খুরুমজরি!

ঐগী নহা ওইরিবা মরূপশিংবু ইকাইখুম্নবা উৎচরি

নহা ওইরিবা অদোম খুদিংমকপু ৱর্ল্স য়ুথ স্কিল্স দেগী য়াম্লবা য়াইফ-পাউজেল পীজরি‍।

ঙসিগী নুমিৎ অসি অদোমগী স্কিলদা, অদোমগী হৈশিংবদা কত্থোক্লবনি‍। ২১শুবা চহীচাসিগী নহাশিংগী, ঙসিগী মিলেনিএলশিংগী খ্বাইদগী চাউবা মপাঙ্গল হায়রগদি মখোয়গী হৈশিংবা, মখোয়গী হৈশিংবা তানবগী অনীংবা অপামবা অসিনি‍।

মরূপশিং,

কোরোনাগী লাংফম অসিনা ৱর্ক-কলচরগা লোয়ন-লোয়ননা নেচর ওফ জোবপুসু হোংদোক্লে‍। অদুগা লেপ্তনা হোংলক্লিবা অনৌবা তেক্নোলোজীনসু মসিদা ইথিল পীরি‍। অনৌবা ৱর্ক-কলচর অমসুং অনৌবা নেচর ওফ জোবতা মীৎয়েং থম্লগা ঐখোয়গী নহাশিংসু অনৌ-অনৌবা স্কিলশিং খোঙজেল য়াংনা লৌশিল্লি‍।

অদুগা মরূপশিং, হৌজিক্কী মতমসিদা লল্লোন ইতিক অমসুং কৈথেলগী ফীভমসু য়াম্না থুনা হোংই অদুনা মতৌ করম্না মসিগা চুশিন্ননা লৈগদৌরিবনো হায়বা ৱাফমসি মীওই কয়ানা ঐঙোন্দা হংই‍। কোরোনাগী মতম অসিদদি ৱাহং অসি হেন্না মরূ ওইরক্লি‍।

মরূপশিং,

ঐনা মসিগী পাউখুম অমখক পীগে‍। মতমগা চুশিন্ননা লৈনবগী লাইৱাদি – স্কিল, রি-স্কিল অমসুং অপস্কিলনি‍। স্কিল হায়বদি অদোম্না অনৌবা মহৈ অমা তমশিনববুনি‍। করিগুম্বা অদোম্না উ মতেক অমদগী চৌক্রী অমা শাবা তম্লবদি মসি অদোমগী হৈশিংবনি‍। অদোম্না উতেক অদুগী মমলসু হেনগৎহল্লে‍। ভেল্যু এদিসন তৌরে‍। অদুবু মমল অসি লেংদনা থম্নবগীদমক্তা অনৌবা দিজাইন, অনৌবা স্তাইল, হায়বদি নুংতিগী অনৌবা খরা হাপচিনবা মথৌ তার‍ি‍। মদুগীদমক অনৌবা তমথবা মথৌ তাই‍। অদুগা অনৌবা মহৈ-মশিং তমদুনা লৈববু রি-স্কিল কৌই‍। অদুগা ঐখোয়গী স্কিল অসিবু হেন্না হেনগৎহনবা, খুদম ওইনা ফর্নিচর মচা মচা শারমবদগী অসুম অসুম তম্লক্তুনা ওফিস অমা দিজাইন তৌরক্লবদি মদুবু অপ-স্কিল কৌগনি‍। স্কিল, রি-স্কিল অমসুং অপ-স্কিলগী লাইৱা অসিবু খঙবা, লৌশিনবা অমদি ঙাক্ন চৎপা হায়বসি ঐখোয় পুম্নমক্কী পুন্সিদা য়াম্না মরূওই‍।

অদুগা ঐনা স্কিলগী ৱারী হেক শাবগা ঐগা হান্না খঙনরম্বা মীওই কয়াবু হেক্তা নীংশিংলকই‍। ঐনা নীংথিনা মশক তাক্ত্রবসু ঐগা খঙনবা মীশক অমনা হেন হেক হায়খি‍। মহাক্না মহাক্না খঙবা মীশক অমগী মরমদা হায়খি‍। মহাক লাইরক য়াম্না তমহৌবদি নত্তে, অদুবু মাগী খুৎইদি য়াম্না ফজরম্মী‍। মতমগী মতুং ইন্না মহাক্না মাগী খুৎইদা অনৌবা মওং মতৌ কয়া হাপচিল্লম্মী ‍। হায়বদি মহাক মশাগী রি-স্কিল তৌজরম্মী‍। মহাক্কী হৈশিংবসিবু উরগা মীয়াম্না মনাক্তা লাকপা হৌরম্মী‍। মীয়াম্না ঐখোয়গীদা অখন্নবা থৌরম অমা লৈ অদুনা বার্তন চেদা মীংনচিংবা ইবগী থবকসি অদোম্না তৌবিয়ু হায়না মঙোন্দা হায়খি‍‍। অদুদগী মহাক মশানা রি-স্কিল তৌজরে, অপ-স্কিল তৌজরে‍। মহাক্না অতোপ্পা লোনশিংদসু ইবা হৌরকখি, অমদি অতোপ্পা লোন খরসু তমখি‍। মতৌ অসুম্না নাকল অমরোমদা মহাক্কী করবার চাউথোরক্লম্মী‍। ফম্না ফম্না মীয়াম্না মাগী মনাক্তা থবক পুদুনা লাক্লম্মী‍। মহাক্না হৈনজবী ওইনা তৌজরম্বা হৈশিংবা অদুনা মহাক্কী পুকচাক্কী অমদি ইকায়খুম্নবগী লম্বী অমা ওইখি‍।

মরূপশিং,

স্কিল হায়বসি তৌর-তৌরগা হেনগৎলকপা ঐখোয় ইশানা ইশাদা পীজবা খুদোলনি‍। স্কিল হায়বসি মতম নাইদে, মসি মতমগী মতুং ইন্না অসুম অসুম হেনগৎলকই‍। স্কিল হায়বসি তোপ তোপ্পী, মসিনা নহাকপু অতোপ্পদগী খেন্নহল্লি‍। স্কিল হায়বসি কনাগুম্বা অমত্তনা লৌবা ঙমদবা লন অমনি‍। অমদি স্কিল হায়বসি ইরোমদোম লেপচবনি, মসিনা কনাগুম্বা অমবু থবক ফংবা য়ারবা মীশক অমা ওইহনবতা নত্তনা মশানা মশাবু থবক পীজবা ঙমহল্লি‍। মীওইববু ফীভম অমদগী ফীভম অমদা পুদুনা চৎপা ঙমবা অসি স্কিলগী মপাঙ্গলনি‍।

মরূপশিং,

মায় পাক্লবা মীওই অমগী পান্দম লৈ মদুদি মখোয়না কৈদৌঙৈদসু মখোয়গী হৈশিংবা হেনগৎনবা খুদোংচাবা মাংহল্লোই‍। মসিদসু নত্তনা খুদোংচাবা তাঞ্জা থিদুনতা লৈ‍। স্কিলগী মতাংদা অদোমগী পুক্নীং চিংশিনবা ঙমদ্রবা, অনৌবা অমা তম্নিংবগী হৈনিংবা লৈত্রবদি পুন্সি অসি মচি লেংবা ঙম্লোই‍। ফাজিন-পুনসিনবা অমা ফাওগনি‍। মওং অমদা অদুগুম্বা মীওই অদু মশাগী মওং মতৌ, মশাগী পর্সোনেলিতীবু পোৎলুম অমা ওইনা খঞ্জরকই‍। মশাগীতা নত্তনা মহাক্কী নক্নবা ইমুং মনুং মরুপ মপাংশিংগীসু পোৎলম অমা ওইরকই‍। স্কিলদা পুক্নীং চীংশিল্লিবা অসিনা হিংনবগী থৌনা, হিংনিংবগী অপামবা পী‍। শুপ্নতগী হিংনবগী অমদি শেন তান্নবগী লম্বী নত্তে‍। হিংনিংবগী অপামবা লৈরবা, হিংনবগী পান্দম পাম্লবা অমদি হিংনবগী শীংনবা পাম্লবদি স্কিলনা ঐখোয়গী শাফম ওইহন্দুনা ঐখোয়গী ইফমদা অনৌবা ৱাখল্লোন পুরকই‍। মসিনা পাঙ্গল পী‍। চহী মতাং অমা হেক্তা ওইজরবসু, নহা ওইরবসু অহল ওইরবসু, করিগুম্বা অদোম্না অনৌ-অনৌবা স্কিল তম্লবদি হিংনবগী পাঙ্গল থৌনা কৈদৌঙৈদসু হল্লোই‍।

মরূপশিং,

স্কিলগী মপাঙ্গল করিনো হায়বসি মসিগা লোয়নদুনা চৎলিবা মীপুম খুদিংদা করিগুম্বা অমা নৎত্রগা অমদি ফাওরমগনি‍। ঐঙোন্দসু ঙসি অদোমগা ৱারী শাবসিদা কুইরবা থৌদোক অমা নীংশিংলকই‍। হায়রিবা থৌদোকসি ঐনা নহা ওইরিঙৈ মতমগী ত্রাইবেল বেল্ততা ভোলুন্তিয়র ওইনা থবক তৌরৈঙৈ মতমগীনি‍। লূপ খরগা পুন্দুনা ঐ থবক তৌরম্মী‍। নোংবদি লূপ অমগা মখোয়গী মীশিংগা মপান্দা চৎকদবা অমা লৈবদগী মখোয়গী জীপতা ঐখোয় পুন্না চৎপা তারম্মী‍। অয়ুক্তা চৎকদবদু জীপতু স্তার্ত হৌরমদে‍। উমং মনুংদা কোইচৎ চৎপদুদা জীপকী ফীভমদু অদুম্না ওইরকখিবনি‍। ময়াম চঙদুনা হোৎনবা য়াবা হোৎনখি, ইনখি, তৌবা য়াবা তৌখি অদুবু গারীদুদি হৌরমদে‍। পুং ৭-৮ তারকপদুদদি মেকানিক অমা কৌরম্মী‍। মানা লাক্লগা খরা পায়থোক পায়শিন তৌরম্মী অদুগা মিনত অনিদা য়াহল্লম্মী‍। অদুগা মঙোন্দা লুপা কয়া তারে হংলুবদা লুপা ২০ তারে হায়রকখি‍। মতমদুদা লুপা ২০ হায়বসি য়াম্না য়াম্লম্মী‍। অদুবু ঐখোয়বু খোঙলোয় অমনা হায়রকখি, হেরা মিনত ২গী থবকসিদা লুপা ২০ হায়রিসিবু‍। মহাক্কী পাউখুমদুনা ঙসিসু ঐবু পুক্নীং থৌগৎলি, ঐগর পুক্নীংদা মমী অমা তাহনখি‍। লাইরক হৈতবা মেকানিক অদুনা হায়রকখি, সাহেব ঐনা মিনত ২গী লুপা ২০ লৌবা নত্তে, চহী ২০ থবক তৌনা তৌনা ঐনা তম্লকখিবা হৈশিংবা, তৌবা ঙমবদুগী মমলনি লুপা ২০ অসি‍। ঐ খঙখি, স্কিলকী মপাঙ্গল মসিমক্নি‍ হায়না‍। স্কিলনা অদোমগী থবকখক্তা নত্তনা অদোমগী হৈশিংববু, ৱাখল্লোনবু মতৌ তমজনিংঙাই ওইহল্লি‍।

অদুগা মরূপশিং,

মতাংসিদা ৱাফম অমসু  খঙজিনবা য়াম্না মরুওই‍। মীওই খরদি লৌশিং অমসুং হৈশিংবা হায়বসিদা মতম পুম্নমক্তা চমম্নদুনা লৈ, নৎত্রগা চমম্নবা পোকহল্লি‍। অসিগুম্বা মীওইশিংদা খুদম মচা অমখক্তং পীজগে‍। মতৌ করম্না সাইকল থৌগনি হায়বসি লাইরিক্তা পাবা য়াই নৎত্রগা য়ুত্যুবতা য়েংবা য়াই‍। মতৌ করম্না সাইকলদা ফমগনি, সাইকল হায়বসি করম তৌই, করমবা শরুক্না করি থবক তৌই, হেন্দল কদাইৱাইদা পায়গনি, ব্রেক কদাইৱাইদা ফাগনি হায়রিবা পুম্নমকসি অদোম্না ভিদিও ওইনা য়েংবা য়াই‍। হায়রিবশিং অসি লৌশিংনি‍। অদোমদা লৌশিং লৈরগা অদোম্না সাইকল থৌগনি হায়বগী গরেন্তী লৈতে‍। অদুগা তশেংবদি সাইকল থৌবদা হৈশিংবা চঙই‍। অদোম্না তপ্না তপ্না তম্লকই‍। অদুগা অদোম্না নুংঙাইনা সাইকল থৌরকই‍। অসুম থৌই, থোইদোকপা অয়েৎ অপন লৈতনা‍। অতৌ অদুম্না মসিবু নহাক্না তমলকপগা লোয়ননা অদোমগী হৈশিংবা হেনগৎলকই, অদোম্না ৱাখল থাদবগী মথৌ তারক্তে‍।

অদুগা খেন্নবা অসি খঙবা হায়বসি লৈঙাক্লোনদগী হৌরগা খুন্নাইগী তাঙ্কক খুদিংদা মথৌ তাই‍। ভারত্তা লৌশিং অমসুং হৈশিংবা অনিগী খেন্নবা খঙবগা লোয়ননা থবক পায়খৎলি‍। ঙসিদগী চহী ৫গী মমাঙদা ঙসিগী নুমিৎসিমক্তদা ৱাখল্লোন অসিগা লোয়ননা স্কিল ইন্দিয়া মিসন হৌদোকখি‍। মসিগী পান্দমদি নহারোলশিংদা লৌশিংগা লোয়ননা স্কিলসু লৈহনবা, হৈশিংবসু লৈহনবা অসিনি‍। মরম অসিননা লৈবাক পুম্বদা প্রধান মন্ত্রী কৌশল বিকাস কেন্দ্র চা কয়া লিংখৎলি‍। আই.তি.আই. মশিং হেনগৎহল্লে, মদুদা অনৌবা সিত মশিং কয়া হাপচিনখ্রে‍। মসিগা লোয়ননা মীওই করোর ৫ হেনবগী স্কিল দেভেলপমেন্ত তৌখ্রে‍। অদুগা হায়রিবা থৌরাং অসি  লেপ্পা নাইদনা চঙশিল্লি‍।

মরূপশিং,

খোঙজেল য়াঙনা হোংলক্লিবা ঙসিগী খুন্নাইসিদা সেক্তর কয়াদা হৈশিংলবা মীওই লাখ কয়াগী মথৌ তারি‍। মরুওইনা হকশেলগী লমদদি য়াম্না চাউনা মথৌ তারকপা য়াই হায়না পানরি‍। মসি খঙজিন্দুনা  কৌশল বিকাশ মন্ত্রালয়না মালেম পুম্বদা ওইরক্লিবা খুদোংচাবশিং অসিবু খঙদোক্নবা থৌরাং পায়খৎপা হৌরে‍। লৌখৎলিবা থৌরাংদি ভারতকী নহাশিংদা অতোপ্পা লৈবাকশিংগী মথৌ তাবশিং, মদুগী মরী লৈনবা অচুমবা অমদি মরিক চুমবা পাঊ ফংহন্নবনি‍। করমবা লৈবাক্তা হকশেলগী সর্ভিসকী লমদা অনৌবা থোং হাংলি‍। করি লৈবাক্তা করমবা সর্ভিস সেক্তরদা করি দিমান্দ লৈরি হায়বগা মরী লৈনবা ঈ-পাউশিং হৌজিক্তি ভারতকী নহাশিংদা ফংহনবা ঙম্লগনি‍।

খুদম ওইনা মর্চেন্ত নেভীগী মতাংদা ওইরবসু ভারত য়াওনা মালেম পুম্বদা হিহোনবা (সেলরশিং)গী মথৌ য়াম্না তারি‍। ঐখোয়গীদি কিলোমিতর লিশিং তরেৎ মখায় শাংবা সমুদ্র খোঙবাল লৈরি‍। মশিং য়াম্লবা ঐখোয়গী মহাশিং সমুদ্র অমসুং সমুদ্র খোঙবালগী ফীভমগী মরমদা নীংথিনা খঙলবনি‍। অদুনা হায়রিবা হীরমসিদা স্কিল হেনগৎহন্নবা থবক পায়খৎলবদি মালেম পুমবদা ঐখোয়না হৈথোই-শিংথোইরবা হিহোনবা লাখ লাখতা পীবা ঙমগনি অমদি ইরৈপাক্কী সমুদ্র খোঙবালগী শেন্মিৎলোনসু হেন্না মপাঙ্গল কলহনবা ঙমগনি‍।

মেপিং তৌবনা হৌজিক্তি অসিগুম্বা মখলগী ঈ-পাউশিং পীবদা হেন্না লায়থোকহল্লগনি‍। মসিগী মথক্তা নুমিৎ মরি-মঙানিগী মমাঙদা লংফৈ চৎলুবা শিন্মীশিংগী হৈশিংবা খঙদোক্নবা পোর্তেল অমা হৌদোক্লে‍। হায়রিবা পোর্তেল অসিনা হৈশিংলবা মীয়াম অমদি হৈশিংলবা লংফৈ চৎলুবা শিন্মীশিং খঙদোকপদা মরুওইবা থৌদাং লৌগনি‍। মসিনা থবক পীরিবশিংনা ক্লিক অমুক্তা স্কিল মেপ তৌখরবা শিন্মীশিংদা য়ৌবা ঙম্লগনি‍। মরুওইনা ফীভমসিদা ময়োললমশিংদগী মখোয় মখোয়গী খুঙ্গংশিংদা হন্নরকখিবা লংফৈ চৎলুবশিংদা চাউনা মতেং ওইরগনি‍। অসিগুম্বা স্কিল সেত পুদুনা খুঙ্গংদা লাকখ্রবা মীওইশৎংগী মখোয় মখোয়গী খুঙ্গংদা চাউখৎ থৌরাং পায়খৎপা হৌরকপগী থৌওং ময়াম মরকসিদা উবিরম্লগনি‍।কনাগুম্বনা স্কুলদা মচু তৈবগী থবক তৌরি, অদুগা কনাগুম্বনা অনৌবা মওংগী য়ুম শারি‍। অপীকপা-অচৌবা য়াওনা মখল খুদিংগী স্কিলশিং অসিনা ইরোমদোম লেপচবা ভারতপুসু চাউনা মপাঙ্গল হাপ্লগনি‍।

ঐনা লৈবাকসিগী নহারোলশিংবু ৱর্ল্দ য়ুথ স্কিল দে না লাকপসিদা অমুক্কা হন্না য়াইফ-পাউজেল পীজরি‍।

অদুগা মালেমগী লাইচৎকী মতম ওইবনা ঐগীসু ইথৌদাং অমা ওইরি‍। ৱাফম অমখক ঐনা হঞ্জিন হঞ্জিন হায়দুনা লাক্লি‍। ঐখক্তনা হায়বা নত্তনা অদোমসু হঞ্জিন হঞ্জিন হায়বিয়ু‍। অদুগা মদুদি করিনো? অহানবদা ঐনা পাম্বদি অদোম হকচাঙ ফনা লৈবনি‍। অনিশুবদা মিতর অনিগী অরাপ্পা ঙাক্না চৎপিয়ু, মায়খুম উপ্পা কাউবিগনু, মসিদা চোকথবা নাইদনবা মীপুম খুদিংদা তাকপিবা লেপ্পীগনু‍। অদুগা ঙসি পুল্লিবা মসিগী মতাংদা হায়খিবা লাইৱা অদু মতম পুম্নমক্তা নীংশিংদুনা লৈবিয়ু‍। লাইরিক কয়া তম্লবসু, দিগ্রী কয়া ফংলবসু ইশাগী হৈশিংবদি লেপ্পা নাইদনা হেনগৎহনবিয়ু‍। মতম পুম্নক্তা অনৌবা স্কিলগীদমক ইশানা ইশাবু শেম শাদুনা থমগদবনি‍। হিংবগী নুংঙাইবা ফংগনি‍। পুন্সিগী অনৌবা খুদোংচাবশিং ফংবা ঙমবগী নুংঙাইবা ফংগনি‍। অদুগা অদোম্না অদোমগী খুৎকী পাঙ্গল, খুৎশাশিংগী পাঙ্গল, পুক্নীং ৱাখলগী পাঙ্গলবু মহৈ অমগী খুত্থাঙদা শীজিন্নরক্কনি অমদি হেন্না হেনগৎহল্লক্কনি হায়না ঐনা থাজৈ‍। অমদি ইশাগী খুমাঙ চাউশিনবতা নত্তনা লৈবাক্কী ওইনসু চাউখৎ মায়কৈরোমদা চঙশিল্লক্কনি‍।

হন্ন-হন্না থাগৎচরি‍।

অদোম য়াইফবা ওইবিয়ু‍।

*****