ಅಂತಾರಾಷ್ಟ್ರೀಯ ಯೋಗ ದಿನಂದು ರಾಷ್ಟ್ರವನ್ನೇದ್ದೇಶಿಸಿ ಪ್ರಧಾನಿ ಭಾಷಣ

ಯೋಗ ದಿನ ಐಕ್ಯತೆ ಮತ್ತು ಸಹೋದರತ್ವದ ದಿನ ಎಂದ ಪ್ರಧಾನಿ, ಯೋಗದಿಂದ ಕೌಟುಂಬಿಕ ಸಂಬಂಧ ಬೆಸೆಯಲಿದೆ: ಪ್ರಧಾನಿ

ಯೋಗ ಕೋವಿಡ್-19 ವಿರುದ್ಧ ನಮ್ಮ ರೋಗ ನಿರೋಧಕ ಶಕ್ತಿ ಬಲಪಡಿಸುತ್ತದೆ: ಪ್ರಧಾನಮಂತ್ರಿ

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಅಂತಾರಾಷ್ಟ್ರೀಯ ಯೋಗ ದಿನದ ಅಂಗವಾಗಿ ಇಂದು ವಿಡಿಯೋ ಕಾನ್ಫರೆನ್ಸ್ ಮೂಲಕ ರಾಷ್ಟ್ರವನ್ನುದ್ದೇಶಿಸಿ ಭಾಷಣ ಮಾಡಿದರು. ಅಂತಾರಾಷ್ಟ್ರೀಯ ಯೋಗ ದಿನ ಐಕ್ಯತೆ ಅಥವಾ ಒಗ್ಗಟ್ಟಿನ ದಿನ ಎಂದು ಪ್ರಧಾನಮಂತ್ರಿ ಹೇಳಿದರು.  ಇದು ಸೋದರತ್ವದ ದಿನವೂ ಆಗಿದೆ. ಕೋವಿಡ್ -19 ಜಾಗತಿಕ ಆರೋಗ್ಯ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಈ ವರ್ಷ ಅಂತಾರಾಷ್ಟ್ರೀಯ ಯೋಗ ದಿನವನ್ನು ವಿದ್ಯುನ್ಮಾನ ಮತ್ತು ಡಿಜಿಟಲ್ ವೇದಿಕೆಗಳ ಮೂಲಕ ಆಚರಿಸಲಾಗುತ್ತಿದೆ ಎಂದರು

ಜನರು ತಮ್ಮ ಮನೆಗಳಲ್ಲಿಯೇ, ಕುಟುಂಬದೊಂದಿಗೆ ಯೋಗಾಭ್ಯಾಸ ಮಾಡುತ್ತಿದ್ದಾರೆ ಎಂದು ಪ್ರಧಾನಿ ಹೇಳಿದರು.

ಯೋಗ ನಮ್ಮೆಲ್ಲರನ್ನೂ ಒಗ್ಗೂಡಿಸಿದೆ ಎಂದರು.

“ನನ್ನ ಜೀವನ- ನನ್ನ ಯೋಗ” ವಿಡಿಯೋ ಬ್ಲಾಗಿಂಗ್ ಸ್ಪರ್ಧೆಯಲ್ಲಿ ಅತಿ ಹೆಚ್ಚಿನ ಜನರು ಭಾಗವಹಿಸಿದ್ದಾರೆ, ಇದು ಜಗತ್ತಿನಾದ್ಯಂತ ಯೋಗಕ್ಕೆ ಇರುವ ಜನಪ್ರಿಯತೆಯನ್ನು ಪ್ರತಿಬಿಂಬಿಸುತ್ತದೆ’’ ಎಂದು ಅವರು ಹೇಳಿದರು.

“ಇಂದು, ನಾವೆಲ್ಲಾ ಸಾಮೂಹಿಕವಾಗಿ ದೊಡ್ಡ ಪ್ರಮಾಣದಲ್ಲಿ ಒಂದೆಡೆ ಸೇರುವುದರಿಂದ ದೂರ ಉಳಿದು, ನಾವು ಮನೆಗಳಲ್ಲಿಯೇ ನಮ್ಮ ಕುಟುಂಬದೊಂದಿಗೆ ಯೋಗಾಭ್ಯಾಸ ಮಾಡುತ್ತಿದ್ದೇವೆ. ಈ ವರ್ಷದ ಘೋಷ ವಾಕ್ಯ “ಮನೆಯಲ್ಲೇ ಯೋಗ ಮತ್ತು ಕುಟುಂಬದೊಂದಿಗೆ ಯೋಗ” ಎಂಬುದಾಗಿದೆ. ಯೋಗದಿಂದ ಕೌಟುಂಬಿಕ ಸಂಬಂಧ ಬೆಸೆಯುತ್ತದೆ, ಅಂದರೆ ಮಕ್ಕಳು, ವಯಸ್ಕರು, ವೃದ್ಧರು ಸೇರಿ ಇಡೀ ಕುಟುಂಬ ಒಟ್ಟಿಗೆ ಯೋಗಾಭ್ಯಾಸ ಮಾಡುವುದರಿಂದ ಅವರ ನಡುವೆ ಸಂಬಂಧಗಳು ಬೆಸೆಯುತ್ತವೆ ಮತ್ತು ಅದರಿಂದ ಮನೆಯಲ್ಲಿ ಸಾಕಾರಾತ್ಮಕ ಶಕ್ತಿ ಹರಿಯುತ್ತದೆ. ಯೋಗ ಭಾವನಾತ್ಮಕ ಸ್ಥಿರತೆಯನ್ನು ಉತ್ತೇಜಿಸಲಿದೆ’’ ಎಂದು ಪ್ರಧಾನಮಂತ್ರಿ ಹೇಳಿದರು.

“ಯೋಗ ನಮ್ಮ ದೇಹದಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ನಾವು ನಮ್ಮ ದಿನನಿತ್ಯದ ಜೀವನದಲ್ಲಿ ಪ್ರಾಣಾಯಾಮವನ್ನು ಅಳವಡಿಸಿಕೊಳ್ಳಬೇಕು. ಪ್ರಾಣಾಯಾಮ ಯೋಗ ಅಥವಾ ಉಸಿರಾಟದ ಅಭ್ಯಾಸ ನಮ್ಮ ಉಸಿರಾಟದ ವ್ಯವಸ್ಥೆಯನ್ನು ಬಲವರ್ಧನೆಗೊಳಿಸುತ್ತದೆ. ಕೋವಿಡ್ -19 ಸೋಂಕಿನಿಂದ ದೇಹದ ಮೇಲೆ ಪ್ರತಿಕೂಲ ಪರಿಣಾಮಗಳಾಗುತ್ತಿರುವ ಈ ಸಂದರ್ಭದಲ್ಲಿ ಪ್ರಾಣಾಯಾಮ ಅತ್ಯಂತ ಉಪಯುಕ್ತ’’ಎಂದು ಪ್ರಧಾನಮಂತ್ರಿ ಹೇಳಿದರು.

“ಯೋಗ ಒಂದು ಐಕ್ಯತೆಯ ದೊಡ್ಡ ಶಕ್ತಿಯಾಗಿ ಹೊರಹೊಮ್ಮಿದೆ. ಇದು ಮಾನವೀಯ ಸಂಬಂಧಗಳನ್ನು ಇನ್ನಷ್ಟು ಗಟ್ಟಿಗೊಳಿಸುತ್ತದೆ, ಇದು ಯಾರೊಬ್ಬರನ್ನೂ ತಾರತಮ್ಯದಿಂದ ನೋಡುವುದಿಲ್ಲ. ವರ್ಣ, ಬಣ್ಣ, ಲಿಂಗಬೇಧ, ನಂಬಿಕೆ ಮತ್ತು ರಾಷ್ಟ್ರಗಳ ನಡುವೆ ತಾರತಮ್ಯ ಎಸಗುವುದಿಲ್ಲ. ಯಾರು ಬೇಕಿದ್ದರೂ ಯೋಗ ಮಾಡಬಹುದು. ನಾವು ನಮ್ಮ ಆರೋಗ್ಯ ಮತ್ತು ಭರವಸೆಯನ್ನು ಉತ್ತಮಗೊಳಿಸಿಕೊಂಡರೆ, ಇಡೀ ವಿಶ್ವ ಆರೋಗ್ಯಕರದಿಂದ ಮತ್ತು ಮನುಕುಲ ಸಂತೋಷದಿಂದ ಇರುವ ದಿನಗಳು ದೂರವಿಲ್ಲ. ಯೋಗದ ಸಹಾಯದಿಂದ ಖಂಡಿತಾ ಇದನ್ನು ನಾವು ಸಾಧಿಸಬಹುದು’’ಎಂದು ಪ್ರಧಾನಿ ಹೇಳಿದರು.

“ಪ್ರಜ್ಞಾವಂತ ನಾಗರಿಕರಾದ ನಾವು, ಒಂದು ಕುಟುಂಬವಾಗಿ ಮತ್ತು ಸಮಾಜವಾಗಿ ಒಟ್ಟಾಗಿ ಮುಂದುವರಿಯಬೇಕಿದೆ. ನಾವು “ಮನೆಯಲ್ಲಿ ಯೋಗ ಮತ್ತು ಕುಟುಂಬದೊಂದಿಗೆ ಯೋಗ’ ಅನ್ನು ನಮ್ಮ ಜೀವನದ ಭಾಗವನ್ನಾಗಿ ಮಾಡಿಕೊಳ್ಳಲು ಪ್ರಯತ್ನಿಸಬೇಕು. ಆಗ ನಾವು ಖಂಡಿತಾ ಯಶಸ್ವಿಯಾಗುತ್ತೇವೆ, ನಾವು ಖಂಡಿತಾ ವಿಜಯಿಯಾಗುತ್ತೇವೆ’’ಎಂದು ಪ್ರಧಾನಮಂತ್ರಿ ಹೇಳಿದರು.

***