খুরুমজরি !!

তরুকশুবা য়োগ নুমীৎসিদা অদোম পুম্নমক্কী মফমদা নুংঙাইবা ফোংদোকচরি অমদি য়াইফ পাওজেল পীজরি। অন্তর্রাস্ত্রীয় য়োগ নুমীৎ অসি ঐখোয় ময়াম পুনশিন্ননবগী নুমীৎনি। মসি মালেম অসি মরুপ-মপাং ওইবগী পাওজেলগী নুমীৎনি। মসি মীওইবগী অমত্তা ওইবা মওং ওইবগী নুমীৎনি। ঐখোয়বু শমজিন্নহলক্লিবা, পুন্না পুনশিন্নহল্লিবা অসিসু য়োগননি। লাপ্ননা লৈনহন্দ্রিবা অসিসু য়োগননি।

কোরোনাগী লুরবা মতম অসিদা মালেমপুম্বগী মীশিংবু মাই লাইফ – মাই য়োগ ভিদিও ব্লোগিংগী চাংদম্নবসিদা শরুক য়াহল্লিবসিবা, য়োগগীদমক্তা কয়াদা থৱায় য়াওবা হেনগৎনরক্লিবা, কয়াদা পাক-চাওরবা হায়বসি উৎলি। মরুপশিং কুমসিগী অন্তর্রাস্ত্রীয় য়োগ নুমীৎকী থীম অসি য়োগ এত হোম এন্দ য়োগ ৱিথ ফেমিলী ওইনা থম্লে। ঙসি ঐখোয় পুম্নমক্না পুল্লপ পুনবগী থৌরম অসিদগী লাপ্না, য়ুমদা লৈদুনা ইমুং-মনুংগা লোয়ননা য়োগ পাংথোক্লি। অঙাং, অহল, নহা, ইমুংগী অহলশিং পুম্নমক য়োগনা শমজিন্নহল্লবদি য়ুমদুদা শক্তিগী ইচেল অমা চেলহল্লি। মরম অসিনা হন্দক্কী য়োগ নুমীৎ, ৱাখল্লোনগী ওইবা য়োগগী নুমীৎসুনি, ঐখোয়গী ইমুং-মনুংগী মরি অদুসু ফগৎহন্নবগী নুমীৎনি।

মরুপশিং, তমথিরবা কোরোনাগী লায়চৎ অসিনা য়োগ তৌবগী মথৌ তাবসি হান্নদগী হেলহনবগুম ফাওহল্লে। করিগুম্বা ঐখোয়গী ইম্যুন সিস্তেম অসি মপাঙ্গল কল্লবদি অনাববু মায়থিহনবদা মতেং পাংগনি। ইম্যুনিতী অসি হেনগৎহন্নবা য়োগগী থৌওং কয়া লৈ, মখল কয়াগী আসন লৈ। মদুগী আসন অদুনা ঐখোয়গী হকচাং অসি কনবা হেনগৎহল্লি, ঐখোয়গী মেতাবোলিজম অসিবু হেন্না মপাঙ্গল কনখৎহনগনি।

কোবিদ-১৯গী ভাইরস অসিনা মরুওইনা ঐখোয়গী নিংশা শ্বর হোনবগী কয়াৎশিং হায়বদি রেসপিরেতরী সিস্তেম অসি শোকহল্লি। ঐখোয়গী রেসপিরেতরী সিস্তেম অসি কনখৎহনবদা খ্বাইদগী য়াম্না কান্নহল্লিবসি প্রানায়াম হায়বদি শ্বর হোনবা শান্নবনি। অয়াম্বনা শ্বর হোন্দোক-হোঞ্জিন শান্নবগী প্রানায়াম অসি ময়াম্না হেন্না খংনৈ। মসিনা য়াম্না কান্নহল্লি। অদুবু প্রানায়ামগী মখল কয়া অমা লৈ। মখোয়শিং অদুগী মর্তা শীতলী, কপালভাতি, ভ্রামরী, ভরিস্ত্রগীসু অদুগা অতৈ মশিং থিঙমদবা কয়া অমসু লৈ। য়োগাগী মওংশিং খুদিংমক, তেক্নিক খুদিংমক অসি ঐখোয়গী রেসপিরেতরী সিস্তেম অমসুং ইম্যুন সিস্তেম অনিমকপু কনখৎহনবদা মতেং পাংই। অদোমদা ঐহাক্না য়াম্না মরুওইবা মওংদা ৱাফম অসি হায়জরি মদুদি অদোম্না নুতিগী হকচাং শাজেল তৌবদা প্রানায়াম অসি শোইদনা য়াওবিয়ু অমসুং অমসুং নিংশা শ্বর হঙ্গৎ-হন্দা শান্নবগী প্রানায়ামসিগা লোয়ননা অতৈ প্রানায়ামগী তেক্নিক অসিসু তৌবিয়ু, মসিবু পাংথোকপিয়ু। য়োগগী থৌওংশিং অসিগী ঙসি কোবিদ-১৯না নারবা মী মশিং কয়ানা কান্নবা লৌরি। য়োগনা মখোয়শিংনা লায়না অসি মায়থিহনবদা মতেং ফংলি।

মরূপশিং,

য়োগদগী ঐখোয়না ইশানা ইশাবু থাজবা অমসু নুংগী ওইনা কনখৎহন্দুনা অরুবশিংগা লান্থেংনদুনা মায় পাক পাকপা ঙম্মি। য়োগদগী ঐখোয়না ৱাখলগী শক্তি ফংই, খুদুম চনশিনবা ঙমহল্লি অমদি অখাঙ কনলহল্লি। স্বামী বিবেকানন্দনা হায়বিরম্মি- “ফিদম্নিংঙাই ওইবা মীশক হায়বসি নিংথিজনা কনামত্তা মী লৈত্রবা মফমদসু থবক তৌবা ঙম্মি অমসুং খ্বাইদগী খোংজেল য়াংবা মওংদসু মপুং ফানা শান্তিদা লৈবা ঙম্মি”।

মসি মী অমগীদমক য়াম্না অচৌবা পাঙ্গল ওই। য়াম্না তাইয়োন্নবা মওংদা লৈরকপদা য়াম্না নিংতিনা লৈদুনা, ৱারদুনা মায়থিরে হায়না খন্দবা, চাং পুবা ঙম্বা হায়রিবশিং অসি য়োগদগী ঐখোয়গী পুন্সিদা মফম কনবা ঙম্মি, ঐখোয়গী পুন্সিবু কনখৎহল্লি। মরম অসিনা অদোম্নসু খংবিরম্লগনি, থম্মোয়দা ফাওবিরম্লগনি য়োগ তৌবা মী অদুনা কৈদৌনুংদা অখাং কন্দবা তৌরম্লোই হায়বা।

য়োগ হায়বগী ৱাহন্থোক্তি- ‘সমত্বম্ য়োগ উচয়তে’

হায়বদি চান্নবা মওংদা-চান্নদবা মওংদা, মায় পাকপা-মায়থিবা, নুংঙাইবা-অৱাবা, ওইরিবা মওং খুদিংমক্তা মান্ননা লৈবা, লেংদনা লৈববু য়োগ হায়না কৌবনি।

মরূপশিং,

য়োগনা অফবা গ্রহ অমগীদমক্তা ঐখোয়গী থিজিনবা হেনগৎহল্লি

মসি অপুনবগী শক্তমগীদমক শক্তি অমগী মওংদা থোরকই অমসুং মীওইবগী মরিবু হেন্না

মসিদা মীচং-মীখাই নাইবা লৈতে। মসি জাৎ, কুচু, নুপা-নুপী, থাজবা অমসুং লৈবাকশিংগীনি হায়বা খায়দে।

য়োগ অসি মী অমনা হেক্তা তৌবা য়াই। অদোম্না মথৌ তারিবশিং অসি অদোমগী মতম অদি অহাংবদুনি। য়োগ অসিনা শুপ্নতগী হকচাংদা পাঙ্গল পীবতা নত্তনা ৱাখলগী মচাংসু ফগৎগহল্লি অমসুং ঐখোয়গী ইমাংদা শিংনবা অমা লাকপদা ৱাখলদা থাজবগা লোয়ননা থংনবা ঙমহল্লি।.

মরূপশিং,

করিগুম্বা ঐখোয়না ঐখোয়গী হকচাং অমসুং ৱাখলশিংগী মরি অসি ফগৎহনবা ঙম্লবদি হকচাং ফনা অমসুং নুংঙাইবা মীওইবা ওইনা লৈবগী মায় পাকপা অদুগী মালেম অসিনা শাখি ওইগদবা নুমীৎ অদু লাপশিল্লক্ত্রবনি। য়োগ অসি মসি চপ চানা ওইহনবা ঙমগনি।

মরূপশিং,

ঐখোয়না য়োগদগী থুদোংচাদবা থোরকপা কয়া নিংথিনা ফহন্নবা তৌবা ঙম্বগী মতাংদা ৱা হায়নরি, মালেমসিগী ফননবগী মতামদা হায়রিবসিদা ঐহাক্না লাই ময়ামগী মরক্তগী অথোইবা কৃষ্ণগী কর্ময়োগ অসিসু ঐহাক্না অদোমদা অমুক হন্না নিংশিংহনবা পাম্মি। গীতাদা ভগৱান কৃষ্ণনা য়োগগী মতাংদা শন্দোক্না তাক্লদুনা হায়রি-‘য়োগঃ কর্মসু কৌশলম্’, হায়বদি থবক পাংথোকপদা হৈথোই-শিংথোইনা অসি য়োগনি। ইফিসেন্সী ইন এক্সন ইজ য়োগ। মসিগী মন্ত্র অসিনা মতম খুদিংমক্তা ঐখোয়দা তম্বিরি মদুদি য়োগদগী পুন্সি অসি হেন্না মতিক চাহনবা ঙমহল্লি। করিগুম্বা ঐখোয়না থবক খুদিংমক থকশি-খাশি ঙাক্না তৌরগদি, ঐখোয়গী থৌদাং অসি পাংথোকপা অসিসু য়োগ মখল অমনি।

মরূপশিং,

কর্ময়োগ অসিগী হেন্না শন্দোকপা মওং অমসু লৈরি।

ঐখোয়গীসিদা হায়নবদা-

য়ুক্ত আহার বিরাস্য, য়ুক্ত চেস্তস্য কর্মসু।

য়ুক্ত স্বপনা-ৱ-বোধস্য, য়ুগো ভৱতি দুঃখহা।।

হায়বদি,

অচুম্বা মওংদা চা-থকপা, অচুম্বা মওংদা শান্ন-খোৎনবা, অচুম্বা মওংদা তুম্বা-হৌগৎপগী হৈনবিশিং, অমসুং মাগী থবক, মাগী থৌদাংশিং নিংথিজনা পাংথোকপা অসি য়োগনি। মসিগী কর্ময়োগ অসিনা ঐখোয় খুদিংমকপু খুদোংথিবা খুদিংমকপু অমদি খুদোংচাদবশিংবু থেংনহনবা ঙম্মি। মসিদা নত্তনা ঐখোয়গীসিদা মশাগী ওইবা নত্তবা থবকশিং ওইজবা অমত্তা য়াওদনা পুম্নমক্কী য়াইফনবা তৌবগী ৱাখল্লোন অসিবুসু কর্ময়োগ কৌই। কর্ময়োগকী মসিগী ৱাকল্লোন অসি ভারতকী নুংদা য়াওদুনা লৈরি। মথৌ তারকদা ভারতকী অসিগুম্বা মশাগী ওইজবা থিবা নত্তবা ৱাখল্লোন অসি মালেম পুম্বনা খংন-উনরে।

মরূপশিং,

ঐখোয়না য়োগসি তৌরকপা মতমদা কর্ময়োগকী ৱাখল্লোন্দগী তৌরকপা তারবদি মী ওইবগী মওংদা, খুন্নাইগী ওইবগী মওংদা, লৈবাক্কী ওইবগী মওংদা ঐখোয়গী শক্তি অসি শরুক কয়ামা হেন্না হেনগৎহল্লি। ঙসি ঐখোয়না অসিগুম্বা ৱাখল্লোন অসিদগী ৱাশক শক্কদবনি- ঐখোয়না ঐখোয়গী হকশেলগীদমক্তা, ঐখোয়গী মীশিংগী হকশেলদাগীদমক্তা হোৎনবা য়াবা হোৎনগনি। খুন্নাই অমগী নাগরিক ওইনা ঐখোয়গী ইমুং-মনুং অমসুং খুন্নাইগী মওংদা অমত্তা ওইনা পুনশিন্নদুনা মমাংলোমদা চংশিনমিন্নগনি।

চেকশিন্না লৈবা নাগরিক্কী মওংদা ঐখোয়না ইমুং-মনুং অমদি খুন্নাইগীদমক্তা অমত্তা ওইনা পুনশিন্নরগা মমাংলোমদা চংশিনমিন্নসি।

ঐখোয়না য়োগ এত হোম এন্দ য়োগ ৱিথ ফেমিলী অসি ঐখোয়গী পুন্সিগী শরুক ওইহন্নবা হোৎনমিন্নসি।

ঐখোয় শোয়দনা মায় পাক্কনি, ঐখোয় শোয়দনা থোইগনি। মসিগী থাজবা অসিগা লোয়ননা অদোম পুম্নমকপু য়োগাগী নুমীৎ অসিদা অমুক হন্না য়াইফ-পাওজেল পীজরি।

লোকাঃ সমস্তাঃ সুখিনো ভৱন্তূ।

ওম !!

*****