প্রধান মন্ত্রী শ্রী নরেন্দ্র মোদীনা সেপ্তেম্বর ১৩দা ভিদিও কনফরেন্সিংগী খুত্থাংদা বিহারদা লৈবা পেত্রোলিয়ম সেক্তরগা মরী লৈনবা মরু ওইবা প্রোজেক্ত অহুম লৈবাক মীয়ামদা খুৎশিন্নরগনি। হায়রিবা প্রোজেক্তশিং অসিদি পারাদিপ-হালদিয়া-দুর্গাপুর পাইপলাইন ওগমেন্তেসন প্রোজেক্তকী দুর্গাপুর-বঙ্কা শরুক অমসুং এল.পি.জি. বোত্তলিং প্লান্ত অনিনি। মখোয়শিং অসি পেত্রোলিয়ম অমসুং নেচরেল গ্যাস মন্ত্রালয়না য়েংশিনবগী মখাদা লৈবা পি.এস.য়ু.শিং ওইরিবা ইন্দিয়ন ওইল অমসুং ঐচ.পি.সি.এল.না চলায়বনি।

থৌরম অসিদা বিহারগী মুখ্য মন্ত্রীসু শরুক য়াগনি।

পাইপলাইন প্রোজেক্তকী দুরগাপুর-বঙ্কা শরুক

ইন্দিয়ন ওইলনা শাবা কিলোমীতর ১৯৩ শাংবা দুরগাপুর-বঙ্কা শরুক অসি প্রধান মন্ত্রীনা ফেব্রুৱারী ১৭, ২০১৯দা উরেপ-উয়ুং তমখিবা পারাদিপ-হালদিয়া-দুর্গাপুর পাইপলাইন ওগমেন্তেসন প্রোজেক্তকী শরুক অমনি। দুরগাপুর-বঙ্কা শরুক অসি হৌজিক লৈরিবা কিলোমীতর ৬৭৯ শাংবা বিহারগী বঙ্কাদা লৈবা অনৌবা এল.পি.জি. বোত্তলিং প্লান্ততা য়ৌবা পারাদিপ-হালদিয়া-দুর্গাপুর এল.পি.জি. পাইপলাইনগী  অহেনবা শরুক অমনি। দাইমীতর ১৪” শাংবা পাইপলাইন অসিনা নোংচুপ বেঙ্গল (কিলোমীতর ৬০), ঝারখন্দ (কিলোমীতর ৯৮) অমসুং বিহার (কিলোমীতর ৩৫)গী রাজ্য অহুম অসি ফাওদুনা চৎলি। হৌজিক হৌজিক পাইপলাইন অসিগী পথাপ্তা পারাদিপ রিফাইনরী, হালিদিয়া রিফাইনরী অমসুং আই.পি.পি.এল. হালদিয়াদগী এল.পি.জি. কাপশিনবা য়াই। অপুনবা প্রোজেক্ত অসিনা লোইশিল্লকপা মতমদা এল.পি.জি. কাপশিনবা য়াবগী খুদোংচাবা অসি পারাদিপ ইম্পোর্ত তর্মিনেল অমসুং বরাউনি রিফাইনরীদগীসু য়ারগনি।

দুর্গাপুর-বঙ্কা শরুক্কী পাইপলাইন শেম্বগী থবক পাঙথোকপা মতমদা মহৌশাগী অমসুং মীওইবনা শেম্বা অপনবা কয়া থেংনখি। তুরেল ১৩ (মসিগী মনুংদা অমদি মীতর ১০৭৭ শাংবা অজয় তুরেলনি), নেস্নেল হাইৱে ৫ অমসুং রেলৱেগী ক্রোসিং য়াওনা অপুনবা ক্রোসিং ১৫৪ শম্নহনখি। পাইপলাইন অসি তুরেল মরিলদা খ্বাইদগী নৌবা হোরাইজোন্তেল দ্রিলিং তেক্নিক শিজিন্নদুনা তুরেলগী ঈচেলদা অপনবা পীদনা শেম্বা ঙমখি।

বিহারগী বঙ্কাদা লৈবা এল.পি.জি. বোত্তলিং প্লান্ত

ইন্দিয়ন ওইলগী বঙ্কাদা লৈরিবা এল.পি.জি. বোত্তলিং প্লান্ত অসিনা বিহারগী “আত্মনির্ভরতা”বু হেনগৎহনবা ওইনা রাজ্য অসিদা লৈরিবা এল.পি.জি. পাম্বা হেনগৎনরিবা অসিবু থেংনবা ঙমহনগনি। মসিগী বোত্তলিং প্লান্ত অসি লুপা করোর ১৩১.৭৫গী শেনফম থাদদুনা বিহারগী ভগলপুর, বঙ্কা, জামুই, অরার‍্যা, কিশনগঞ্জ অমসুং কতিহার জিলাশিংগা লোয়ননা ঝারখন্দগী গোদ্দা, দিওঘর, দুমকা, শাহিবগঞ্জ অমসুং পাকু জিলাশিংগী তেংবাংনবা হায়দুনা শাখিবনি। এল.পি.জি. এল.এম.তি. ১৮০০ থম্বা ঙম্বগী মতিক লৈবা অমসুং নোঙমদা অহাংবা সিলিন্দর ৪০,০০০ হানবা ঙম্বা প্লান্ত অসিনা বিহার রাজ্যদা হকথেংনবা অমসুং নাকোইনবা থবক্কী খুদোংচাবা কয়া পীবা ঙম্লগনি।

বিহারগী চম্পরন (হরসিধি)দা লৈবা এল.পি.জি. প্লান্ত

ঐচ.পি.সি.এল.গী ১২০ তি.এম.তি.পি.এ. এল.পি.জি. বোত্তলিং প্লান্ত অসি নোংপোক চম্পরন জিলাগী হরসিধিদা লুপা করোর ১৩৬.৪ চঙদুনা শাখিবনি। মসিগী প্লান্ত অসি একর ২৯ পাক-চাউবা মফম অমদা শাবনি অমসুং প্রধান মন্ত্রীনা এপ্রিল ১০, ২০১৮দা উরেপ-উয়ুং তমখিবনি। মসিগী বোত্তলিং প্লান্ত অসিনা বিহারগী নোংপোক চম্পরন, নোংচুপ চম্পরন, মুজাফরপুর, সিৱান, গোপালগঞ্জ অমসুং সিতামারহি জিলাশিংগী এল.পি.জি.গী তঙাই ফদবশিং থেংনগনি।

মসিগী থৌরম অসি দি.দি. ন্যুজতা লাইব তেলিকেস্ত তৌগনি।

***