মাইনোরিতী এফিয়র্সকী য়ুনিয়ন মিনিস্তর মুক্তার অব্বাস নাগবিনা ঙসি হায়খি কোরোনা লাইচৎকী শিংনবনা মরম ওইদুনা সাউদি অরাবিয়া সরকারগী ৱারেপ ইকায়খুম্নদুনা অমসুং মীয়ামগী হকশেলগী য়াইফনবা খন্দুনা , হজ ২০২০ পাংথোক্নবা ভারতকী মুস্লিমশিং সাউদি অরাবিয়াদা চৎতনবা ৱারেপ লৌরে। ঙসি মহাক্না মেদিয়াদা ৱাফম অসি ফোংদোকখিবনি।

মহাক্না হায়খি , মহাক্না সাউদি অরাবিয়াগী হজ অমসুং উমরাহ মিনিস্তর দোক্তর মোহমদ সালে বি তহির বেন্তেনদগী ফোন কোল অমা ঙরাং ফংখি অমসুং কোরোনা লাইচৎনা মরম ওইদুনা ভারত্তগী হজ শরুক য়াগদবা মীওইশিং থারক্তনবা সাউদি অরাবিয়ানা খঙহল্লকখি। ৱাফম অসি মখোয়গা কুপ্না খন্নরে অমসুং মালেম পুম্বা কোরোনা লাইচৎকী অৱাবা মায়োক্নরি হায়বা য়ানরে অমসুং সাউদি অরাবিয়াসু লাইচৎ অসিনা শোকহল্লি।

মিনিস্তরনা হায়খি হজ ২০২০গীদমক এপ্লিকেসন লাখ ২.১৩ ফংখি। হজ শরুক য়াগদবা মীওইশিংনা পীশিনখিবা শেলফমশিং করি অমতা কক্তনা খুদক্তা শেল লোইনা হন্দোক্নবা থবক পায়খৎপা হৌরে। শেলফম অদু এপ্লিকান্তশিংগী বেঙ্ক একাউন্তশিংদা দি বি তিগী খুৎথাংদা ওনলাইন্দা অমুক হন্না পীথোক্কনি।

য়ুনিয়ন মিনিস্তরনা হায়খি চহি অসিদা মেহরাম য়াওদনা হজ পাংথোক্নবা নুপী ২৩০০ চে থাজিল্লকখি। মেহরাম য়াওদনা হজ চৎগদবা নুপী ২৩০০ অদু হজ ২০২০গী থাজিনখিবা মখোয়গী এপ্লিকেসনদা য়ুম্ফম ওইরগা হজ ২০২১ চৎপা য়াগনি। মেহরাম য়াওদনা হজ চৎনবা অনৌবা চে থাজিনখিবা নুপীশিং মথং চহিগী হজ চৎপা য়াগনি।

মুক্তার নগবিনা হায়খি ২০১৯দা ভারতকী মুস্লিম লাখ ২ হজ পাংথোকখি। মসিগী মনুংদা চাদা ৫০ নুপীশিংনি। ২০১৮দা নুপীশিং মেহরাম(নুপা মপাং) য়াওদনা হজ পাংথোকপা য়াবগী অয়াবা সরকারনা পীখিবদগী পুন্না নুপী ৩০৪০ হজ শরুক য়াখি।

হৌখিবা নুমিদাংদা সাউদি অরাবিয়াগী হজ অমসুং উমরাহ মিনিস্ত্রীনা থোকপা চেরোল অমদা হায়খি “কোরোনা লাইচৎ অমসুং মীয়াম পুনবা মফমদা কোরোনাভাইরস শন্দোকপগী অকিবা লৈবদগী চহি অসিগী হজ মাংজৌননা সাউদি অরাবিয়াদা লৈহৌবা তোঙান-তোঙানবা লৈবাকশিংগী অকক্নবা মীওই খর খক হজ পাংথোক্নবা ৱারেপ লৌরে। মসিগী মীয়ামগী হকশেলগী য়াইফনবা অমসুং মীয়াম থাপ্না লৈনবা তঙাইদবা চৎন-কাংলোনশিং ঙাক্নবা হজ পাংথোক্নবা ৱারেপ লৌখিবনি।

*****