মরূপশিংবু হায়নিংঙাই লৈতনা থাগৎচরি!!

অনলোক-১গী মতুংদা অহানবা ওইনা উন্নবনি। লৈবাক অসিগী রাজ্য অমসুং য়ুনিয়ন তেরিতোরী ২১দা অনলোক-১ অসিদগী খংহৌ-উহৌবশিংগী মতাংদা পাক-শন্না খন্নখ্রে। কোরোনা অসি অচৌবা রাজ্য, অচৌবা শহর খরদনা হেন্না শন্দোরকই হায়বসি শেংলবা ৱাফম্নি। শহর খরদা মী য়াম্না চিনবা, অপীক-অপীকপা য়ুমশিং, লৈরক-খুল্লক্তা লাপথোক্ননা লৈনবা ৱাৎপনা নুমীৎ খুদিংগী মীওই শিশিং-লিশিং কয়া চত্থোক-চৎশিন তৌনবা অসিনা কোরোনাগী লান্থেং অসি হেন্না শিংননিংঙাই ওইহল্লে।

অদুম ওইনমক ইরৈচাশিংনা চেকশিন্না, মফম কয়াশিংদা লৈঙাক অসিনা অখুবা মওংদা থবক পায়খত্তুনা অমসুং কোরোনাবু লান্থেংনরিবশিংবু শৌগৎপনা মরম ওইদুনা ঐখোয়গী ফীভম অসি লাকশিনবা ঙম্বগী ৱাংমা লান্না চৎহন্দ্রি। মতম চানা ত্রেসিং, ত্রিৎমেন্ত অমসুং রিপোর্তিং তৌবনা মরম ওইদুনা ঐখোয়গীসিদা লায়না-লায়চৎ অসিদগী ফগৎলকপগী মশিং অসি লেপ্তনা হেনগৎলক্লি। আই.সি.ইয়ু. অমসুং ভেন্তিলেতর কেয়রগী মথৌ তাবা অসি অনাবশিংনা মথৌ তাবা হন্থরক্লিবা ৱাফম অসি হরাওনিংঙাইনি।

মতম চানা লৌখৎপা খোংথাংশিং অসিগী মরম্না চাওরবা খুদোংথিবশিং অসি থেংনবা ঙম্লিবনি। লোকদাউনগী মতমদা লৈবাক অসিদা লৈরিবা মীয়াম অসিনা চৎন-পথাপ ঙাক্না চৎপা উৎলিবা অসিনা ভাইরস অসি খুদোংথিনিংঙাই ওইবা মওংদা হেনগৎলকপা অসি থিংবা ঙম্লিবনি। লায়েংবগী মওংদবু ওইরো, হেল্থ ইনফ্রাস্ত্রকচরদবু ওইরো নিংথিজনা তম্বিরবা থবক তৌরিবশিংবু ওইরো ঙসি ঐখোয়না লৈরিবা অসি ফীভম ফনা লৈরি।

শুপ্নতগী থা অহুমগী মমাংদা পি.পি.ই.শিং, দাইগ্নোনোস্তিক কীৎশিংগীদমক্তা ভারত্তা খক্তা নত্তনা মালেমগী অতৈ মফমশিংদসু কোইচেন-চেন্নখি হায়বসি অদোম্নসু খংবিরি। ভারত্তসু অকক্নবা স্তোক্তা লৈখি মরমদি ঐখোয় অসি মপুং ওইনা ইম্পোর্তা তাংজবা ওইখি। ঙসি ফীভম অসি মালেম পুম্বগী ওইনা কোতী ১দগী হেনবা পি.পি.ই.শিং অমসুং মাস্ক এন.৯৫ খক্তমক রাজ্যশিংদা য়ৌহনবা ঙমখ্রে। ঐখোয়গীদা দাইগ্নোস্তিক কীৎশিং অসি স্তোক য়াম্না লৈরে অমসুং মসিগী প্রদক্সনগী চাং অসি য়াম্না হংনগৎহনখ্রে।

হৌজিক্তি পি.এম.কেয়র্স ফন্দদগী ভারত্তা শাজবা ভেন্তিলেতরশিং সপ্লাই তৌবা হৌখ্রে।

লৈবাক অসিদা পুন্না কোরোনা তেস্ত তৌনবা লেব ৯০০দগী হেন্না লৈরে, কোবিদ স্পিসিএল ফমুং লাক্ষ-লাক্ষ, ক্বারেন্তাইন অমসুং আইসোলেসন সেন্তর লিশিং-লিশিং লৈরে অমসুং অনাবশিংগী খুদোংচানবগীদমক্তা ওক্সিজেন মরাং কাইনা ফংহনখ্রে। লোকদাউনগী মতম অসিদা মশিং লাক্ষ কয়াদা হ্যুমেন রিসোর্সশিং ত্রেন তৌখ্রে। খ্বাইদগী চাওরবা ৱাফমদি ঙসি লৈবাক অসিগী নাগরিকশিংনা ভাইরস অসিদগী হান্নদগী হেন্না চেকশিনখ্রে, হৈ শিংনা থবক পাংথোকপা হেল্লে। মসি পুম্নমক অসি রাজ্য সরকারগী মতেংদগী, মফম-মফমগী লৈঙাক্লিবশিংগী অহিং-নুংথীল খাক্তনা থবক তৌবদগী ওইথোকপা ঙমহল্লিবনি।

মরূপশিং,

কোরোনাগী মায়োক্তা থেংনরিবা লান অসি মায় পাক্নবা থাজবা পীরিবা ৱাফমশিং অসিগী মরক্তা ঐখোয়না হেল্থ ইনফ্রাস্ত্রকচর, ইনফোর্মেসন সিস্তেমশিং, ৱাখলগী ওইবা তেংবাং অমসুং মীয়াম্না লৌরিবা থৌদাং অসিদা লেপ্তনা ফগৎহনগদবনি।

মরূপশিং,

কোরোনানা নাবা হেঞ্জিল্লকপা অনাবশিংগী মশিং অসি য়েংলগা হেল্থ ইনফ্রাস্ত্রকচর অসি চাওথোকহনবা, পুন্সি খুদিংমক কনবনা খ্বাইদগী অথোইবা মওংদা পাংথোক্কদবনি। মসিগীশিং অসি কোরোনানা নারবা মীওই খুদিংমক্না নিংথিজনা লায়েংলবখক্তদা ওইথোকপা ঙমগনি। মসিগীদমক্তা ঐখোয়না তেস্তিং তৌবদা অহেনবা মীৎয়েং থমগদুনা লায়চৎ অসিনা নারবা মীশিংবু থুনা খংদোক্তুনা আইসোলেসন তৌবা ঙমহনগদবনি। ঐখোয়গী হৌজিক লৈরিবা তেস্তিং তৌবগী চাং অসি মপুং ফানা শিজিন্ননবা অমসুং লেপ্তনা চাওথোকহনগদবনি হায়বা ৱাফম অসি লুনা খনগদবনি।

মরূপশিং,

হৌখিবা থা অনিসিদা ক্বারেন্তাইন অমসুং আইসোলেসন সেন্তর মশিং কয়া লৈহনখ্রে। কনাগুম্বা অনাবা অমফাওবা ফমুংগী খুদোংচাদবা লৈহন্দনবা মসিগী খোংজেল অসি ঐখোয়না হেন্না হেনগৎহনগদনি। কোরোনা থোক্লিবা মতম অসিদা তেলিমেদিসিনগী মরু ওইবা অসি য়াম্না হেনগৎখ্রে। হোম ক্বারেন্তাইন্দা নত্রগা আইসোলেসন্দা লৈবা মরূপ ওইরো নত্রগা অতোপ্পা লায়নানা নাবা মীশিং ওইরো পুম্নমক তেলিমেদিসিনগী কান্নবা অসি ফংননবা ঐখোয়না কন্না হোৎনগদবনি।

মরুপশিং,

করিগুম্বা লায়চৎ অমদগী ঙাকথোক্নবা অচুম্বা ই-পাও অসি য়াম্না মরু ওই হায়বসি অদোম পুম্নমক্না হেন্না থোইনা খংনরবা ৱাফম্নি। মরম অসিনা ঐখোয়গী হেল্পলাইনশিং মতেং পাংবা ঙম্ননবা ওইরো, পাংবা ঙমদনবা নত্তবদা মীৎয়েং থমগদবনি। ঐখোয়গী মেদিকেল অমসুং পেরামেদিকেল স্তাফশিংনা হোসপিতালদা কোরোনাগী লান্থেং অসি থেংনরিবা অসিগুম্না তেলিমেদিসিনগী থোংদগী কোরোনানা নারবশিং অসিবু লমজিং-লমতাকপা ঙম্ননবা, মখোয়শিংবু অচুম্বা ই-পাও পীনবা সেনিয়র দোক্তরশিংগী তীমশিং অসি শেম-শাদুনা থমগদবনি। মসিদা নত্তনা মীয়ামদা নিংথিজনা হেল্পলাইনশিং ফংহনবা ঙম্নবা নহা ওইরিবা ভোলুন্তিয়রশিংগী লাম্নীশিংসু পুনশিনগদবনি।

আরোগ্য সেতু এপকা য়াম্না দাফনলোদ তৌবা রাজ্যশিংদা অফবা মওংদা ফল ফংলি। আরোগ্য সেতু এপ অসি হেন্না য়ৌহন্নবা মশিং য়াম্না মীশিংনা দাউনলোদ তৌনবা লেপ্তনা হোৎনগদনি। লৈবাক অসিদা মোন্সুনগী মতম অসি তপ্না-তপ্না মমাংলোমদা চংশিল্লক্লি হায়বসি ঐখোয়না খংগদবনি। সিজন অসিদা হকশেলগা মরি লৈনবা খুদোংচাদবশিং লৈরিবা অসি লৈহন্দনবা তৌবা অসি য়াম্না মরু ওই, নত্রবদি য়াম্না অচৌবা শিংনবা অমা ওইরকপা য়াই।

মরুপশিং,

কোরোনাগী মায়োক্তা থেংনরিবা লানফম অসি ৱাখলগী ওইবা মওংসু ওইরি। লায়চৎ অসিনা নারক্কনি হায়না কিবদগী থোরকপা স্তিগমাদগী ঐখোয়না ঐখোয়গী নাগরিকশিং অসি মতৌ করম্না নান্থোকহল্লক্কদগে হায়বসিগী মতাংদসু ঐখোয়না কন্না হোৎনগদবনি। কোরোনা অসিবু মায়থিবা পীরম্লিবা মী মশিং অসি য়াম্না য়াম্লে অমদি য়াম্না থুনসু হেনগৎলক্লি হায়বা অসি ঐখোয়বা মীশিংদা থাজহনগদবনি। মরম অসিনা কোরোনানা নাবা ওইরবসু কিরোইদবনি।

কোরোনা ভাইরস ওইরো, ঐখোয়গী দোক্তরশিং ওইরো, অতৈ হেল্থ ৱার্করশিং ওইরো মখোয় পুম্নমক্কীসু খুদোংচাবশিং লেপথোক্তুনা থম্বা অসিসু য়াম্না মরু ওইহনগবনি। মখোয়বু থাক খুদিংমক্তা অশোই-অহাম থোকহন্দবা অসিসু লৈবাক অসিগী থৌদাংনি।

মরুপশিং,

কোরোনাগী মায়োক্তা লান্থেংনবদা খুন্নাই অসিগী মীওই সেক্সনশিংনা হীরম কয়াগা শম্নরিবা মীশিং, সিভিল সোসাইতীগী মীশিংবুসু লেপ্তনা পুক্নিং থৌগৎপীদবনি। মখোয়গী লান্থেং পুম্নমক অসি লৈঙাক্কী থৌদাংসু লৈরি। ঐখোয়গী মীয়াম তীনবা মফমশিংদা, ঐকোয়গী ওফিসশিংদা মাস্ক নত্রগা পেসকোভর, লাপতোক্ননা লৈনবা অমসুং সেনিতাইজেসনগী থবক-থৌওং অসি হঞ্জিন-হঞ্জিন নিংশিংবিগদবনি, মসিদা কনাগুম্বা অমত্তনা চেকশিন্দবা তৌরোইদবনি।

মরুপশিং,

রাজ্য কয়ানা কোরোনাগী মায়োক্তা থেংনরিবা লান্থেং অসি য়াম্না থাগৎনিংঙাই ওইবা মওংদা থবক তৌরি। হায়রিবা রাজ্যশিং অসিদা খ্বাইদগী ফবা মওংদা থবক পাংথোক্লিবশিং অসি খংহনবগী মথৌ তাই। রাজ্য খুদিংমক্না মানা-মানা খংউ-উরুবা অমদি থাহ্গৎনিংবা ৱাফমশিং অদু ৱাখলদা চিংনবা অমত্তা লৈতনা থম্বিগনি। মদুদগী মাংদা লাক্কদৌরিবা নুমীৎশিং অসিদা হেন্না ফবা লাল্লোং শেম্বদা পুম্নমক্না মতেং ওইগনি। মথংগী খন্ন-নৈনবা অসি মখা তানা পাংথোকপিনবা গৃহ মন্ত্রীদা হায়জরি।

*****