‘মন কি বাত ২.০’গী ১১শুবা তাংকক্কী ৱা ঙাংবদা প্রধান মন্ত্রী শ্রী নরেন্দ্র মোদীনা ভারতকী কোরোনাগা শোক্নরিবা লান অসিদা মীয়াম্না মরু ওইবা থৌদাং য়াদুনা মীয়াম, সরকার অমসুং লৈঙাক্লোইশিংগা লোইননা লাইচৎ অসি লানথেংনরি হায়খ্রে। লৈবাক অসিগী মীওই খুদিংমক লান অসিগী লান্মীনি অমসুং মখোইনা লান অসিগী মাং থাদুনা চৎলি হায়না মখা তানা হায়খি। লানফম অসিদা মফম মতম খুদিংদা অমনা অমগী মতেং পাংনবা চোংথোরক্লিবা মীয়ামগী ৱাখল্লোনবুসু মহাক্না থাগৎখি। 

লৈত-লাইরশিংগী চাননবা পীনবা হোৎনবদগী হৌরগা চেং হ্ৱাই পীবা ফাওবা, লোকদাউন ইন্দুনা চৎপা, মশানা লায়েংশং শিনবদগী হৌরগা অনা লায়েংগী পোৎ-চৈ শেম শাবা ফাওবগী থবক কয়া তৌদুনা ময়াম পুন্না খোংশানমীন্নরি হায়না প্রধান মন্ত্রীনা হায়খ্রে। হেন্দোক পাথোক্না মশাদা থাজবা অমসুং ঐখোইগী শহর, খুঙ্গং, লৈরক খুল্লক নত্ত্রগা লোইশংদা কোরোনা য়ৌরক্ত্রবনিনা কৈদৌনুংদা য়ৌরক্লরোই হায়বগী অরানবা ৱাখল খনবীগনু হায়না মহাক্না হায়খি। ‘দো গজ দুরী হে জরুরী’ হায়বা অসি ঐখোইগী লাইশোন ওইগদবনি অমসুং মীয়াম্না মশা ফনা লৈনবা য়ামদ্রবদা অমগী অমগী মরক্তা খুদুপ অনিগী অরাপ্পা থমগদবনি হায়না মহাক্না য়াম্না কন্না হায়খি। হেন্না থৱাই য়াওরিবনি হায়দুনা লৈকাইগী থাক্তা নত্ত্রগা অতৈ মফম খুদিংমক্তা লৈবা মতমদা চেকশিন্দবা হায়বসি কৈদৌনুংদা তৌবীগনু হায়না মীয়ামদা চেকশিন ৱাসু হায়খি।

ঐখোইগী থবক তৌবগী হৈনবীশিং, পুন্সি মহিং অমসুং মীওইবগী নোংমগী ওইবা হৈনবীশিংদা অফবা অহোংবা কয়া মশা মথন্নতা লাকপা হৌরে হায়না প্রধান মন্ত্রীনা হায়খি। খ্বাইদগী হেন্না পাক শন্না উবা ফংবা অসি মাস্ক উপ্তুনা মায় খুমজিনবা অসিনি। কোরোনাগী মরমদগী পুরকপা অহোঙবা অসিনা মাস্ক উপ্পা অসি মীওইবগী নোংমগী পুন্সিগী হৈনবী অমা ওইরক্লি হায়না মহাক্না হায়খি। হৌজিক্তি মাস্ক অসিনা অফবা খুন্নাই অমগী খুদম ওইরগনি হায়নসু হায়খি। মহাক্না মীয়ামদা গমছা অমা নত্ত্রগা ফি মচা শিজিন্নদুনা মায় কুপ্নবা ৱাফমসু থমখি।

খুন্নাই অসিদা নীংথিনা খঙবা হৌরকইবা ৱাফম অমদি মীয়াম তিনবা মফমদা তিন শিৎপদগী ওইরকপা ফত্তবশিং অদুনি হায়না পি.এম.না ফোংদোকখি। মহাক্না হায়খি মদুদি মফম মরাং খঙদনা তিন শিৎপগী ফত্তবা হৈনবী অসি মীওই অয়াম্বনা তৌরম্মি অমসুং মসিনা লু-নানবা অমসুং হকশেলদা অচৌবা অয়েৎপা অমা পীদুনা লাক্লি। মহাক্না মীপুম খুদিংনা হৈনবী অসি থাদোকপীয়ু হায়না হায়খি। মসিনা ঐখোইগী লু নান্না ইশা-ইউ ফনা লৈহনবতা নত্তনা কোরোনাগী লাইচৎ অসিসু থিংবদা মতেং পাংগনি হায়না মহাক্না হায়খি।  

প্রধান মন্ত্রীনা হায়খি মদুদি ইরাং মনুং অসিদা লৈবাক মীয়াম্না উৎলিবা থৌনা লিংজেল অসিনা অনৌবা ভারত অমা শেম্বগী থৌওং হৌরক্লে। ললোন ইতিক্কী মফমশিং, লোইশঙশিং, মহৈ তম্নবা ইন্সতিত্যুসনশিং অমসুং লৈবাক অসিগী অনা লায়েংগী সেক্তরশিং চলাইবগী ইনৌ নৌবা থৌওং অমদসু কন্না চংশিল্লক্লি হায়না মহাক্ন হায়খি। তেক্নোলোজীগী মতাংদসু লৈবাক অসিগী ইন্নোভেতর খুদিংনা ওইরক্লিবা ফিভম অসিগী তাল্লকসিদা অনৌবা অমা নত্ত্রগা অমা পুথোরক্লি।

কেন্দ্রগী, রাজ্যগী সরকারশিং অমসুং বিভাগ অমসুং ইন্সতিত্যুসন খুদিংমক্না অমগা অমগা খুৎশম্নদুনা মীয়ামগী য়াইফনবা থবক থৌরম কয়া নীংথিনা পাইখৎলি হায়না পি.এম.না হায়খি। এবিএসন সেক্তর, রেলৱেগী থবক তৌরিবশিংনা লৈবাক মচাশিংনা থেংনরিবা খুদোংচাদবশিং অসি লৌথোকপীদুনা অহিং নুংথিল নাইদনা থবক তৌরি হায়না মহাক্না হায়খি। মহাক্না লাইফলাইন উরান হায়রিবা অখন্নবা কেম্পেন অসিনা অতেনবা মতমগী মনুংদা লৈবাক শিনবা থুংনা হিদাক লাংথক ফংহল্লিবা অসিগী মতাংদসু পনখি। লাইফলাইন উরান্না পুন্না কিলোমীতর লাখ অহুমগী অরাপ্পা পাইদুনা লৈবাক অসিগী কাচিন কোয়া থুংনবা মেদিকেল সপ্লাইগী অপুনবা তোন চামঙাদগী হেনবা অসি পীরি। 

লোকদাউন অসিগী মনুংদা লৈবাক অসিগী অপুনবা মীচম মীয়ামদা তঙাই ফদবা পোৎলমশিং ৱাত্তনা ফংহন্নবগীদমক্তা রেলৱেনা হনবা লৈতনা থবক তৌরিবা অসিগী মতাংদা প্রধান মন্ত্রীনা পনখি। ইন্দিয়ন রেলৱেনা পার্সেল ত্রেন ১০০গী মথক্তা লম্বী ৬০মুক্তা চেল্লি। শ্রী মোদীনা হায়খিবদা পোস্তেল বিভাগসু মেদিকেল সপ্লাইশিং ফংহন্নবা হোৎনবদা অচৌবা মতেং পাংলি। মহাক্না মখোইশিং অসি কোরোনাগী অশেংবা লান্মীনি হায়খি। লাইরবশিংগী মতেং পাংবা অসি সরকারগী অচেৎপা খুভম অমনি হায়বদু পল্লদুনা লাইরবশিংগী বেঙ্ক একাউন্ততা প্রধান মন্ত্রী গরীব কল্যান পেকেজগী মখাদা হকথেংনা শেল হাপ্পগী থবকশিংসু চত্থরি হায়না প্রধান মন্ত্রীনা হায়খি। লাইরবশিংদা লেম্না গ্যাস সিলিন্দর পীবা অমসুং থা অহুমগী হৱাই চেংৱাই লেম্না পীবগী খুদোংচাবসু পীরি। মহাক্না সরকারগী বিভাগ কয়া অমসুং বেঙ্কতা থবক তৌরিবা মীওইশিংনা অমত্তা ওইনা থবক তৌমিন্নরিবা অসিবুসু থাগৎপা ফোংদোকখি। 

পি.এম.না রাজ্য সরকারশিংবুসু লাইচৎ অসি থেংনবদা থৱাই য়াওনা থবক তৌবগীসু থাগৎপা ফোংদোকখি। মহাক্না হায়খি মদুদি মফম মফমগী লৈঙাক্লোইশিং অমসুং রাজ্যগী সরকারশিংনা মশাগী থবকশিং মতিক চানা পাংথোক্লিবা অসি কোরোনাগা থেংনরিবা লান অসিদা য়াম্না মরু ওই। মখোইনা কন্না হোৎনরিবশিং অসি থাগৎফম থোকই হায়না মহাক্না হায়খি। লৈবাক পুম্বা অসিগী মেদিকেল সর্বিস্তা থবক তৌরিবা মীওইশিং অসিদা থমোই শেংনা থাগৎপা ফোংদোক্লদুনা প্রধান মন্ত্রীনা দাক্তরশিং, নর্সশিং, পেরা-মেদিকেল স্তাফশিং, কম্ম্যুনিতী হেলথ থৌমীশিং অমসুং মরী লৈনবা অসিগুম্লবা মীওইশিং অসিনা মতম পুম্বদা থবক নীংথিনা তৌরদুনা কোরোনা লৈতবা ভারত অমা ওইহন্নবা থৌদাং লৌরি হায়না হায়খি। মখোইগী তেক্ত কাইদনবা ঐখোইনা হোৎনফম থোকই অমসুং মসিগী মরী লৈনবা খোংথাং অমসু লৌখৎখ্রে। খোংথাং অসিনা অসিগুম্লবা কোরোনাগী লান্মীশিং অসিদা অয়েৎপা পীবা, অশোক অপন নংহনবা অমসুং য়ৈখাই থিনখাইবগী থবক তৌবা মীওইশিংদা অকনবা চৈরাক পীনবা ৱাফম কয়া অমা য়াওই। 

য়ুমগী থবক্ত মতেং পাংবীরিবশিং, ঐখোইগী অৱাৎপশিং পীরিবা অচম্বা মীওইশিং নত্ত্রগা দুকান্দা থবক তৌবা মীওইশিং, তঙাই ফদবা পোৎ চৈ থিন্দোক থিঞ্জিন তৌরিবা মীওইশিং, কৈথেলদা থবক শুরিবা শিন্মীশিং, খুল্লক্তা ওতো রিক্সো থৌরিবশিংগী খুদম পীরদুনা শ্রী মোদীনা হায়খি মদুদি মখোই য়াওদ্রগদি ঐখোইগী পুন্সি অসি কয়া য়াম্না ৱাগদগে হায়বদু ঙসিদি খঙলে। হৌজিক্তি মীয়াম্না মখোইশিং অসিবু নীংশিংদুনা মখোইগী মতেং পাংবতা নত্তনা সোসিএল মীদিয়াদা মখোইগী মরমদা ইকাই খুম্ননীংঙাই ওইবা ৱাহৈ-ৱাতা কয়া ইনরি হায়না মহাক্না হায়খি। দাক্তরশিং, অনা লায়েংশংগী অমোৎ অকাই শেংবা মীওইশিং অমসুং মরী লৈনবা মীওইশিং অমসুং পুলিস্কী মীওইশিংসু ঙসিদি মীয়াম্না তোঙানবা অফবা মিৎয়েং অমদা য়েংলে হায়না হায়খি। ঙসিদি পুলিস্কি মীওইশিংনা লাইরবশিং অমসুং লৈত-লাইরশিংদা চাননবা অমসুং হিদাক লাংথকশিং য়ৌনবসু হোৎনরি হায়না মহাক্না হায়খি। হৌজিক্তি মীওই মীয়াম্না পুলিস্কা থমোইগী মরী লৈনবগী মতম অদু ওইরক্লে হায়না মহাক্না হায়খি। 

শ্রী মোদীনা হায়খিবগী মতুং ইন্না সরকারনা covidwarriors.gov.in কৌবা দিজিতেল প্লেতফোর্ম অমা পুথোক্লে। প্লেতফোর্ম অসিগী খুত্থাংদা সোসিএল ওর্গানাইজেসনগী মীওইশিং, সিবিল সোসাইতীগী মীহুৎশিং অমসুং মফম মফমগী লৈঙাক্লোইশিং অসি অমগা অমগা শম্নহল্লে। য়াম্না তেনবা মতমদা দাক্তরশিং, নর্সশিং, এ.এস.ঐচ.এ.-এ.এন.এম.গী থৌমীশিং, এন.সি.সি. অমসুং এন.এস.এস. কেদেৎশিং, তোঙান তোঙানবা লমগী মীওই কয়া য়াওনা মীওই কোতি ১.২৫ অসি পোর্তেল অসিগী শরুক অমা ওইরে। মসিগী কোবিদকী লান্মীশিং অসিনা লৈকাইগী থাক্তা ক্রাইসিস লাকশিন্নবা শিল লাংবা অমসুং চলাইবদা মতেং অচৌবা অমা পাংলি। মহাক্না মীয়ামসু covidwarriors.gov.in অসিদা য়াওদুনা কোবিদকী লান্মী অমা ওইবীদুনা লৈবাক্কী শেবা তৌবীয়ু হায়না হায়খি।

প্রধান মন্ত্রীনা ইরাং অসিগী মরক অসিদা ভারতনা মীওইবা অমগী তৌফম থোকপা ওইনা মালেমদসু তঙাই ফদবা মীওইশিংগী ওইনা হিদাক লাংথক পীরি হায়না মীয়ামদা খঙহনখি। মালেমগী মীওই কয়া অমনা ভারতকী অয়ুর্ভেদা অমসুং য়োগগী কান্নবা অমসুং মসিনা ঐখোইগী ইম্ম্যুন সিস্তেম ফগৎহনবদা পীবা তেংবাং কয়া অসিগী মরম্না ঐখোইদা পুক্নিং চংনা য়েংলি হায়না মহাক্না হায়খি। শ্রী মোদীনা আয়ুশ মন্ত্রালয়না ইম্ম্যুন ফগৎহন্নবা হায়রিবা কাংলোনশিং অসি ইল্লু হায়না হায়খি। ঈশিং লুম্বু লুম্বু শাবা, দিকোক্সন তৌবা অমসুং আয়ুশ মন্ত্রালয়না পীরিবা কাংলোনশিং অসি য়াম্না কান্নবনি হায়না মহাক্না মখা তানা হায়খি। ঐখোইনা ঐখোইগী পাঙ্গল অমসুং ঐখোইগী ফজরবা চৎনবীশিং অসিবু শক খঙবীদবা অসি ঐখোইগী লাইবক থীবনি হায়খি। ঐখোইগী হৌরক্লিবা য়াওল অসিনা খুদমদা য়ুম্ফম ওইবা থিজিন হুমজিনবা তৌদুনা ঐখোইগী ইনাৎকী চৎনবীশিং অসি অনৌবা অমসুং সাইন্তিফিক ওইবা লোন্দাদা নৌহৌননা পুথোকপগী তঙাইফদবা অদুগী মতাংদা পনখি। মালেম অসিনা ঐখোইগী য়োগবু হরাওনা লৌশিল্লিবা অসিগুম্না ঐখোইগী লিশাং শিৎনা লিরবা অয়ুর্বেদগী ৱাখল্লোন অসিবুসু হরাওনা লৌশিনগনি হায়না মহাক্না হায়খি। 

অকশয় ত্রিত্যগী শেংলবা নুমিৎ অসিদা লৈবাক মীয়াম্না অকোইবা, উমং, তুরেল অমসুং ইকোসিস্তেম অপুনবা অসিগী মতাংদা অমুক্তং মুন্না খন্থবীয়ু হায়না প্রধান মন্ত্রীনা হায়খি। করিগুম্বা ঐখোইনা অমুক নৌনা ফংবা য়াবা পোত্থোকশিং অসি অদুম শিজিন্নবা পাম্লবদি ঐখোইগী পৃথিবী অসিসু ৱাৎতা পাদনা অমুক লৈহনবা মথৌ তাই হায়না প্রধান মন্ত্রীনা মখা তারদুন হায়খি। শ্রী মোদীনা হায়খি মদুদি অকশয় ত্রিত্যগী কুমহৈ অসিনা ইরাং মনুংদা মীঙোন্দা পীথোকপগী পাঙ্গল অমসুং শক্তি মশক খঙবগী তাঞ্জা অমা পীরি। প্রধান মন্ত্রীনা নুমিৎ অসি তিরথাঙ্করাগী অহানবা লাই রিশবদেবগী পুন্সিদা য়াম্না মরু ওইবা নুমিৎ অমা ওইখি অমসুং নুমিৎ অসি ঈশ্বর বাস্বেশ্বরগী মপোক নুমিৎসু ওই হায়না মীয়ামদা নীংশিংহনখি। রমজানগী শেংলবা থাসু হৌরে অমসুং ইদকী মমাংদা মালেম অসিদা কোরোনাবু লোইশিনহনবীরো অমসুং থৱাই য়াওনা ইদ পাংথোকচরগে হায়রদুনা হান্নদগী হেন্না থৱাই চেৎনা খুরমগদবনি হায়না হায়খি। 

রমজানগী মনুং অসিদা লম লমগী লৈঙাক্লোইশিংনা পীরিবা কাংলোনশিং অসি নীংথিনা ইন্নবাশ্রী মোদীনা মীয়ামদা হায়খি মরমদি লম্বীদা, কৈথেলদা অমসুং লৈকাইদা নত্ত্রগা খুল্লক্তা অমনা অমদগী লাপ্ননা লৈবগী কাংলোন ইনবা অসি য়াম্না মরু ওইবনি হায়নসু হায়খি। মীয়াম্বু খুদুপ অনি লাপ্না লৈনবা অমসুং য়ুম য়ুমদ্গী থোক্তনবগী কান্নবা কয়া খঙহল্লিবা খুন্নাইগী লুচিংবশিংবুসু শ্রী মোদীনা থাগৎপা ফোংদোকখি। মালেম পুম্বদা, ভারতসু য়াওনা, কুমহৈ পাংথোকপা অমসুং শরুক য়াবগী মওং অসি কোরোনানা হোংহল্লে হায়না প্রধান মন্ত্রীনা হায়খি।