ইনফোর্মেসন অমসুং ব্রোদকাস্তিংগী য়ুনিয়ন মিনিস্তর প্রকাস জাবরেকরনা হায়খি তি.ভি. চেন্নেলশিংগা মখোয়গা চাং অমদা থম্নবা হৌজিক কম্যুনিতী রেদিওশিংদা পুং অমদা মিনিৎ ৭ এদভরতাইজমেন্তগী মতম পীরিবা অসি মিনিৎ ১২দা হেনগৎপা মহাক্না পাম্মী । অখন্নবা থৌরাং অমা ওইনা মিনিস্তরনা কম্যুনিতী রেদিও স্তেসনশিং তারিবশিংদা ৱা ঙাংখি । থৌরম অদু চপ মান্নবা স্লোত অনি থোক্নবা ঙসি নুমিদাং পুং ৭ অমসুং পুং ৭.৩০দা শন্দোকখি ।

মিনিস্তরনা হায়খি কম্যুনিতী রেদিও স্তেসনশিং লিংখৎপদা চংবা শেনফমগী চাদা ৭৫ মিনিস্ত্রীনা পুথোক্লি অমসুং নোংমগী থবক-ইনখাংগী দরকার ওইবা শেনফম্না স্তেসন মশানা পুথোক্লি । হৌজিক তি.ভি. চেন্নেলশিংদা পুং অমদা মিনিৎ ১২গী এদভরতাইজমেন্তশন্দোকপায়াহল্লি অদুগা কম্যুনিতী রেদিও স্তেসনশিংদা পুং অমদা মিনিৎ ৭ শন্দোকপা য়াহল্লি । মখোয়না অহেনবা ফন্দ থিবা মথৌ তাদনবা রেদিও স্তেসনশিংদা চপ মান্নবা মতম পীবা মহাক্না পাম্মী অমসুং কম্যুনিতী রেদিও স্তেসনশিংদা মফম অদুগী এদভরতাইজমেন্ত য়াম্না শন্দোকপা ঙমহনগনি ।

মহাক্কী হৌদোকপগী ৱারোলদা মিনিস্তরনা হায়খি কম্যুনিতী রেদিও স্তেসন অসি মশামক লৈকাই অমনি । স্তেসনশিং অসি অহোংবা পুরক্নবা এজেন্তশিংনি অমসুং স্তেসন অমনা নোংমদা মীওই মিল্লিয়ন কয়া থৌরম তাহল্লি অমসুং অসিগুম্বা কম্যুনিতী রেদিও স্তেসনশিং মশিং হেনগৎহন্নবা মিনিস্ত্রীনা থৌরাং অমা পায়খৎলগনি ।

মহাক্না হায়খি ঐখোয়না অতোপ্পা লায়নাশিং তান্থোকখিবগুম ঐখোয়না  কোবিদ-১৯ লায়না অসি তান্থোকখিগদবনি । ঐখোয়না অনৌবা কাংলোন মরি হায়বদি য়ুমদা লেংদনা লৈবা, তোইনা  খুৎ হাম্বা, মাক্স উপ্পা অমসুং থাপ্না লৈনবা অসি ইনগদবনি । মীয়াম লাপ্না লৈবা অমসুং শেন-থুম তানবগী থবক অনিগী  মরক্ত খুদোংচাদবশিং থেংনরিবা অসিগী মতাংদা মিনিস্তরনা হায়খি “জান বি জহান বি” লাইৱা অসি ইনগদবনি অমসুং লাইচৎ লৈরিবা মফমশিংদা শেন-থুমগী থবকশিং অথিংবা থমলবসু গ্রিন জোনশিংদা থবক সুবা হৌরে ।

মিনিস্তরনা হায়খি এফ এম চেন্নেলশিংদা শন্দোক্লিবা অসিগুম্না কম্যুনিতী রেদিও স্তেসনশিং পাউ শন্দোকপা য়াহন্নবা মহাক্না খন্নগনি । শেমজিনবা পাউশিং শন্দোকপা থিংবদা অসিগুম্বা স্তেসনশিং অসিনা মরুওইবা থৌদাং লৌগনি । অচুম্বা পাউশিং য়ৌহন্নবা কম্যুনিতী রেদিও স্তেসনশিংনা ওল ইন্দিয়া রেদিওগী পাউ শন্দোক্কদবনি । পি আই বীগী মখাদা মিনিস্ত্রীনা ফেক্ত চেক সেল অমা হাংদোক্লে অমসুং ফেক্ত চেক সেলগী থবকশিংদা কম্যুনিতী রেদিও স্তেসনশিংনা মতেং পাংগদবনি ।

হন্দক হৌদোকখিবা অত্মানির্ভর ভারত পেকেজগী মতাংদা মিনিস্তরনা হায়খি মসিনা লৌউ-শিংউ অমসুং ইন্দস্ত্রি য়াওনা সেক্তর কয়াদা অহোংবশিং পুরক্নবা অপুনবা পেকেজ অমনি অমসুং মসিনা মপান্দগী লৈবা হন্থনবা অমসুং মপান্দা থাদোকপা হেনগৎহন্নবা পান্দম থম্লি । পেকেজ অসি ফজনা পাম্নরে অমসুং মীয়াম হরাওরে ।

নুংগী ৱারোল :

• কম্যুনিতী রেদিও স্তেসনশিং অসি ওল ইন্দিয়া রেদিও অমসুং লনাই এফ এম চেন্নেলশিংগা লোয়ননা লৈরিবা থার্দ তয়রগী রেদিও ব্রোদকাস্তিং অমনি । মসি মীয়াম্না মীয়াগীদমক লৈবা কিলোমিতর ১০-১৫ ফাওবা শন্দোকপা ঙম্বা লো পৱার এফ এম রেদিও স্তেসন অমনি ।
• ২০০২দা অহানবা কম্যুনিতী রেদিও স্তেসনশিংগী থৌশিল হৌরবা মতুংদা ভারত্তা কম্যুনিতী রেদিও স্তেসনশিং থবক হৌখি । মসিগী থৌশিল অসিনা মহৈলোয়শঙশিং খক কম্যুনিতী রেদিও স্তেসনশিং লিংখৎপা য়াহনখি । এন জি ওশিং , কে ভি কেশিং অমসুং অতৈ শেন্দোং তানবা নত্তবা লুপশিং ভারত্তা কম্যুনিতী রেদিও স্তেসনশিং লিংখৎনবগী অয়াবা পীদুনা থৌশিল অদু ২০০৬দা পাকথোক চাউথোকহনখি। ঙসিদি ভারত্তা কম্যুনিতী রেদিও স্তেসন ২৯০ লৈরে । হায়রিবা কম্যুনিতী রেদিও স্তেসনশিং অসিনা অতোপ্পা মেদিয়া মরাং কাইনা ফংদবা মীওই মিল্লিয়ন ৯০ রোম কোনশিল্লি । কম্যুনিতী রেদিও স্তেসনশিং অসিনা মফম অদুগী লোনশিংদা থৌরমশিং শন্দোক্তুনা মীয়ামদা হেন্না খুদোংচাবা পীরি।
• লুপশিং অসি মখাগী অসুম্না খাইদোক্লি :

কম্যুনিতী রেদিও শৌগৎনবা লুপা করোর ২৫ কাইথোক্তুনা সরকারনা হৌজিক “সপোর্ততিং কম্মুনি রেদিও মুভমেন্ত ইন ইন্দিয়া” কৌবা স্কিম অমা পায়খৎলি ।স্কিম অসিগী ওইনা চহি অসিগী শেনফম লুপা করোর ৪.৫০নি।

****