2020 ମେ 4 ତାରିଖ ସୁଦ୍ଧା ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା (PMGKP) ରେ ଦେଶର 39 କୋଟି ଦରିଦ୍ର ଲୋକଙ୍କୁ 34,800 କୋଟି ଟଙ୍କାର ଆର୍ଥିକ ସହାୟତା ଡିଜିଟାଲ ପେମେଣ୍ଟ ବ୍ୟବସ୍ଥାରେ ଯୋଗାଇ ଦିଆଯାଇଛି । କୋଭିଡ-19ର ମୁକାବିଲା ପାଇଁ ଦେଶବ୍ୟାପୀ ଲକଡାଉନ ଲାଗୁ ହେବା ପରେ ଗରିବ ଲୋକଙ୍କୁ ଏହାର ପ୍ରଭାବରୁ ସୁରକ୍ଷିତ ରଖିବା ପାଇଁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମାର୍ଚ୍ଚ 26ରେ ଏହି ଯୋଜନାର ଘୋଷଣା କରିଥିଲେ ।

ପିଏମଜିକେପିର ଅଂଶ ସ୍ୱରୂପ ଦେଶର ଗରିବ, ବରିଷ୍ଠ ନାଗରିକ, କୃଷକ ଓ ମହିଳାମାନଙ୍କୁ ମାଗଣା ଖାଦ୍ୟ ଶସ୍ୟ ଓ ଅର୍ଥ ସହାୟତା ଯୋଗାଇ ଦିଆଯାଉଛି । ଏହି ଯୋଜନା ଘୋଷଣା ହେବା ମାତ୍ରେ ତତ୍କାଳ ଏହାକୁ କାର୍ଯ୍ୟକାରୀ କରାଯାଇଥିଲା । ଯୋଜନାର ରୂପାୟନ ପ୍ରକ୍ରିୟାକୁ ଉଭୟ କେନ୍ଦ୍ର ଓ ରାଜ୍ୟ ସରକାର ନିୟମିତ ଭାବେ ତଦାରଖ କରୁଛନ୍ତି । ଏହି ସହାୟତା ବ୍ୟବସ୍ଥା ଉଦ୍ଦିଷ୍ଟ ହିତାଧିକାରୀଙ୍କ ନିକଟରେ ଯେପରି ଅବିଳମ୍ବେ ବିନା ବାଧାରେ ପହଞ୍ଚିବ ତାହା ନିଶ୍ଚିତ କରିବାକୁ ଅର୍ଥ ମନ୍ତ୍ରଣାଳୟ, ଅନ୍ୟାନ୍ୟ ସଂପୃକ୍ତ ମନ୍ତ୍ରଣାଳୟ, କ୍ୟାବିନେଟ ସେକ୍ରେଟାରିଏଟ ଓ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସବୁ ସମ୍ଭାବ୍ୟ ପଦକ୍ଷେପ ଗ୍ରହଣ କରାଯାଇଛି ।

ହିତାଧିକାରୀଙ୍କ ପାଖରେ ଅର୍ଥ ରାଶି ସିଧାସଳଖ ପହଞ୍ଚାଇବା ପାଇଁ ଫିନଟେକ ଓ ଡିଜିଟାଲ ଟେକ୍ନୋଲଜିକୁ ନିୟୋଜିତ କରାଯାଇଛି । ପ୍ରତ୍ୟକ୍ଷ ଲାଭ ହସ୍ତାନ୍ତର ଯୋଜନା ବା ଡିବିଟି ମାଧ୍ୟମରେ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ଆର୍ଥିକ ସହାୟତା ପଠାଯାଇଛି । ଏହା ଫଳରେ ଅର୍ଥର ବାଟ ମାରଣା ଓ ଅପଚୟ ସମ୍ଭାବନା ଦୂର ହୋଇଛି । ଆହୁରି ମଧ୍ୟ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ ସିଧାସଳଖ ଏହି ଅର୍ଥ ଜମା ହେଉଥିବାରୁ ସେମାନଙ୍କୁ ବ୍ୟାଙ୍କକୁ ଯିବାକୁ ପଡୁନାହିଁ ।

ଏହି ସହାୟତା ଯୋଗାଣରେ ବର୍ତ୍ତମାନ ସୁଦ୍ଧା ଯେଉଁ ପ୍ରଗତି ହାସଲ କରାଯାଇଛି ତାହା ନିମ୍ନରେ ପ୍ରଦାନ କରାଯାଇଛି : -

• ପିଏମ-କିଷାନ ଯୋଜନାର ପ୍ରଥମ କିସ୍ତି ହିସାବରେ 16,394 କୋଟି ଟଙ୍କା 8.19 କୋଟି ହିତାଧିକାରୀଙ୍କୁ ପ୍ରଦାନ କରାଯାଇଛି ।
• ଜନଧନ ଆକାଉଣ୍ଟଧାରୀ ମହିଳାମାନଙ୍କ ମଧ୍ୟରୁ 20.05 କୋଟି ହିତାଧିକାରରୀ (98.33%)ଙ୍କ ଆକାଉଣ୍ଟକୁ ପ୍ରଥମ କିସ୍ତିରେ ମୋଟ 10,025 କୋଟି ଟଙ୍କା ପଠାଯାଇଛି । କଷ୍ଟମର ଇନଡ୍ୟୁସଡ ଟ୍ରାନଜାକସନ ବ୍ୟବସ୍ଥାରେ ଯେଉଁ ଜନଧନ ମହିଳା ଆକାଉଣ୍ଟଧାରୀଙ୍କ ଜମା ଖାତା ଡେବିଟ ହୋଇଛି ସେମାନଙ୍କ ସଂଖ୍ୟା 8.72 କୋଟି (44%) । ମେ 5 ତାରିଖ ସୁଦ୍ଧା 5.57 କୋଟି ମହିଳା ଜନଧନ ଆକାଉଣ୍ଟଧାରୀଙ୍କ ଖାତାକୁ ଦ୍ୱିତୀୟ କିସ୍ତିରେ 2,785 କୋଟି ଟଙ୍କା ପ୍ରେରଣ କରାଯାଇଛି ।
• ବୃଦ୍ଧବୃଦ୍ଧା, ବିଧବା, ଭିନ୍ନକ୍ଷମ ଆଦି 2.82 କୋଟି ଲୋକଙ୍କ ବ୍ୟାଙ୍କ ଖାତାକୁ 1405 କୋଟି ଟଙ୍କା ସହାୟତା ଆକାରରେ ପଠାଯାଇଛି ।
• ନିର୍ମାଣ ଶ୍ରମିକ କଲ୍ୟାଣ ଯୋଜନାରେ 2.20 କୋଟି ଶ୍ରମିକ ମୋଟ 3492.57 କୋଟି ଟଙ୍କାର ଆର୍ଥିକ ସହାୟତା ପାଇଛନ୍ତି ।
• ଏ ପର୍ଯ୍ୟନ୍ତ 36ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ କେନ୍ଦ୍ରୀୟ ଭଣ୍ଡାରରୁ 67.65 ଲକ୍ଷ ମେଟ୍ରିକ ଟନ ଖାଦ୍ୟ ଶସ୍ୟ ଉଠାଇଛନ୍ତି । ସେଥି ମଧ୍ୟରୁ 30.16 ଲକ୍ଷ ମେଟ୍ରିକ ଟନ ଖାଦ୍ୟଶସ୍ୟ ଏପ୍ରିଲ ମାସ ପାଇଁ 60.33 କୋଟି ହିତାଧିକାରୀଙ୍କୁ ବଣ୍ଟନ କରାଯାଇଛି । ଏହା ଛଡା ଚଳିତ ମେ ମାସ ନିମନ୍ତେ ସବୁ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ସରକାର 12.39 କୋଟି ହିତାଧିକାରୀଙ୍କୁ 6.19 ଲକ୍ଷ ମେଟ୍ରିକ ଟନ ଖାଦ୍ୟ ଶସ୍ୟ ଇତି ମଧ୍ୟରେ ବାଣ୍ଟିସାରିଲେଣି ।
• ଇତି ମଧ୍ୟରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ 2.42 ମେଟ୍ରିକ ଟନ ଡାଲି ପଠାଯାଇସାରିଛି । ମୋଟ 19.4 କୋଟି ହିତାଧିକାରୀ ପରିବାରଙ୍କ ମଧ୍ୟରୁ 5.21 କୋଟି ପରିବାର ଏହି ଡାଲି ପାଇସାରିଲେଣି ।
• ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାରେ 5.09 କୋଟି ଗ୍ୟାସ ସିଲିଣ୍ଡର ଇତି ମଧ୍ୟରେ ବୁକିଂ କରାଯାଇଛି । ବର୍ତ୍ତମାନ ସୁଦ୍ଧା 4.82 ମାଗଣା ସିଲିଣ୍ଡର ହିତାଧିକାରୀଙ୍କୁ ପ୍ରଦାନ କରାଯାଇଛି ।
• ଇପିଏଫଓ ଯୋଜନାରେ 9.6 ଲକ୍ଷ ସଦସ୍ୟ ଇତି ମଧ୍ୟରେ ଅନଲାଇନ ଅର୍ଥ ଉଠାଣ ବ୍ୟବସ୍ଥାରେ 2985 କୋଟି ଟଙ୍କାର ନନରିଫଣ୍ଡେବଲ ଅଗ୍ରୀମ ଅର୍ଥ ଉଠାଇଛନ୍ତି । ସେମାନଙ୍କୁ ଅଗ୍ରୀମ ଉଠାଣ ପାଇଁ ହଇରାଣ ହେବାକୁ ପଡିନାହିଁ ।
• ଇପିଏଫଓ ବାବଦ 24 ଶତାଂଶ ଅଂଶ ପ୍ରଦାନ ବ୍ୟବସ୍ଥାରେ 44.97 ଲକ୍ଷ କର୍ମଚାରୀଙ୍କ ପାଇଁ ସେମାନଙ୍କ ଆକାଉଣ୍ଟକୁ 698 କୋଟି ଟଙ୍କା ଯାଇଛି ।
• MGNREGAରେ ମଜୁରି ବୃଦ୍ଧି କରାଯାଇ ତାହା ଚଳିତ ବର୍ଷ ପାଇଁ ଲାଗୁ କରାଯାଇଛି । ଏଥିପାଇଁ ଏପ୍ରିଲ ପହିଲାରେ ବିଜ୍ଞପ୍ତି ପ୍ରକାଶ କରାଯାଇଥିଲା । ଏହି ଯୋଜନାରେ ମୋଟ 5.97 କୋଟି ଶ୍ରମ ଦିବସ ସୃଷ୍ଟି କରାଯାଇଛି । ମଜୁରି ଓ ସାମଗ୍ରୀ ବାବଦ ବାକିଥିବା ଅର୍ଥ ପ୍ରଦାନ ନିମନ୍ତେ ରାଜ୍ୟମାନଙ୍କୁ 21,032 କୋଟି ଟଙ୍କା ଯୋଗାଇ ଦିଆଯାଇଛି ।
• ସରକାରୀ ହସ୍ପିଟାଲ ଓ ସ୍ୱାସ୍ଥ୍ୟସେବା କେନ୍ଦ୍ରଗୁଡିକରେ ସ୍ୱାସ୍ଥ୍ୟକର୍ମୀଙ୍କ ପାଇଁ ବୀମା ବ୍ୟବସ୍ଥା କାର୍ଯ୍ୟକାରୀ କରାଯାଇଛି । ନ୍ୟୁ ଇଣ୍ଡିଆ ଆସ୍ୟୁରାନ୍ସ କମ୍ପାନୀ ଏଥିପାଇଁ ମୋଟ 22.12 ଲକ୍ଷ ସ୍ୱାସ୍ଥ୍ୟକର୍ମୀଙ୍କୁ ବୀମାଭୁକ୍ତ କରିଛି ।

ପ୍ରଧାନମନ୍ତ୍ରୀ ଗରିବ କଲ୍ୟାଣ ପ୍ୟାକେଜ

05.05.2020 ସୁଦ୍ଧା ମୋଟ ପ୍ରତ୍ୟକ୍ଷ ଲାଭ ହସ୍ତାନ୍ତରଣ

***********