এম.এস.এম.ই. অমসুং আর.তি. &ঐচ.কী কেন্দ্র মন্ত্রী, শ্রী নিতীন গদকারীনা কোবিদ-১৯ শন্দোরকপা অসি থিংনবা থমখিবা লোকদাউন অসিনা মরম ওইরগা থোকহল্লকপা মায়োক্নরিবা অৱাবশিং অসিদগী লান্থোকপা ঙম্নবা সরকারগী মাইকৈদগী অঙম্বা মতেং পুম্নমক পাংগনি হায়না ফুতৱেয়র ইন্দস্ত্রীদা থাজবা পীরকখ্রে। মহাক্না নাগপুরদগী ভিদিও কনফরেন্সিংগী খুথাংদা কনফিদরেশন ওফ ইন্দিয়ন ফুতৱেয়রগী ইন্দস্ত্রীশিংগী মীহুৎশিংগা লোইননা ৱারী শানখি। শ্রী গদকারীনা হায়খি মদুদি সরকারনা ঙরাং খক্তং লুপা কোতি ৫২০৪ হৌখিবা নুমিৎ ১০নিদা ইনকম তেক্স দিপার্তমেন্ততগী রিফন্দ ওইনা এম.এস.এম.ই.শিংদা থাদোকখ্রে মসিনা সেক্তর অদুদা য়াম্না চাউনা মতেং পাংগনি।

মন্ত্রীনা ইন্দস্ত্রীদা মপান লমদগী পোৎচৈ পুশিল্লকপশিংগী মহুৎ শিন্নবা থবক পাইখৎপা অমসুং মপান লমদা পোৎচৈশিং থাদোক্নবগীদমক্তা তাঞ্জা অসি লৌনবসু হায়খ্রে।

মীফম অদুদা, ফুতৱেয়র ইন্দস্ত্রীগী মীহুৎশিংনা ৱার্কিং কেপিতেল, লোজিস্তিকশিং, শানবা মচাকশিং, থবক শুফমগী ফিভম, কর্বার তৌবা মখা তানা চথবা অমসুং কোবিদ-১৯গী লাইচৎ অসিগী মরক্তা ফুতৱেয়রগী দিমান্দদা শোকহনবশিংগা মরী লৈননা খন্ননীংঙাই ওইবা ৱাফমশিং পুথোরকখি অমসুং সেক্তর অসিবু শোকহন্দনবা সরকারনা তেংবাংনবগী পাম্বৈশিং লৌখৎপীনবা হায়জরকখ্রে।

মসিদ নত্তনা মখা তানা হায়খ্রে মদুদি লোকদাউন মতুংদা ফাওবা তপ্না তপ্না অদুম পোৎচৈ পুথোকপা হৌরগনি অমসুং ফুল কেপাসিতী য়ৌবদা থা খরদি অদুমক চংখিগনি মসিনা মরম ওইরগা শানবগী মচাকশিংদা কা হেন্না অহেনবা লৈবগী ফিভম থোরকপা অদুনা শানবগী মচাকশিং অদু কা হেন্না পৈশিন্দনবা চাইনাদগী ফুতৱেয়রগী শানবগী মচাকশিং পুশিল্লকপা অদু লেপ্নবা হায়জখ্রে।

শ্রী গদকারীনা পনখি মদুদি খ্বাইদগী অহানবা অমসুং খ্বাইদগী মরু ওইবদি, সরকার অসিনা অখন্নবা সেক্তর খরদি মথৌ তৌবা হৌনবগী অয়াবা পীখ্রে অদুবু কোবিদ-১৯ শন্দোরকপদগী থিংনবা মথৌ তাবা ঙাকথোক্নবগী পাম্বৈশিং শিজিন্নবা অসি ইন্দস্ত্রীশিংনা তঙাইফদনা মথৌ তাই। মহাক্না পি.পি.ই. (মাস্কশিং, সেনিতাইজরশিং, গ্লোবশিং অসিনচিংবা) শিজিন্নবগী মতাংদা মরু ওইনা পনখি অমসুং কর্বারগী থবক থৌওংশিং মখা তানা চত্থবা মতমদা সোসিয়েল দিস্তেন্সিং নীংথিনা পাংথোক্কদবনি হায়না পাউতাক পীখ্রে।

শ্রী গদকারীনা শেল-থুমগী মন্ত্রালয় অমসুং কমর্স মন্ত্রালয়দা সেক্তর অসিগী ওইনা খুদক্কী ওইবা তেংবাং পীননবা মরি লৈনবা ইসুশিং লৌখৎকনি হায়বগী থজবা পীরকখ্রে। শ্রী গদকারীনা ফুতৱেয়র ইন্দস্ত্রীনা লোকদাউন মতুংদা কর্বারগী থবক থৌরমশিং অমুক পাইখৎপা হৌবা মতমদা থাজনা অফবা খোংথাংগা লোইননা হৌগদবনি অমসুং কোবিদ-১৯গী চিরবা মতম অসি লোইখ্রবা মতুংদা থোরক্কদবা খুদোংচাবশিং অদু লৌনবগীদমক্তা পুন্না থবক তৌমিন্নগদবনি হায়নসু হায়খি।