তোঙান তোঙানবা শিনফমশিংদগী থোইদোক হেন্দোক্লবা মীথুংশিং, খুরুমজরি! ভারত্তগী য়াইফ-পাউজেল পীজরি। ইন্দিয়া ইঙ্ক গ্রুপ্পু থৌরম অসি পাংথোকপগীদমক্তা ঐনা তৌবীমল খঙবা উৎচরি। পাংথোক্লিবা থৌরম অসি ইন্দিয়া ইঙ্কনা হৌখিবা চহিশিংদা তৌখিবা শিংথানীংঙাই ওইরবা থবকশিংদুগী শরুক অমনি। অদোমগী থৌরম অসিনা ভারত্তা ফংলিবা খুদোংচাবশিং মালেমগী ওদিয়েন্সতা য়ৌহনবদা মতেং ওইরে। অদোম্না ভারত অমসুং য়ু.কে.গী মরক্তা লৈনবা মরী হেন্না কনখৎহনবদা মতেং পাংলে। হন্দক চহিগী থৌরম অসিনা অতোপ্পা খোঙবুশিংদসু য়ৌশিনবা ঙমবসি ঐহাক নুংঙাইবা ফাওই। মথংগী চহিদদি অদোমসু সেন্তর কোর্ত্তা লৈবগী খুদোংচাবা ফংগনি অমদি ৱিম্বলদনগী নুংঙাইবসু ফংলগনি হায়না থাজৈ।

মরূপশিং,

হৌজিক্কী মতম অসিদা অমুক হিংগৎলক্নবগী ৱারী শানবা হায়বসি হৌনশানি। অদুগা মসিগা মান্ননা মালেম্না অমুক হৌগৎলকপগা ভারতনা হৌগৎলকপগা মরী শমজিন্নবা অসিসু হৌনশানি। মালেমনা হৌগৎলকপগী ৱারীদা ভারতনা মাংজিল থাবা থৌদাং য়াগনি হায়না থাজবা লৈ। ৱাফম অসিদা ঐহাক্না মরম অনিগা য়াম্না নক্নবা মরী লৈবা উবা ফংই। অহানবসিনা ভারতকী হৈথোই শিংথোইবনি। মালেম পুম্বদা অদোম্না ভারতকী হৈথোই শিংথোইবগী থৌদাং উখ্রে। হায়রিবশিংসিদা ভারতকী প্রোফেস্নেলশিং, দোক্তর, নর্স, বেঙ্কর, উকিল, সাইন্তিস্ত, প্রোফেসর, ঐখোয়গী শুব-নোম্বা কল্লবা শিন্মীশিং পুম্নমক য়াওরি। ভারতকী তেক ইন্দস্ত্রী অমসুং তেক প্রোফেস্নেলশিং কনানা কাওথোকপা ঙমগনি। মখোয়না চহি কয়া লম্বী তাক্তুনা লাক্লি। ভারত অসি থৌদাং য়ানবগীদমক মতম পুম্নমক্তা খৌরাংদুনা লৈবা অমদি তম্নবগীদমকসু ঙাইদুনতা লৈবা হৈথোই শিংথোইবশিংগী পাৱর-হাউসনি। মফমসিদা মায়কৈ অনি পুনশিন্দুনা হোৎনমিন্নবগী চাউনা কান্নরবা থৌওং লৈ।

মরূপশিং,

অনিসুবা অসিনা ভারতকী অহোংবা পুরকপা অমদি নৌনা ময়োল চোংখৎলকপা ঙম্বগী মতিং অসিনি। ভারত মচাশিং অসি মহৌশানা অহোংবা পুরকপা পাম্বা মীওইশিংনি। পুৱারীনা তাক্লি মদুদি ভারতনা খুন্নাইগী ওইরবসু শেন্মিৎলোনগী ওইরবসু শিংনবা খুদিংমক লান্থোক্তুনা লাক্লি। মসি ভারতনা অহোংবা পুরকপা অমদি অনৌবা ময়োল চোংখৎলকপগী ৱাখল্লোন অদুগা লোয়ননা পাংথোক্লিবনি। হায়রিবা ৱাখল্লোন অসিমক হৌজিকসু মখা শমথদুনা চৎলি।

মরূপশিং,

নাকল অমরোমদা ভারতনা মালেমগী লাইচৎ অসিগী মায়োক্তা অকনবা লানফম অমা লান্থেংনরি। মীয়ামগী হকশেলদা অহেনবা মিৎয়েং চংবগা লোয়ননা, ঐখোয়না শেন্মিৎলোন মশা মউ ফনা থম্নবা হোৎনবদসু চপ মান্ননা মিৎয়েং চঙলি। ভারতনা অমুক হৌগৎলকপগী ৱাফমগী মতাংদা হায়রিবসি চেকশিনবগা লোয়ননা হৌগৎলকপা, মিনুংশিগা লোয়ননা হৌগৎলকপা, অকোয়বগী ফিভম অমসুং শেন্মিৎলোন অনিমক্তা তুং কোইনা চৎকদবা মওংদা হৌগৎলকপদুনি। ভারত্তা লৈরিবা ঐখোয়সি মহৌশা লাইরেম্বীবু মীপুম খুদিংমক্না ইরাৎচবা চৎনবীসিদা য়াওরিবনি। মালেম অসিনা ঐখোয়গী ইমানি অদুগা ঐখোয়না মহাক্কী মচাশিংনি হায়না ভারত্তা থাজনৈ।

মরূপশিং,

হৌখিবা চহি তরুকসিদা, অপুনবা ফাইনান্সিএল ইনক্লুজন, হাউজিং অমদি ইনফ্রা শেমগৎ শাগৎপদা রেকোর্দ থমবা, লল্লোন ইতিক তৌবদা নুংঙাইহনবা, জি.এস.তি. য়াওনা ইচং থৌবা তেক্স রিফোর্ম, মালেমগী খ্বাইদগী চাউবা হেল্থকেয়র থৌরাং – অয়ুস্মান ভারত, হৌদোকপনচিংবা হীরমশিংদা ভারতনা চাউনা মায় পাক্লি। হায়রিবা মায় পাকপশিং অসিনা চাউখৎ থৌরাংগী মথংগী রাউন্দগী য়ুম্ফম থোল্লে।

মরূপশিং,

ভারত মচাশিংদা ঙম্লোই হায়না থাজনবশিং ফংবা ঙম্নবা হোৎনবগী ৱাখল্লোন লৈ। শেন্মিৎলোন অমুক হিঙ্গৎহনবগী মতাংদা ভারত্তা অশংবা মতোল চোংলকপা উবা ফংবদা থোইদোক্না ঙক্নীংঙাই ওইদে। লাইচৎ মতমসিদা, ঐখোয়না ঐখোয়গী মীয়ামদা তেংবাং পীরি অমদি অরুবা স্ত্রকচরদা অহোংবশিং পুরকখ্রে। ঐখোয়না শেন্মিৎলোন অসিবু হেন্না শেন্থোক লৈবা, শেন থাদবদা নুংঙাইবা অমদি হিদান্নবা য়াবা অমা ওইহন্নবা হোৎনরি।

ঐখোয়গী তেংবাংগী পেকেজ অসি স্মার্ত ওইবা অমসুং খ্বাইদগী হেন্না লায়রবশিংদা খ্বাইদগী হেন্না তেংবাং পীননবা পান্দম থম্বনি। তেক্নোলোজীগী মতেংনা শেনফম খুদিংমক বিনিফিসরীশিংদা হকথেংননা য়ৌরে। তেংবাং অসিদা য়াওরিবশিংদি লেম্না চাকথোং গ্যাস পীবা, বেঙ্ক একাউন্ততা শেন থাজিনবা, মীওই মিলিয়ন কয়াদা চেং-হৱাই লেম্না পীবা অমদি অতৈ কয়া য়াওরি। ঐখোয়না অনলোক হেক হৌরকপগা, ঐখোয়না মালেমগী খ্বাইদগী চাউবা পব্লিক ৱর্ক প্রোগ্রাম শিন্মী মিলিয়ন কয়াদা থবক পীননবা হৌদোকখ্রে। মসিনা খুঙ্গংগী শেন্মিৎলোন অমুক হন্না কনখৎহনবতা নত্তনা খুঙ্গংগী মফমশিংদা তুং কোইবা য়াবা মচাক মথুমশিং শেমগৎপদসু মতেং ওইরি।

মরূপশিং,

ভারত অসি মালেমগী মনুংদা খ্বাইদগী ওপন ওইবা শেন্মিৎলোন ওইরি। ঐখোয়না মালেমগী কম্পনী খুদিংমক মখোয়গী মফম ভারত্তা লাক্তুনা শেমগৎলনবগীদমক অঙাঙবা কার্পেৎ থাদুনা থম্লি। ভারতনা ঙসি পীরিবা খুদোংচাবশিং অসি মশিং য়ামদবা লৈবাক খরখক্তমক্না পীরক্কনি। তোঙান তোঙানবা অনৌবা হীরমশিংদা ভারত্তা ওইথোকপা য়াবা অমদি খুদোংচাবা কয়ামরুম লৈ। ঐখোয়না লৌউ-শিংউদা পুরক্লিবা অহোংবা অসিনা স্তোরেজ অমদি লোজিস্তিক্কী লমদা য়াম্না পুক্নীং চিংশিন্নীংঙাই ওইবা শেন থাদবগী খুদোংচাবা পীরি। শেন থাদবশিংনা লাক্তুনা ঐখোয়গী শুবা-নোম্বা কনবা লৌমীশিংদা হকথেংননা শেন থাদনবা ঐখোয়গী থোংশিং হাংদুনা থম্লি।

মরূপশিং,

ঐখোয়না এম.এস.এম.ই. সেক্তরদা অহোংবা পুরক্লে। চাউখৎপা এম.এস.এম.ই. সেক্তরনা অচৌবা ইন্দস্ত্রীশিংদসু মতেং ওইগনি। দিফেন্স সেক্তরদা শেন থাদবগী খুদোংচাবা লৈরি। কোমথোক্লবা এফ.দি.আই. চৎন-কাংলোনগা লোয়ননা মালেমগী খ্বাইদগী চাউবা মিলিতরীশিংগী মরক্তগী অমনা অদোম্বু লাক্নবা অমদি মখোয়গী পোত্থোকশিং শাননবা পাউকৎ পীরি। হৌজিক্তি স্পেস সেক্তরদসু শেন থাদনবগী অহেনবা খুদোংচাবা লৈরে। মসিনা স্পেস তেকপু মীয়ামগী য়াইফনবগীদমক কম্মর্সিএল ওইনা শিজিন্নবদা অহেনবা এক্সেস পীরগনি। ভারতকী তেক অমসুং স্তার্ত-অপ সেক্তর অসি মশক থোকপা অমা ওইরি। মফমসিদা দিজিতেল্লী এম্পৱার্দ তৌরবা অশা চাউরবা মীওই মিলিয়ন কয়াগী কৈথেল অমা লৈরি। অদোম্না মখোয়গীদমক শাবীগদৌরিবা পোত্থোক মখলশিংদু অমুক্তং খন্দুনা য়েংবীয়ু।

মরূপশিং,

লাইচৎ অসিনা ভারতকী ফার্মা ইন্দস্ত্রী অসি ভারতখক্তগী নত্তনা মালেম পুম্বগী লন অমনি হায়বসি অমুক্কা হন্না উৎলে। মসিনা মরুওইনা চাউখৎলক্লিবা লৈবাকশিংগীদমক্তা হিদাক্কী মমল হন্থহনবদা মাঙজিল থানা থৌদাং য়ারি। ভারত্তা শাবা ভেক্সিন্না মালেমগী অঙাংশিংনা মথৌ তাবা ভেক্সিনগী শরুক অহুম থোকপগী অনি ওইরি। ঙসিসু ঐখোয়গী কম্পনীশিং কোবিদ-১৯গী ভেক্সিন শেম্নবা অমদি পুথোক্নবা মালেমগী ওইনা হোৎনরিবা অসিদা ইচং থৌনা শরুক য়ারি। ভেক্সিন হেক ফংবগা শেমগৎপা অমদি চাং য়াম্না পুথোকপদা ভারতনা মরুওইবা শক্লোন লৌরক্কনি হায়বসি ঐনা চেৎনা থাজৈ।

মরূপশিং,

ভারত মচা করোর ১৩০না মরোমদোম লেপচবা ভারতকী পাউজেল পীরি। মরোমদোম লেপচবা ভারত অমা। আত্মনির্ভর ভারতনা ইরমদমগী পোত্থোক অমদি শিজিন্নবগী থৌওংবু মালেমগী সপ্লাই চেনগা পুনশিন্নরি। আত্মনির্ভর ভারত অসি ইশাদগী হেন্দোক্তবা নৎত্রগা মালেমগা শম্নদবগী ৱাফম নত্তে। মসিদি ইরোমদোম হিংজবা ঙমজবা অমদি ইশানা পুথোকচবা ঙমজবা ফিভম থম্বগী ৱাফম্নি। ঐখোয়না মতিং লৈবা, মান্নবা অমদি অমুক হিংগৎলকপা ঙমবা হায়রিবশিং অসি য়োকখৎনবা থৌরাংশিং পায়খৎলি।

মরূপশিং,

ফোরম অসিনা পন্দিৎ রবী শঙ্করগী ১০০ শুবা মপোক কুমওন থৌরমবুসু মশক তাক্লি হায়বসিদা ঐঙোনদা নুংঙাইবা ফাওই। মহাক্না ভারতকী ক্লাসিকেল ম্যুজিক্কী ফজববু মালেমদা পুথোক্লম্বনি। কমদৌনা নমস্তেনা মীবু তরাম্না ওকপগী মালেমগী ওইবা মওং অমা ওইখিবগে হায়বসি অদোমসু উবীরম্লগনি। লাইচৎ অসিদা য়োগ, অয়ুর্বেদ অমসুং মাইবগী হিদাকশিংদা মালেম পুম্বগী ওইনা মীয়াম্না পাম্নবা হেনগৎলকপসু উরি। ভারতকী লীরবা নাৎ, ভারতকী পুম্নমক্না য়াবা ইং-চিকপগী ৱাখল্লোন অসিনা ঐখোয়গী পাঙ্গল ওইরি।

মরূপশিং,

মালেমগী ফনবগীদমক অমদি নুংঙাই-য়াইফনবগীদমক তৌবা য়াবমখৈ তৌনবা ভারতনা শেম শাদুনা লৈরি। মসি অহোংবা লাক্লিবা, মথৌ পাংথোক্লিবা অমদি ওল্লক্লিবা ভারত অমনি। মসি অনৌবা শেন্মিৎলোনগী খুদোংচাবশিং পীরিবা ভারত অমনি। মসি মীওইবদা য়ুম্ফম ওইবা অমদি চাউখৎ মায়কৈদা শুপচিল্লবা লম্বী অমদা চঙশিল্লক্লিবা ভারত অমনি।

ভারতনা অদোম পুম্নমকপু খৌরাংনা ঙাইরি।

নমস্তে,

ঙমখৈ লৈতনা থাগৎচরি।

***