খুরুমজরি,

আচার্য় শ্রী মহাশ্রমনজী, মহাসভাগী অধ্যক্ষ সুরেশ চন্দ্র গোয়লজী, অমসুং তেক্নোলোজীগী থোংদা থৌরম অসিগা শাগেন্নরিবা অখং-অহৈশিং. মরুপ-মপাং পুম্নমক!

সন্ত প্রৱর আচার্য় শ্রী মহাপ্রজ্ঞজীগী মপোক নুমীৎকী শেংলবা থৌরম অসিদা ঐখোয় ময়াম পুল্লিবা অসি ঐখোয়গী পুম্নমক্কী ওইনা লাইবক ফবনি। মহাক্কী থৌজাল,মহাক্কী য়াইফ-পাওজেল অদু অদোম্না, ঐনা, ঐখোয় ময়াম পুম্নমক্না খংন-উনরি।

সন্ত প্রৱর আচার্য় শ্রী মহাপ্রজ্ঞজীবু খুরুমজদুনা, মহাকপু শ্রদ্ধাঞ্জলি কৎচবগা লোয় ন-লোয়ননা ময়াম পুম্নমকপু য়াইফ পাওজেল পীজরি। ঐহাক্না আচার্য় শ্রী মহাশ্রমনবুসু থোইদোক-হেন্দোক্না থাগৎপা ফোংদোকচরি।

কোরোনাগী ফীভম অসিগী মরক্তসু মহাক্না থৌরম অসিবু তেক্নোলোজীগী থোংদা য়াম্না নিংথিজনা পাংথোকপীরি।

মরূপশিং,

অদোম ময়ামগী মরক্তগী আচার্য় শ্রী মহাপ্রগ্যজীগী সতসঙ্গশিং অমসুং ইন্তর্ভিয়ুশিং অনিমক য়াওবগী খুদোংচাবা ফংহৌবা মীওই কয়া অমা য়াওরি। মতম অদুদা মহাক্কী স্পিরিচুএল ওইবা ইনর্জী অদু শোয়দনা উবা ফংবিরমগনি।

ঐনা অসুম্না হায়রিবসিগী মরমদি ঐনা হিংলিবা পুন্সিদা মসিগী তাঞ্জা অসি আচার্য় শ্রীগী অথোইবা মীনুংশি অমসুং থৌজাল অসি লেপ্তনা ফংদুনা লাক্লি।

ঐনা নিংশিংলি, ঐনা গুজরাৎকী মুখ্য মন্ত্রী ওইবা মতমদা মহাক গুজরাত্তা লাকখি। ঐহাক্না মহাক্কী আহিংশাগী খোংচৎ অদুদা মীওইবগী সেবা তৌবগী অভিয়ান অদুদা য়াওবগী খুদোংচাবা ফংজখি।

মতমদুদা ঐনা আচার্য় প্রৱরগী মমাংদা হায়খি, ‘আদোমগী লম্বি অদু ঐগী লম্বি ওইজনিংই’।

আচার্য় শ্রীনা নুংশিবিবা অদুনা অদোমগী লম্বিসু ঐগী লম্বি ওইরে অদুগা ঐসু আচার্য় শ্রীগী ওইরে।

মরূপশিং,

ঐনা মতম পুম্বা মহাক্কা লোয়নখিবা অদুদা ঐনা খংবা ঙমখি মদুদি মহাক্কুম্বা য়ুগঋশিগী পুন্সিদা মশাগীদমক্তনি হায়বা করিসু লৈতে। মখোয়গী পুন্সি, মখোয়গী ৱাখল্লোন পুম্নমক অসি খুন্নাইগীদমক্ত, মীওইবগীদমক্তনি।

আচার্য় মহাপ্রগ্যজীনা হায়বিরম্মী, ‘ঐ অমদি ঐগী হায়বা ৱাখল্লোন অদু থাদোক্লগদি খুদিংমক নহাক্কী অদুম ওইগনি’।

মহাক্কী লাইৱা, মহাক্কী ফিলোজোফি অদু মহাক্কী পুন্সিদা ময়েক শেংনা উবা ফংখি।

মহাক্কী পুন্সিদা মহাক্কীনি হায়বা করিসু লৈতে অদুবু পুম্নমক মহাক্কীনি হায়বসি ঐখোয় পুম্বনা উনরে।

মহাক্কী পুন্সিদা ‘ওইশিনবা/লৌশিনবা’ অসু পোৎ অমত্তগীসু নৎলমদে অদুবু ‘মীনুংশি’ অসিদি মীপুম খুদিংমক্কিনি।

মরূপশিং,

তাইবংপাল অসিদা পুন্সি অসিনা হিংনবগী ফিলোজোফিদি লায়না ফংই অদুবু অসিগুম্বা মওংদা পুন্সিনা হিংবদি লায়না ফংবা ঙমদে। মসি ইচচম্বা ৱাফম নত্তে। অদুবু ময়ামদগী তোঙানবা মীওইপোক অদুনতা ‘ময়ামদগী তোঙানবা’ অসিনা মীওই-মীতৌ অসি তাকই।

মরম অদুনবু রাস্ত্রকবি রামধারি সিংহ দিনকরনা হায়রম্মি- আচার্য় মহাপ্রজ্ঞজীগী অনৌবা য়াওলগী বিবেকানন্দনি।

মতৌ অসিগুম্না দিগম্বর অসি পারি-পুরিগী অথোইবা সন্ত আচার্য় বিদ্যানন্দজীগা য়েংনবদা দাক্তর সর্বপল্লী রাধাকৃষ্ণনজীগা চাংদম্নবা য়াই।

আচার্য় মহাপ্রজ্ঞজীনা ইখিবা সাহিত্যগী লৈচল অসি থোইদোক-হেন্দোকপা মওংগী ওইখি।

ঐখোয়গী থোইদোক-হেন্দোক্না ইকাই খুম্নরবা অতলজী অসি মশামকসু সাহিত্য অমসুং গ্যানগী মরমদা অদুক্কী মতিক খংলম্মি, মহাক্না তত্তনা হায়বিরম্মি-“ঐ আচার্য় মহাপ্রগ্যগী সাহিত্যগী, মহাক্কী সাহিত্যগী অরুববু, মহাক্কী গ্যান অমসুং মহাক্কী ৱাহৈশিং অসিবু য়াম্না পামজবা অমনি”। মেংলবা ৱাহৈ-খোন্দা, ময়াম্বু শুমহৎপা খোঞ্জেল, ৱাহৈশিং খনবগী চাং পুবা, লাইনা পীথোরকপা থৌজাল ফংলবা মীশক অমা ওইরম্মি।

ঙসিসু আচার্য় শ্রীগী সাহিত্য অসি পাবিরবদি, মহাক্কী ৱাফমলবদি মহাক অসি মহাক্কী নুংদা অথোইবা মীওই কয়াগী মমি তাবগে, মহাক্কী গ্যান অদু কয়াদা পাক-চাওবগে হায়বা খংবা ঙমগনি।

মহাক্না অদুক্কী মতিক হকচিনবা মওংদা স্পিরিচুএলগী মতাংদা ইরম্বা অদুগুম্না ৱাঙুলোন, রাজনিতী, সাইকোলোজি অমসুং ইকোনোমিক্সকী হীরমদা য়াম্না পাক-চাওনা ৱাখল্লোন লৈরম্মি।

হারমশিং অসিদা মহাপ্রজ্ঞজীনা সংস্কৃত, হিন্দী, গুজরাতী, ইংলিশতা লাইরিক ৩০০দগী হেন্না ইরমখি।অদুগা অদোম্না মহাক্কী লাইরিক অদু নিংশিংবিরমগনি-দি ফোমিলি দি নেসন। মসিগী লাইরিক মহাপ্রজ্ঞজীনা দা. এ.পি.জি.অব্দুল কলামজীগা লোয়ননা পুন্না ইখিবনি।

ইমুং অমনা নুংঙাইবা ইমুং অমা করম্না ওইগদগে, নুংঙাইবা ইমুং অমনা অৱাৎ-অপা লৈতবা লৈবাক অমা মতৌ করম্না শেম্বা ঙম্বগে হায়বগী ৱাখল্লোন অসি অথোইবা মীশক অনিসিনা মসিগী লাইরিক অসিদা ইরি।

ঐনা মুখ্য মন্ত্রী ওইরবা মতুংদা দা অব্দুল কলামজীনা গুজরাত্তা লাকখিবা নুমীৎ অদু ঙসিফাওবা নিংশিংলি। মতমদুদা ঐসু মহাক্কা লোয়ননা আচার্য় প্রৱর উন্নবা চৎখি। ঐনা অথোইবা মীশক অনিসিগা লোয়নজবা ফংজহৌখি।

মখোয় অনিমক্না পুন্না লৈমিন্নখিবা অদুদা ঐখোয়গীসিদা ঋশিনা মতৌ করম্না বৈ়জ্ঞানিক ওইবা মীৎয়েং থম্বগে অমসুং বৈজ্ঞানিকনা মতৌ করম্না ঋশিবু খোয়দাজবা ওইবা য়াবগে হায়বদু ঐনা হকথেংননা উবা ফংজখি।

মহাপ্রজ্ঞজীগী মতাংদা দা.অব্দুল কলাম্না হায়বিরম্মি, মহাক্কী পুন্সিগী পান্দমদি- চৎলু, তানশিল্লু অমসুং পীয়ু। হায়বদি লেপ্তনা খোংচৎ চৎলু, গ্যান তানশিল্লু অমসুং অরৈবদু খুন্নাইনা পীয়ু হায়বনি।

মরূপশিং,

মহাপ্রজ্ঞজীনা মহাক্কী পুন্সিদা কিলোমিতর লিশিং-লিশিংগী খোংচৎ অমসুং অতেনবা খোংচৎ চৎলমখি। মহাক্কী পুন্সিগী অরোইবা মতমদা অহিংশাগী খোংচৎ চৎখিরম্মি।

মহাক্না হায়বিরম্মি, ‘থৱাইনা ঐগী ঈশ্বরনি, কত্থোকপনা ঐগী লাইনিংনি, অখাংবা কনবনা পাঙ্গলনি অমসুং অহিংশানা ঐগী লাইনিং লিচৎনি’।

মসিগী পুন্সিগী মওং অসিদা মহাক মশামক্না হিংলমখি অমসুং মীওই লাক্ষ-কোতী কয়াবুসু তম্বিরম্মি। য়োগাদগী মীওই লাক্ষ-কোতী কয়া অমবু মহাক্না অৱাবা ৱাখল খন্দনা হিংনবগী মহৈ অদু তম্বিরম্মি। নুমীৎ অসিগা হেক মথংগী নুমীত্তা অন্তর্রাস্ত্রিয় য়োগাগী নুমীৎ ওইরিবসিসু য়াম্না নুংঙাইবা ৱাফম্নি।

ঐখোয়গী ওইনসু ঐখোয় পুম্বনা মহাপ্রগ্যজীগী ‘নুংঙাইবা ইমুং অমসুং ৱাত্ত পাদবা লৈবাক’ অমা ওইহন্নিংবগী মংলান অদু মপুং ফাহনবদা, মহাক্কী ৱাখল্লোন অদু খুন্নাইসিদা য়ৌহনবদা থৌদাং লৌবা ঙম্বা হায়বসিসু লাইবক ফবনি।

মরূপশিং,

আচার্য মহাপ্রগ্য জীনা ঐখোয় পুম্নমক্তা লাইৱা অমসু পীবিরম্মি। মহাক্কী লাইৱা অদুদি- ‘হকচাং ফবা মীওই, অফবা খুন্নাই, অফবা শেন্মিৎলোন’।ঙসিগী ওইরিবা ফীভম অসিদা মহাক্কী লাইৱা অসিনা ঐখোয় খুদিংমক্তা ইনোৎ হাপ্পিরি।

ঙসি লৈবাক অসিনা মসিগী লাইৱা অসিগা লোয়ননা আত্মনির্ভরগী ৱাশক অদু মমাংলোমদা চংশিল্লি। ঐখোয়গী খুন্নাই অমসুং লৈবাক অসিগী ফীদম অসি ঐখোয়গী ঋশিশিং, মুনিশিংগী থৱাইনা ঐখোয়গী ইমাংদা থম্বিরমখিবা অদু ঐখোয়গী লৈবাক অসিনা য়াম্না থুনা ৱাশক অদু মপুং ফাহল্লগনি। অদোম পুম্নমক্না মংলান অসিবু মপুং ফাহনগনি। অদোম পুম্নমক্না হকচাং ফনা, শোই-ঙামদনা লৈনবা সন্ত প্রৱর আচার্য় শ্রী মহাপ্রজ্ঞজীগী পুন্সিগী পাওজেল অসি অনৌবা মীরোলফাওবা য়ৌবা ঙমহল্লসনু,য়াইফ-পাওজেলশিং অসিগা লোয়ননা ময়াম পুম্নমকপু হায়নিংঙাই লৈতনা থাগৎচরি।