মরূপশিং,

খুরুমজরি, অদোম ময়ামগা ৱারী শানবগী তাঞ্জা ফংলে। ঐখোয় পুম্নমক্না ইশাগী পুন্সিদা অকা-অকুম কয়া অমা থেংনৈ। ঐখোয়না খুন্নাই অসিদা হিংলিবা পুন্সি মহিংদা, খুঙ্গংদা, শহরদা তোঙান-তোঙানবা অরুবশিং লাক্তুনা লৈ। অদোম্না য়েংবীয়ু. ঙরাং নোং খাকখি। বিহারদা, উত্তর প্রদেশতা মীওই কয়াগী থৱাই মাংখ্রে। অদুবু মালেম পুম্বদা, অপুনবা মীওইবা জাতিদা অমুক্তদা মতেং পাংনীংবা লৈরগসু অমনা অমগী মতেং পাংবা ঙমদবা অসুক চাউবা অৱাবসি নংগনি হায়বা কনানসু খল্লুদে। অসিগুম্বা তানফম অসিদা অৱাবা ফাওদবা কনাসু লৈরম্লোই। অঙাং ওইরো, অহল ওইরো, নুপী ওইরো নুপা ওইরো, লৈবাক ওইরো মালেম ওইরো মীওই খুদিংমক্না অৱাবসি মায়োক্নরি। তুংদসু করম্বা মতমদা অৱাবসিদগী করম্বা মতমদা নান্থোরক্কদগে হায়বা ঐখোয় খঙদে। হোই, ঐখোয়না মসি ফনবা হিদাক অমা খঙই। মসিগী হিদাক্তি গজ অনি লাপথোক্না লৈনবা। মসিগী হিদাক্তি মায় খুমজিনবা, ফেসকভর নত্ত্রগা গমশা শিজিন্নবনি। কোরোনাগী ভেক্সিন থোরক্ত্রিবফাওবা, তীকা থোরক্ত্রিবফাওবা মসিগী হিদাকসিনা থিংবা ঙমগনি।

মরূপশিং,

ঙসি অদোম ময়ামগা ৱারী শানবা মতমদা, অদোমগী মায়থোংদা নুংঙাইবগী তারিবা মমি, অদোমগী মিৎয়েংগী মমল, অদোমগীনি খনবগী মওংশিং পুম্নমক ঐখোয় পুম্নমক্না উখি। মসিগী থৌরম অসিদা উত্তর প্রদেশকী খ্বাই ময়াম্না খঙনরবা শক্তি লৈরবা মুখ্য মন্ত্রী শ্রী য়োগী অদিত্যনাথজী লৈবীরি, সরকারগী মন্ত্রীশিং, লৈঙাক অসিগা মরী লৈনবা মকোক থোংবা ওফিসিএলশিং লৈবীরি অমদি য়ু.পি.গী জীলাশিংগা শম্নরিবা মরূপশিংসু য়াওবীরি।

হোৎনবগী পাৱর লৈ হায়বসি ঐখোয় পুম্নমক্না খঙই। হোৎনবগী শক্তি অসিনা য়ু.ম্ফম ওইদুনা ভারত সরকারনা প্রধান মন্ত্রী গরীব কল্যান রোজগার অভিয়ান হৌদোকখি। ঙসি মসিগী শক্তি অসিনা ‘আত্মনির্ভর উত্তর প্রদেশ রোজগার অভিয়ান’ অসিবু ইনোৎ হাপ্লি। হায়বদি কেন্দ্র সরকারগী য়োজনা অসি য়ৌগীজীগী সরকারনা ক্বালিতেতিব অমসুং ক্বান্তিতেতিব ওইবা মওং অনিমক্তা পাক-চাউবা মওংদা ওইহনখ্রে।

য়ু.পি. সরকারনা থৌরাংশিং অসিখক্ত হাপচিন্দুনা বেনিফিসরীশিংগী মশিং হেনগৎহনবদা নত্তনা আত্মনির্ভর ভারতগী পান্দমগা লোয়ননা মপুং ওইনা শমজিন্নহনখ্রে। ঐহাক্না দবল ইঞ্জিন হায়না মতম পুম্নমক্তা হায়রিবসি অদোম্না তাবীরমগনি, মসিহা হোৎনরিবসি, ‘আত্মনির্ভর উত্তর প্রদেশ রোজগার অভিয়ান’, অসি মসিগী য়াম্না অথোইবা খুদম্নি। অদুগা য়োগীজীগী লিচিং মখাদা খুদোংথিবদগী খুদোংচাবগী মওংদা ওন্থোক্লিবা অসিদা ঐহাক্না পুংথা থাজৈ, য়োগীজী অমসুং মহাক্কী তীম্না থৱাই-হকচাং য়াওনা হোৎনরিবা অসিদগী অতৈ রাজ্যশিংনসু মসিগী য়োজনা অসিদগী তম্বা য়াবা কয়াসু য়াওগনি, মীওই খুদিংমক্না মসিদগী ইথিল ফংগনি।

অতৈ রাজ্যশিংনসু মখোয়গী লমশিংদুদা অসিগুম্বা য়োজনাশিং অসি পুথোরক্কনি হায়বা ঐনা থাজৈ। অদুগা ঐদি য়ু..পি.গী সাংসদনি। উত্তর প্রদেশতা অসিগুম্বা অফবা থবকশিং অসি পাংথোক্লিবা অসিদা ঐঙোন্দা হেন্না নুংঙাইবা ফাওই। মরমদি মফমদুগী মীশিংগী থৌদাং অসি ঐগীসুনি।

মরূপশিং,

খুদোংথিবা থোকপা মতমদা উবা ফংলিবা থৌনা অসিনা উৎলিবা পাইরক-লৌশিং অসিদগী মায় পাকপা ঙমহল্লি। ঙসি মালেম পুম্বনা কোরোনাগী অসুক চাউবা খুদোংথিবা অসি মায়োক্নরিঙৈগী মতমসিদা উত্তর প্রদেশনা উৎলিবা থৌনা, পাইরক-লৌশিং উত্তুনা মায় পাকপা ফংলিবা, কোরোনাগী খোংজং চংশিল্লক্লিবা মওং, অরুবা ফিভমশিংবু লাকশিল্লিবা মওং অসিনা ঐহাক্না মসিগীশিং অসি হান্না অমুক্তা থৌকখিদ্রিবা, থাগৎনীংঙাই ওইবা মওংনি।

মসিগীদমক্তা ঐহাক্না উত্তর প্রদেশকী নাগরিক কোতি ২৪বু থাগৎলি, মখোয়দা ঐহাক্না নোল্লুকচরি। অদোম্না পাংথোক্লিবা থবক অসি মালেম পুম্বগীদমক্তদি অথোইবনি। উত্তর প্রদেশকী মী মশিং অসিনা মালেমগী চাউর-চাউরবা অখঙ-অহৈশিংবু অঙাকপা ফাওহনবা ঙম্বগী অথোইবা মতিক ময়াই লৈ। য়ু.পি.গী দোক্তর ওইরো, পেরামেদিকেল স্তাফ ওইরো, ৱাইশিৎ-ৱাইশেং তৌবা মী ওইরো, পুলিশ ওইরো, আশা ওইরো, আঙ্গনৱাদী ৱার্কর ওইরো, বেঙ্ক নত্ত্রগা পোস্তওফিসকী মরূপশিং ওইরো, ত্রান্সপোর্ত বিভাগকী মরূপশিং ওইরো, শিন্মী মরূপশিং ওইরো, মীপুম খুদিংমক্না থৱায় য়াওনা মথৌদাং পাংথোক্লি।

য়োগীজী অমসুং মহাক্কী তীম্না মীয়ামগী মীহুৎ ওইরো নত্ত্রগা থৌমী ওইরো ময়াম পুম্নমক্না খ্বাইদগী অথোইবা থবক তৌরি, শিংথানীংঙাই ওইবা থবক তৌরি। অদোম ময়াম্না পুন্না য়ু.পি. অসিবু লুরবা ফিভম অসিবু য়েংশিল্লিবা অসি লাক্কদৌরিবা চহি কয়া-কয়াদা উত্তর প্রদেশকী অঙাং খুদিং, ইমুং খুদিংনা মসিবু য়াম্না চাউথোকচবগা লোয়ননা নীংশিংনহৌরগনি, মতম শাংনা নীংশিংনরগনি।

মরূপশিং,

উত্তর প্রদেশনা হোৎনরিবা অমসুং মায় পাক্না পাংথোকখিবশিং অসি খ্বাইদগী অথোইবা ওইরিবসিগী মরমদি মসি রাজ্য অমত্তংদদা নত্তনা মালেমসিদা লৈরিবা লৈবাকশিংগী খ্বাইদগী চাউবা রাজ্যনি। মসিগী মায় পাকপা অসি য়ু.পি.গী মীশিংনা মশাদা ফাওরি অদুবু করিগুম্বা মশিং অসি অদোম্না খঙলগদি অঙকপা ফাওবিগনি!

মরূপশিং,

ঐখোয়না য়ুরোপকী চাউরবা লৈবাক মরী হায়রগদি-ইংলেন্দ, ফ্রাঞ্চ, ইতলী অমসুং স্পেন্নি! মসিগী লৈবাকশিং অসি চহি ২০০-২৫০ ফাওবা সুপরপাৱর ওইদুনা লাকখি, ঙসিসু মালেমসিদা মখোয়শিং অসিগী মখা পোন্না লৈরি! করিগুম্বা মসিগী অপুনবা মী মশিং অসি পুনশিন্নবা তারগদি কোতি ২৪রোম ওইগনি! ঐখোয়গীদি য়ু.পি. মথন্তদা অপুনবা মী মশিং কোতি ২৪রোম্নি! হায়বদি ইংলেন্দ, ফ্রাঞ্চ, ইতলী অমসুং স্পেন্দ হায়রিবা লৈবাক মরীসিদা মী মশিং অদুম্মুক য়াম্না উত্তর প্রদেশতা লৈ! অদুবু কোরোনা থোক্লকপা অসিদা লৈবাক মরীসিদা পুন্না মীওই লাখ ১গা লিশিং ৩০ শিখিবা মতমদা য়ু..পি.দা শিখ্রবা মী মশিং অসি শুপ্নতগী ৬০০ খক্তনি! কদায়দগী লাখ ১গা লিশিং ৩০গা অদুগা কদায়দগী ৬০০। মী অমত্তং শিবা ওইরসু অৱাবগী মশক্নি।

অদুগা লৈবাক মরীসিনা পুন্না হোৎনবা য়াবা হোৎনরজরবসু মখোয়গী মফমশিংদুদা য়ু..পি.দগী মী মশিং কয়া হেন্না শিখ্রে হায়বসিমসু ঐখোয়না খঙজিনগদবনি। মসিগী লৈবাকশিং অসি হেন্না চাউখৎপা ঙাক্তনি, মখোয়গীদা রিসোর্সশিংসু য়াম্না হেল্লি, মফমদুদা সরকারশিংনা থবকসু অঙম্বা থাক্তা হোৎনবা ঙাক্তনি! অদুম ওইরগসু মখোয়গী নাগরিকশিংবু কনবদা মায় পাকপা ঙমদবা অদু য়ু.পি.না মায় পাক্না পাংথোকপা ঙম্লে!

মরূপশিং,

মতমসিদা ময়ামগী মরকসিদগী অয়াম্বনা অমেরিকাগী ওইরিবা ফিভমগী মতাংদা তাবীরম্লগনি! অমেরিকাগী রিসোর্সশিং, অনৌবা তেক্নোলোজীশিংগী ৱাত্তনা লৈ! অদুম ওইনমক, ঙসি অমেরিকা অসি কোরোনানা হায়নীংঙাই লৈতনা চৈথেং ফংহল্লে।! অমেরিকাগী মী মশিং অসি কোতি ৩৩ মুক্নি অদুগা য়ু.পি.গী মী মশিং অসি কোতি ২৪মুক লৈ হায়বসি অদোমসু নীংশিংবীয়ু! অদুবু হৌজিক ফাওবদা অমেরিকাদা শিখিবা মী মশিং অসি লাখ ১গা লিশিং ২৫রোম শুখ্রে অদুগা য়ু..পি.দনা ৬০০মুক শুখ্রে।

অদুবু য়োগীজীগী উত্তর প্রদেশ সরকার অসিনা নীংথিজনা থৌরাং তৌরমদ্রবা, য়ু.পি.দসু অমেরিকাগী মতৌগুম অমাং-অনা নংলমগনি। ঙসি য়ু.পি.দা মী ৬০০কী মহুত্তা ৮৫০০০ মপুন্সি মাংলমগনি! অদুবু য়ু.পি.গী সরকারনা কন্না হোৎনবসিদগী হৌজিক ফাওবদা য়ামদ্রবদা মীওই লিশিং ৮৫মুক্কী মপুন্সি কনবদা মায় পাক্লে হায়না ঐখোয়না হায়বা য়াই! ঙসি ঐখোয়না নাগরিকশিংগী পুন্সি কনবা ঙম্লিবা অসিমক মশানা অদুম অপেনবা ৱাফম্নি অমসুং লৈবাক অসিনা মশাদা থাজজবগী মওংনি! অদুম ওইরমদ্রগদি এলাহবাদগী সাংসদনা লৈবাক অসিগী প্রধান মন্ত্রী ওইবীরমখিবা মতমদুদা কুম্ভগী মীনা চিক্না-চাইনবা য়াখিদ্রবা মতমদুদা মীওই লিশি-লিশিং শিখিরমখি। মতম অদুদা সরকারদা লৈরম্বশিং অদুনা শিখিবা মী মশিং অসি বোৎশিন্নবা হোৎনখি। অদুবু হৌজিক উত্তর প্রদেশকী মীশিংগী পুন্সি কলহৌরবা মতমসিদা, শোই-ঙাম্নীংঙাই ওইদ্রবকানসিদা য়াম্না নুংঙাইবা ফাওই।

মরূপশিং,

মসিগী মতাংদসু নীংশিংদুনা থমগদবা ৱাফম অমা লৈ। লৈবাক শিন-থুংনা শিন্মী মরূপ, থৌমী মরূপ লাখ ৩০-৩৫মুক্তগী হেনবনা চয়োল খরগী মমাংদা মশা-মশাগী খুঙ্গংদা হল্লকখিবা মওং অদুগীনি। শিন্মী লিশিং কয়া শ্রমিক স্পিসিএল ত্রেন চেলহল্লগা য়ু.পি. সরকারনা অৱাবা নংলবা ঐখোয়গী মীশিংবু হল্লকহনখি। অতোপ্পা রাজ্যদগী লাকখিবা মরূপশিংদগী লায়চৎ অসি শন্দোরকপগী খুদোংথিবা অসি হেন্না লৈরম্মি। অদুবু উত্তর প্রদেশ না অরুবা ফিভম অসি অখাং কনবগা লোয়ননা ঙাক-শেনখি, মহাক্না রাজ্য অসিবু চাউরবা খুদোংথিবা অমদগী নান্থোকহল্লকখ্রে।

মরূপশিং,

য়ু.পি.দা ২০১৭গী মমাংদা লৈরম্বা লৈঙাক অদুনা পাল্লম্বা সরকার অদুদা ফিভম অসি ওইরম্বা তারবদি মতৌ অসিগুম্বা মহৈ ফংনা পাংথোক্কনি হায়বগী ৱাখলফাওবা শাগৎপা ঙম্লম্লোই। হান্না লৈরম্বা সরকার অদু ওইরম্লবদি, হোস্পিতাল শাবগী মিংদা, ফমুংগী মশিংগী মিংদা, শিংনবা অসিবু নাথৈদুনা থম্লমগনি। অদুবু য়োগীজীনা অসিগুম্বা থবক অসি তৌদে। য়োগীজীনা মহাক্কী সরকারনা ফিভম অসি য়াম্না হকচিন্না খঙখি। মহাক্না খঙখি মদুদি অতৈ চাউর-চাউরবা লৈবাকশিংদা ওইরিবা ফিভম অসি য়েংলগা মহাক্কী সরকারনা অতোপ্পা লান্থেং অমা থেংনখি।

ক্বারেন্তাইন সেন্তর ওইরো, আইসোলেসগী খুদোংচাবা ওইরো মসিগীশিং অসি শেমগৎনবগীদমক্তা অঙম্বা থাদুনা হোৎনখি। মখোয়গী মপাবুং লৈখিদবা ওইরগসু মপাবুংগী মঙানিগী লৈহুন্দা চৎপগী মহুত্তা উত্তর প্রদেশকী মীশিংগী পুন্সিমসিগীদমক খঞ্জবা য়োগীজিনা কোরোনাসিদগী মাগী মীশিংবু কন্নবগীদমক অদোম ময়ামগা ৱাখল চুংশিন্না লৈখি। মপান্দগী লাকখিবা শিন্মীংগীদমক্তা মতম য়াম্না চংহন্দনা য়েংশিন্নবা কমিতী লিশিং ৬০ রোম শেমখি। কমিতীশিং অসিনা খুঙ্গংশিংদা ক্বারেন্তাইন সেন্তরশিং শমগৎনবা তেংবাং কয়া অমা পীখি। শুপ্নতগী থা অনি-মখাইখক্তংসিদা কোরোনাগী অনাবশিং লায়েংনবা হোস্পিতালদা ফমুং লাখ থৌরাংখ্রে।

মরূপশিং,

লোকদাউনগী মতমসিদা লায়রবশিংনা চানবগী অৱাবা মায়োক্নদনবগীদমক্তা য়োগীজীগী সরকরানা তৌরিবা থবক অসি হান্না মমাংদা অমুক্তা পাংথোকখিদিবা মওংনি। প্রধানমন্ত্রী গরীব কল্যান অন্ন য়োজনাদগী য়ু.পি. য়াম্না থুনা লায়রবশিং অমসুং খুঙ্গংদা হল্লকখিবা শিন্মী মরূপশিংদা লেম্না রাসন ফংহনখি। হায়বদি লায়রবা কোতি ১৫মুক্না চানবগী অৱাবা মায়োক্নদনবা থবক পায়খৎখি। চারা হেন্দুনা তুমদনবা তৌখি।

মতম অসিদা য়ু.পি.দা লাইরবশিংদা চানবা পোৎলম মেত্রিকতন লাখ ৪২ য়েন্থোকখ্রে। রাসন কার্দ লৈতবশিংদসু য়ু.পি. সরকারনা সরকারগী রাসন দুকানগী থোং হাংখ্রে। মসিদা নত্তনা উত্তর প্রদেশকী লাইরবা নুপী কোতি ৩.২৫দা জনধনগী একাওন্ততগী লুপা কোতি লিশিং ৫রোমদা দাইরেক ত্রান্সফর তৌখ্রে। নীংতম্বা ফংলবা মতুংদা পুৱারীদা সরকার অমত্তনা অসুক চাউবা মওংদা তেংবাং পীখিরম্লোই।

মরূপশিং,

ভারত অসিবু মরোমদোম লেপচবা ঙাম্নবগী লম্বী অসিদা য়াংনা খুমাং চাউশিলহন্নবা অভিয়ান ওইরো নত্ত্রগা গরীব কল্যান রোজগার অভিয়ান ওইরো, উত্তর প্রদেশ অসি য়াম্না মাংজিল থানা চৎলি। গরীব কল্যান রোজগার অভিয়ান্দগী শিন্মীশিংগী চাগা অসি ফগৎহন্নবা পাম্বৈশিং হেনগৎহন্নবগীদমক্তা খুঙ্গংশিংদা থৌরাং কয়া পায়খৎপা হৌগদৌরে। লায়রবশিংগী অফবা য়ুম শানবা ওইরো, ময়ামগী ওইবা তোইলেৎ শানববু ওইরো, পঞ্চায়েৎকী শঙলেন শানববু ওইরো, গুহা-পুখ্রি তৌনববু ওইরো, লম্বী শেম্নববু ওইরো, ইন্তর্নেৎকী লাইন তিংববু ওইরো অসিগুম্বা থবক ২৫গী লিস্ত অমা সরকারনা শেমখ্রে।

ঙসি মসিবু পাক-শন্না পাংথোক্লদুনা মসিদা আত্মনির্ভর ভারত অভিয়ান অসিসু হাপচিন্দুনা উত্তর প্রদেশনা হকথেংননা চাউরাক্না শিন্মী অমসুং থৌমী মরূপ কোতি ৩.২৫দা হকথেংননা থবক পীনবা হোৎনরি। মসিদা লাখ ৬০রোম্না খুঙ্গং চাউখৎনবগী থবক্তা য়াওরি অদুগা লাখ ৪০মুক্না অপীকপা ইন্দস্ত্রীশিং হায়বদি এম.এস.এম.ই.শিংদগী থবক পীরি। মসিদা নত্তনা মশানা থবক পীজবশিংগীদমক্তা ওন্ত্রপ্রিনর লিশিং-লিশিং মুদ্রা য়োজনাদগী লুপা কোতি লিশিং ১০রোমগী পুনবা শেল য়েন্থোকখ্রে। অপুবা শেনগা কোন্ননা ঙসি হেন্দিক্রাফ লিশিং-লিশিং কয়াদা অনৌবা মেছিনশিং অমসুং তুল কীৎশিং পীখ্রে। 

মসিনা হেন্দিক্রাফশিংগী থবক হেনগৎহনগনি অমসুং মখোয়দা কান্নহনগনি। ঐহাক্না বেনিফিসরীশিংদা, থবক ফংলবশিংদা হন্না-হন্না নুঙাইবা ফোংদোকচরি।

মরূপশিং,

য়ু.পি.গী সাংসদ ওইবা মরম্না তত্তনা পাও ফাওনদনা লাক্লি। কোতি ১.২৫গী থৌমীগী, থবক তৌবশিংগী মশক খঙদোক্নবা, শিন্মী লাখ ৩০দগী হেনবগী হৈজ-শিংজবগী, এক্সপরিএন্সকী দেতা থৌরাং তৌবা অমসুং মখোয়গী থবকশিংগী চুনবা মওংদা শেম্বা অসিনা উত্তর প্রদেশ সরকারগী থৌরাং অসি কয়াদা মপুং ফাবগে, কয়াদা পাক-চাউবগে হায়বদু উৎলি। য়ু.পি.গী জীলা অমা, পোত্থোক অমগী য়োজনা অসি হান্নদগী মফমদুগী পোৎশিংবু হেনগৎহন্নবা পুক্নিং থৌগৎলি, মখোয়দা য়াম্না অচৌবা মার্কেৎ ফংহল্লি।

হৌজিক আত্মনির্ভর ভারত অভিয়ান্দগী লৈবাক অসিদা মফম-মফমদুগী পোত্থোকশিংবু হেনগৎহন্নবগীদমক ইন্দস্ত্রীশিংগী ক্লস্তর শেম্লিবা অসিদগী উত্তর প্রদেশ অসিদা কান্নবা য়াম্না ফংহল্লগনি। মসিদগী ফীগী, মুগাগী, শউনগী, শেঞ্জেংগী ওইবা য়াম্লবা ইন্দস্ত্রীএল ক্লস্তরশিং লৈরি, মখোয়শিং অসিগী মপাঙ্গল ফংগনি, অনৌবা মার্কেৎ ফংগনি।

আত্মনির্ভর ভারত অভিয়ান্দগী উত্তর প্রদেশকী লৌমীশিংদা কান্নবা ফংহল্লগনি। লৌমীশিংগী ফগৎনবা, অপীকপা লল্লোন-ইতিক্কী থবক হেনগৎহন্নবা চহি কয়াদগী লেপ্পা লৈতনা শেমদোক্নবা অচৌবা ৱাফম ৩ তান্দুনা লাকখি। হৌজিক কেন্দ্র সরকার অসিনা পুদুনা লাক্লিবা ৱায়েল-পথাপকী সেন্তর ৩ অসি লৌমীশিংগী মন্দিগী মপান্দা মশাগী পোত্থোক অদুয়োনবগী হক ফংলে। হায়বদি মমল নীংথিজনা ফংগদবা মফমদা পোৎ য়োনগনি। অতোপ্পা অমনা লৌমীদুনা পাম্লগদি লৌহোন হুল্লিঙৈগী মতমদগী লৌরোক্কী মমল লেপথোকপা য়াই।

হৌজিক আলুগী পোত্থোক পুথোরক্লিবা লৌমীশিংগা চিপশিং শারিবা ইন্দস্ত্রীশিংগা লোয়ননা, হৈনৌ থারিবা লৌমীশিংনা মেঙ্গো জুইস শেম্লিবশিংগা লোয়ননা, খামেন অশিনবা থারিবা লৌমীনা সোস শেম্বশিংগা লোয়ননা মরু হুনবা মতমদগী য়াশিন্নবা য়ারে। মসিদগী মখোয়না মমল তানা ফংবগী অকিবা অদু লৈহল্লরোই।

মরূপশিং,

মসিদা নত্তনা শা-শন লোইবশিংগীসু থৌরাং কয়া অমা পায়খৎলি। নুমিৎ নিনিগী মমাংদা শা-শন লোইবশিং অমসুংদাইরি সেক্তরগীদমক্তা লুপা কোতি লিশিং ১৫গী অখন্নবা ইনফ্রাস্ত্রকচর শেমখ্রে। মসিদগী চাউরাক্না অনৌবা লৌমীশিংগা শা-শন লোইবা কোতি ১মুক্কা শম্নহল্লগনি,দাইরিগা মরি লৈনবা অনৌবা খুদোংচাবশিং শেমগৎকনি। লাক্কদৌরিবা মতমসিদা খুঙ্গংশিংদা থবক লাখ ৩৫ রোম লৈরবা য়ারি হায়না থাজনরি। নহানখক্তমক কেন্দ্র সরকারনা য়ু.পি.দা তুরিজম্বু খুমাং চাউশিলহন্নবগীদমক মরুওইবা ৱারেপ অমগা অমুক লৌখ্রে। বুদ্ধগী সর্কিৎনা অথোইবা মওংদা য়েংলগা কুশিনগর এয়র্পোর্ত অসি অন্তর্রাস্ত্রীয় এয়রপোর্ত ওইনা লাওথোকখ্রে। মসিদগী উত্তরাঞ্চলদা ফ্লাইৎশিং হেন্না শম্নবা হেলহল্লগনি অমদি মপাঙ্গল কনখৎহল্লগনি অমসুং ইরৈবাক-মীরৈবাক্তগী মহাত্মা বুদ্ধবু থাজনা নীংজরিবা কয়ানা ইরাই লাইনা উত্তর প্রদেশতা লাকপা য়ারগনি। মসিদসু মফমদুগী নহারোলশিংগীদমক্তা থবক অমদি মশানা থবক পীজবশিংগী খুদোংচাবশিং ফংলগনি। অমসুং ত্রান্সপোর্তকী লমগী থোইদোকপা মওং অসি অদোম্নসু খঙবীরি। মসিগী লম অসিদা তাবদগী তারবা, য়াম্বদগী য়াম্লবা মীশিংদা থবক পীরি।

মরূপশিং,

উত্তর প্রদেশ, অসি মতম পুম্নমক্তগী ভারতকী চাউখৎনবগী লমদা খ্বাইদগী মরুওইবা শরুক ওইদুনা লাক্লি। খুঙ্গং-লাইরবা অমসুং লৈবাক অসি হেন্না মপাঙ্গল কনখৎহন্নবগীদমক পুদুনা চৎলিবা মিশন অসিদা উত্তর প্রদেশনা শরুক য়ারিবা অসি মফম অসিদা বি.জে.পি. সরকারনা লাকপদগী লেপ্তনা হেনগৎলক্লি। হৌখিবা চহি অহুম-মখাই অসিদা অচৌবা য়োজনা খুদিংমক্তা উত্তর প্রদেশনা য়াম্না য়াংনা থবক তৌরি। চহি অহুখক্তদা য়ু.পি.দা লায়রবশিংগী অফবা য়ুম লাখ ৩০ হেন্না শাখ্রে। চহি অহুমখক্তং হোৎনদুনা য়ু.পি.না লহ্মাংদা অমা-অশোই তৌদবা মফম ওইনা লাওথোকখ্রে। চহি অহুমখক্তদা মনুং-মপান ফাওনা য়াম্না শেংনা য়ু.পি. নহারোল লাখ ৩দা সরকারগী থবক ফংহনখ্রে। চহি অহুমখক্তং হোৎনদুনা য়ু.পি.দা মমাগী অশিবগী চাং অসি চাদা ৩০ হন্থখ্রে।

মরূপশিং,

চহি কয়াদগী উত্তরাঞ্চলদা ইন্সেফিলাইতিসনা লায়চৎকী মওংদা অৱাবা নংহনখি। পোকপদা ঙাইরিবা অঙাংশিং কয়া অমা নুংঙাইতবা মওংদা লায়না অসিনা নাদুনা শিখি। হৌজিক য়ু.পি. সরকারনা হোৎনদুনা মসিগী লায়নাসিনা নাবা মশিং হন্থহল্লে, শিবগী চাংশু হন্থদুনা চাদা ৯০ ফাওবা হন্থহল্লে। মসিদা নত্তনা মেদিকেল কোলোজ ওইরো নত্ত্রগা আয়ুশমান ভারত অভিয়ান্দগী অতোপ্পা খুদোংচাবশিং ফংহনবদসু য়ু.পি.না শিংথানিঙাই ওইবা থবকশিং তৌরি। মৈ, ঈশিং, লম্বীগুম্বা মরুওইবা খুদোংচাবশিং অসি অমুক্তা তৌখিদ্রিবা মওংদা শেমদোকখ্রে। অনৌবা লম্বী অমসুং এক্সপ্রেসৱে শেম্বদা য়ু.পি.না মাংজিল থারি। অদুগা খ্বাইদগী অচৌবা ৱাফম অমনা ঙসি উত্তর প্রদেশ অসি ইংনা-চিক্না লৈরে, ৱায়েল কাংলোনশিং কাইদনা লৈরে। মরম অসিনা উত্তর প্রদেশতা মালেম অসিগী ইনভেস্তরশিংনা মিৎয়েং থম্লি। সরকারনা লৈবাক অসিগী অমসুং মীরৈবাক্কী ইনভেস্তরশিংবু পুক্নিং চিংশিন্নবগীদমক্তা খোংথাংশিং লৌখৎলি মসিদগী য়ু.পি.না কান্নবা কয়া লৌরি। য়েংবীয়ু, ঙসি মালেম পুম্বনা কোরোনা অসি লান্থেংনরিবা মতম অসিদা য়ু.পি.না মাগী চাউখৎনবগীদমক অচৌবা য়োজনা হৌদোকখ্রে। খুদোংথিবগী অসিবু খুদোংচাবদা ওন্থোকপগী থবক অসি য়ু.পি.না মপুং ফাহনগদৌরে। অদোম ময়াম্বু অমুক্কা হন্না থবক্কী খুদোংচাবশিং অসিগীদমক্তা য়াম্না নুংঙাইবা ফোংদোকচরি!!

হৌজিক কোরোনাগী মায়োক্তা লান্থেংনবগী থবক অসি চত্থরি হায়বসি নীংশিংবীয়ু। থবক চৎপিয়ু অদুবু গজ অনি লাপ্ননা লৈবা, মাইদা মাস্ক উপ্পা অমসুং লেপ্তনা শেংদোক-চামথোকপা অসি য়াম্না মরু ওই। পুন্সি অমসুং পুন্সিনা হিংনবগীদমক্তা ঙাক-শেন্নবগীদমক্তা থেংনরিবা লান্থেং অসিদা উত্তর প্রদেশনা মায় পাক্কনি অদুগা ভারতসু মায় পাক্কনি।

হন্না-হন্না থাগৎচরি!!

*****