পুম্নমকপু খুরুমজরি!!!

মীয়াম পুম্নমক্তা অমসুং মালেম শিনবা  থুংনা লৈরিবা ভগবান বুদ্ধগী মনাইশিংদা বেসক্কী হরাউ তয়াম্বা কয়া অমগা লোইননা বুদ্ধ পুর্নিমাগী য়াইফ-পাউজেল পীজরি।

ঐহাক্না লাইবক ফবা অমা ওইরুবনা অসিগুম্বা শেংলবা নুমিৎ অসিদা মীয়ামগা উনজদুনা ময়াম পুম্নমক্তগী  য়াইফ-থৌজাল নীবা ফংজবনি। মমাংগী থৌরম কয়াদসু অসিগুম্বা খুদোংচাবসি ফংজখি। ২০১৫ অমসুং ২০১৮দা দিল্লীদা ময়ামগা লোইননা কুম্হৈ শরুক য়াবা ফংজখি অমসুং কোলম্বোদনা ২০১৭তা ফংজখি।

অদুম ওইনমক, হৌজিক ওইরিবা ফিবম অসিদি হান্নগা য়াম্না খেন্নরে। ঐখোয় শক্কা-শক্কা উনবা ফংদ্রে।

মরূপশিং, ভগবান বুদ্ধনা অসুম্না হায়বীরমই-

মনো পুব্বং-গমা ধম্মা,

মনোসেত্থা মনোময়া, মসিনা হায়রি, ধম্মা (নত্ত্রগা ৱাখলদা লৈবা ধর্ম), ৱাখল হায়বসিনা পুম্নমক্তগী হেনবনি। মসিনা থবক পুম্নমক্কী হৌরকফম্নি। ৱাখলগী মতেংননি ঐগা নহাক্কা শম্নহল্লিবসি। হকচাংগী মরু ওইবা লৈরক্ত্রিবসি মসিগী মরম অসিননি। অদোমগী মরক্তা লৈবা ফংজবসি ঐগীদি খ্বাইদগী লাইবক ফবনি, অদুবু হৌজিক্তি ফিবম য়াম্না চাদ্রে।

লৈফম্না লাপ্নরবসু, তেক্নোলোজীগী মতেংনা, ঐখোয় পুম্নমক্না অমগা অমগা ৱারী শানবদি ফংহল্লি, অমসুং মসিনা অপেনবা হায়বদু ওইহল্লে হায়না ঐহাকনা লৌই।

মরূপশিং, ইন্তর্নেসনেল বুদ্ধিস্ত ওর্গনাইজেসন্না লোকদাউনগী খুদোংচাদ্রবা মতম অসিদা ভর্চুএল বেসক পুর্নিমা দে  পাংথোকপীবগীদমক থাগৎফম থোকই। অদোমগী অনৌবা থৌরাং অসিনা, ঙসিগী থৌরম অসিদা মালেম পুম্বদা লৈরিবা মীওই মিলিয়ন কয়ানা শরুক য়াবা ফংজরে।

লুম্বিনীগী মথক্তা, বোধ গয়া, সর্নাথ অমসুং কুশিনাগরগী শ্রী অনুরধাপুর স্ত্যুপাদা পাংথোক্লিবা অপুনবা থৌরম  অমসুং শ্রী লঙ্কাগী ভাস্কাদুৱাদা পাংথোক্লিবা থৌরমশিং অসি অদুক্কী মতিক ফজখ্রে।

মফম খুদিংমক্তা পাংথোক্লিবা খুরমজবগী থৌরম্বু ওনলাইন্দা উহল্লিবসি অঙকপা অমনি। নহাক্না মসিগী থৌরম  অসিবু মালেম শিনবা  থুংনা কোরোনা মালেমগী লাইচৎ অসিদা মমাং থাদুনা লান্থেংনরিবা মীওইশিংগীদমক থৌনীজবা ওইনা পাংথোক্কনি হায়না লেপখিবা। ঐহাক্না অসিগুম্বা মীনুংশিগী ওইবা থৌরাং অমা পাইখৎপীরিবা অসিগীদমক থাগৎপা ফোংদোকচরি।

অসিগুম্বা মপুং ফানা শিন-লাংদুনা হোৎনরিবসিনা হৌজিক ওইরিবা শিংনবা অসিদগী নান্থোক্তুনা মীয়াম পুম্নমক্কী অৱাবা কোকহনবা ঙমগনি হায়বসি ঐগী অচেৎপা থাজবনি। মরূপশিং, পুম্নমক্কী অৱাবা কোক্নবা পাউজেল অমসুং অরেপ্পনা ভারতকী চাউখৎলোনগী মশক তাক্লি। মসিগী কলচর অসিবু ভগবান বুদ্ধনা অমুক্কা হেন্না ময়েক শেংহনবীরমই।

ভগবান বুদ্ধনা মহাক্কী পুন্সিবু মঙাল ফংদুনা মশক খঙজখ্রবা মতুংদা অতোপ্পা পুন্সি কয়াগীসু মঙাল ফংনবা হোৎনবীরমই। মহাক্কী পাউজেলদি কনাগুম্বা অমদা নত্ত্রগা করিগুম্বা হীরম অমদা লোইবা নাইদে।

চহী চা কয়া অসিদা, সিদ্ধার্থ পোক্লবা মতুংদা, সিদ্ধার্থনা বুদ্ধ ওইরবা মতুংদা, মতমগী খোংজেলনা ঐখোয়বু থৌদোক ৱাথোক কয়া অমদা পুরকখ্রে।

মতম কয়া হৌখ্রে, ফিবম কয়াসু অহোংবা লাকখ্রে, খুন্নাইগী থবক থৌরম কয়া হোংখ্রে, অদুবু ভগবান বুদ্ধগী পাউজেলদি ঐখোয়গী পুন্সিদা লোইনদুনা লৈহৌরি। পুম্নমকসিগী মরমদি, বুদ্ধ হায়বসে অচম্বা মিং অমখক নত্তে, মসি অশেংবা, অচুম্বা ৱাখল্লোন অমনি, মীওইবা জাতিবু পুদুনা চৎলিবা মীওইবা পুম্নমক্কী মিহুলদা য়াওবা ৱাখল্লোন্নি। বুদ্ধ হায়বসি হৌখ্রবা পুন্সিদা তৌখিবা অরানবা কয়া কোকহনবা অমসুং পুম্নমকপু থাদোকপা ঙম্নবগী হৌরকফম্নি।

বুদ্ধ হায়বসি সেবা তৌবা অমসুং কত্থোকপগা ৱাহন্থোক মান্নবনি। অচেৎপা ৱারেপ অমগা লোইননা, বুদ্ধ হায়বসে খু্ন্নাই অমা হোংনবগী হৌরকফম্নি। বুদ্ধদি খাংবা কনবা, কত্থোকপা অমসুং মালেম পুম্বদা নুংঙাইবা শন্দোক্নবা হোৎনবদা পুক্নিং লুপখিবা অমনি। ঐখোয়দা লৈরিবা খুদোংচাবা কয়া অসি য়েংসি, অতোপ্পা কনাগুম্ববু সেবা তৌবা, অনাবা য়েংবা, লাইরবা অমবু পীজবীবা, হোস্পিতাল শেংবা, লম্বীদা আইন ঙাক্লিবা মখোয় পুম্নমকনা পুংজা খুদিংগী সেবা তৌরিবা কয়া অমা উরে। ভারত্তা, ভারতকী মপান্দা, মখোয় পুম্নমক অসি ইকাই খুম্নফম থোকই।

মরূপশিং, মালেম পুম্বদা খুদোংথীবা কয়া অমা লৈরবদা, অৱাবা ৱাখল, নীংহন্নবা অমসুং খোইশাওনবা লাকপা মতমদা বুদ্ধনা তাকপীরম্বা কয়া চান্নহল্লক্লি। মহাক্না মতম চুপ্পদা অৱা-অনা তারবা মিৎকুপশিংবু ঐখোয়না ঙম্না চৎনবা অমসুং মখোয়বু লাকশিন্নবা তাকপীরমই। ৱাদুনতা লৈগদবা নত্তে। ঙসিদি, ঐখোয় পুম্নমক্না খুদোংথীবা ফিবম অমদগী নান্থোক্নবা হোৎনরি।

ভগবান বুদ্ধনা তাকপীরম্বা অচুম্বা লম্বী মরি-

মীনুংশি

নুংশিবা

নুংঙাইবা মিৎকুপ নত্ত্রগা অৱাবা মীৎকুপ্তা ইথক হৌদনা ইংনা তপ্না লৈবা, মী অমবু মাগী অরানবা অমসুং মগুনগী ৱাংমদা য়াবা- হায়রিবা অচুম্বশিং অসি ভারতকী লৈমাইদা মতম চুপ্পদা ইথিল পীদুনা লাক্লি।

ঙসিসু ভারতনা মশাগীতা য়েংদনা, খেন্নবা থমদনা অৱাবা তারবশিংগা লোইননা, লৈবাকসিগী অমসুং মালেম পুম্বগী ওইনা লেপ্লি হায়বসি উরে।

মাংবা অমসুং তোংবা, তৌবা ঙম্বা নত্ত্রগা ঙমদবা থিদনা হৌজিক ওইরিবা ফিবম অসিদা ঐখোয়না অঙম্বা থাক্তা মতেং পাংবা হায়বদুনা মাংদা থমদুনা অতোপ্পগী মতেং পাংগদবনি।

মসিগী মরম অসিননি, খুদোংচাদ্রবা মতম অসিদা মালেমদা লৈরিবা লৈবাক কয়ানা ভারতপু নীংশিংনরিবা অমসুং লৈজদ্রবা পুম্নমক্তা ভারতনা মতেং পাংনবা হোৎনবদা হালেংবা লৈত্রি।

ঙসিদি, ভারতনা ভারত মচা পুম্নমক্কী পুন্সি কন্নবা হোৎনরি, অমসুং মালেমগী থাক্তা তৌগদবা থবকসু চপ মান্ননা য়েংদুনা তৌরি।

মরূপশিং, ভগবান বুদ্ধগী ৱাহৈ খুদিংমক, মানা লীবীরম্বা ৱারী খুদিংমক্না ভারতনা মীওইবা খু্ন্নাইগী সেবা তৌনবা হোৎনরিবা অসিবু থৌনা হাপ্লি। বুদ্ধনা ভারতকী মঙাল অমসুং ভারত পুম্ববু ইশানা ইশাবু খঙজবগী মগুন তাক্লি। ইশানা ইশাবু খঙজবসিনা, ভারতনা হৌজিকসু মীওইবা খু্ন্নাই অমসুং মালেম পুম্বনা ফগৎলক্নবগীদমক হোৎনরি অমসুং তুংদসু হোৎনখিগনি। ভারতকী চাউখৎপনা মালেম পুম্বগী চাউখৎলোন্দা মতেং পাংগনি।

মরূপশিং, ঐখোয়গী পান্দম অমসুং মাই পাকপগী পথাপ অসি মতমগী মতুং ইন্না হোংলকখিগনি। অদুম ওইনমক, ঐখোয়না ঐখোয়গী ৱাখলদা থমগদবদি, ঐখোয়না লেপ্পা নাইদনা হোৎনগদবনি হায়বসিনি। অতোপ্পবু নুংশিরবদি, তৌরিবা থবক্তুবু নুংশিনা লোইনরবা, ঐখোয়গী মাংদা লৈবা খ্বাইদগী শাথীবা শিংনবা ফাওবা মাইয়োক্নবা ঙমগনি।

সুপ্প বু্নদ্ধ পবুজ্ঝন্তি, সদা সাৱকা, মসিনা হায়রি, মীওইবা খুন্নাইগীদমক অয়ুক নুংথিল নাইদনা হোৎনরিবশিং অসে, বুদ্ধগী অশেংবা মনাইনি। মসিগী ৱাখল্লোন অসিনা ঐখোয়গী পুন্সিদা মঙাল পীরি অমসুং মাংজিল থানা চৎহল্লি।

মসিগী য়াইফ-পাউজেল অসিগা লোইননা, ঐহাক্না ময়াম পুম্নমকপু থাগৎপা ফোংদোকচরি। অসিগুম্বা খুদোংচাদ্রবা মিৎকুপ অসিদা, চেকশিন্না লৈবীয়ু, ইমুং মনুং অমসুং নহাক্না লৈরিবা লৈবাক অদুবু চেকশিনবীয়ু, ইশাবু ঙাক শেন্দুনা লৈবীয়ু অমসুং অতোপ্পবুসু অঙম্বা থাক্তা মতেং পাংবীয়ু।

পুম্নমক্কী হকশেল তেক্ত-কাইদবা ওইরসনু, য়াইফ-পাউজেল অসিগা লোইননা ঐহাক্কী ৱারোল মতাং অসিদা লোইশিঞ্জরগে।

পুম্নমকপু থাগৎচরি!! সর্ভ মঙ্গলম!!

****