অনলোক ১.০ মতুংগী ফিবম অমসুং কোবিদ-১৯ লাইচৎ থেংননবা পায়খৎলিবা থৌরাংগী মতাংদা ভিদিও কনফরেন্সিংগী খুৎথাংদা প্রধান মন্ত্রী শ্রী নরেন্দ্র মোদীনা চীফ মিনিস্তরশিংগা নুমিৎ নিনি ৱারী শানবগী অনিসুবা শরুক ঙসি পাংথোকখ্রে।

প্রধান মন্ত্রীনা হায়খি অচৌবা রাজ্যশিং অমসুং সহরশিংদা ভাইরস অসি পাক-শন্না শন্দোক্লে। মী কুংনা তাবা, থাপ্না লৈবদা খুদোংচাদবা অমসুং মশিং য়াম্লবা মীওই কয়া নোংমগী চৎথোক-চৎশিন তৌবা অসিনা ফিবম অসি ওইরকপনি, অদুবু মীয়ামগী খাংবা কনবা, লৈঙাক্কী শেম-শাবা অমসুং কোরোনা লান্মীশিংগী কৎথোকপা অসিনা লাইচৎ শন্দোরকপা লাকশিনবা ঙম্বনি। মতম চানা খোঙ্গুল লিবা, লায়েংবা অমসুং পাউ পীবদগী অনাবা ফবা মশিং হেনগৎলক্লি। লোকদাউন মনুংদা মীয়াম্না উৎখিবা থকশি-খাসি অদুনা কোবিদ-১৯ শন্দোরকপা হেনগৎলকপা থিংখিবনি।

হকশেলগী মচাক-মথুমশিং ফগৎহনবা

শিংনবা অসি থেংননবা হকশেলগী মচাক-মথুমশিং অমসুং ত্রেনিং ফংলবা মীওইশিং মরাংকাইনা লৈরিবা অসিগী মতাংদা প্রধান মন্ত্রীনা হায়খি লৈবাক অসিদা পি.পি.ইশিং, মাক্সশিং অমসুং চাংয়েং তৌনবা খুৎলাইশিং মরাং কাইনা পুথোক্লে, পি.এম কিয়ার্স ফন্দ শীজিন্নদুনা ভারত্তা শাবা ভেন্তিলেতরশিং ফংহল্লে , আইসোলেসন অমসুং ক্বারেনতাইন সেন্তর লিশিং কয়াদা তেস্তিং লেবশিং, কোবিদ স্পিসিয়েল ফম্মুং লাখ কয়া ফংহল্লে অমসুং ত্রেনিং পীদুনা মেদিকেল স্তাফ কয়া মরাং কাইনা লৈরে। হকশেলগী মচাক-মথুম, ই-পাউ ফংহনবগী থবকশিং, পুক্নিং থৌগৎপা অমসুং মীয়াম শরুক য়াবা হেনগৎহন্নবা থবকশিং অসি লেপ্তনা চৎথবা দরকার ওই।

প্রধান মন্ত্রীনা হায়খি অনাবা মীওইশিং য়াম্না য়াংনা চাংয়েং তৌবা, খোঙ্গুল লিবা অমসুং তোখাইনা থম্বা য়াম্না মরুওই। পাকথোক-চাউথোক্নবা লেপ্তনা হোৎনবগা লোয়ননা হৌজিক লৈরিবা চাংয়েং তৌবা ঙম্বগী ফিবম অসি মপুংফানা শীজিন্নগদবনি। তেলিমেদিসিনগী খুৎথাংদা লমজিংনবা অমসুং ই-পাউ পীনবা সেনিয়র দোক্তরশিংগী অচৌবা কাংবু অমা শেমগৎপা দরকার ওই। হেল্পলাইনশিংগী খুৎথাংদা মতম চানা অচুম্বা পাউশিং শন্দোক্কদবনি অমসুং হেল্পলাইনশিং ফজনা মথৌ পাংথোক্নবা নহারোল ভলুন্তিয়রশিংগী কাংবু অমা শেমগৎপা দরকার ওই।

অকিবা অমসুং ইকায়বা লান্থেংনবা

প্রধান মন্ত্রীনা হায়খি অরোগ্যা সেতু এপ মশিং য়াম্না দাউনলোদ তৌবা রাজ্যশিং অফবা ফল ফংবা উরে। এপ শীজিন্নবা হেনগৎহন্নবা থবক পায়খৎকদবনি । নোংচু থা লাকপা অসিদা মরী লৈনবা হকশেলগী খুদোংচাদবশিং থেংননবা মিকুপ-নাহুম শিংনা লৈগদবনি। ভাইরস অসিগী মায়োক্তা লান্থেংনবদা পুক্নিং-ৱাখল শোন্থদনবা হোৎনগদবনি , ভাইরস অসি মাইথিবা পীদুনা অনাবা ফরবা মশিং য়াম্লবা মীওইশিং ফোংদোক্তুনা মীয়ামদা লৈরিবা অকিবা অমসুং ইকায়বগী লানফম থেংনগদবনি। ঐখোয়গী কোরোনা লান্মীশিং, দোক্তরশিং অমসুং হকশেলগী মীওইশিং মতেং পাংনবা অমসুং শৌগৎনবা ঐখোয়না হোৎনগদবনি। মসিগী লানফম অসিদা জন বাগিদারি অসি তঙাইফদে অমসুং মীয়াম্না মাক্স শীজিন্নবা, মাই কুপশিনবা অমসুং থাপ্না লৈবা অসি লেপ্তনা নিংশিংগদবনি।

চীফ মিনিস্তরশিং ৱা ঙাংখি

ঙসিগী ৱারী শানবা অদুদা মহারাস্ত্রা, তামিল নাদু, দিল্লি, গুজরাত, রাজাস্থান, উত্তর প্রদেস, মৈধ্য প্রদেস, নোংচুপ বঙ্গাল, কর্নাতাকা , বিহার, অন্ধ্র প্রদেস, হরিয়ানা, জম্মু অমসুং কাস্মির, তেলঙ্গানা অমসুং ওরিসা রাজ্যশিং/য়ু.তিশিং শরুক য়াখি।

অসিগুম্বা ৱারবা মতম অসিদা মহাক্কী লমজিং মখাদা ভাইরস অসি থেংননবা লৈবাক অসি অমতা ওইনা পুনশিনবগীদমক চীফ মিনিস্তরশিংনা প্রধান মন্ত্রী থাগৎখি। চীফ মিনিস্তরশিংনা হৌজিক মখোয়গী রাজ্যশিংদা লৈরিবা হকশেলগী মচাক-মথুমশিং অমসুং হেনগৎহন্নবা পায়খৎলিবা থবকশিং, মাংজিল থাদুনা থবক তৌরিবশিংদা পীরবা মতেং, লাইচৎ শন্দোক্লিবা মফমশিং য়েংশিনবগী থবকশিং, মাক্স শীজিন্নবা হেনগৎহন্নবা পায়খৎলিবা খোঙজংশিং অমসুং ময়ুমদা হল্লক্লবা শিন্মীশিং থবক পীনবা হোৎনরিবশিং পাউদমখি।

অনলোক ২.০

চীফ মিনিস্তরশিংগী ৱাফমশিং প্রধান মন্ত্রীনা থাগৎখি। মহাক্না হায়খি ভাইরসকী মায়োক্তা অপুনবা অমগী মখাদা লান্থেংনরিবা অসিনা ঐখোয় মাইপাকপা ঙমগনি লোয়ননা চেকশিন-থৌরাংশিং পায়খৎতুনা শেন-থুমগী থবকশিংসু হেনগৎহনগদবনি। হৌজিক লৈবাক অসি লোকদাউনগী তাঙ্কক অমদা লৈরিবা মরম্না লোকদাউনগী তোকঙাশিং থেংনবা দরকার ওই। হৌজিক ঐখোয় অনলোক্কী অনিসুবা তাঙ্কক্কী ৱাখল খনবা দরকার ওইরে অমসুং ঐখোয়গী মীয়ামদা য়ারিবমখৈ খুদোংচাদবা থোকহন্দনবা খনগদবনি।

মহাক্না হায়খি অথিংবশিং হন্থরকপা, শেন-থুমগী থবকশিং ফগৎলকপা অসি অমুক হিঙ্গৎলকপগী খুদমশিংনি। পোৎ মমল হেনগৎলকপা লাকশিনবা ঙম্লে । রাজ্যশিংনা শেমগৎ-শাগৎপগী থবকশিং হেনগৎহন্নবা থবকশিং পায়খৎকদবনি। অত্মানির্ভর ভারতকী মখাদা পায়খৎপা থবকশিংনা এম.এস.এম.ইশিং, লৌউ-শিংউ অমসুং লৌউ-শিংউগী পোৎথোকশিং য়োনবদা থেংনরিবা অৱাৎপশিং মেনখৎলে। লাক্লিবা থাশিংদা শিন্মীশিংনা থেংনগদবা খুদোংচাদবশিং ফজনা থেংননবা মিকুপ-নাহুম শিংনা লৈবা দরকার ওই।

হোম মিনিস্তরনা হায়খি প্রধান মন্ত্রীগী লমজিং মখাদা হৌজিক ফাওবদা ঐখোয়না ভাইরসকী মায়োক্তা লান্থেংনরিবা লাল অসি মাইপাকলি , অদুবু লাল অসি লোইদ্রি। ঐখোয় অনলোক হৌরে, ঐখোয় চেকশিন্না লৈগদবনি। ইশা ঙাকথোক্নবা চুঙ্গোই অমা ওইনা অরোগ্যা সেতু এপ্প দাউনলোদ তৌনবা মহাক্না চীফ মিনিস্তরশিংদা খঙহনখি।

হেল্থ মিনিস্ত্রিগী ও.এস.দিনা হায়খি লোকদাউনগী তাঙ্ককশিংদা কেস মশিং হেনগৎলকপগী চাং হন্থরকখি অমসুং মখা তানা হৌজিক অনলোক ১.০দসু কেস মশিং হেনগৎলকপগী চাং হন্থরকখি। লোকদাউনগী অফবা ফলশিং ওইনা মশিং য়াম্লবা থৱায় কয়া কনবা ঙমখি , মীয়াম ৱাখল তাহনখি অমসুং হকশেলগী মচাক-মথুমশিং শেমগৎহৌখি। কেস মশিং অমসুং অপুনবা মীশিংগী লাখ ১দা শিবগী চাং খ্বাইদগী নেম্বা মালেমগী লৈবাকশিংগী মরক্তা ভারত য়াওরে।

*****