কেন্দ্রগী হকশেল অমসুং য়াইফ-য়ুম্বালগী মন্ত্রী দাক্তর হর্স বর্ধন্না ঙসি শ্রী গীরিশ চন্দ্র মুর্মু, জম্মু-কশ্মীরগী লেফতিনেন্ত গবর্নর; শ্রী আর.কে. মাথুর, লদাখকী লেফতিনেন্ত গবর্নর; শ্রী ত্রিবেন্দ্র সিংহ রাৱৎ, উত্তরাখন্দগী মুখ্য মন্ত্রী অমসুং হিমাচল প্রদেশকী মুখ্য মন্ত্রী শ্রী জয় রাম থাকুরগা অৱাংবা থাক্কী মীফম অমা এম.ও.এস., হকশেল অমসুং য়াইফ-য়ুম্বাল মন্ত্রালয়গী শ্রী অশ্বিনী কুমার চৌবে য়াওদুনা পাংথোকখ্রে। মীফম অসি রাজ্য/য়ু.তি.শিংদা কোবিদ-১৯গী চেকশিন থৌরাংশিং অমসুং শেম-শাবগী ফিভম খঙনবা রাজ্যগী হকশেল মন্ত্রীশিং অমসুং রেদ জোন্দা লৈবা জিলাশিংগী কলেক্তরশিংগা মহাক মশামক্কা পাউ ফাওনবগী শরুক অমনি।

মীফম অসিগী অহৌবদা দাক্তর হর্শ বর্ধন্না রাজ্য/য়ু.তি.শিংদা হায়খিবদা মে ১২, ২০২০ ফাওবদা লৈবাক অসিদা কেস ৭০,৭৫৬ লাকখিবগী মনুংদা মীওই ২২,৪৫৫ নাবা ফখ্রে অমসুং মীওই ২,২৯৩ লৈখিদ্রে। হৌখিবা পুং ২৪দা অনৌবা কেস ৩,৬০৪ লাকখি অমসুং মীওই ১৫৩৮না নাবা ফখি। হৌখিবা নুমিৎ ১৪দা দব্লিং তাইম ১০.৯ ওইরম্বা অদু হৌখিবা নুমিৎ হুম্নিদা হন্থরক্তুনা ১২.২দা লৈরে হায়খি। শিবগী চাং অসি ৩.২% ওই অমসুং নাবা ফগৎপগী চাংনা ৩১.৭৪% ওই হায়না মহাক্না মখা তাখি। মখা তারদুনা (ঙরাং ফাওবদা) আই.সি.য়ু.দা এক্তিব কোবিদ-১৯ অনাবা ২.৩৭% লৈ, ভেন্তিলেতর শিজিন্নবা ০.৪১% লৈ অমসুং ওক্সিজেন থাজিন্দুনা লৈবনা ১.৮২%নি হায়খি। দাক্তর হর্শ বর্ধন্না লৈবাক অসিগী তেস্ত তৌবা ঙম্বগী চাংসু হেনগৎলে অমসুং সরকারগী লেবোরেতরী ৩৪৭ অমসুং লন্নাইগী লেবোরেতরী ১৩৭না পুন্না নোংমদা তেস্ত ১,০০,০০০ তৌবা ঙম্লে হায়খি। হৌজিক ফাওবদা অপুনবা ওইনা কোবিদ-১৯গী তেস্ত ১৭,৬২,৮৪০ তৌখ্রে। তৌবতবু ঙরাং তেস্ত ৮৬,১৯১ তৌখি।

দাক্তর হর্শ বর্ধন্না কোবিদ-১৯ থেংননবা থৌরাং খুদিংমক লৌখৎলে অমসুং কেন্দ্র অমসুং রাজ্য/য়ু.তি.না পুন্না হোৎনমিন্নদুনা হৌজিক ফাওবদা কোবিদ-১৯ খক্কী ওইবা হোস্পিতালগী মশীং হেনগৎলকপা, আইসোলেসন অমসুং আই.সি.য়ু. অমসুং ক্বরেন্তাইন সেন্তর মশক খঙদোকপা অমসুং শেমগৎপা অসিনা লৈবাক অসিনা কোবিদ-১৯না থোকহল্লকপা খুদোংচাদবা খুদিংমক থেংননবা শেম শেয়ার হায়খি। কেন্দ্র সরকারনসু মতিক চাবা মাস্ক অমসুং পর্সনেল প্রোতেক্তিব ইকুইপমেন্তনচিংবা কয়া রাজ্য/য়ু.তি./কেন্দ্রগী ইন্সতিত্যুসনশিংদা পীদুনা মতেং পাংলি হায়না মহাক্না মখা তাখি। 

রাজ্য/য়ু.তি.শিংদা ওইরিবা কোবিদ-১৯ কেসকী ফিভমশিং অমসুং মসিবু করম্না শেন্নরিবগে য়েংলবা মতুংদা দাক্তর হর্শ বর্ধন্না হায়খিবদা হল্লক্কদৌরিবা মাইগ্রেন্ত শিন্মীশিং অসি য়েংলদুনা রাজ্য/য়ু.তি.শিংনা কুপ্না য়েংশিনবা, কন্তেক ত্রেসিং তৌবা, মতিক চানা তেস্তিং তৌবা অমসুং হল্লক্লিবা মীওইশিংবু মতম চানা লায়েংবদা অকনবা মিৎয়েং চংগদবনি। মপান লমদগী লাকপা মীওইশিংসু মসিগী মনুং চল্লি। তোঙান তোঙানবা রাজ্য/য়ু.তি.শিংনা লাক্লিবা মীওইশিংবু নীংথিনা গারীদগী কুমথহন্নবা, ক্বরেন্তাইন তৌনবা, তেস্তিং অমসুং মখা তানা লায়েংনবা চপ চাবা চেকশিন থৌরাং লৌখৎনখ্রে। কন্তেক ত্রেসিং অমসুং মতিক চাবা লায়েং পীবদা মতেং পাংনবা হল্লক্লিবা মীওই খুদিংনা আরোগ্য সেতু এপ দাউনলোদ তৌবা অসি তঙাই ফদবা অমা ওইহনগদবনি হায়খি।

দাক্তর হর্শ বর্ধন্না লাইচৎ অসিনা শোকহল্লবা অমসুং শোকহন্দ্রিবা জিলা খুদিংদা সিবিয়র এক্যুৎ রেস্পিরেতরী ইনফেক্সন (এস.এ.আর.আই.)/ ইনফ্লুএঞ্জা লাইক ইলনেশ (আই.এল.আই.) থোকপরা থোক্তবরা হায়না থিজিনবগী থবক হেন্না কনখৎকদবনি হায়খ্রে। মফমদুদা মেদিকেল কলেজ লৈরবদি মখোয়গী মতেং লৌ হায়না রাজ্য/য়ু.তি.শিংদা হায়খ্রে। অসিগুম্বা থৌওং অসিনা করিগুম্বা অনাবা লোৎশিনবা মীওই নত্ত্রগা অনাবগী অহৌবা থাক্ত লৈবা মীওই মশক খঙদোকপা ঙমদুনা মতম চানা লায়েংহৌবা য়াহনগনি হায়না মহাক্না মখা তানা হায়খি। এস.এ.আর.আই./আই.এল.আই. শেন্নবগী থবকশিং অমসুং আই.দি.পি.এস.না উত্তরাখন্দদা কন্তেক ত্রেসিং অমসুং মোনিতরিং তৌবগী থবকপুসু থাগৎপা ফোংদোকখি। কোবিদকা মরী লৈনদবা তঙাই ফদনা চংদ্রবা য়াদ্রবা সর্বিসশিং অরাপ্পা মফমদা য়ৌহন্নবা হায়দুনা লদাখকী য়ু.তি.না মোবাইল মেদিকেল ভান থাবগী থবকসু হৌখ্রে। য়ু.তি.সিদা কোবিদ-১৯ মপুং ওইনা শেন্ননবা দাক্তর খরা অমসুং পুলিস্কী মীওই খরা মফমশিং অসিদা অমগী মথংদা অমনা চত্তুনা মতেং পাংনবা খাক্তুনা থম্লি হায়না শ্রী আর.কে. মাথুরনা হায়খ্রে। মখোয়না পঞ্চায়ৎ অমসুং কাংলুপকী অহল-লমনশিংগসু পুন্না থবক তৌমিন্নদুনা লায়নাগী মরমদা খঙহন্দুনা থাজবসু মাংদনবা হোৎনরি। কেন্দ্র সরকারনা তেক্নিকেল অমসুং অতোপ্পা তেংবাং কয়া লেপ্তনা পীবিবগীদমক রাজ্য/য়ু.তি.শিং তৌবীমল খঙবা উৎলি। হিমাচল প্রদেশকী সিরমাওরগী শম ককপা মীওইশিংদা লোকদাউন লোইরবা মতুংদা ইনগদবা কোবিদ-১৯গা মরী লৈনবা থৌওং কয়া তাকপীরি। শ্রী জয় রাম থাকুরনা হায়খিবদা ফ্রন্তলাইন হেলথ ৱর্করশিং, পুলিস্কী মীওইশিং অমসুং পেরামিলিতরী ফোর্সশিংদা ইম্ম্যুন কনখৎনবা হায়দুনা অয়ুর্বেদিক ইম্ম্যুনিতী বুস্তরশিংসু পীরি।

দাক্তর হর্শ বর্ধন্না লদাখতা হিদাক মনা শিজিন্নবগী চাং য়াম্না ৱাংই হায়খি অমসুং মীয়াম তিনবা মফমদা লোক-তিন শিৎপসি মমাংদা থোকখিবা চৎন-কাংলোনগী মতুং ইন্না থিংগদবনি হায়খি।

ইম্ম্যুনাইজেসন তৌবা, তি.বি.গী কেস থিদোকপা অমসুং লায়েংবা, দাইলাইসিস তৌরিবা অনাবশিংগী ব্লদ ত্রান্সফ্যুসন তৌহনবা, কেন্সরগী অনাবশিংবু লায়েংবা, মীরোনবী নুপীগী এ.এন.সি. তৌবনচিংবা কোবিদকা মরী লৈনদবা তঙাই ফদবা সর্বিসশিংসু  রাজ্যশিংনা পীফম থোকই হায়না হন্না হন্না হায়খি। অয়ুশমান ভারত হেলথ অমসুং ৱেলনেশ সেন্তরশিংসু হাইপর্তেন্সন, দাইবিতিস অমসুং কেন্সর মখল অহুমগী স্ক্রীনিং তৌবদা শিজিন্নগনি হায়খি। রাজ্যশিংনা মখোয়দা মতাংগী মতুং ইন্না তেস্তিং তৌবগী মথক্তা ঙাকথোক্নবা অমসুং ইম্ম্যুন কনখৎনবা হিদাকশিং পীগদবনি হায়খি। রাজ্য/য়ু.তি.শিংদা তঙাই ফদনা চংগদবা হিদাকশিং মতিক চানা থম্নবসু খঙহনখি। হেল্পলাইন নম্বর ১০৭৫কী মথক্তা ১০৪সু কোবিদকা মরী লৈনদবা তঙাই ফদবা সর্বিসশিংগী মরমদা ৱাকৎপা অমসুং অসিগুম্বা সর্বিসশিং লৈ হায়বগী পাউ পীনবা শিজিন্নবা য়াই হায়দুনা রাজ্যশিংদসু খঙহনখ্রে। মখোয়দা ভেক্তর লায়নাশিংসু য়েংশিনবা মথৌ তাই হায়নসু খঙহনখ্রে। লোইননা তোলোব অমসুং ইন্সেন্তিব পীথোকপীবনা ফ্রন্তলাইন ৱর্করশিংগী ৱাখলগী ইথিল হেনগৎহনগনি মরম অদুনা রাজ্য/য়ু.তি.শিংদা মতম চানা পীথোক্নবসু খঙহনখ্রে।

দাক্তর হর্শ বর্ধন্না হিমাচল প্রদেশকী উনা, চম্বা, হমীরপুর, সিরমাওর, সোলান অমসুং কাংগ্রা জিলাশিং; জম্মু অমসুং কশ্মীরগী শোপিয়ান, স্রিনগর, বন্দিপোরা অমসুং অনন্তনাগ য়ু.তি.শিং; উত্তরাখন্দগী হরিদ্বার জিলা অমসুং লদাখকী লেহ অমসুং কার্গিল য়ু.তি.শিংগী তোঙান তোঙানবা দি.এম.শিংগা মফমশিং অসিদা কোবিদ-১৯গী ওইরিবা ফিভম অমসুং ঙাক শেনবগী ৱাফম কয়াদা কুপ্না ৱারী শাখ্রে। অসিগুম্বা থৌওং অসিনা পুন্না হোৎনমিন্নবগী অমসুং অৱাৎপা লৈরবসু মেনখৎনবা অমসুং ইরাংসিবু য়াম্না কুপ্না খঙমিন্নদুনা থবক তৌমিন্নবদা মতেং পাংগনি হায়খ্রে।

মীফম অদুদা মিস প্রীতি সুদান, সেক্রেতরী (ঐচ.এফ.দবল্যু.), শ্রী সঞ্জীব কুমার, স্পিসিএল সেক্রেতরী (হেলথ), শ্রী রাজেশ ভুশন, ও.এস.দি. (ঐচ.এফ.দবল্যু.), মিস বন্দনা গুর্নানী, এ.এস. এন্দ এম.দি. (এন.ঐচ.এম.), শ্রী বিকাস শীল, জোইন্ত সেক্রেতরী (এম.ও.ঐচ.এফ.দবল্যু.), দাক্তর এস.কে. সিংহ, দাইরেক্তর, এন.সি.দি.সি.গা লোইননা প্রিন্সিপাল সেক্রেতরী (হেল্থ) অমসুং অতোপ্পা রাজ্যগী হেল্থকী সেনিয়র ওফিসিএলশিংনা শরুক য়াখি।

*****