প্রধান মন্ত্রী শ্রী নরেন্দ্রা মোদীনা ঙসি অন্ধ্র প্রদেশ, কর্নাতকা, তামিল নাদু, ৱেস্ত বেঙ্গল, মহারাস্ত্র, পঞ্জাব, বিহার, গুজরাত, তেলঙ্গনা অমসুং উত্তর প্রদেশ য়াওনা রাজ্য ১০গী মুখ্য মন্ত্রীশিং অমসুং মীহুৎশিংগা লোয়ননা ভিদিও কনফরেন্সকী থোংদা হৌজিক ওইরিবা লায়চৎ অসিগী ফীভম অমদি লাকশিন্নবা লৌখৎগদবা থৌরাংগী মতাংদা খন্ননবা ঙসি ৱারী শাখ্রে। কর্নাতকাগী ওইনদি উপ মুখ্য মন্ত্রীনা মীহুৎ ওইখি।

তিম ইন্দিয়াগী অপুনবগী পাঙ্গল

প্রধান মন্ত্রীনা হায় মীপুম খুদিংমক্না মতেং চাউনা পাংখিবা অমসুং তিম ইন্দিয়ানা উৎখিবা অপুনবগী পাঙ্গল অদু শীংথানিংঙাই ওইখি।  মহাক্না হোস্পিতালশিং অমসুং হেল্থ ক্যের ৱার্করশিংনা থেংনরিবা খুদোংচাদবশিংগী মতাংদসু ৱা ঙাংখি। মহাক্না হায় এক্তিব কেসকী ৮০%দি শরুক য়ারিবা রাজ্য ১০ অসিদগী ওইরি অমসুং করিগুম্বা ভাইরস অসি রাজ্য ১০সিদা মায়থিবা পীবা ঙম্লবদি লৈবাক পুম্বনা কোবিদ-১৯গী লান অসিদা মায় পাকপা ঙমগনি

তেস্ত তৌবা হেনগৎপনা ফেতেলিতী রেৎ হন্থহনবা

প্রধান মন্ত্রীনা হায় নোংমদা তৌবা তেস্তকী মশিং অসি লাখ ৭ য়ৌরে অমসুং লেপ্তনা হেনগৎলক্লি মসিনা ঙন্না খঙদোকপদা অমদি লাকশিনবদা মতেং পাংখ্রে। লৈবাক অসিগী ফেতেলিতী রেৎকী চাংচৎ অসি মালেমগী লৈবাকশিংগী মরক্তা খ্বাইদগী নেম্বা ওইরি অমসুং লেপ্তনা হন্থহল্লি। এক্তিব কেসশিংগী পর্সেন্তেজ অসি হন্থরক্লি অমরোমদা ফগৎলকপগী চাংনা হেনগৎলক্লি হায়না মহাক্না ফোঙদোকখি। মহাক্না হায় খোঙথাংশিং অসিনা মীয়াম্না থাজবা থম্বা ঙমহল্লিবনি অমসুং ফেতেলিতী রেৎ ১%গী মখাদা থম্না পান্দম অথুবদা মাব পাকপা ঙম্লগনি।

খন্ন-ন্নৈনবা অসিদা বিহার, গুজরাত, য়ু.পি., ৱেস্ত বেঙ্গল অমসুং তেলঙ্গনাদা তেস্ত তৌবা কনশিনবা অথুবদা মথৌ তারে হায়না ৱারেপনখিবা অদু প্রধান মন্ত্রীনা থমখি। মহাক্না হায় লান্থেংনবা অসিদা লাকশিনবা, কন্তেক্ত ত্রেসিং অমসুং সর্ভিলেন্স অসিনা খ্বাইদগী কান্নবা খুলাইশিং ওইরি। মীয়াম্না ৱাখল তাদুনা অমসুং হোৎনবা অসিদা মতেং পাংশিনবনা মরম ওইরগা ঐখোয়না হোম ক্বরেন্তিন মপুং ফানা তৌবদা মায় পাকপা ঙম্লিবনি। আরোগ্যা সেতু এপকী কান্নবা অমদি খঙহৈরবশিংনা থমখিবগী মতুং ইন্না মহাক্না হায়, করিগুম্বা ঐখোয়না কেসশিং অসি হৌরকপগী পুং ৭২দা খঙদোকপা ঙম্লবদি ভাইরস অসিনা শন্দোরকপা তপথহনবা ঙমগনি। লায়না অসিনা নারবা মীওই অমগা শোক্না শম্নরুরবা পুম্নমক পুং ৭২গী মনুংদা খঙদোক্তুনা তেস্ত তৌথোকপা মথৌ তাই হায়না মহাক্না ফোঙদোকখি। খুৎশা হামদোকপা, গজ অনিগী অরাপ্পা থম্না, মাস্কশিং উপ্পগা লোয়ননা মসি লাইৱা অমগুম্না লৌগদবনি হায়না মহাক্না মখা তাখি।

দিল্লী অমদি অনকপদা লৈবা রাজ্যশিংদা লৌখৎপা লালোং

প্রধান মন্ত্রীনা হোম পুবা মন্ত্রীনা দিল্লী অমদি অনকপদা লৈবা রাজ্যশিংগা লোয়ননা লায়চৎ অসি পুন্না থেংনবদা মায় পাক্নবা রোদমেপ অমা শেমখিবা অদু নীংশিংখি। মহাক্না হায় লালোং অসিগী মপুং ওইবা য়ুম্বীদি কন্তেনমেন্ত জোনশিং কায়দোকপা অমসুং স্ক্রিনীং তৌবদা মীৎয়েং চংবা মরু ওইনা খুদোং য়াম্না থিবা কাংলুপশিং। খোঙথাংশিং অসিগী ফলশিং ঐখোয়না উবা ফংলি, মহাক্না হায় হোস্পিতালশিংদা ফজনা লায়েং চত্থবা অমসুং আই.সি.য়ু. বেদশিং হনগৎহনবগী  খোঙথাং লৌখৎপনা য়াম্না কান্নবা ওইখি।

মুখ্য মন্ত্রীশিংনা ফোঙদোকখিবা

মুখ্য মন্ত্রীশিংনা মখোয়গী রাজ্যশিংদা হৌজিক ওইরিবা ফীভমদা ফীদবেক পীখি। মখোয়না লাইচৎ অসিবু মায় পাক্না লাকশিনবগী অমসুং লেপ্পা লৈতনা লমজিংবীবা অমসুং মতেং পাংবীবগীদমক প্রধান মন্ত্রীবু থাগৎপা ফোঙদোকখ্রে। মখোয়না তেস্ত তৌখ্রবশিং, তেস্ত তৌবা হেনগৎনবা লৌখৎকদবা খোংথাংশিং, তেলি-মেদিসিন শিজিন্নবা অমসুং হকশেলগী ইনফ্রাস্ত্কচরশিং ফগৎনবা হোৎনরিবশিংগী মতাংদা ফোঙদোকখি। মখোয়না সেরো-সর্ভিলেন্স পাংথোকপদা মখাতানা কেন্দ্রগী হকশেল মন্ত্রালয়না মতেং পাংনবা হায়জখি অদুগা লৈবাক অসিদা ইন্তিগ্রেতেদ মেদিকেল ইনফ্রাস্ত্রকচর অমা শেমগৎনবা অপাম্বসু ফোঙদোকখি।

দবল্যু.ঐচ.ও.না থাগৎপা ফোঙদোকপা

ঙাকশেল মন্ত্রীনা ভাইরস অসিগা লান্থেংবদা সরকারনা লৌখৎপা য়াবা খোংথাং খুদিংমক লৌখৎলি অদুগা মসিগীদমকৱার্ল্দ হেল্থ ওর্গাইজেসন্না থাগৎপা ফোঙদোকখ্রে হায়না থমখি।

হকশেল অমসুং য়াইফ-য়ুম্বাল মন্ত্রালয়গী সেক্রেতরীনা রাজ্য খরদা কেস মশিং হেনগৎপা অসি চাংচৎতগী হেল্লে   অমসুং রাজ্যশিংদা তেস্ত তৌবগী চাং য়াম্না হেনগৎহন্নবা ফোঙদোক্লদুনা লৈবাক অসিদা লৈরিবা কোবিদ কেসকী অপুনবা শক্তম অমা উৎখি। মহাক্না চপ চাবা শীবা মীশিং রিপোর্ত তৌবগী তঙাইফদবা অদু ফোঙদোকখি অমসুং লোকে কম্ম্যুনিতীশিংগী মতেংগা লোয়ননা কন্তেনমেন্ত জোনশিদং য়েংশিনবগী পাম্বৈগী মতাংদসু ফোঙদোকখি।

কেন্দ্রগী শেল-থুমগী মন্ত্রী, হকশেল মন্ত্রী অমসুং এম.ও.এস. হোম এফিয়র্সসু ৱারী শাবা অদুদা শরুক য়াখি।

******