প্রধান মন্ত্রী শ্রী নরেন্দ্র মোদীনা স্মার্ত ইন্দিয়া হেকাথোন ২০২০গী গ্রান্দ ফিনালেদা ভিদিও কনফরেন্সকী থোংদা ঙসি ৱা ঙাংখ্রে।

স্মার্ত ইন্দিয়া হেকাথোন

স্মার্ত ইন্দিবা হেকাথোনগী গ্রান্দ ফিনালেদা ৱা ঙাংবদা পি.এম.না হায় লৈবাক অসিনা মায়োক্নরিবা খুদোংচাদবশিং কোকহন্নবা মহৈরোয়শিংনা হোৎনরি। সমস্যাশিং অসি কোকহনবগা লোয়ননা মসিনা ভারতনা নীংজরিবা দেতা, দিজিতাইজেসন অমসুং হাই-তেক ফ্যুচর অসিসু মপাঙ্গল কনখৎহল্লি। ২১শুবা চহিচা অসিদা খোঙজেল য়াংনা চংশিল্লিবা অসি খঙবগা লোয়ননা ভারতনা মশাবু তপ্না অওনবা পীজরক্তুনা থৌদাং মপুং ফানা লৌবা ঙম্নবা লেপ্তনা চংশিনবা মথৌ তাই হায়না প্রধান মন্ত্রীনা ফোঙদোকপগা লোয়ননা হায় মদুদি ইন্নোবেসন, রিসর্চ, দিজাইন, দিবেলপমেন্ত অমসুং ওন্ত্রপ্রিনরশিপকীদমক লৈবাক অসিদা মথৌ তাবা ইকোসিস্তেম অমা শেমগৎপা তাই। মহাক্না হায় মসিগী পান্দমদি ভারতকী এজুকেসন অসি হেন্না মোদর্ন ওইহনবা অমসুং তেলেন্তকী খুদোংচাবশিং ফংহনবা অসিনি।

অনৌবা এজুকেসন পোলিসী

অনৌবা এজুকেসন পোলিসী অসিগী মতাংদা ৱা ঙাংলদুনা প্রধান মন্ত্রীনা হায় মসি দ্রাফ তৌখিবা মতমদা ২১শুবা চহিচাগী নহাশিংগী ৱাখল্লোন, মথৌ তারিবশিং,আশা, অমসুং নীংজরিবশিং অদু খন্থরগা শেমখিবনি। মসি শুপ্নতগী পোলিসী দোক্যুমেন্ত অমা নত্তে মসিদা ভারত মচা কোতি ১৩০ হেনবনা নীংজরিবা অদুগী মমি অমনি হায়না মহাক্না মখা তাখি। মহাক্না হায় “ঙসি ঙসি মকসু অঙাং কয়ানা মখোয়বু মখোয়না পামদবা সবজেক্ত অমদা য়ুম্ফম ওইরগা মখোয়গী মরমদা লেপথোকপী হায়না খল্লি। মমা-মপাশিং, মরী-মতাশিং, মরূপশিং অসিনচিংবগী প্রেসরনা মরম ওইরগা অঙাংশিংদা অতোপ্পনা খনবা সবজেক্ত অদুদা মখোয়না মখা চত্থরি। মসিনা মরম ওইরগা মহৈ-মশিং হৈরবা অদুবু মখোয়না তমজরুরিবা অদু মখোয়দা কন্নফম খঙদ্রবা মীগী মীশিং হেন্না য়ামখৎহল্লি। ” মহাক্না হায়খি মদুদি অনৌবা এজুকেসনগী পোলোসী অসিনা অহোংবা পুরক্তুনা ভারতকী এজুকেসন সিস্তেম অসিদা সিস্তেমেতিক ওইবা অওনবা অমা পুরক্নবা অমসুং এজুকেসনগী ইন্তেন্ত অমসুং কন্তেন্ত অনিমক হোংদোক্নবা হোৎনরি। মহাক্না হায় মদুদি এন.ই.পি.না লর্নিং, রিসর্চ অমসুং ইন্নোবেসনদা মিৎয়েং থমদুনা স্কুল, কোলেজ অমসুং য়ুনিভর্সিতী ফগৎনবা হোৎনরি; অমসুং কনাগুম্বগী অপাম্বা লম্বীদা লমজিংবীবা ঙম্বা ওইহন্নবা হোৎনরি।

মহৈরোয়শিংদা ৱা ঙাংলদুনা প্রধান মন্ত্রীনা হায়, “হেকাথোন অসি নখোয়না কোকহন্নবা হোৎনগদবা অহানবা সমস্যা নত্তে, অমদি মসিনা অরোইবসু নত্তে। ” নহা ওইরিবশিংদা মহাক্না লেপ্তনা থবক অহুম তৌহন্নীংলি: তমশিনবা, ৱাহং হংবা অমসুং ৱারোইশিন পীবা। মহাক্না হায় কনাগুম্বা হৈরবা মতমদা ৱাহং হংনবা লৌশিং লৈরকই অমসুং ভারতকী নেস্নেল এজুকেসন পোলিসীনা মসিগী ৱাখল্লোন অসি ফাওহল্লি। স্কুলদগী হেন্দোকখিবদা কান্নফম লৈত্রবা স্কুল বেগকী পোৎলুমদগী পুন্সিদা মতেং ওইরগদবা মহৈগী থৌজালদা, চুম্না চিনফা পুরম্বদগী অচৌবা ৱাখল খলহনবা অসিদা মিৎয়েং হোংদোকপা তাই হায়না মহাক্না ফোঙদোকখি।

ইন্তর্দিসিপ্লিনরী স্তদীদা মিৎয়েং চংবা

প্রধান মন্ত্রীনা হায় ইন্তর্দিসিপ্লিনরী স্তদীদা মিৎয়েং চংবা হায়বা অসি অনৌবা এজুকেসন পোলিসীগী খ্বাইদগী পুক্নীং চিংশিন্নবা মচাক অমা ওইরি। মসিগী ৱাখল্লোন অসি মায়াম্না পাম্নরক্লি মরমদি মফম অমদা মীপুম খুদিংমক চল্লু য়াদে। মহাক্না ইন্তর্দিসিপ্লিনরী স্তদীদা মিৎয়েং চংবগা লোয়ননা হায় মসিনা খুন্নাই অমনা মহৈরোয় অমবু করি তৌবা পাম্বগে হায়বগী মহুত্তা মহৈরোয় অমনা হৈনীংলিবা তম্নীংলিবা অদু তম্বা য়াহনগনি।

এজুকেসন ফংহনবা

বাবা সহেব অম্বেদকরনা হায়রম্বা এজুকেসন অসি মীপুম খুদিংদা ফংহনগদবনি হায়বা অদু পল্লদুনা পি.এম.না হায় মসিগী এজুকেসন পোলিসী অসি মহাক্কী এজুকেসন ফংহন্নবা অদুগুম্বা ৱাখল্লোন অদুগীদমক পুথোকপনি। নেস্নেল এজুকেসন পোলিসী অসিনা প্রাইমরীদগী হৌরগা এজুকেসন ফংহনগনি। মহাক্না হায় পোলিসী অসিনা ২০৩৫ ফাওবদা হায়র এজুকেসনগী গ্রোস এনরোলমেন্ত রেসিও অসি চাদা ৫০দা হেনগৎহন্নবা পান্দমশিং থম্লি। মহাক্না মখা তারদুনা হায় মসিগী এজুকেসন পোলিসী অসিনা থবক থিরিবা মীওই ওইরম্বদগী থবক পীরিবা মীওই ওইহন্নবা মিৎয়েং থম্লি। মসি অমরোমদা ঐখোয়গী ৱাখল্লোন অমসুং ঐখোয়গী থবক পায়খৎপগী মওং অসিদা অওনবা অমা পুরক্নবা হোৎনবা অমনি।

ইমালোলদা মিৎয়েং চংবা

প্রধান মন্ত্রীনা হায় অনৌবা এজুকেসন পোলিসী অসিনা ভারতকী লোলশিং চাউখৎহনবদা মখা তানা মতেং পাংলগনি। মহাক্না হায় মহৈরোয়শিংদা মখোয়গী ঙল্লিঙৈ মতমদা মশাগী লোলদা মহৈ তম্বনা মখোয়দা হেন্না কান্নবা ওইগনি। মহাক্না মখা তারদুনা হায় অনৌবা এজুকেসন পোলিসী অসিনা ভারতকী লোল কয়া অসি মালেমদা উৎপা ঙমহল্লগনি।

গ্লোবেল ইন্তিগ্রেসন্দা মিৎয়েং চংবা

পি.এম.না হায় পোলিসী অসিনা লোকেলদা মিৎয়েং চংলবসু গ্লোবেল ইন্তিগ্রেসন্দা চপ মান্নবা মিৎয়েং থম্লি। মালেমগী মকোকথোংবা ইন্সতিত্যুসনশিং ভারত্তা কেম্পসশিং হাংনবা পুক্নীং থৌগৎখ্রে। মসিনা ভারতকী নহাশিংদা মালেমগী থাক্তা এক্সপোজর অমসুং খুদোংচাবশিং ফংহল্লগনি অমসুং মখোয়বু মালেমগী থাক্তা চাংদম্ননবা শেম-শাবদসু মতেং পাংলগনি। মসিনা ভারত অসি মালেমগী এজুকেসনগী হব অমা ওইহল্লদুনা মালেমগী থাক্কী ইন্সতিত্যুসনশিং শাগৎপদা মতেং পাংলগনি।

***