ਕੇਂਦਰੀ ਮਾਨਵ ਸੰਸਾਧਨ ਵਿਕਾਸ ਮੰਤਰੀ,  ਸ਼੍ਰੀ ਰਮੇਸ਼ ਪੋਖਰਿਯਾਲ ‘ਨਿਸ਼ੰਕ’ ਨੇ ਅੱਜ ਵੈਬੀਨਾਰ  ਜ਼ਰੀਏ ਦੇਸ਼ ਭਰ  ਦੇ ਮਾਪਿਆਂ ਅਤੇ ਵਿਦਿਆਰਥੀਆਂ ਨਾਲ ਸੰਵਾਦ ਕੀਤਾ ਅਤੇ ਕੋਵਿਡ-19 ਕਾਰਨ ਉਤਪੰਨ ਪਰੀਸਥਿਤੀਆਂ ਦੀ ਵਜ੍ਹਾ ਨਾਲ ਉਨ੍ਹਾਂ  ਦੇ  ਮਨ ਵਿੱਚ ਉਠ ਰਹੇ ਵੱਖ-ਵੱਖ ਸਵਾਲਾਂ  ਦੇ ਜਵਾਬ ਦਿੱਤੇ। ਇਸ ਵੈਬੀਨਾਰ ਸੰਵਾਦ ਨਾਲ ਜੰਮੂ - ਕਸ਼ਮੀਰ ਤੋਂ ਲੈ ਕੇ ਕੇਰਲ ਤੱਕ ਅਤੇ ਗੁਵਾਹਾਟੀ ਤੋਂ ਲੈ ਕੇ ਗੁਜਰਾਤ ਤੱਕ ਲਗਭਗ 20000 ਮਾਪੇ ਜੁੜੇ।

 ਕੇਂਦਰੀ ਮੰਤਰੀ ਨੇ ਆਪਣੇ ਵੈਬੀਨਾਰ ਸੰਵਾਦ  ਜ਼ਰੀਏ ਮਾਨਵ ਸੰਸਾਧਨ ਵਿਕਾਸ ਮੰਤਰਾਲੇ  ਦੁਆਰਾ ਚਲਾਏ ਜਾ ਰਹੇ ਔਨਲਾਈਨ ਸਿੱਖਿਆ ਲਈ ਵੱਖ-ਵੱਖ ਅਭਿਆਨਾਂ ਅਤੇ ਯੋਜਨਾਵਾਂ ਬਾਰੇ ਸਾਰੇ ਮਾਪਿਆਂ ਨੂੰ ਜਾਣੂ ਕਰਵਾਇਆ।  ਉਨ੍ਹਾਂ ਨੇ ਕਿਹਾ ਕਿ ਮੰਤਰਾਲੇ  ਨੂੰ ਆਪਣੇ ਵਿਦਿਆਰਥੀਆਂ ਦੀ ਸਿੱਖਿਅਕ ਗਤੀਵਿਧੀਆਂ ਦੀ ਚਿੰਤਾ ਹੈ ਅਤੇ ਇਸ ਵਜ੍ਹਾ ਤੋਂ ਅਸੀਂ ਪਹਿਲਾਂ ਤੋਂ ਚਲੀਆਂ ਆ ਰਹੀਆਂ ਵੱਖ-ਵੱਖ ਯੋਜਨਾਵਾਂ ਨੂੰ ਜੰਗੀ ਪੱਧਰ ‘ਤੇ ਲਾਗੂ ਕੀਤਾ ਜਿਸ ਦਾ ਲਾਭ ਦੇਸ਼  ਦੇ 33 ਕਰੋੜ ਵਿਦਿਆਰਥੀ ਕਦੇ ਵੀ ਅਤੇ ਕਿਤੇ ਤੋਂ ਵੀ ਉਠਾ ਸਕਦੇ ਹਨ।

ਦੇਸ਼ ਭਰ  ਦੇ ਮਾਪਿਆਂ ਦਾ ਆਭਾਰ ਪ੍ਰਗਟ ਕਰਦੇ ਹੋਏ, ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਦੇਸ਼ ਇਸ ਸਮੇਂ ਬੇਮਿਸਾਲ ਸੰਕਟ ਤੋਂ ਗੁਜਰ ਰਿਹਾ ਹੈ। ਮਾਪਿਆਂ ਲਈ ਇਹ ਸਮਾਂ ਹੋਰ ਵੀ ਮੁਸ਼ਕਿਲ ਹੋ ਜਾਂਦਾ ਹੈ ਕਿਉਂਕਿ ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਦੀ ਪੜ੍ਹਾਈ ਦੀ ਅਤੇ ਭਵਿੱਖ ਦੀ ਚਿੰਤਾ ਵੀ ਸਤਾ ਰਹੀ ਹੋਵੇਗੀ।  ਸ਼੍ਰੀ ਨਿਸ਼ੰਕ ਨੇ ਮਾਪਿਆਂ ਨੂੰ ਵਿਸ਼ਵਾਸ ਦਿਵਾਇਆ ਕਿ ਮਾਨਵ ਸੰਸਾਧਨ ਵਿਕਾਸ ਮੰਤਰਾਲਾ  ਵਿਦਿਆਰਥੀਆਂ ਦੀ ਪੜ੍ਹਾਈ ਅਤੇ ਉਨ੍ਹਾਂ  ਦੇ  ਭਵਿੱਖ ਲਈ ਪੂਰੀ ਤਰ੍ਹਾਂ ਨਾਲ ਪ੍ਰਤੀਬੱਧ ਹੈ।  ਕੇਂਦਰੀ ਮੰਤਰੀ ਨੇ ਦੱਸਿਆ ਕਿ ਇਸ ਦਿਸ਼ਾ ਵਿੱਚ ਮੰਤਰਾਲਾ  ਦਿਕਸ਼ਾ,  ਈ-ਪਾਠਸ਼ਾਲਾ,  ਮੁਕਤ ਵਿਦਿਅਕ ਸੰਸਾਧਨਾਂ ਦਾ ਰਾਸ਼ਟਰੀ ਭੰਡਾਰ (ਐੱਨਆਰਓਈਆਰ),  ਸਵਯੰ,  ਡੀਟੀਐੱਚ ਚੈਨਲ ਸਵਯੰਪ੍ਰਭਾ ਆਦਿ ਦੁਆਰਾ ਸਾਰੇ ਵਿਦਿਆਰਥੀਆਂ ਦੀ ਪੜ੍ਹਾਈ ਜਾਰੀ ਰੱਖਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

https://twitter.com/DrRPNishank/status/1254676191585296384

ਸ਼੍ਰੀ ਪੋਖਰਿਯਾਲ ਨੇ ਦੱਸਿਆ ਕਿ ਔਨਲਾਈਨ ਸਿੱਖਿਆ ਨੀਤੀ ਨੂੰ ਮਜ਼ਬੂਤ ਬਣਾਉਣ ਲਈ ਅਸੀਂ ਭਾਰਤ ਪੜ੍ਹੇ ਔਨਲਾਈਨ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਹੈ ਜਿਸ ਵਿੱਚ ਦੇਸ਼ ਭਰ ਤੋਂ ਵਿਦਿਆਰਥੀਆਂ ,  ਮਾਪਿਆਂ ਅਤੇ ਅਧਿਆਪਕਾਂ ਤੋਂ ਸੁਝਾਅ ਮੰਗੇ ਗਏ ਸਨ।  ਸਾਨੂੰ 10000 ਤੋਂ ਅਧਿਕ ਸੁਝਾਅ ਪ੍ਰਾਪਤ ਹੋਏ ਸਨ ਜਿਨ੍ਹਾਂ ‘ਤੇ  ਮੰਤਰਾਲਾ  ਬਹੁਤ ਛੇਤੀ ਦਿਸ਼ਾ-ਨਿਰਦੇਸ਼ ਲੈ ਕੇ ਆਵੇਗਾ।

ਕੇਂਦਰੀ ਮੰਤਰੀ ਨੇ ਵਿਦਯਾਦਾਨ 2.0 (Vidyadan 2.0) ਬਾਰੇ ਮਾਪਿਆਂ ਨੂੰ ਦੱਸਦੇ ਹੋਏ ਕਿਹਾ ਕਿ ਇਸ ਮੁਹਿੰਮ ਤਹਿਤ ਮੰਤਰਾਲੇ ਨੇ ਦੇਸ਼  ਦੇ ਸਿੱਖਿਆਸ਼ਾਸਤਰੀਆਂ ਅਤੇ  ਸਿੱਖਿਆ ਸੰਗਠਨਾਂ ਨਾਲ ਵੱਖ-ਵੱਖ ਈ - ਲਰਨਿੰਗ ਪਲੈਟਫਾਰਮਾਂ ‘ਤੇ ਕੋਰਸ   ਦੇ ਅਨੁਸਾਰ ਸਮੱਗਰੀ ਵਿਕਸਿਤ ਕਰਨ ਅਤੇ ਇਸ ਵਿੱਚ ਯੋਗਦਾਨ ਦੇਣ ਦੀ ਤਾਕੀਦ ਕੀਤੀ ਹੈ।  ਸ਼੍ਰੀ ਨਿਸ਼ੰਕ ਨੇ ਅੱਗੇ ਕਿਹਾ ਕਿ ਇਸ ਪ੍ਰੋਗਰਾਮ ਵਿੱਚ ਅਨੇਕ ਸਿੱਖਿਆਸ਼ਾਸਤਰੀਆਂ ਅਤੇ ਸਿੱਖਿਆ ਸੰਸਥਾਵਾਂ  ਨੇ ਆਪਣੀ ਰੁਚੀ ਦਿਖਾਈ ਹੈ ਅਤੇ ਆਸ ਜਤਾਈ ਕਿ ਬਹੁਤ ਛੇਤੀ ਸਾਨੂੰ ਇਸ ਤਹਿਤ ਕਾਫ਼ੀ ਸਾਰੀ ਪਾਠ ਸਮੱਗਰੀ ਮਿਲ ਜਾਵੇਗੀ।

ਇਸ ਸੰਵਾਦ  ਦੇ ਦੌਰਾਨ ਡਾ ਨਿਸ਼ੰਕ ਨੇ ਮਾਪਿਆਂ  ਦੇ ਸਵਾਲਾਂ  ਦੇ ਜਵਾਬ ਵੀ ਦਿੱਤੇ। ਐੱਨਸੀਆਰਈਟੀ ਕਿਤਾਬਾਂ ਦੀ ਉਪਲਬੱਧਤਾ  ਦੇ ਸਵਾਲ ‘ਤੇ ਮੰਤਰੀ ਜੀ ਨੇ ਕਿਹਾ ਕਿ ਐੱਨਸੀਆਰਈਟੀ ਨੇ ਲਗਭਗ ਸਾਰੇ ਰਾਜਾਂ ਵਿੱਚ ਕਿਤਾਬਾਂ ਭੇਜ ਦਿੱਤੀਆਂ ਹਨ ਅਤੇ ਬਹੁਤ ਜਲਦੀ ਵਿਦਿਆਰਥੀਆਂ ਨੂੰ ਇਹ ਕਿਤਾਬਾਂ ਉਪਲੱਬਧ ਹੋ ਜਾਣਗੀਆਂ।

ਸੀਬੀਐੱਸਈ ਦੀਆਂ 10ਵੀਂ ਅਤੇ 12ਵੀਂ ਦੀਆਂ ਰਹਿੰਦੀਆਂ ਪਰੀਖਿਆਵਾਂ ਆਯੋਜਿਤ ਕਰਵਾਉਣ  ਦੇ ਸਵਾਲ ਦਾ ਜਵਾਬ ਦਿੰਦੇ ਹੋਏ ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਹਾਲਾਤ ਨਾਰਮਲ ਹੋਣ ‘ਤੇ ਮੁੱਖ ਵਿਸ਼ਿਆਂ  ਦੇ 29 ਪੇਪਰਾਂ ਦੀਆਂ ਪਰੀਖਿਆਵਾਂ ਦਾ ਆਯੋਜਨ ਕੀਤਾ ਜਾਵੇਗਾ।

ਲੌਕਡਾਊਨ ਵਿੱਚ ਵਿਦਿਆਰਥੀਆਂ ਦੀ ਸਿੱਖਿਆ ਦਾ ਨੁਕਸਾਨ ਕਿਵੇਂ ਘੱਟ ਕੀਤਾ ਜਾਵੇ ਇਸ ਸਵਾਲ  ਦੇ ਜਵਾਬ ਵਿੱਚ ਉਨ੍ਹਾਂ ਨੇ ਕਿਹਾ ਕਿ ਮੰਤਰਾਲੇ  ਦੇ ਵੱਖ-ਵੱਖ ਔਨਲਾਈਨ ਪਲੈਟਫਾਰਮਾਂ  ਜ਼ਰੀਏ ਵਿਦਿਆਰਥੀਆਂ ਦੀ ਸਿੱਖਿਆ ਜਾਰੀ ਹੈ।  ਉਨ੍ਹਾਂ ਨੇ  ਦੱਸਿਆ ਕਿ ਮੰਤਰਾਲੇ  ਦੇ ਕੇਵਲ ਦੀਕਸ਼ਾ ਪਲੈਟਫਾਰਮ ‘ਤੇ ਹੀ 80, 000 ਤੋਂ ਅਧਿਕ ਕੋਰਸ ਉਪਲੱਬਧ ਹਨ ਅਤੇ ਲੌਕਡਾਊਨ ਦੇ ਸਮੇਂ ਵਿੱਚ  ਇਸ ਨੂੰ ਵਰਤਣ ਦੀ ਦਰ ਵਿੱਚ ਕਈ ਗੁਣਾ ਵਾਧਾ ਹੋਇਆ ਹੈ,  ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਇਸ ਸਮੇਂ ਕਰੋੜਾਂ ਵਿਦਿਆਰਥੀਆਂ ਦੁਆਰਾ ਇਸ ਦਾ ਇਸਤੇਮਾਲ ਕੀਤਾ ਜਾ ਰਿਹਾ ਹੈ। ਇੱਕ ਸਵਾਲ  ਦੇ ਜਵਾਬ ਵਿੱਚ ਕੇਂਦਰੀ ਮੰਤਰੀ ਨੇ ਦੱਸਿਆ ਕਿ ਲੌਕਡਾਊਨ ਦੇ ਕਾਰਨ ਸਿੱਖਿਆ ਦਾ ਨੁਕਸਾਨ ਨਾ ਹੋਵੇ ਇਸ ਦੇ ਲਈ ਐੱਨਸੀਈਆਰਟੀ ਦੁਆਰਾ ਵਿਕਲਪਿਕ ਕੈਲੰਡਰ ਬਣਾਇਆ ਗਿਆ ਹੈ ਅਤੇ ਸੀਬੀਐੱਸਈ ਨੂੰ ਵੀ ਨਵਾਂ ਅਕਾਦਮਿਕ ਕੈਲੰਡਰ ਜਾਰੀ ਕਰਨ ਦਾ ਨਿਰਦੇਸ਼ ਦਿੱਤਾ ਗਿਆ ਹੈ।  ਇਸ ਦੇ ਇਲਾਵਾ ਕੇਂਦਰੀ ਮੰਤਰੀ  ਨੇ ਵਿਦਿਆਰਥੀਆਂ  ਦੇ ਕਰੀਅਰ ਸਬੰਧੀ ,  ਪਰੀਖਿਆ ਸਬੰਧੀ ਅਤੇ ਹੋਰ ਕਈ ਸਵਾਲਾਂ  ਦੇ ਜਵਾਬ ਦਿੱਤੇ।

ਉਨ੍ਹਾਂ ਨੇ ਇਸ ਦੌਰਾਨ ਇਹ ਵੀ ਦੱਸਿਆ ਕਿ ਮੰਤਰਾਲਾ  ਲਗਾਤਾਰ ਸਾਰੇ ਰਾਜਾਂ  ਦੇ ਸਿੱਖਿਆ ਮੰਤਰੀਆਂ ਅਤੇ ਸਿੱਖਿਆ ਸਕੱਤਰਾਂ  ਦੇ ਸੰਪਰਕ ਵਿੱਚ ਹੈ ਅਤੇ ਇਹ ਸੁਨਿਸ਼ਚਿਤ ਕਰਨ ਵਿੱਚ ਲਗਿਆ ਹੋਇਆ ਹੈ ਕਿ ਇਸ ਮੁਸ਼ਕਿਲ ਘੜੀ ਵਿੱਚ ਵੀ ਵਿਦਿਆਰਥੀਆਂ ਦੀ ਪੜ੍ਹਾਈ ਜਾਰੀ ਰਹੇ।  ਇਸ ਸੰਦਰਭ ਵਿੱਚ ਕੱਲ੍ਹ ਉਹ ਸਾਰੇ ਰਾਜਾਂ  ਦੇ ਸਿੱਖਿਆ ਮੰਤਰੀਆਂ  ਨਾਲ ਵੀਡੀਓ ਕਾਨਫਰੰਸਿੰਗ  ਜ਼ਰੀਏ ਗੱਲ ਕਰਨਗੇ ਜਿਸ ਵਿੱਚ ਵਿਸ਼ੇਸ਼ ਰੂਪ ਨਾਲ ਕੋਵਿਡ - 19 ਤੋਂ ਪੈਦਾ ਹੋਈ ਅਕਾਦਮਿਕ ਚੁਣੌਤੀਆਂ ਨਾਲ ਨਜਿੱਠਣ,  ਮਿਡ ਡੇ ਮੀਲ ਅਤੇ ਸਮਗਰ ਸ਼ਿਕਸ਼ਾ (Samagra Shiksha) ਆਦਿ ਬਾਰੇ ਚਰਚਾ ਕੀਤੀ ਜਾਵੇਗੀ।

ਸ਼੍ਰੀ ਨਿਸ਼ੰਕ ਨੇ ਇਸ ਵੈਬੀਨਾਰ ਨਾਲ ਜੁੜਨ ਲਈ ਸਾਰੇ ਮਾਪਿਆਂ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਅਗਲੇ ਹਫ਼ਤੇ ਉਹ ਵੈਬੀਨਾਰ  ਜ਼ਰੀਏ ਵਿਦਿਆਰਥੀਆਂ ਨਾਲ ਜੁੜਨਗੇ ਅਤੇ ਉਨ੍ਹਾਂ ਨਾਲ ਸੰਵਾਦ ਸਥਾਪਿਤ ਕਰਨਗੇ।

ਉਨ੍ਹਾਂ ਨੇ ਆਪਣੇ ਸੰਵਾਦ ਨੂੰ ਸਮਾਪਤ ਕਰਨ ਤੋਂ ਪਹਿਲਾਂ ਸਾਰੇ ਮਾਪਿਆਂ ਦਾ ਇਸ ਮੁਸ਼ਕਿਲ ਸਮੇਂ ਵਿੱਚ ਧੀਰਜ ਨਾਲ ਲੌਕਡਾਊਨ ਦਾ ਪਾਲਣ ਕਰਨ ,  ਸੋਸ਼ਲ ਡਿਸਟੈਂਸਿੰਗ ਅਤੇ ਸਿਹਤ ਵਿਭਾਗ  ਦੇ ਦਿਸ਼ਾ-ਨਿਰਦੇਸ਼ਾਂ ਦਾ ਪਾਲਣ ਕਰਦੇ ਰਹਿਣ ਲਈ ਧੰਨਵਾਦ ਕੀਤਾ ਅਤੇ ਉਨ੍ਹਾਂ ਨੂੰ ਕੋਰੋਨਾ  ਦੇ ਖ਼ਿਲਾਫ਼ ਇਸ ਜੰਗ ਵਿੱਚ ਪੂਰੀ ਇਮਾਨਦਾਰੀ  ਨਾਲ ਹਿੱਸਾ ਲੈਣ ਲਈ ਧੰਨਵਾਦ ਕੀਤਾ।

******

ਐੱਨਬੀ/ਏਕੇਜੇ/ਏਕੇ