প্রধানমন্ত্রীগী লোইশঙ

অনলোক ১.০ মতুংদা ওইরক্লিবা ফিবম খন্ননবা প্রধান মন্ত্রীনা চীফ মিনিস্তরশিংগা ৱারী শানখ্রে


ঐখোয়না পুন্সি অমসুং হিংনবা লম্বী অনিমক; হকশেলগী মচাক-মথুমশিং ফগৎহন্নবা, শেন-থুমগী থবকশিং লোয়ননা চাংয়েং তৌবা অমসুং খোঙ্গুল লিবা হেনগৎহন্নবা মিৎয়েং চঙগদবনি : প্রধান মন্ত্রী

মীওই খুদিংমক কন্নবা ঐখোয়না হোৎনরি; হৌজিক লৈবাক অসিদা অনাবা ফরকপগী চাং চাদা ৫০ হেল্লে : প্রধান মন্ত্রী
কোরোনাভাইরসনা মরম ওইদুনা মী খ্বাইদগী য়াম্না শিদবা লৈবাকশিংগী মনুংদা ভারত য়াওরে : প্রধান মন্ত্রী

ইশা, ইমুং-মনুং অমসুং লৈকাই অশোই-অঙাম থোক্তনবা, কনাগুম্বা অমতনা মাক্স উপ্তনা য়ুমদগী মপান থোক্নবা খল্লোইদবনি : প্রধান মন্ত্রী

হন্দক পায়খৎলিবা থবকশিং অসিনা মরম ওইদুনা, ঐখোয় মাংদা চৎখৎনবা পুক্নিং থৌগৎপা অনৌবা ময়োল কয়া হৌজিক শেন-থুমগী ফিবমদা উবা ফংলে : প্রধান মন্ত্রী

রাজ্যশিংদা ওইরিবা ফিবমশিংগী মতাংদা চীফ মিনিস্তরশিংনা পাউদমখি, হৌজিক লৈরিবা হকশেলগী মচাক-মথুমশিং অমসুং হেনগৎহন্নবা পায়খৎলিবা থবকশিংগী মতাংদা খঙহনখি

Posted On: 16 JUN 2020 5:35PM by PIB Imphal

অনলোক ১.০ মতুংদা ওইরক্লিবা ফিবম খন্ননবা ভিদিও কনফরেন্সকী খুৎথাংদা ঙসি প্রধান মন্ত্রী শ্রী নরেন্দ্র মোদীনা চীফ মিনিস্তরশিংগা ৱারী শানখি অমসুং কোবিদ-১৯ লাইচৎ লাকশিন্নবা পায়খৎলিবা থৌরাংশিং খন্নখি। মসি প্রধান মন্ত্রীগা চীফ মিনিস্তরশিংগা ৱারী শানবা তরুকলকসুবনি, মমাংদা মার্চ ২০, এপ্রিল ২, এপ্রিল ১১, এপ্রিল ২৭ অমসুং মে ১১দা পাংথোকখ্রে।

ভাইরস থেংননবা মতম চানা ৱারেপ লৌবা

লাইচৎ অসি লাকশিন্নবা মতম চানা ৱারেপ লৌবদগী লৈবাক অসিদা মসি শন্দোরকপা লাকশিনবা ঙম্বনি হায়না প্রধান মন্ত্রীনা ফোংদোকখি। মহাক্না হায়খি ঐখোয়না হনগৎনা য়েংবা মতমদা, মালেমদা ঐখোয়না কোওপরেতিপ ফেদেরেলিজমগী খুদম অমা উৎলে হায়বা মীয়াম্না নিংশিংগনি।

প্রধান মন্ত্রীনা হায়খি মী খুদিংমক কন্নবা ঐখোয়না হোৎনরি। হৌজিক চৎথোক-চৎশিনগী থবক খুদিংমক হাংদোক্লে, শিন্মী লাখ কয়া মখোয়গী খুঙ্গংশিংদা চৎখ্রে, ভারতমচা লিশিং কয়া মপান্দগী হল্লক্লে অমসুং ভারত অসি মীশিং য়াম্লবসু, মালেমগী অতৈ মফমশিংদা পুন্সিদা শিংনরিবা অদুগুম্বা কোরোনাভাইরস লাইচৎ ভারত্তা ওইদ্রি।

মহাক্না হায়খি ভারতমচাশিংনা উৎলিবা থকশি-খাসি মালেমগী হকশেলগী অখঙ-হৈশিংনা থাগৎলি, হৌজিক ভারতকী অনাবা ফরকপগী চাং চাদা ৫০ হেল্লে। কোরোনাভাইরসনা মরম ওইদুনা মী খ্বাইদগী য়াম্না শিদবা লৈবাকশিংগী মনুংদা ভারত য়াওরে। মসিগী অচৌবা মরমদি ঐখোয়না থকশি-খাসি ঙাক্লপা অমসুং নিয়মশিং ইনবদগীনি, মসিনা কোরোনাভাইরসনা খজিক্তং শোকহনগনি। কনাগুম্বা অমতনা মাক্স উপ্তনা মপান থোক্লোইদবনি। মসি মীওই অদু খক্তগী মরুওইবা নত্তে মসি মহাক্কী ইমুং অমসুং লৈকাইগীসু য়াওরিবনি। মীয়াম্না ‘দো গজ দুরি’, সাপোন্না খুৎ হাম্বা অমসুং সেনিতাইজর শীজিন্নবা কাউরোইদবনি। থকশি-খাসিদা কোমথোকপনা ঐখোয়না ভাইরস অসি লান্থেংনবদা শোন্থগনি।

শেন-থুমগী অনৌবা ময়োলশিং

প্রধান মন্ত্রীনা হায়খি মমাংগী চয়োলদা পায়খৎখিবা থবকশিং অদুদগী শেন-থুমদা অনৌবা ময়োলশিং চোংলকপা উরে, মৈ শীজিন্নবা হেনগৎলে, চহি অসিগী মে থাদা হার য়োনবা হেনগৎলে, মমাং চহিগা চাংদম্নবদা কালেন লৌরোক্কী মরূ-মরাং হুনবা হেনগৎলে, লোকদাউন মমাংদা লৈরম্বা চাংদা দিজিতেল পেমেন্ত হেনগৎলে, মে থাদা তোল খোমগৎপা হেনগৎলে অমসুং মপান্দা পোৎ থাদোকপা হৌরে। হায়রিবা খুদমশিং অসিনা ঐখোয়গী পুক্নিং থৌগৎলে।

অত্মানির্ভর ভারত অভিয়ানগী কান্নবশিং

প্রধান মন্ত্রীনা হায়খি অত্মানির্ভর ভারত অভিয়ানগী কান্নবা ফংলিবা রাজ্যশিংদা লৌউ-শিংউ, হোর্তিকলচর, ঙা য়োকপা অমসুং এম.এস.এম.ইশিংগী থবকশিং হেনগৎলক্লে। এম.এস.এম.ইশিংদা বেঙ্করস কম্মিতিগী খুৎথাংদা করিগুম্বা য়াম্না য়াংনা শেন্থং পীথোক্লবদি হায়রিবা ইন্দস্ত্রিশিং অদুনা য়াম্না য়াংনা থবক পায়খৎতুনা থবক ফংহনবা ঙমগনি। ললোন-ইতিক অমসুং ইন্দস্ত্রিগী অৱাৎপশিং মেনখৎনবা ভেলু চেনশিং পুন্না থবক তৌমিন্নবা মরুওই। রাজ্যশিংদা অকক্নবা শেন-থুমগী থবকশিং নোংমদা পুং ২৪ থবক তৌগদবনি অমসুং মখা তানা শেন-থুমগী থবকশিং ফগৎহন্নবা পোৎ হাপ্পা অমসুং পোৎ থাবগী থবকশিং থুজিনহনগদবনি।

প্রধান মন্ত্রীনা হায়খি লৌউ-শিংউগী থবকশিংদা অওনবা পুরক্তুনা লৌমীশিংদা কান্নবা ফংহনগদবনি, লৌমীশিংগী শেন্থোক হেনগৎলক্লবদি ইকোনোমিদা দিমান্দ হেনগৎলক্কনি। অৱাং-নোংপোক অমসুং ত্রাইবেলশিংগী মফমশিংদগী পুথোরকপা ওর্গনিক ওইবা পোৎথোকশিং, ৱাগী পোৎথোকশিং অমসুং ত্রাইবেলগী পোৎথোকশিং য়োন্নবা অনৌবা কৈথেলশিং লিংখৎকদবনি। রাজ্যশিংনা মফম অদুগী পোৎথোকশিং কান্নবা লৌগদবনি অমসুং পোৎথোক হেন্না পুথোক্নবা অমসুং ফজনা য়োন্নবা ব্লোক অমসুং দিস্ত্রিক্কী থাক্তা হায়রিবা পোৎথোকশিং অসি মশক খঙদোক্নবা হোৎনগদবনি। অত্মানির্ভর ভারত অভিয়ানগী মখাদা লাউথোকখিবশিং অদু থবক ওইনা পাংথোক্নবা পুন্না থবক তৌমিন্নবা দরকার ওই।

চীফ মিনিস্তরশিং ৱা ঙাংখি

নুমিৎ নিনি চৎথগদবা ৱারী শানবা অসিগী ঙসিগী অহানবা শরুক্তা পঞ্জাব, অসম, কেরলা, উত্তরখান্দ, ঝারখান্দ, ছতিসগর , ত্রিপুরা, হিমাচল প্রদেস, চন্দিগর, গৱা, মনিপুর, নাগালেন্দ, লাদাখ, পুদুচেরি, অরুনাচল প্রদেস, মেঘলয়, মিজোরম, অন্দমান অমসুং নিকোবর ইথৎশিং, দদ্রা নাগর হাভেলি অমসুং দমান দিয়ু, সিক্কিম অমসুং লক্ষদ্বিব শরুক য়াখি।

অসিগুম্বা ৱারবা মতম অসিদা মহাক্কী লমজিং মখাদা ভাইরস অসি থেংননবা লৈবাক অসি অমতা ওইনা পুনশিনবগীদমক চীফ মিনিস্তরশিংনা প্রধান মন্ত্রী থাগৎখি। চীফ মিনিস্তরশিংনা হৌজিক মখোয়গী রাজ্যশিংদা লৈরিবা হকশেলগী মচাক-মথুমশিং অমসুং হেনগৎহন্নবা পায়খৎলিবা থবকশিংগী মতাংদা খঙহনখি। মখোয়না পায়খৎলিবা মীয়াম ৱাখল তাহন্নবা খোঙজংশিং, ময়ুমদা হল্লক্লবা শিন্মীশিং থবক পীনবা হোৎনরিবশিং, অরোগ্যা সেতু এপ্প শীজিন্নবা অমসুং রাজ্যশিংদা শেন-থুমগী থবকশিং অমুক হৌনবা হোৎনরিবশিং পাউদমখি।

পুন্সি অমসুং হিংনবা লম্বীদা মিৎয়েং থম্বা

চীফ মিনিস্তরশিংগী ৱাফমশিং প্রধান মন্ত্রীনা থাগৎখি। পুন্সি অমসুং হিংনবা লম্বীদা মিৎয়েং থম্বগী মরুওইবা অদু মহাক্না ফোংদোকখি । মহাক্না হায়খি অতোপ্পা অমদা, চাংয়েং তৌনবা অমসুং খোঙ্গুল লিনবা হকশেলগী মচাক-মথুমশিং ফগৎহনবা দরকার ওই অমসুং শেন-থুমগী থবকশিংসু হেনগৎহনগদবনি। হৌজিক অমসুং তুংগী দরকার ওইবা অনিমক য়েংলগা ৱারেপশিং লৌগদবনি।

হৌজিক ভাইরস অসিগী অকিবা লোইদ্রি অমসুং শেন-থুমগী থবক পায়খৎপা মতমদা মীকুপ-নাহুম শিংবা দরকার ওই হায়না মহাক্না লুচিংবশিংদা খঙহনখি।

হোম মিনিস্তর অমিত সাহনা হায়খি হৌজিক ফাওবদা ঐখোয় লাইচৎ অসিগী মায়োক্তা মাইপাক্লবা লানফম অমা শোক্নরি, মাংদা লৈরিবা লম্বী অসি য়াম্না শাংলি অমসুং মাক্স শীজিন্নবা অমসুং দো গজ দুরিগী মতাংদা প্রধান মন্ত্রীনা পীরিবা পাউতাকশিং খুদিংমক্না ইনগদবনি।

শেম-শারিবশিং অমুক হনগৎনা য়েংবা

কোবিদ-১৯ থেংননবা ভারতনা পায়খৎলিবা থবকশিং সেনিয়র মিনিস্তরশিং অমসুং ওফিসিয়েলশিংগা লোয়ননা প্রধান মন্ত্রীনা জুন ১৩দা মীফম অমা পাংথোক্তুনা অমুক হন্না য়েংশিনখি। মীফম অদুদা লাইচৎ অসিগী মতাংদা লৈবাক অসিদা পায়খৎলিবা থবকশিং অমুক হন্না য়েংশিনখি।

অপুনবা কেসশিংগী শরুক অহুম থোকপগী শরুক অনি রাজ্য ৫দা থেংনরি অমসুং কেস অয়াম্বা অচৌবা সহরশিংদা লৈরি। অচৌবা সহরশিংনা থেংনরিবা অৱাবশিং য়েংলগা, চাংয়েং তৌনবা খুদোংচাবশিং, ফম্মুংশিং অমসুং লায়েংবগী থবকশিং হেনগৎহন্নবা খন্নখি।

সহর অমসুং জিলাগী ওইনা দরকার ওইরিবা হোস্পিতালগী ফম্মুংশিং/আইসোলেসনগী ফম্মুংশিংগী মতাংদা ইমপ্বার গ্রুপনা পুখৎলকপা ৱাফমশিং প্রধান মন্ত্রীনা খঙজিনখি অমসুং রাজ্যশিংগা তান্নরগা খুদক্কী ওইবা থৌরাং পায়খৎনবা হেল্থ মিনিস্ত্রিগী ওফিসিয়েলশিংদা খঙহনখি। কুমগী নোং চুবা হৌরকপা অসিনা মরম ওইদুনা চুনবা থবকশিং পায়খৎনবা থৌরাং তৌনবা মহাক্না মিনিস্ত্রিদা পাউতাক পীখি।

*****



(Release ID: 1631983) Visitor Counter : 259