প্রধান মন্ত্রী, শ্রী নরেন্দ্র মোদীনা ঙসি লৈবাক মীয়ামদা ইন্তরনেসনেল যোগ দেগী থৌরমদা ভিদিও কন্ফরেন্সিংগী খুত্থাঙদা ৱা ঙাঙখ্রে‍। প্রধান মন্ত্রীনা হায়, ইন্তরনেসনেল যোগ দে অসি ৱাখল্লোন মান্নবশিং পুনশিন্নবগী নুমিৎনি‍। মসি মচীন-মনাউ ওইবগী নুমিৎনি‍। কোবিদ-১৯গী মালেমগী হকশেলগী ইমর্জেন্সী অমা লৈবসিনা মরম ওইরগা চহী অসিগী ওইনদি ইন্তরনেসনেল যোগ দে অসি ইলেক্ত্রোনিক অমদি দিজিতেল ফম্পাক্তা পাঙথোক্লি‍।

প্রধান মন্ত্রীনা হায়, মীয়াম্না মখোয় মখোয়গী য়ুমদা মখোয়গী ইমুং মনুংশিংগা যোগ শান্নরি‍।

মহাক্না হায়খি, যোগনা ঐখোয়বু পুনশিনহল্লি‍।

মালেমগী মফম পুম্নমক্তগী ‘মাই লাইফ – মাই যোগ’ ভিদিও ব্লোগ্গিং চাংদম্নবদা মীয়াম্না মশীং য়াম্না শরুক য়ারক্লিবসিনা যোগবু মীয়াম্না পাম্নবা হেনগৎলক্লি হায়বা তাক্লি‍, হায়না মহাক্না হায়খি‍।

ঙসিদি ঐখোয় পুম্নমক মীয়াম পুনবা মফমদগী লাপ্না লৈদুনা ঐখোয়গী ইমুং মনুংশিংগা য়ুমদা যোগ শান্নগদবনি‍। চহী অসিগী থিমদি ‘যোগ এত হোম এন্দ যোগ এত ফেমিলী’ হায়বসিনি‍। ইমুং অমদা লৈরিবা অঙাঙ, নহা অমদি অহলশিং পুনশিন্দুনা যোগ শান্নমিন্নবনা মরম ওইরগা যোগনা ইমুং মনুং মরী ফগৎহল্লি অমদি য়ুমদা অফবা ইনর্জী অমা চেলহল্লি‍। যোগনা পুক্নীংগী ইহুলবুসু লাকশিনহল্লি, হায়না পি. এম.না হায়খি‍।

“যোগনা ঐখোয়গী হকচাঙগী ইম্ম্যুন সিস্তেম‍। নহাক্না মহাক্কী নুংতিগী পুন্সিদা প্রনায়মবু য়াওহনগদবনি‍। প্রনায়ম যোগ নৎত্রগা নীংশা হোনবগী শাজেলনা ঐখোয়গী নীংশা হোনবগী সিস্তেমবু মপাঙ্গল কনখৎহল্লি‍। মসি হৌজিক্কী মতমসিগা হেন্নসু চাশিন্নবা অমা ওইরি মরমদি কোবিদ-১৯ ভাইরসনা খ্বাইদগী হেন্না শোকহল্লিবসি হকচাঙগী নীংশা হোনবগী লম্বীদনি,” হায়না প্রধান মন্ত্রীনা হায়খি‍।

প্রধান মন্ত্রীনা হায়, যোগ অসি অপুনবগী শাফু অমা ওইরক্লে‍। মসিনা খেন্নবা থমদবনা মীওইবগী মরীবু হেন্না চেৎশিনহল্লি‍। মসিনা কাংলুপ, কুচু, নুপা-নুপী, লাইনীং অমদি লৈবাক্কী ৱাংমদা লৈরি‍। কনাগুম্বা অমা হেক্তনা যোগবু শীজিন্নবা য়াই‍। করিগুম্বা ঐখোয়না ঐখোয়গী হকশেল অমদি নীংজবগী তরাবু নীংথিনা শেমবা ঙম্লবদি মালেমসিনা মায় পাক্লবা মশা মউ ফবা অমদি নুংঙাই য়াইফবা মীওইবা খুন্নাই অমা উগদবা নুমিত্তু লাপ্লরোই‍। হায়রিবা অসি ফংবদা যোগনা শোয়দনা মতেং ওইগনি‍।

“ৱাখল তারবা মীওই অমা ওইনা, ঐখোয়না ইমুং মনুং ওইনা অমদি খুন্নাই ওইনা মাঙদা লিংজেল মান্ননা চঙশিনগনি‍। ঐখোয়না ‘যোগ এত হোম এন্দ যোগ ৱিথ ফেমিলী’বু ঐখোয়গী পুন্সিগী শরুক অমা ওইহন্নবা হোৎনগনি‍। ঐখোয় শোয়দনা মায় পাক্কনি, ঐখোয় শোয়দনা ঙমগনি”, হায়না প্রধান মন্ত্রীনা মখা তাখি‍।

*****