ইকাইখুম্নরবা রেবরেন্দ দা. জোশেফ মার থোমা মেত্রোপোলিতান, ইকাইখুম্নরবা ফাদরশিং, মার থোমা চর্চকী চীং লেম্লবা মেম্বরশিং,

অসিগুম্লবা চীং লেম্লবা থৌরমসিদা ৱা ঙাঙবা ফংজবা অসি ঐগীদমক্তদি মমল য়াম্লবা তাঞ্জা অমনি। খ্বাইদগী ইকাইখুম্নরবা দোক্তর জোশেফ মার থোমা মোত্রোপোলিতানগী ৯০শুবা মপোক কুমওনগী অখন্নবা থৌরম অসিদা ঐখোয় পুল্লি। ঐনা মহাক্কী মফমদা য়াইফ-পাউজেল পীজরি অমদি ঐনা মহাকপু পুন্সি নুংশাংবা তেক্ত কায়দনা লৈনবগী ৱাফম থমজরি। দা. জোশেফ মারনা মহাক্কী মপুন্সি খুন্নাইসিগী অমদি লৈবাকসিগী য়াইফনবগীদমক কত্থোক্তুনা লাক্লি। মহাক্না মরুওইনা লায়রবা মুত্থৎপা অমদি নুপীগী পাঙ্গল হেনগৎহনবা হায়বসিদা পুক্নীং চঙদুনা লাক্লি।

মরূপশিং,

মার থোমা চর্চ অসি লোর্দ খ্রিস্তকী তুংইনবা সেন্ত থোমাসকী চীং লেম্লবা ৱাখল্লোনগা নক্নবা মরী লৈ। ভারতনা মতম পুম্নমক্তা মায়কৈ কয়াদগী স্পিরিচুএলয়গী ইথিল তরাম্না ওক্তুনা লাক্লি। সেন্ত থোমাসকী থৌদাং অমদি মহাক্কী তুং ইল্লিবা ভারতকী খ্রিস্তিয়ান ফুরুপ য়াম্না মমল লৈনা লৌই। সেন্ত থোমাসপু ঐখোয়না নোল্লুকপগা পুন্না উই। মহাক্না চুম্না হায়রম্মী, “নোল্লুকপা হায়রিবা লমচৎ অসি অফব থবকশিংদা মতম পুম্নমক্তা মহৈ য়াল্লি”। অসিগুম্বা নোল্লুকপগী ৱাখল্লোন অসিনা মার থোমা চর্চনা ঐখোয়গী ভারত মচাশিংগী মফমদা অফবা অহোংবা অমা পুরক্নবগীদমক থবক তৌদুনা লাক্লি। সেন্ত থোমাস লৌশিং লৈবা মীশক্নি। মার থোমা চর্চনা ভারতকী নীংতম খোঙজঙদা থৌদাং য়ারম্মী। চর্চ অসিনা লৈবাকসিবু পুন্সিনবদা মাঙজিল থানা হোৎনরম্বনি।

চর্চ অসিনা ইমর্জেন্সীগী মায়োক্তা লান্থেংনরম্মী। মার থোমা চর্চ অসিনা ভারতকী ৱাখল্লোনদা মরা তাদুনা লৈখিবা অসি তশেংনা চাউথোকচনিংঙাইনি। চর্চ অসিগী থৌদাংশিং লৈবাক্কী থাক্তা শকখঙখ্রে। মার থোমা চর্চকী হান্নগী মেত্রোপোলিতান, ফিলিপোজ মার খ্রাইসোতোমবু ইং ২০১৮দা পদ্ম ভুষন লান্থোকখ্রে। মহাক্না মীওই কয়াবু পুক্নীং থৌগৎলম্মী।

মরূপশিং,

মালেম অসিনা মালেমগী ওইবা লাইচৎ অমগা অকনবা লান্থেং অমা মায়োক্নরি। কোবিদ-১৯ অসি মীওইবগী পুন্সিদা শীংনবা হকচাঙগী অনাবা অমখক্তা নত্তে। মসিনা ঐখোয়গী হকচাঙ শোক্নিংঙাই ওইবা পুন্সি মহিংদসু পুক্নীং চঙহল্লি। মালেমগী ওইবা লাইচৎ অমা হায়বসিনা মীওইবা খুন্নাই অসিনা লায়েং অমা মথৌ তারে হায়বা তাক্লি। ঐখোয়গী গ্রহ (অপকঙা) অসিদা নুংশি চান্নবা অমদি নুংঙাই য়াইফবা পুরক্নবগীদমক ঐখোয় তৌবা য়াবা তৌসি।

মরূপশিং,

কোরোনা লান্মীশিংনা থৌনা ওইদুনা ভারতনা কোবিদ-১৯বু খোঙফম চেৎনা লান্থেংনরি হায়বসি খঙবদা অদোম হরাওগনি। চহীসিগী ঙল্লিঙৈদা, ভারত্তা ভাইরস অসিগী চৈথেং য়াম্না শাথিগনি হায়না মীওই খরনা হায়রম্মী। অদুবু লৈঙাক্নং লৌখৎখিবা লোকদাউন অমদি অতৈ থৌরাং কয়ানা লোয়ন-লোয়ননা মীয়ামগী ওইবা লান্থেং অমনা, ভারত অতোপ্পা লৈবাকশিংদগী য়াম্না হেন্না ফনা লৈরি। ভারতকী অনাবা ফগৎলকপগী চাং ৱাংখৎলক্লি।

কোবিদ নৎত্রগা অতোপ্পা মরম্না পুন্সি অমা মাঙবা হায়বসি লাইবক থিবনি। অদুম ওইনমক ভারতকী ওইনা কোবিদনা মরম ওইদুনা শিবগী চাং অসি মীওই মিলিয়ন অমদা ১২নি। ৱাফমসিদা ফোঙদোক্নিংলিবদি ইতালীগী মী শিবগী চাং অসি মীওই মিলিয়ন ৫৭৪নি। অমেরিকা, ব্রিতেন, স্পেন অমদি ফ্রান্সকী ফিগরসু ভারত্তকী য়াম্না ৱাংনা লৈ। মীওই করোর ৮৫গী য়ুম ওইরিবা খুঙ্গং লাখ কয়া কোরোনাভাইরসনা শোক্তনা লৈরি।

মরূপশিং,

মীয়ামগী ওইবা লান্থেং অসিনা হৌজিকফাওবদি অফবা মহৈ পীরি অদুবু ঐখোয় লায়না লৈথোকপা য়ারগদ্রা? য়ারোই, কৈদৌঙৈদসু য়ারোই। তশেংবদি, ঐখোয় হেন্নদুম চেকশিনবা মথৌ তাই। মায়খুম উপ্পা, সোসিএল দিস্তেন্সিং, দো গজ কী দুরী (খুদুপ অনিগী অরাপ্পা), মীয়াম তিনবা মফমদগী লাপথোকপা, তোয়না খুৎ হামবা, হায়রিবাশিং অসি মরুওইরি।।

অদুগা তানফমসিদা, ঐখোয় শেন্মিৎলোন চাউখৎপা অমদি ভারত মচা করোর ১৩০গী য়াইফনবা মায়কৈদা মায় ওনশিনবা মথৌ তাই। লল্লোন ইতিক্কী কাংখোঙসু চৎহনবা মথৌ তাই। লৌউ শিংউ চাউখৎহনগদবনি। হৌখিবা চয়োল খরসিদা ভারত লৈঙাক্না শেন্মিৎলোনগা মরী লৈনবা অতেনবা মতমগী অমদি অশাংবা মতমগী ৱাফমশিংগী মতাংদা থবক পায়খৎখ্রে। সমুদ্রদগী হৌরগা তরং ফাওবা, ফার্মদগী হৌরগা ফেক্তরীফাওবা, মীয়ামগী ওইবা অমদি চাউখৎপা পুরক্নবা ফিরেপশিং লৌখ্রে।

আত্মনির্ভর তারত, মরোমদোম লেপচবা ঙম্বা ভারতকী পাউজেলনা ভারত মচা খুদিংমক্কী শেন্মিৎলোন মপাঙ্গল কনখৎহন্দুনা য়াইফবা পুরক্লগনি। থা অমগী মমাঙদা, কেন্দ্রগী কেবিনেতনা প্রধান মন্ত্রী মতস্য সম্পদ য়োজনা অয়াবা পীখি। স্কিম অসিনা ঐখোয়গী ঙা য়োকপগী সেক্তরদা অহোংবা পুরক্কনি। লুপা করোর লিশিং কুন হেনবা শেনফম থাদদুনা স্কিম অসিনা সেক্তর অসিদা ইনোৎ হাপ্নবা পান্দম থম্লি। মসিগী পান্দমসি মপান্দা পোত্থোক থাদোকপদগী লাকপা শেনফম হেনগৎহনবা অমদি মীওই লাখ য়াঙ্খৈমঙা হেনবদা অহেনবা থবক পীবগী খুদোংচাবা পীবসুনি। ঐখোয়না হেন্না ফবা তেক্নোলোজী, মচাক মথুম থমবা অমদি ভেল্যু চেন মপাঙ্গল কনখৎহনবা পাম্মী। কেরলাদা লৈরিবা ঐগী ঙামী ইচিন ইনাউশিংনা স্কিম অসিদগী কান্নবা ফংবা ঙমগনি হায়না ঐহাক্না থাজৈ।

মরূপশিং,

স্পেস সেক্তরদা মৈহৌরোল ওইহৌরগদবা অহোংবা পুরকখ্রে। অহোংবা অসিনা স্পেসকী লনশিং অমদি থৌওংশিং হেন্না ফনা শীজিন্নবা ঙমহল্লগনি। দেতা অমদি তেক্নোলোজী শীজিন্নবগী ফীভম ফগৎলগনি। কেরলাগা নহা কয়া অমদি মরুওইনা খা ভারতকী কহাশিংনা সাইন্স অমদি তেক্নোলোজীগী লমদা থৱায় লুপশিনবগী মতৌ ঐনা উবা ফংই। মখোয়না অহোংবা অসিদগী কান্নবা ফংগনি।

মরূপশিং,

ঐখোয়গী লৈঙাক অসি পুক্নীংগী ইহুল খঙবা অমদি ভারতপু চাউখৎপগী ইঞ্জিন অমা ওইহন্নবগীদমক অশানবা মীৎয়েংনা মতম পুম্নমক্তা লমজিংদুনা চৎলি। ঐখোয়না ঐখোয়গী ফিরেপশিং দিল্লীগী নুংঙাইরবা লৈঙাক্কী ওফিসতগী লৌদে মীয়ামদগী ফংলকপা ফীদবেক্তা য়ুম্ফম ওইরগা লৌই। হায়রিবা ৱাখল্লোন অসিননি ঙসি ভারত মচা পুম্নমক বেঙ্ক একাউন্ত অমমম পায়বা ঙম্লিবসি। ইমুং করোর ৮ হেনবনা মৈখু চেন্দবা চাকখুম শীজিন্নবা ফংলে। ময়ুম মকৈ লৈজদবশিংদা লৈফম চাফম পীনবগীদমক য়ুম করোর ১.৫ হেন্না শাখ্রে।

ভারত অসি মালেমগী খ্বাইদগী চাউবা হকশেলগী স্কিম, অয়ুশমান ভারতকী মপু ওইরি। মীওই করোর অমা হেনবনা মশক থোকপা লায়েং ফংবা ঙম্লে। লায়রবশিংগীদমক মখোয়না লৈরিবা মফম অমা হেক্তদা মতেং পীনবগীদমক ঐখোয়না ৱন নেসন-ৱন রাসন কার্দ স্কিম পুরক্লে। মিদ্দল ক্লাসশিংগীদমক নুংঙাইনা হিংবা ঙম্নবগীদমক ঐখোয়না থৌরাং কয়ামরুম পায়খৎলে। লৌমীশিংগীদমক ঐখোয়না এম. এস. পি. হেনগৎলে অমদি সেক্তর অসিদগী ময়াই চাবা লৌথোক্তুনা মতিক চাবা মমল মখোয়দা ফংহন্নবা থবক পায়খৎলে।

নুপীশিংগীদমক মখোয়না মথৌ তাবা হকশেলগী মচাকশিং ঐখোয়না তোঙান তোঙানবা স্কিমশিংগী খুত্থাঙদা পীনবা হোৎনরি। অদুগা মেতর্নিতী লিভ শাংদোকপদা মখোয়গী শিনফমদা শোকহন্দরে। ভারত লৈঙাক্না লায়নীং, জেন্দর, ফুরুপ, চৎনবী অমদি লোনদা খেন্নবা মীৎয়েং য়েংদে। ভারত মচা করোর ১৩০পু মপাঙ্গল কলহন্নবা ৱাখল্লোননা ঐখোয়বু লমজিংলি অমদি ঐখোয়গী লমজিং মৈরা ‘ভারতকী সংবিধান’না ওইরি।

মরূপশিং,

শেংলবা বাইবলদা অপুনবগী মতাংদা পাক শন্না পল্লি। হৌজিক ময়াম মরক্তা তিন্দুনা লৈবাকসিগী খুমাঙ চাউশিন্নবগীদমক হোৎনমিন্নবগী মতম্নি। ঐখোয়গী থৌওংনা কমদৌনা লৈবাক্কী চাঊখৎলোনদা শরুক য়াগনি হায়বসি খনশি। ঙসিদি ভারতনা হায়রি – ঐখোয় ইরমদমসিদা পুথোকচগনি অমদি ইরমদমগী পোত্থোক লৈগনি। মসিনা য়ুমথোঙ কয়াদা নুংঙাই য়াইফবগী লৈরা চুখৎকদৌরিবনি। ঐখোয়গী লৈবাকসিবু মপাঙ্গল কলহন্নবা লম্বী কয়া লৈ। মার থোমা চর্চনা মখোয়গী ৱাখল্লোনগা চান্ননা হীরমসিদা শোয়দনা লেপখৎলক্কনি অমদি লাক্কদৌরিবা মতমশিংদা ভারতকী চাউখৎপগী লম্বীদা মরুওইবা শক্লোন লৌরক্কনি।

অমুক্কা হন্না, ঐহাক্না ইকাইখুম্নরবা রেবরেন্দ দা. জোশেফ মার থোমা মেত্রোপোলিতানগী মফমদা য়াইফ-পাউজেল পীজরি।

পুম্নমকপু থাগৎচরি। ময়াম ঙমখৈ লৈতনা থাগৎচরি।

***