ভারত ইমানা য়াইফরে

ভারত ইমানা য়াইফরে

মরূপশিং, অদোমগী থৌনা, চোংশিন্দুনা মায়োক্নবা ঙম্বগী থৌনা অমসুং ইমা ভারতিগী ইকাই খুম্নবা অসি ঙাক্নবগীদমক অদোম্না কত্থোক্লিবা পুম্নমক অসি চাংদম্ননিংঙাই লৈতে। অদোমগী ইচং থৌবা অসিসু মালেমসিদগী তাদে। অরুবা মতাংশিং অসিদা অদোম্না অসুক থাক ৱাংনা ইমাগী চিঙ্গোই ওইদুনা ইমাবু ঙাক শেল্লিবা, মহাক্কী থৌগল তৌরিবা অসি মালেম অসিদা কনানসু চাংদম্নবা ঙম্লোই।

অদোমগী থৌনা অসি অদোম্না ঙাক্লিবা মফম অদুদগীসু হেন্না ৱাংই। অদোম্না ৱারেপ্না অদুনা অদোম্না নুতিগী অদোমগী খোংনা চত্তুনা ওল্লিবা অদুদগী হেন্না চেৎলি। অদোমগী পাম্বোমশিংনা অদোমগী অকোয়বদা লৈরিবা নুংশিংদগী হেন্না কনবা হেল্লি। অদোমগী ৱাখলগী পাঙ্গলনা অদোমগী মনাক নকপদা লৈরিবা চিংজাওশিং অসিদগী হেন্না কনবা হেল্লি। অদোম ময়ামগী মরক্তা লাকপা অসিদা মসিগীশিং অসি ঐগী পুক্নিংদা ফাওরি। ইমীৎমক্না উরি।

মরূপশিং, লৈবাক অসি ঙাকপা অসি অদোমগী খুত্তা লৈরবা মতম অসিদা, অদোমগী কল্লবা পুক্নিংশিং অদুদা লৈরিবা অসি লেংদ্রবা থাজবা অদুনি। ঐহাক খক্তা নত্তনা লৈবাক পুম্বনা চপ চানা থাজৈ অমসুং লৈবাক অসিনা করিসু ৱারুদে। অদোম্না ঙমখৈ অসিদা লেপ্পী হায়বা ৱাফম লৈবাক অসিদা লৈরিবা মীওই খুদিংদা পুক্নিং থৌগৎলি। আত্মনির্ভর ভারত ওইনবগী ৱাশক অসি অদোম পুম্নমক্কী মরম্না, অদোমগী থাদোকপা, কত্থোকপা, নুপা থোকপা মতৌশিংগী মরম্না হেন্না মপাঙ্গল কলহল্লি। অদুগা হৌজিক অদোম অমসুং অদোমগী মরূপশিংনা ফৎলিবা থৌনা অসিনা মালেম পুম্বদা ভারতকী থৌনা অসি করিনো হায়বা উৎলি।

হৌজিক ঐগী মাংদা নুপী লান্মীশিংসু উরি। লানগী লানবুংদা, ঙমখৈদা উরিবশিং অসিনা মশানা অদুম ইনোৎ হাপ্লি।

মরূপশিং, লৈবাক অসিগী কবি রামদারী সিংহ দিনক্রজীনা ইবিরম্মি-

জিনকে সিংহনাদ সে ,হমী। ধরতী রহী অভী তক ধোল।

কলম, আজ উনকি জয় বোল। কলম, আজ উনকি জয় বোল।

অদুদি ঙসি ঐহাক্না ঐহাক্কী খোঞ্জেলনা য়াইফরে হায়না হায়রি, অদোম্বু খুরুমজরি। ঐহাক্না গলৱান তম্পাক্তা থৱায় কত্থোকখ্রবা ঐখোয়গী অথৌবা জৱানশিং অদুবু অমুক্কা হন্না শ্রদ্ধাঞ্জলি কৎচরি। মসিগীশিং অসিদা নোংপোক্তগী, নোংচুপ্তগী, অৱাংদগী, লৈবাক অসিগী কাচিন খুদিংদগী অথৌবশিংনা মখোয়গী থৌনা-লিংজেল অদু পুথোক্তুনা উৎখি। মখোয়গী ইচং-থৌবদা, মখোয়গী লানগী খোল্লাওদা মালেম লৈমনা হৌজিকসু হরাও মথোই কারি। ঙসি লৈবাক অসিদা লৈরিবা মীওই খুদিংমক্না নখোয়পুম্বদা ইকাই খুম্ননা কোক নোন্দুান খুরুম্লি। ঙসি ভারত্তা লৈরিবা মীওই খুদিংমক্কী থম্মোয়দা অদোমগী থৌনা ফবগী মতৌ অমদি লিংজেলনা চাওথোকহল্লে।

মরূপশিং, সিন্ধুগী থৌজালনা লৈবাক অসি থৌজাল ফংলি। থৌনা ফবা মচাশিংগী থৌনা অমসুং লিংজেলবু শক্ন-শোন্নবশিংনা মসিগী মালেম অসিদা মশানা অদুম তিনশিঞ্জখ্রি। লেহ-লদ্দাখতগী কারগিল অমসুং সিয়াচিনফাওবা রিজাঙ্গলাগী উন্না কুপ্পা চিংশিংদগী গলৱান তম্পাক্কী অইংবা ঈচেলফাওবা, চিংদোল খুদিং, চিং খুদিং, ঈরিক খুদিং, নুংকুপ-নুংজাও খুদিংনা ভারতকী লান্মীশিংগী থৌনা-লিংজেলগী খুদম তাক্লি। কোর্প ১৪গী থৌনা ফবগী ৱারীনা মায়কৈ খুদিং নিল্লে। মালেম অসিনা নমশিন্দুনা থম্বা য়াররোইদবা থৌনা অদু উরে, খংলে। অদোমগী থৌনাফবগী ৱারীশিংনা য়ুম-য়ুম খুদিংদা নিন্দুনা লৈরি অমসুং বারত ইমাগী য়েক্নবশিংনা অদোমগী ফায়রসু উরে অদোমগী ফ্যুরীসু উরে।

মরূপশিং, লদ্দাখকীদি মসি অপুনবা শরুক্নি, মসি ভারতকী কোক্নি, ভারতকী মীওই কোতী ১৩০গী ইকাই-খুম্নবগী সিম্বোলনি। মসিগী লম অসি ভারতকীদমক্তা খ্বাইদগী অথোইবা মওংদা কত্থোক্নবা মতম পুম্নমক্তা থৌরাং তৌদুনা লৈরিবা মরৈবাকপু নুংশিজবশিংগী লম্নি। লম অসিনা কুশোক বকুলা রিনপোন্সেগুম্বা অথৌবা মরৈবাক নিংবা মীওই অমা লৈবাক অসিদা পীনবিরে। মহাক্কী মরম্না য়েক্নবশিংগী ফত্রবা ৱাখলশিংনা মফমদুদা লৈরিবা মীশিংবু হোংদোক-হোংজিন তৌখিবা অসি রিনপোন্সেজীমক্ননি। রিনপোন্সেগী লিচিংনা মফমসিদা ৱাখলদা খেৎনবশিং পোকহন্নবা হোৎনখিবশিংগী খুজিল-থৌরাংপুম্বা লদ্দাখকী লৈবাক নিংবা মীশিংনা মায়থিবা পীখি। মসি মখোয়শিংগী শিংথানিংঙাই ওইরবা হোৎনবা কনবশিং অদুগী মহৈনা লৈবাক অসিবু, ভারতকী লান্মীবু লদ্দাখ স্কাউতকী মমিংদগী ইনফ্রেন্ত্রী রেজিমেন্ত শেম্ননবগীদমক ইনোৎ হাপ্লি। ঙসি লদ্দাখকী মীশিংনা লান্মী ওইরো নত্রগা মীচমগী থৌদাং লৌবা ওইরো থাক খুদিংদা লৈবাক অসিবু হেন্না মপাঙ্গল কলহন্নবগীদমক অঙকপা ফংনা থৌদাং য়ারি।

মরূপশিং, ঐখোয়গীসিদা হায়নৈ-

খঙ্গেন আক্রম্য ৱন্দিতা আক্রমন পুনিয়া, বির ভোগ্য বসুধরা

হায়বদি থৌনাফবনা মহাক্কী খুৎলায়গী পাঙ্গলখক্তনা লৈবাক অসিগী ইমা লৈবাক অসিবু ঙাকই। লৈবাক অসি থৌনা ফবগী ইখৌ লাংজবনি, থৌনাফবশিংগীদমক্তনি। মসিগী ঙাক-শেনবা অসিদা ঐখোয়না মতেং অমদি পাঙ্গল, ঐকোয়গী ৱাশক অসি হিমালয়মুক ৱাংই। মসিগী পাঙ্গল অমসুং মসিগী ৱাশক অসি হৌজিক অদোমগী মীত্তুদা ঐহাক্না উবা ফংই। অদোমগী মায়থোংদা ময়েক শেংনা উরি। অদোম অসি চহী লিশিং কয়াদগী লান্দাবশিংগী, মীওৎ-মীনৈ তৌবশিংগী চপ চাবা পাউথুম পীরিবা অদুগুম্বা লৈবাক অদুগী থৌনা ফবনি। ঐখোয়, মসি ঐখোয়গী শক্তম্নি, ঐখোয় অসি খুত্তা বাসি পায়রিবা কৃষ্ণবু লাৎচবা মীশক অদুনি। ঐখোয় অসি সুদর্শন চক্র পায়বা কৃষ্ণবুসু ফীদম অদু ঙাক্না চৎপা মীশিংনি। মসিগী ইথিল অসিনা লান্দারকপা খুদিংদা ভারত অসি হেন্না মপাঙ্গল কনখৎপা হেনগৎহল্লি।

মরূপশিং, লৈবাক্কী, মীওইবগী চাওখৎনবগীদমক্তা ইং-তপ্পা অমসুং মরূপ-মপাং ওইবগী মওং খুদিংমক অয়াবা পীজরি, মীপুম খুদিংমক্না মসি য়াম্না মরু ওইবনি হায়না লৌই। অদুবু ইং-তপ্পনা কৈদৌনুংদা পাঙ্গল শোন্থহল্লক্লোই হায়বসিসু ঐখোয়না খংই। মপাঙ্গল শোনবনা ইং-তপ্পগী খোংথাং লৌখৎপা ঙম্লোই। থৌনা ফবখক্তনা ইং-তপ্পগী মমাংদা থমগদবা ৱাফং ওই। ভারত অসি ঙসি ঈশিং, লৈবাক, অতিয়া অমদি স্পেসফাওবা য়ৌনা পাঙ্গল কনখৎপা হেনগৎলক্লিবা অসিগী মরুমদা লৈরিবা পান্দম অসি মালেম অসি য়াইফনবগীদমক্তনি। ভারত অসি ঙসি অনৌবা খুৎশু-খুৎলায়শিং শেম-শারি। মালেম অসিগী অনৌবা তেক্নিক অসি ভারতকী লান্মীগীদমক পুরক্লিবা অসিগী মরুমদা মসিগী ৱাখল্লোনসু মসিনি। ভারতনা অনৌবা ইনফ্রাস্ত্রকচর অসি থুনা-য়াংনা শেম্লিবা অসিগী মরুমদা লৈরিবা পাওজেলসু মসিনি।

ৱর্ল্দ ৱার অসি ঐখোয়না নিংশিংবা তারবদি, মালেমদা লান থোকপা ওইরো নত্রগা ইং-তপ্পা পুরকপগী ৱাফম ওইরো- + মথৌ তারকপা মতমদা মালেম অসিনা ঐখোয়গী থৌনা ফবশিংগী থৌনা অদু উরে অদুগা মালেম অসি ইং-তপ্না লৈহন্নবগীদমক মখোয়না হোৎনরিবশিং অদুবুসু পুক্নিংদা ফাওরি। মতম পুম্নমক্তা ঐখোয়না মীওইবগী, হ্যুমেনিতীগী ঙাকথোক্নবা অমসুং ঙাক-শেন্নবগীদমক থবক তৌই, পুন্সি অসি লেল্লি। অদোম পুম্নমক ভারতকী মসিগী পান্দম অসিবু, ভারতকী পারি-পুরিগী পরম অসিবু, ভারতকী খ্বাইদগী অথোইবা নাৎ অসিবু শেমগৎ-শাগৎলিবা মকোক থংবা লিদর অমনি।

মরূপশিং, অথোইবা মুনি তিরুৱল্লুৱরজীনা চহি লিশিং কয়াগী মমাংদা হায়বিরম্মি-

ম্হারা মানমান্দ

বরী চেলা কুতুম য়ে না নানগে

য়ে মম পরাই কহা

হায়বদি থৌনা ফবা, ইকাই খুম্নবা, চিং-লেম্বা মওং-মতৌগী চৎন-লোনচৎ অমসুং থাজনিংঙাই ওইবা মতৌ হায়রিবা মতিক ময়াই মরী অসি লৈবাক অমা হেক্তগী লান্মীশিংদা মিংশেল ওইরি। ভারতকী লান্মীশিংনা মসিগী লম্বি অসিদা চৎলি।

মরূপশিং, পাকথোক-চাওথোকপগী য়ুগ অসি লোইখ্রে, য়ুগ অসি চাওখৎনবগী য়ুগনি। থুনা হোংলক্লিবা মতম অসিদা চাওখৎনবগী ওইবা অসি মরি লৈনবনি। মথং-মথং চাওখৎলকপা অসিমক খুদোংচাবনি অমসুং মথং-মথং চাওখৎলকপা অসিমক তুংগী ওইবগী য়ুম্ফমসুনি। হৌখিবা চহি চাশিং অসিদা মথং-মথং শন্দোরকপনা মীওইবগী খ্বাইদগী মাং তাকহনখি, মীওইববু অমাং-অতা থোকহন্নবা হোৎনখি। মথং-মথং শন্দোরকপগী মচিং অসি কনাগুম্বদা লৈবদা মতম পুম্নমক্তা মহাক্না খুদোংথিবা নংহল্লি।

অদুগা মরূপশিং, অসিগুম্বা পাঙ্গলশিং অসি মুৎখ্রে নত্রগা মমায় লৈথোকখিদবা য়াদদনা লৈথোকখ্রে হায়বসি পুৱারীনা শাখিনি হায়বসি কাওরোইসি। মালেম অসিনা মতম পুম্নমক্তা মসি খংন-উনরবনি অমসুং মসিদা য়ুম্ফম ওইরগা হৌজিক অমুক হন্না মালেম পুম্বনা মথং-মথং শন্দোরকপগী মায়োক্তা লৈখ্রে। ঙসি মথং-মথং চাওখৎলকপদা কত্থোক্লে অমসুং চাওখৎনবগী হাংদোক্লিবা লমজেল অসিবু তরাম্না ওক্লি।

মরূপশিং, ঐহাক্না লৈবাক অসি ঙাক-শেনবগা মরি লৈনবা ৱারেপ অমা হেক্তগী মতাংদা খনবা মতমদা খ্বাইদগী অহানবদা ইমা অনিবু খুরুমজৈ- অহানবদা ঐখোয় পুম্নমক্কী ইমা ভারত অমসুং অনিশুবদা অদোমগুম্বা থৌনা ফবা লান্মীশিংবু পোকপিরিবা ইমাশিংবু, ঐহাক্না ইমা অনিসিবু খুরুমজরি। ঐহাক্কী ৱারেপ অসিগী মসিনা চাংয়েংনি। চাংয়েং অসিদা অদোমগী ইকাই খুম্নবা, অদোমগী ইমুং-মনুংগী ইকাই খুম্নবা অমসুং ভারত ইমাগী ইকাই খুম্নবা অসিনা লৈবাক অসিগী খ্বাইদগী মরু ওইবনি।

লান্মীশিংগীদমক্তা অনৌবা খুৎলাইশিং ওইরো নত্রগা অদোমগী খুৎশু-খুৎলায়শিং ওইরো পুম্নমক অসিগীদমক ঐখোয়না য়াম্না খন্দুনা লাক্লি। হৌজিক লৈবাক অসিদা ঙমখৈগী ইনফ্রাস্ত্রকচরদা চাদি তৌখ্রিবা অসি চাওরাক্না শরুক অহুম হেনখ্রে। মসিদগী ঙনমখৈগী মফমশিং ফগৎহন্বলা অমসুং ঙমখৈদা লম্বিশিং, থোং শান্ননবগী থবকসু য়াম্না য়াংনা তৌরি। মসিগী য়াম্না চাওবা কান্নবা অমসু ফংলি মদুদি হৌজিক অদোম ময়ামশিংদা পোৎশিং অতেনবা মতমদা য়ৌরে।

মরূপশিং, লান্মীশিংদা তেংবাংনবগীদমক মতম শাংনদগী আশা তৌদুনা লাক্লিবা অসি চুফ ওফ দিফেন্সকী ফম শেম্বগী ৱাফম ওইরো নত্রগা पद का गठन करने की बात हो নেস্নেল ৱার মেমোরিয়েল শাবগীনি; ৱান রেঙ্ক ৱান পেন্সনগী ৱারেপ ওইরো নত্রগা অদোমগী ইমুং য়েংশিনবদগী হৌরগা মহৈ-মশিং তমহন্নবফাওবগী অচুম্বা থৌরাংগীদমক লেপ্তনা থবক, লৈবাক অসিনা ঙসি থাক খুদিংমক্তা মাগী লান্মীশিং অমসুং সৈনিকশিংবু মপাঙ্গল কনখৎহল্লি।

মরূপশিং, ভগৱান গৌতম বুদ্ধনা হায়-

থৌনা লৈবগা মরি লৈনবা অসি ৱাশক্কনি, কনভিক্সগীনি। থৌনানা কত্থোকপনি, থৌনানা কম্পেসন্নি। থৌনা অসি চিং লেম্না অমসুং লেপ্পা লৈতনা অচুম্বগী মীচংদা লেপ্পা ঙম্নবগী পারা তম্বিরি। থৌনা অসি অচু্ম্ববু অচুম্বনি হায়বা ঙম্বগী শক্তি অদু পী।

মরূপশিং, লৈবাক অসিগী অতৌবা মচাশিংবু গলৱান তম্পাক্তা চোকথবা নাইদ্রবা থৌনা উৎখিবা, থৌনা-লিংজেল অদুগী মপুং ফাবা মওংনি। লৈবাক অসিনা নখোয়গীদমক চাওথোকচৈ, নখোয় অসি চাওথোকচনিংঙাইগী মশক্নি। নখোয়গা লোয়ননা ঐখোয়গী আই.তি.বি.পি.গী জৱানশিংগী মরূপশিং ওইরো, বি.এস.এফ.কী মরূপ ওইরো, ঐখোয়গী বি.আর.ও. অমদি অতোপ্পা ওর্গনাইজেসনগী জৱানশিং ওইরো অরুবা ফীভমদা থবক তৌরিবা ইঞ্জিনীয়রশিং ওইরো, শিন্মীশিং ওইরো অদোম খুদিংমক্না অঙকপা মওংদা থবক থৌবিরি। মীপুম খুদিংমক্না তেংবাংনদুনা ভারত ইমাবু ঙাক-শেন্নবগীদমক্তা, ভারত ইমাগী থৌগলগীদমক্তা কত্থোক্লি।

ঙসি অদোম পুম্নমক্কী হোৎনমলনা লৈবাক অসিগী খুদোংথিবা ময়াম অসি হনবা লৈতনা পুন্না লান্থেংনমিন্নরি। অদোম পুম্নমক্তগী ইথিল অসি লৌরগা ঐখোয়না পুন্না শিংনবা অসিদা, লুরবদগী লুরবা শিংনবা অসিদা মায় পাকপা ঙম্লি। অদুগুম্বা ভারতকী মমাংদা, অমসুং ঐখোয় পুম্নমক্কী মাংলান ওইরিবা ভারত অদুগীদমক অথোউইবা মওংদা অদোম পুম্নমক্না ঙমখৈদা লৈবাক অসিবু ঙাক-শেল্লি, অদুগুম্বা মাংলানগী ভারত অদু ওইহনগনি। ইরৈচা কোতী ১৩০সু মনিং হন্থনা লৈরোই, মসি ঐহাক্না নখোয়শিংদা থাজবা অসি পীবা লাক্লিবনি। ঐখোয়না পাঙ্গল অমত্তা ওইনা আত্মনির্ভর ভারত শেমগনি, শোইদনা শেমগনি। অদুগা অদোমদগী ইনোৎ অসি ফংবদা আত্মনির্ভর ভারতকী ৱাশক অসি হেন্না মপাহ্গল কনখৎলি।

ঐহাক্না অদোম পুম্নমকপু অমুক্কা থম্মোয়দগী হন্না-হন্না খুরুমজরি, হন্না-হন্না থাগৎচরি। ঐহাক্কা লোয়ননা পাঙ্গল লৈনা হায়বিয়ু-

ভারত ইমানা য়াইফরে

ভারত ইমানা য়াইফরে

বন্দে মাতরম – বন্দে মাতরম – বন্দে মাতরম

থাগৎচরি

*****