టీకా అందుబాటులోకి వచ్చిన వెంటనే, కోవిడ్-19 కు వ్యతిరేకంగా టీకాలు వేయడానికి ప్రణాళిక మరియు సన్నాహాలను సమీక్షించడానికి, ఈ రోజు జరిగిన ఒక ఉన్నత స్థాయి సమావేశానికి ప్రధానమంత్రి శ్రీ నరేంద్రమోదీ, అధ్యక్షత వహించారు.

భారతదేశపు విస్తారమైన మరియు విభిన్న జనాభాకు టీకాలు వేయడం,  మందుల సరఫరా నిర్వహణ, హాని ఎక్కువగా ఉన్న జనాభాకు ప్రాధాన్యత ఇవ్వడం, ఈ ప్రక్రియలో పాల్గొన్న వివిధ ఏజెన్సీల మధ్య సమన్వయం, అలాగే ఈ జాతీయ స్థాయి కార్యక్రమంలో  ప్రైవేటు రంగం మరియు పౌర సమాజం పాత్ర వంటి విషయాల గురించి ప్రధానమంత్రి ఈ సందర్భంగా వివరించారు.

ఈ జాతీయ స్థాయి కార్యక్రమాన్ని సమర్ధవంతంగా నిర్వహించడానికి ప్రధానమంత్రి నాలుగు మార్గదర్శక సూత్రాలను ప్రతిపాదించారు : మొదటి సూత్రం : టీకాలు ప్రారంభించే సమయంలో, ముందుగా హాని కలిగించే సమూహాలను గుర్తించి ప్రాధాన్యత ఇవ్వాలి, ఉదాహరణకు వైద్యులు, నర్సులు, ఆరోగ్య కార్యకర్తలు, వైద్యేతర ఫ్రంట్ ‌లైన్ కరోనా యోధులు మరియు సాధారణ జనాభాలో హాని కలిగించే వ్యక్తులు; రెండవది : “ఎవరికైనా, ఎక్కడైనా” టీకాలు వేయడం జరగాలి, అంటే, వ్యాక్సిన్ వేయడానికి ఎటువంటి నివాస సంబంధిత నిబంధనలు విధించకూడదు; మూడు :  ఆ టీకా సరసమైనదిగా, సార్వత్రికమైనదిగా ఉండాలి - ఏ వ్యక్తిని వదిలివేయకూడదు; మరియు నాలుగు : ఉత్పత్తి నుండి టీకా వరకు మొత్తం ప్రక్రియను సాంకేతిక పరిజ్ఞానంతో నిజ సమయంలో పర్యవేక్షించాలి మరియు మద్దతు ఇవ్వాలి.

అన్నింటినీ అత్యంత సమర్థవంతంగా, సమయానుసారంగా టీకాలు వేయడానికి చేపట్టే ఈ జాతీయ కార్యక్రమానికి వెన్నుముకలా నిలిచే సాంకేతిక పద్ధతులను విస్తృత స్థాయిలో అంచనా వేయాలని ప్రధానమంత్రి అధికారులను ఆదేశించారు.

ఇంత పెద్ద ఎత్తున టీకాలు వేసే ఈ కార్యక్రమానికి సవివరమైన ప్రణాళికను రూపొందించే పని వెంటనే చేపట్టాలని ప్రధానమంత్రి ఆదేశించారు.

టీకా అభివృద్ధి ప్రయత్నాల ప్రస్తుత స్థితిని కూడా ఈ సమావేశంలో సమీక్షించారు.  కోవిడ్ -19 కు వ్యతిరేకంగా టీకాలు వేసే ప్రయత్నాలలో ఉన్నతమైన పాత్ర పోషించాలన్న భారతదేశ నిబద్ధతను ప్రధానమంత్రి ప్రత్యేకంగా పేర్కొన్నారు.

****