ঙসি ভিদিও কনফরেন্সকী খুৎথাংদা মোরিসসতা প্রধান মন্ত্রী নরেন্দ্র মোদী অমসুং মোরিসসকী প্রধান মন্ত্রী প্রবিন্দ জগনাথনা পুন্না অনৌবা সুপ্রিম কোর্ত বিল্দিং শঙ্গাখ্রে। অহানবা ওইনা ভারতকী মতেংগা লোয়ন্না কোনুং ওইরিবা সহর পোর্ত লুইজদা শাবা বিল্দিং অসি কোবিদ লাইচৎ মতুংদা হাংদোক্কদবনি। শিংথানিংঙাই ওইরবা প্রোজেক অসি ভারত সরকারগী য়ু.এস.দোল্লর মিল্লিয়ন ২৮.১২গী মতেংগা লোয়ন্না শাবা লোইশিনখিবনি।

থৌরম অদুদা প্রধান মন্ত্রী নরেন্দ্র মোদীনা হায়খি মীওইবা খুন্নাইগী মরুওইবা অদু খনবনা চাউখৎ-থৌরাংগী থবকশিংদা ভারতনা মতেং পাংবগী নুঙগী ওইবা ফিলোসোফিনি অমসুং মীয়ামগী য়াইফনবা পায়খৎলিবা শেমগৎ-শাগৎপগী প্রোজেকশিং অসিনা ভারত অমসুং মোরিসসকী মরক্তা লৈনরিবা মরীশিং হেন্না চেৎশীনহল্লগনি। অনৌবা নমুনা অমসুং খ্বাইদগী ফবা খুদোংচাবশিং লৈরবা অনৌবা সুপ্রিম কোর্ত বিল্দিং অসি মোরিসস জুদিসিয়ারিগী চপ চাবা মফম অমা ওইরগনি অমসুং ভারত অমসুং মোরিসস মতেং পাংনবগী খুদম অমনি। প্রোজেক অসি অপীবা মতমগী মনুংদা লোইশিনখি অমসুং হান্না চঙগনি হায়না পানরম্বা শেনফমদগী হন্থখি।  

প্রধান মন্ত্রী মোদীনা হায়খি মোরিসসকী চাউখৎ-থৌরাংদা মতেং পাংনবা অসি ভারতকী চাউখৎ-থৌরাংগী মতেং পীনবগী মরুওইবা শরুক্নি। চাউখৎ-থৌরাংগী লমদা ভারতনা মতেং পাংলিবা অসি করিগুম্বা ফিবমশিং অমতা মরী লৈনদে, রাজনিতি নৎত্রগা ললোন-ইতিক্কী খুদোংচাবা য়েংলগা পায়খৎপা নত্তে। চাউখৎ-থৌরাংগী মতেং পীনবগী ভারতকী মরুওইবা ৱাখল্লোনদি ঐখোয়গী মরুপশিং ইকায়খুম্নবনি অমসুং মরুওইবা পান্দমদি ঐখোয়গী চাউখৎপগী পারাশিং খঙমিন্নবনি। চাউখৎ-থৌরাংগী মতেং পীনবগী ভারতকী মরুওইবা গুনশিংদি ‘ইকায়খুম্বা’, ‘খেন্নবশিং অমতা ওইবা’ অমসুং ‘তুংকোইনা চৎনগদবা চাউখৎ-থৌরাং’নি।

মোরিসসকী মীয়াম্না মাইপাকপদা ভারতনা চাউথোকচবা পোক্লি হায়না ফোঙদোকলদুনা প্রধান মন্ত্রীনা হায়খি লাক্লিবা চহিশিংদা ভারত-মোরিসসকী মরুপ-মপাং ওইবগী মরী হেন্না ফগৎলক্কনি হায়না মহাক্না থাজবা থম্লি।

লৈবাক অনিগী মরক্তা মতেং পাংনরিবা অমসুং মরুপ-মপাং ওইবগী অচেৎপা মরীশিংগী মমি অমা ওইনা প্রোজেক অসি ভারতনা মতেং পাংবদা প্রধান মন্ত্রী জুগনৌথনা থম্মোয় শেংনা থাগৎখি। মহাক্না হায়খি ভারতকী মতেংগা লোয়ননা সুপ্রিম কোর্তকী বিল্দিং শাবা অসি মোরিসসতা মতমগী অনৌবা মচাক-মথুমশিং শেমগৎপগী অনৌবা মাইপাকপা অমনি অমসুং মসিনা মোরিসসকী ৱায়েনবগী থবকশিং হেন্না মতিক চাহনগনি, খুদোংচাবা ফংহনগনি অমসুং খুদিংমক কোনশিনবা ঙমগনি।

ভারতকী ‘সাগার’(সেকুরিতি এন্দ গ্রোথ ফোর ওল ইন দি রিজন)পান্দমগা ইরোইন্না শেমগৎখিবা অনৌবা সুপ্রিম কোর্ত বিল্দিং অসিনা ভারত মহাসাগর লমদমদা মোরিসস অসি অচেৎপা মরুপ অমা ওইনা ভারতনা লৌরিবা থৌদাং উৎলে অমসুং লৈবাক অনিগী মরক্তা লৈনরিবা মরী মপাঙ্গল কনখৎহন্নবা ভারতনা পীখিবা থাজবশিং থবক ওইনা উৎলে।

***