খুরুমজরি! চহি ১২৫ মাই পাক্না মপুংফারকপদা অহানবদা ময়াম পুম্নমক থাগৎপা ফোংদোক্লি। চহি ১২৫গী খোঙচৎ অসি য়াম্না শাংই। মসিদা খুমাং চাউশিনবা কয়া লৈরমগনি ; নহাক্না অকা-অকুম কয়া মায়োক্নরমগনি, অদুবু লুপ অমা চহি ১২৫ হিংহনবা হায়বদি য়াম্না চাউবা থবক অমনি। লুপ অসি অহোংবা কয়া লৈখ্রে, থবক থৌরমশিং হোংলে। চহি ১২৫ অসিদা সি.আই.আই. মপাঙ্গল কনখৎহনবদা মতেং পাংখিবা হান্নগী য়াওনা লময়ানবশিং অহানবদা ঐনা থাগৎপা পাম্মি। ঐখোয়গী ইরক্তা মখা তানা লৈত্রবশিং ঐনা ইকায়খুম্নবা উৎলি অমসুং তুংগীদমক ফম পায়হৌগদবা মীওইশিং ঐনা য়াইফ-পাউজেল পীজরি।

কোরোনা লাইচৎ লাকপদগী অসিগুম্বা ওনলাইনগী থৌরমশিং অনৌবা চৎনবী অমা ওইরে। খুদোংথিবা খুদিংমক্তগী নান্থোক্নবা লম্বী অমা থিবা অসিসু মীওইবগী খ্বাইগী কনবা থৌনানি। অমরোমদা, হৌজিক ঐখোয়না ভাইরস অসি থেংননবা অকনবা থবকশিং পায়খৎলি, অমরোমদা, ঐখোয়না শেন-থুমগী চেকশিন-থৌরাং পায়খৎলি। অমরোমদা, ঐখোয়না মীয়ামগী পুন্সি কয়া কনবা অমসুং অতোপ্পা অমদা ঐখোয়না লৈবাক্কী শেন-থুমগী ফিবম ফনা লৈহন্নবা দরকার ওইরি। মসিগী ফিবম অসিদা নখোয়না অমুক হন্না চাউখৎপগী খোঙজেল হেনগৎহন্নবা পুথোরক্লিবা ৱাফম অসি থাগৎনিঙাইনি। ঐখোয় শোইদনা অমুক হন্না ফিবম ফগৎলকখিগনি। হৌজিক ওইরিবা ফিবম অসিদা ঐনা য়াম্না থাজনা মসি হায়বা অসিদা নখোয় খরনা অঙকপা পোক্লমগনি।

ঐনা থাজবা থম্বগী মরম কয়া লৈরি। ভারতকী থবক পাংথোকপা ঙম্বা অমসুং অৱাবা ময়োক্নবা ঙম্বা অসিদা ঐ থাজবা থম্লি। ভারতকী লৌশিং অমসুং তেক্নোলোজীদা ঐ থাজবা থম্লি। ভারতকী অনৌবা পুথোকপা ঙম্বদা ঐ থাজবা থম্লি। ভারতকী লৌমীশিং, এম.এস.এম.ই.শিং অমসুং ওন্ত্রেপ্রেনিউয়রশিংদা ঐ থাজবা থম্লি। মরম অসিনা ঐনা হোই হায়রবনি। ঐখোয় অমুক হন্না ফিবম ফগৎলকখিগনি। ভারত মসিগী চাউখৎপগী লম্বীদা অমুক লাকখিগনি।

মরূপশিং,

কোরোনানা ঐখোয়গী চাউখৎপগী খোঙজেল তপথহনবা য়াই,অদুবু লৈবাক অসিগী অচুম্বা অমদি ভারতনা লোকদাউন পাংথোকখ্রে অমসুং হাংদোকপগী তাঙ্কক অমদা চঙলে। হাংদোকপগী তাঙ্কক অমদা শেন-থুমগী অয়াম্বা শরুক হাংদোকলে। জুন ৮গী মনুংদা খর হেন্না হাংদোক্লগনি। মসি চাউখৎপা অমুক হৌরকপনি।

কোরোনা ভাইরসনা মসিগী মশা-মরেংশিং মালেম শীনবা থুংনা শন্দোরকপা মতমদা, ভারতনা মতম চানা অচুম্বা থবকশিং পায়খৎহৌবনা মরম ওইদুনা ঙসি ঐখোয়না পুম্নমক থৌরম অসি পাংথোকপা ঙম্লিবনি। করিগুম্বা ঐখোয়না ঐখোয়গী ফিবম অসি মালেমগী লৈবাকশিংগা চাংদম্নরি, ভারত শীনবা থুংনা লোকদাউন থমখিবগী কান্নবা হৌজিক ঐখোয়না উবা ফংলে। লোকদাউন অসিদা ভারতনা কোরোনা থেংননবা শেমশাবা খক নত্তনা, লৈবাক অসিগী মীওই কয়া কনখি। ফিবম অসিদা, হৌজিক ৱাহং হংলিবদি মথং করি পায়খৎকনি ? ইন্দস্ত্রীগী লুচিংবশিং ওইনা নখোয়গী পুক্নিংদা ৱাহং অমদি শোইদনা হংলমগনি –হৌজিক সরকারনা করি তৌগনি ? অত্মানির্ভর ভারত কম্পেনগী মতাংদা নখোয়না ৱাহং খর হংনিংলমগনি। মসি মশানা তাবনি অমসুং হংফম থোকপনি।

মরূপশিং,

কোরোনাগী মায়োক্তা শেন-থুমগী ফিবম অমুক ফগৎহনবা হায়বসি ঐখোয়গী খ্বাইদগী মরুওইবা থবকশিংনি। মসিগীদমক খুদক্তা থবক পায়খৎনবা সরকারনা ৱারেপশিং লৌরে। মসিগী মথক্তা, অসিগুম্বা ৱারেপশিং অসিনা লৈবাক অসি মতম শাংনা থবক তৌবদা মতেং পাংগনি।

মরূপশিং,

লায়রবশিং খুদক্কী ওইনা মতেং পীবদা প্রধান মন্ত্রী গরিব কলয়ান য়োজননা য়াম্না মতেং পাংলি। স্কিম অসিগী মখাদা মীওই করোর ৭৪দা চানবা ফংহনখ্রে। কোইনা চৎপা শিন্মীশিংসু লেম্না চেং ফংহনখ্রে। মসিগী মথক্তা, লায়রবা ইমুংশিংদা লুপা করোর লিশিং ৫০ য়েন্থোকখ্রে। মসিদা নুপীশিং, দিবয়াংশিং, অহলশিং, শিন্মীশিং অমসুং মী খুদিংমক কান্নবা ফংখি। লোকদাউন মনুংদা সরকারনা লায়রবশিং লেম্না গ্যাস সিলিন্দর করোর ৮ য়েন্থোকখি। লনাই কম্পেনিশিংগী থবক তৌবা মীওই লাখ ৫০গী একাউন্তশিংদা সরকারনা ই.পি.এফ. কন্ত্রিবিউসনগী চাদা ২৪ মতেং পাংখি। মখোয়গী একাউন্তশিংদা লুপা করোর ৮০০ হাপচিনখি।

মরূপশিং,

ভারত মশা-মরোমদোম লেপচনবা অমসুং চাউখৎনবগী লম্বীদা অমুক লাক্নবা হোৎনবদা পোৎলম মঙা য়াম্না মরুওই – ইনতেন্ত, ইনক্লুজন, ইনভেস্তমেন্ত, ইনফ্রাস্ত্রকচর অমসুং ইন্নোবেসন। হন্দক ৱারেপশিং লৌদুনা ঐখোয়না সেক্তর খুদিংমক তুংগীদম থৌরাং তৌরে। ঙসি ভারতনা অনৌবা চাউখৎপগী মাইকৈ অমদা খোঙ থাংনবা থৌরাং তৌরে। মরূপশিং অহোংবশিং অসি ঐখোয়গী ওইনা মচিৎ মচিৎ লৌবা ৱারেপশিং নত্তে। ঐখোয়গী ওইনা অহোংবশিং অসি ফজনা থৌরাং তৌরবা, পুনশিল্লবা,মরী লৈনবা অমসুং তুংগী য়েংলবা থৌরাংনি।

আই.বি.সি, বেঙ্ক পুনশিনবা, জি.এস.তি., ইনকম তেক্স এসেসমেন্তগী থবকশিংদা অহোংবা পুরক্তুনা সরকারনা খুৎ থিংজিনবা হন্থহন্নবা অমসুং লনাই ইন্তরপ্রাইজশিং পুক্নিং থৌগৎনবা ঐখোয়না মতম চুপ্পদা থবক পায়খৎলি। মরম অসিদগী, সরকারনা থৌশিলশিং অওনবা পুরকপগী থবকশিং পায়খৎলি অমসুং লৈবাক অসিনা মসিদা থাজবা থমলি। নিংতম্লবা মতুংদা শেমখিবা নিয়মশিংনা লৌমীশিং মিদলমেনশিংগী থৌজালদা হিংহনখি। নিয়মশিং অদু য়াম্না কনবদগী লৌমীশিংনা মখোয়গী পোৎথোকশিং অদু মখোয়গী খুৎথাংদা য়োনবা তাখি। অসিগুম্বা অরানবশিং অসি চুমথোক্নবা ঐখোয়গী সরকারনা য়ানিংবা উৎলে।

এ.পি.এম.সি. এক্তা অহোংবা লৈখ্রবা মতুংদা হৌজিক লৌমীশিংনা মখোয়গী হকশিং ফংলগনি। হৌজিক লৌমীশিংনা মখোয়না অপাম্বা মীওইদা অমসুং অপাম্বা মমলদা মখোয়গী পোৎথোকশিং য়োনবা য়ারগনি। হৌজিক লৌমী অমনা মহাক্কী মহৈ-মরোং অদু য়োন্নবা লৈবাক্কী মফম অমদা হেক্তা পুবা য়ারগনি। মখোয়গী পোৎথোকশিং ইলেকত্রোনিক ত্রেদিংগী মখাদা য়োনবা য়ারগনি। ঐখোয়গী শিন্মীশিংগী য়াইনবা অমসুং থবক ফংবা হেনগৎনবা শিন্মীগী অহোংবা পুরক্নবা থবক কয়াসু পায়খৎলে।

প্রাইবেত সেক্তরশিংদা অয়াবা পীরমদবা নন-স্ত্রাতেজিক সেক্তরশিং হৌজিক হাংদোক্লে। সবকা সাথ, সবকা বিকাস, সবকা বিশ্বাস হায়বা ৱাখল্লোন অসিদা চহি কয়া তক্নদুনা লাকখিবা থবকশিং পাংথোক্নবা ঐখোয়না ৱারেপশিং লৌখিবনি। মালেমদা ভারত্তা অহুমসুবা খ্বাইদগী চাউবা কোয়লা রিজার্ব লৈরি। হৌজিক কোয়লা সেক্তর অসি হাংদোক্নবা থবক পায়খৎপা হৌরে। হৌজিক শেন্দোং তান্নবা কোয়লা পেকপগী থবক অয়াবা পীরে। মিনরেল মাইনিংগী ওইনসু, হৌজিক কম্পেনিশিংনা মিনরেল থিবগা লোয়না মাইনিংগী থবকশু পাংথোকপা য়ারে।

মরূপশিং,

মাইনিং সেক্তর, ইনর্জি সেক্তর, রিছর্স অমসুং তেক্নোলোজীগী লমদা ইন্দস্ত্রী অমসুং নহারোল অনিমক কান্নবা ফংগনি। নহাক্না লৈবাক অসিগী স্পেস সেক্তর নৎত্রগা এতোমিক ইনর্জি সেক্তরদা শেন থাদবা য়ারগনি অমসুং খুদোংচাবা কয়া নখোয়গী মরাংকাইনা লৈরে।

মরূপশিং,

এম.এস.এম.ই. সেক্তরশিংগী য়ুনিতশিংনা লৈবাক্কী জি.দি.পিদা য়াম্না চাউনা মতেং পাংলি। মসি চাদা ৩০ মতেং পাংলি। এম.এস.এম.ই.গী ময়েক শেংনবা ৱাহন্থোক পীনবা মতম কয়াগী মমাংদগী ইন্দস্ত্রীনা তকশিনদুনা লাক্লি। মদু হৌজিক ফংলে। মসিনা এম.এস.এম.ই.শিং চিংনবা অমতা লৈতনা চাউখৎপা ঙমলগনি। লৈবাক অসিগী এম.এস.এম.ই.শিংদা থবক শুরিবা মীওই করোর কয়া কান্নবা ফংনবা লুপা করোর ২০০গী পোৎ মপান্দগী লৈনবা মালেমগী তেন্দরশিং সরকারনা হন্দোকখ্রে। অত্মানির্ভর ভারত পেকেজ অসি এম.এস.এম.ই. সেক্তরগী ইঞ্জিনগী থাও অমনি।

মরূপশিং, হৌজিক লৈরিবা মালেমগী ফিবমশিং খঙবা য়াম্না মরুওই। হৌজিক মালেমগী লৈবাকশিং হান্নদগী হেন্না অমগা অমগা মতেং পীনবা পাম্লে। অমনা অমগী দরকার ওইবা হেনগৎলকলে। অসিগুম্বা মতম অসিদা মালেমনা ভারত্তা থাজবা থম্বা অসুম অসুম হেনগৎলক্লে। ঙসিদি মালেম্না ভারত্তা থাজবা থম্বা হেনগৎলকপদগী অনৌবা থাজবা অমা ভারতকী ওইনসু হেনগৎলে। কোরোনা ভাইরসকী ৱারবা মতম অসিদা ভারতনা লৈবাক ১৫০ হেনবদা মেদিকেলগী পোৎলমশিং মতেং পাংলি।

মরূপশিং,

মালেম্না ভারত্তা থাজবা হেনগৎলকপা অসিগী কান্নবা ভারতকী ইন্দস্ত্রীশিংনা লৌগদবনি। মসিগী থৌদাং অসি সি.আই.আই.গুম্বা লুপশিংনা লৌগদবনি। করিগুম্বা নখোয়না খোঙথাং অনি মাংলোমদা চৎখৎলবদি, সরকারনা খোঙথাং মরি মাংদা চৎখৎকনি অমসুং নখোয় মতেং পাংগনি। প্রধান মন্ত্রী অমা ওইনা, ঐ নখোয়গীদমক লেপ্লি হায়না ঐনা থাজবা পীরি। ঐবু থাজৌ, অমুক হন্না চাউখৎলকপা অসি অরুবা অমা নত্তে। হৌজিক ভারতকী ইন্দস্ত্রীশিংগী লম্বী নাখৈ শেংলে হায়বদি অত্মানির্ভর ভারতকী লম্বী, মশা-মরোমদোম লেপচবা ভারতকী লম্বী লৈরে। মশা-মরোমদোম লেপচবা ভারত হায়বগী ৱাহন্থোক্তি ঐখোয় হেন্না মপাঙ্গল কনহনবা হায়বনি।

মশা-মরোমদোম লেপচবা ভারতনা মালেমগী ইকোনোমিদা পুনশিনগনি অমসুং মতেং পাংগনি। খঙগদবদি, মশা-মরোমদোম লেপচবা ভারত হায়বসি মরুওইবা হিরমশিংদা ঐখোয়না কনাগুম্বা অমগী মখা পোন্দবা হায়বনি। মসি ভারত্তা অচৌবা ইন্তরপ্রাইজশিং লিংখৎপা অমসুং ইন্তরপ্রাইজশিং অদু মালেমগী অচৌবা ফোর্সশিং ওইহনবনি। মসি থবক পীনবা খোঙজং অমনি। মসিগী খোঙজং অসিদা সি.আই.আই.গুম্বা লুপশিংনা অনৌবা থৌদাং অমা লৌগদবনি। লৈবাক মনুংগী ইন্দস্ত্রীশিং অমুক হিঙ্গৎহনবদা নহাক্না মতেং পাংগদবনি। মালেমগী কৈথেলশিংদা য়ৌহনবদা নহাক্না ইন্দস্ত্রী মতেং পাংগদবনি।

মরূপশিং,

হৌজিক লৈবাক অসিদা শাবা পোৎশিং ‘মেদ ইন ইন্দিয়া’ অমসুং ‘মেদ ফোর ৱার্ল্দ’ ওইহনবা দরকার ওইরে। কমদৌনা লৈবাক অসিনা মপান্দগী পুশিল্লকপা হন্থহনগনি ? করি নৌবা পান্দমশিং থম্বা য়াগনি ? হিরম খুদিংমক্তা পোৎথোক হেনগৎহন্নবা ঐখোয়না ঐখোয়গী পান্দমশিং থমগদবনি। মসিগী পাউজেল অসি ঙসিগী ইন্দস্ত্রীদা পীবা ঐনা পাম্মি অমসুং লৈবাক অসিনা নখোয়দা থাজবা থমলি।

মরূপশিং,

ভারত্তা শাবা অসি থবক পীনবা মরুওইবা অমনি অমসুং নখোয়গুম্বা লুপশিংগা ৱারি শানদুনা মরুওইবা সেক্তরশিং মশক খঙদোক্লে। ফর্নিচর, এয়র কন্দিসন্নর, শউন অমসুং খোঙউপগী সেক্তরশিং থবক পায়খৎপা হৌরে। ঐখোয়গী দরকার ওইবা এয়র কন্দিসন্নরশিংগী চাদা ৩০ ঐখোয়না মপান্দগী পুশিল্লক্লি। মসি ঐখোয়না হন্থহনগদবনি। মালেমগী শউনগী পোৎথোক খ্বাইদগী য়াম্না পুথোকপা অনিসুবা লৈবাক ওইরবসু, মালেমগী লৈবাকশিংদা ঐখোয়না য়োনবগী চাং য়াম্না নেম্লি।

মরূপশিং, ঐখোয়না থবক ফজনা পাংথোকপা ঙমগদবা সেক্তর কয়া লৈরি। নখোয়গুম্বা মরূপশিংনা মতেং পাংবদগী ভারত্তা বন্দে ভারতগুম্বা ত্রেনশিং শারে। ঙসিদি লৈবাক অসিনা কোচশিং মপান্দা য়োল্লে। মোবাইল ফোন নৎত্রগা ঙাকশেনগী খুৎলায়শিং মপান্দগী লৈবা হন্থহন্নবা থবক কয়া পায়খৎলি। ঐনা চাউথোক্না হায়রি মদুদি হৌখিবা থা ৩ অসিদা লুপা করোর কয়াগী পর্সোনেল প্রোতেক্তিব ইকুইপমেন্ত(পি পি ই) ভারত্তা শারে। মসিগী ঐখোয়গী ইন্দস্ত্রীগী থৌনানি। নখোয় ময়াম্না খুঙ্গংশিংদা শেন থাদবগী খুদোংচাবা লৌগদবনি অমসুং লৌমীশিংগা থবক তৌমিন্নগদবনি।

মরূপশিং,

লৌউ-শিংউ, ঙা য়োকপা, চীঞ্জাক শেম-শাবা, খোঙউপ শাবা নৎত্রগা ফার্মাগী অনৌবা খুদোংচাবা কয়া হাংদোক্লে। সহরশিংদা শিন্মীশিংগী লৈফম পীনবা সরকারনা লাউথোক্লিবা স্কিম অসিদা নখোয় শরুক য়ানবা ঐনা হায়জরি।

মরূপশিং,

লৈবাক অসিগী চাউখৎপগী খোঙচৎতা প্রাইবেত সেক্তর য়াওহন্নবা ঐখোয়গী সরকারনা খন্নরি। নখোয়গী দরকার ওইবা খুদিংমক অত্মানির্ভর ভারত কেম্পেন্না ফংহনগনি। সেক্তর খুদিংমক্কী অকুপ্পা মরোলশিং শেমগৎনবা, য়ানবা পুরক্নবা, অচৌবা ৱাখল শাগৎনবা ঐনা হায়জরি। ঐখোয়গী লৈবাক অসিদা অহোংবা পুরক্নবা ঐখোয় পুন্না লৈঙাক্কী অহোংবশিং পুরক্নবা থবক পায়খৎমিন্নসি।

ঐখোয় পুন্না মশা-মরোমদোম লেপচবা ভারত অমা শেমগৎসি। অহানবদা লৈবাক অসি মশা-মরোমদোম লেপচবা ঙম্নবা ৱাশক লৌসি। মসিগী ৱাশক অসিদা নখোয়গী ঙমজবা পাঙ্গল-থৌনা থাদসি। নখোয়গীদমক সরকার লৈরি অমসুং লৈবাক্কী পান্দমশিং ফংনবা নখোয়না লেপকদবনি। নখোয়না মাইপাকপা মতমদা ঐখোয় মাইপাক্কনি অমসুং লৈবাক অসি নৌনা চাউখৎকনি অমসুং মশা-মরোমদোম লেপচবা ঙমগনি। সি.আই.আই.না চহি ১২৫ মপুংফারকপদা ঐনা অমুক হন্না থাগৎচরি। থাগৎচরি!

***