ঙসি নই দিল্লীগী রাজঘাত্তা লৈবা গান্ধী স্মৃতি অমসুং দর্সন স্মৃতিদা প্রধান মন্ত্রী নরেন্দ্র মোদীনা স্বচ্ছ ভারত মিসনগী থবকশিং উৎপা মফম অমা ওইরিবা রাস্ত্রিয়া স্বচ্ছতা কেন্দ্র হাংদোকখ্রে।২০১৭গী এপ্রিল ১০দা পাংথোকখিবা গান্ধীগী চম্পারন সত্যগ্রহগী চহি ১০০শুবা থৌরমদা মহাত্ম গান্ধীদা কৎথোকপা ওইনা প্রধান মন্ত্রীনা অহানবা ওইনা রাস্ত্রিয়া স্বচ্ছতা কেন্দ্র(আর এস কে) লাউথোকখিবনি। থৌরম অসিদা জাল শক্তিগী মিনিস্তর গাজেন্দ্র সিংহ সেখাৱাত অমসুং জাল শক্তিগী রাজ্য মন্ত্রী রাত্তন লাল কাতারিয়া শরুক য়াখি।

রাস্ত্রিয়া স্বচ্ছতা কেন্দ্র য়েংবা

২০১৪দা মীওই করোর ৫০ হেন্না লমহাংদা খোঙহাম্লম্বদগী ২০১৯দা লমহাংদা খোঙহাম্বা তোকখিবা ভারতকী অওনবশিং খোঙ্গুল লিবা দিজিতেল অমসুং আউতদোর ইন্সতোলেসনশিং রাস্ত্রিয়া স্বচ্ছতা কেন্দ্রদা থম্লি। রাস্ত্রিয়া স্বচ্ছতা কেন্দ্রগী সেক্সন অহুম প্রধান মন্ত্রীনা য়েংখি। অহানবদা মহাক্না হোল ১দা উৎলিবা স্বচ্ছ ভারতগী খোঙচৎকী ৩৬০ দিগ্রি ওদিও ভিজুএল সো য়েংখি। মথংদা মহাক্না হোল ২দা এল.ই.দি পেনেলশিং, হোলোগ্রাম বোক্সশিং, ইন্তরএক্তিব গেমশিং অমসুং স্বচ্ছ ভারত মিসনগী মতাংদা উৎপা অতৈ কয়া য়েংখি। রাস্ত্রিয়া স্বচ্ছতা কেন্দ্রগী মমাংদা লৈবা লম্পাক্তা উৎলিবা  একজিবিসন অহুম হায়বদি- মহাত্ম গান্ধীনা লুচিংদুনা মীয়াম্না স্বচ্ছতাগী ৱাশক লৌবা, ঝারখান্দগী খুঙ্গংগী রানি মিসত্রিস অমসুং মখোয় মশামক্না বানার সেনা হায়না কৌজবা স্বচ্ছতাগ্রহি অঙাংশিংগী ইন্সতোলেসনশিং প্রধান মন্ত্রীনা য়েংখি।

স্কুলগী মহৈরোয়শিংগা ৱারি শানবা

রাস্ত্রিয়া স্বচ্ছতা কেন্দ্র শীনথুংনা য়েংলবা মতুংদা প্রধান মন্ত্রীনা রাস্ত্রিয়া স্বচ্ছতা কেন্দ্র সোভেনিয়র সেন্তর য়েংখি। মহাক্না কেন্দ্র অসিগী এম্পিথিয়েতরদা ভারতকী রাজ্যশিং অমসুং য়ুনিয়ন তেরিতোরিশিংগী মহুৎশীনবা দিল্লীগী মহৈরোয় ৩৬গা লোয়ননা ৱারি শানখি। মখোয়গী য়ুম অমসুং স্কুলদা পাংথোকখিবা স্বচ্ছতাগী থবকশিংগী মতাংদা অমসুং রাস্ত্রিয়া স্বচ্ছতা কেন্দ্র উবদা মখোয়না ফাওখিবশিংগী মতাংদা মখোয়গী ওইবা ৱাফমশিং অঙাংশিংনা প্রধান মন্ত্রীদা ফোঙদোকখি। রাস্ত্রিয়া স্বচ্ছতা কেন্দ্র অসিগী মনুংদা করম্বা শরুক্না মহাক্না খ্বাইদগী হেন্না পাম্বগে হায়না অঙাংশিংদগী মরক্তগী অমনা প্রধান মন্ত্রীদা হংলকপদা, প্রধান মন্ত্রীনা পাউখুম পীরদুনা হায়খি, স্বচ্ছ ভারত মিসন, মহাত্ম গান্ধীদা কৎথোকপা শরুক অসি মহাক্না খ্বাইদগী পাম্মী।

মীয়ামদা ৱা ঙাংবা

অঙাংশিংগা ৱারি শানরবা মতুংদা, প্রধান মন্ত্রীনা লৈবাক মীয়ামদা ৱা ঙাংখি। স্বচ্ছ ভারত মিসনগী খোঙচৎ অমসুং রাস্ত্রিয়া স্বচ্ছতা কেন্দ্র অসি মতম পুম্নমক্কী ওইনা মহাত্ম গান্ধীদা কৎথোকখিবা অসিগী মতাংদা মহাক্না ফোঙদোকখি। স্বচ্ছতা অসি মীয়ামগী খোঙজং অমা ওইহনবগীদমক প্রধান মন্ত্রীনা ভারতকী মীয়াম থাগৎখি অমসুং তুংদসু খোঙজং অসি মখা চৎথনবা মীয়ামদা তকশিনখি। ঐখোয়না কোরোনাভাইরস থেংনরিঙৈ মনুংদা অমসুং ঐখোয়গী নোংমগী পুন্সিদা স্বচ্ছতাগী মরুওইবা মহাক্না অমুক হন্না পনখি।

থৌরম অসিদা, স্বচ্ছতাগীদমক নিংতম্বা নুমিৎ ফাওবা পাংথোক্কদবা চয়োল অমগী অখন্নবা কেম্পেন ‘গান্দাগী মুক্ত ভারত’ প্রধান মন্ত্রীনা হৌদোকখ্রে, খোঙজং মনুংদা অগস্ত ১৫ ফাওবা নুমিৎ খুদিংগী ভারতকী সহর অমসুং খুঙ্গংশিংদা স্বচ্ছতাগী মীয়ামগী খোঙজং অমুক হন্না মপাঙ্গল কনখৎহন্নবা অখন্নবা লম-তু শেংবগী থবকশিং পাংথোক্কনি।

রাস্ত্রিয়া স্বচ্ছতা কেন্দ্র য়েংনবগী মতম

মীয়াম থাপ্না লৈনবা অমসুং লু-নান্নবা চৎন-কাংলোনশিং মতুংইন্না, মীয়াম্না য়েংনবা অগস্ত ৯দগী অয়ুক পুং ৮দগী নুংথিলগী পুং ৫ ফাওবা রাস্ত্রিয়া স্বচ্ছতা কেন্দ্র হাংদোক্কনি। মতম অমগী মনুংদা অকক্নবা মী মশিং খক রাস্ত্রিয়া স্বচ্ছতা কেন্দ্র অসি য়েংবা য়াগনি, মতম খরগী ওইনা মহৈরোয়শিং য়েংনবা থৌরম পাংথোক্লোই। অদুবু মতম খরগী ওইনা রাস্ত্রিয়া স্বচ্ছতা কেন্দ্রগী ভর্চুএল তুরশিং পাংথোক্কনি। অসিগুম্বা অহানবা ভর্চুএল তুর অ্গস্ত ১৩দা জাল শক্তি মিনিস্তর গাজেন্দ্র সিংহ সেখাৱাতকা লোয়ননা পাংথোক্কনি। রাস্ত্রিয়া স্বচ্ছতা কেন্দ্র য়েংনবা তিক্কেত কক্নবা অমসুং অহেনবা ই-পাউ খঙনিংবশিংনা rsk.ddws.gov.in দা চঙবা য়াগনি।

*****