অত্মানির্ভর ভারত এপ ইনোবেসন চেলেঞ্জ শরুক য়ানবা তেক্নোলোজীগী মীওইশিংদা প্রধান মন্ত্রী নরেন্দ্র মোদীনা তকশিল্লি।

লিঙ্কইনদা থাগৎখিবা পোস্ত অমদা প্রধান মন্ত্রীনা হায়খি , ভারত্তা অফবা তেক্নোলোজী অমসুং স্তার্দ-অপকী ফিবম অমা লৈরে অমসুং নহারোলশিংনা হিরম কয়াদা তেক্নোলোজীগী অফবা খুদোংচাবা কয়া ফংহল্লে। নৌবা এপশিং পুথোক্নবা অমসুং লৈবাক অসিগী এপশিং ফগৎহন্নবা তেক্নোলোজী অমসুং স্তার্ত-অপশিংগী মীওইশিংগী মরক্তা খৌরাংবা কয়া লৈরে , অমরোমদা লৈবাক অসিনা অত্মানির্ভর ভারত অমা শেমগৎনবা থবক পায়খৎলি। মসি ঐখোয়গী কৈথেলদা পাম্নগদবা অমসুং মালেমগী কৈথেলদা চাংদম্নবা ঙমগদবা এপশিং পুথোক্নবগী মাইকৈ তাক্নবা অফবা খুদোংচাবা অমনি।

মসিগী পান্দম অসিগা লোয়ননা, অতল ইনোবেসন মিসন অমসুং ইলেকত্রোনিক্স অমসুং ইনফোরমেসন তেক্নোলোজী মিনিস্ত্রিনা অত্মানির্ভর ভারত এপ ইনোবেসন চেলেঞ্জ পাংথোকপনি। চাংদম্নবা অসি লম্বী অনি থোক্নবা খাইদোক্লি : হৌজিক লৈরিবা এপশিং ফগৎহনবা অমসুং অনৌবা এপশিং পুথোকপা। মসিগী চাংদম্নবা অসি মওং-মরিল তানা পাংথোক্নবা সরকার অমসুং তেক্নোলোজীগী থবক তৌরিবা মীওইশিংনা পুন্না শীনগনি।

হৌজিক শীজিন্নরিবা এপশিং অমসুং ই-লার্নিং, য়ুমদগী থবক শুনবা, গেম শান্নবা, ললোন-ইতিক, হরাও-কুম্মৈ, ওফিসগী থবকশিংগী অমসুং সোসিএল নেতৱার্কিং কাংলুপগী এপশিং ওইনা সরকারনা লমজিংগনি অমসুং মতেং পাংগনি। অফবা মগুন লৈবা এপশিং মশক খঙদোক্নবা মিসনগী মওংদা ত্রেক-০১ থবক তৌগনি অমসুং থা অমগী মনুংদা থবক লোইশিনগনি। অনৌবা এপশিং অমসুং প্লেতফোর্মশিংগী ওইনা অনৌবা ৱাখল, ইনকুবেসন, প্রোতোতাইপিং অমসুং কৈথেলদা য়োন্নবগী মতেং পাংনবা ত্রেক-০২না থবক পাংথোক্কনি।

মসিগী চাংদম্নবা অসিনা হৌজিক লৈরিবা এপশিং অসি মখোয়গী পান্দমশিং হেন্না ময়েক শেংনা উবা ঙমহল্লগনি অমসুং খুদোংচাদবা কয়া কোকহন্নবা ঙম্বা তেক্নোলোজীগী পোৎথোকশিং শেমগৎপা ঙমহনগনি হায়না প্রধান মন্ত্রীনা ফোংদোকখি।

প্রধান মন্ত্রীনা হংখি, তেক্নোলোজীনা ভারতকী অরিবা মশান্নশিং মমিং চৎহনবা ঙমগদরা, মীয়াম অমুক হন্না খুন্দা-লৈতাহনবা নৎত্রগা কাউন্সেল্লিং পাংথোকপদা মতেং পাংবা ঙমগদবা এপশিং পুথোকপা ঙমগদরা নৎত্রগা চুনবা চহি মতাংগী লাইরিক তম্নবা, গেমিং এপশিং শাবা ঙমগদরা। অত্মানির্ভর এপ ইকোসিস্তেম অমা শেমগৎনবা চাংদম্নবা অসি শরুক য়ানবা মহাক্না তেক্নোলোজীগী মীওইশিংদা তকশিনখি।

*****