শিপিং অমসুং কেমিকেল্স অমসুং ফর্তিলাইজরকী মিনিস্তর ওফ স্তেৎ (ইন-চার্জ) মনসুখ মন্দাবিয়ানা হায়খ্রে মদুদি অফবা হিদাকশিং অহোংবা মমলদা ফংহল্লিবা জন ঔশধী কেন্দ্রশিংদা নোংমদা মীওই লাখ ১০ লাক্তুনা কোবিদ-১৯ লাকশিনবদা জন ঔশধী কেন্দ্রশিংনা মরুওইবা থৌদাং অমা লৌরি । হায়রিবা কেন্দ্রশিং অসিদা হায়দ্রোক্সীক্লোরোকুইনসু য়োল্লি ।

মহাক্না হায়খি প্রধান মন্ত্রী ভারতীয়া জনঔশধী পরিয়োজনা (পি.এম. বি.জে.পি.) অসি ভারত সরকারগী ফর্মাস্যুতিকেল্স দিপার্তমেন্তনা পায়খৎপা অনৌবা থবক অমনি অমসুং মীয়ামদা অফবা জেনেরিক হিদাক মমল হোংনা ফংহন্নবা প্রধান মন্ত্রীগী মঙলান অদু মঙফাওননবা স্কিম অসিগী মখাদা জন ঔশধী কেন্দ্রশিং হাংদোকপনি ।

ওফিস পায়বা হৌরকপদগী, প্রধান মন্ত্রী নরেন্দ্র মোদীনা জন ঔশধী কেন্দ্রশিং হাংদোক্নবা অকনবা ইনোৎ পীদুনা লাক্লি । চহি ৫.৫গী লৈঙাক্কী মতম অসিদা , লৈবাক শীনবা থুংনা জন ঔশধী কেন্দ্র ৬০০০ থবক তৌদুনা অফবা হিদাকশিং কৈথেলদা ফংলিবা মমলদগী চাদা ৫০দগী চাদা ৯০ ফাওবা হোংনা য়োল্লে ।

মহাক্না মখা তানা হায়খি মমল হোংবা অমসুং অফবা জেনেরিক হিদাকশিং য়োনবগী মথক্তা, জন ঔশধী কেন্দ্রশিংনা অথিংবা মনুংদা লায়রবা মীয়ামদা অচা-অথকশিং অমসুং হিদাকশিং লেম্না ফংহল্লি ।

কোবিদ-১৯গুম্বা অখন্নবা ফিবম অসিদা, জন ঔশধী কেন্দ্রশিংগী থৌদাং য়াম্না মরুওই । অহিং-নুংথিল চুপ্পা চোকথবা লৈতনা জন ঔশধী কেন্দ্র ৬০০০না লায়রবা মীয়ামগী সেবা তৌরি । ২০২০গী এপ্রিলদা লৈবাক শীনবা থুংনা লুপা করোর ৫২ রোমগী হিদাকশিং ফংহনখি । জন ঔশধী কেন্দ্রশিংদসু অহোংবা মমলদা হায়দ্রোক্সীক্লোরোকুইন, এন-৯৫ মাক্স, থ্রি-প্লাই মাক্স, হেন্দ সেনিতাইজর য়োল্লি ।

কোবিদ-১৯ লাইচৎ মনুংদা মখোয়গী মরুওইবা খঙলদুনা মন্দাবিয়ানা হায়খি মদুদি জন ঔশধী দুকান মপুশিংনা লায়রবা মীয়ামগী পাংথোক্লিবা তমজনফম ওইবা থবকশিং অসি ঐনা থাগৎলি ।

****