কেন্দ্ৰীয় গৃহ মন্ত্ৰী শ্ৰী অমিত শ্বাহে কয় যে ভাৰত চৰকাৰে দিল্লীত ক’ভিড-১৯ৰ সংক্ৰমণ বৃদ্ধি ৰোধ কৰিবলৈ পৰ্যাপ্ত পদক্ষেপ গ্ৰহণ কৰিব৷ দিল্লীত অনুষ্ঠিত হোৱা এক সৰ্বদলীয় বৈঠকত সভাপতিত্ব কৰি শ্ৰী অমিত শ্বাহে কয় যে আমি সকলোৱে ঐক্যৱদ্ধভাৱে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত এই মহামাৰীৰ বিৰুদ্ধে যুঁজিব লাগিব৷

কেন্দ্ৰীয় গৃহ মন্ত্ৰীগৰাকীয়ে বৈঠকত এই বুলি কয় যে কেন্দ্ৰীয় চৰকাৰে গ্ৰহণ কৰা সিদ্ধান্তসমূহ তৃণমূল পৰ্যায়ৰ পৰা প্ৰণয়ন কৰা হ’ব৷ শ্ৰী অমিত শ্বাহে দলসমূহৰ কৰ্মীবৃন্দক  দিল্লীবাসীৰ কল্যাণাৰ্থে কেন্দ্ৰীয় চৰকাৰে গ্ৰহণ কৰা পদক্ষেপসমূহ প্ৰণয়নত সহায় কৰিবলৈ আহ্বান জনায়৷ তেওঁ দলসমূহক ৰাজনৈতিক স্বাৰ্থৰ পৰা ঊৰ্ধলৈ গৈ জনস্বাৰ্থৰ বাবে কাম কৰিবলৈ আহ্বান জনায়৷ তেওঁ কয় যে ৰাজনৈতিক ঐক্যৱদ্ধতাই জনসাধাৰণৰ মাজত আশাৰ সঞ্চাৰ কৰিব৷ তেওঁ কয় যে আমি নতুন প্ৰযুক্তিৰ সহায়ত ক’ভিড-১৯ৰ পৰীক্ষণ সামৰ্থ বৃদ্ধি কৰিব লাগিব৷

বৈঠকখনত উপস্থিত আছিল আম আদমী দলৰ শ্ৰী সঞ্জয় সিং, বিজেপিৰ দিল্লী ৰাজ্যিক সভাপতি শ্ৰী আদেশ গুপ্তা, কংগ্ৰেছৰ ৰাজ্যিক সভাপতি শ্ৰী অনিল চৌধুৰী আৰু বিএছপিৰ প্ৰতিনিধিসকল৷ বৈঠকত অংশগ্ৰহণ কৰা নেতাসকলে ক’ভিড-১৯ৰ বিৰুদ্ধে যুঁজিবলৈ কেন্দ্ৰীয় চৰকাৰক সম্পূৰ্ণ সহযোগিতা আগবঢ়াব বুলি জানিবলৈ দিয়ে৷

কালি অনুষ্ঠিত হোৱা বৈঠকখনত বিভিন্ন পদক্ষেপৰ বিষয়ে সিদ্ধান্ত গ্ৰহণ কৰা হয়৷ ইয়াৰে ভিতৰত ৫০০টা পৰিৱৰ্তিত ৰে’ল দবা দিল্লী চৰকাৰক প্ৰদান, ঘৰে ঘৰে স্বাস্থ্য সৰ্বেক্ষণ, আগন্তুক দুটা দিনৰ ভিতৰত পৰীক্ষণ সামৰ্থ দুগুণ আৰু ছদিনৰ ভিতৰত তিনিগুণলৈ বৃদ্ধি কৰা ইত্যাদিয়েই অন্যতম৷ বৈঠকখনত ব্যক্তিগতখণ্ডৰ চিকিৎসালয়সমূহত নিম্ন মূল্যত ৬০% ক’ৰোনা বেডৰ উপলব্ধতা নিশ্চিতিৰো সিদ্ধান্ত গ্ৰহণ কৰা হয়৷

*****

NW/RK/PK/AD/DD/MANN