ঙসি ভারত সরকারনা কোবিদ-১৯গা মায়োক্ননবগীদমক লৈবাক শিনবা তুংনা পাংথোক্লিবা লোদাউন অসি মো ৩ ফাওবা শাংদোক্নবা ৱারেপ লৌখ্রে।

কেন্দ্রগী য়ুমলৈ-কৈরৈ মন্ত্রী শ্রী অমিৎ শাহনা মসিগীদমক প্রধান মন্ত্রীজীবু থমোই শেংনা তৌবীমল খঙবা ফোংদোক্লদুনা হায়, “ঙসি প্রধান মন্ত্রী শ্রী নরেন্দ্র মোদীনা কোবিদ-১৯ শন্দোকপদগী ঙাকথোক্নবা অমসুং মসিবু লোইশিন্নবগীদমক লৈবাক শিনব-থুংনা তৌরিবা লোকদাউন অসি মে ৩ ফাওবা শাংদোক্নবা ৱারেপ লৌরকপা অসি ভারত অমসুং ভারত মচাশিংগী পুন্সি অমসুং মখোয়বু ঙাক শেন্ননবগীদমক লৌরকপা ৱারেপনি। মসিগীদমক্তা ঐনা প্রধান মন্ত্রীজীবু থমোই শেংনা তৌবীমল খঙবা উৎচরি।”

কোবিদ-১৯ শন্দোরকপদগী থিংননবা অমসুং মসিবু লোইশিন্নবগীদমক ভারত সরকারনা লৌরকপা ৱারেপ খুদিংমকপু থাগৎপা ফোংদোক্লদুনা শ্রী শাহনা হায়, “ঙসি মালেম অপুনবনা কোরোনা লাইচৎ মায়োক্নরিবা মতম অসিদা প্রধান মন্ত্রী শ্রী নরেন্দ্র মোদীগী মিৎয়েং মখাদা ভারতকী মীয়াম্না মসিগা মায়োক্নবদা খুদম অমা থম্লে। সরকারনা মতম চানা লৌরকপা ৱারেপ পুম্নমক অমসুং মীয়াম্না মসিবু শৌগৎপা অসি মসিগী খুদম্নি।”

লাইচৎ অসিগা মায়োক্ননবা অমসুং মীয়ামগী তঙাইফদবা পুম্নমক মপুং ফাহন্নবগীদমক কেন্দ্র অমসুং রাজ্যশিংগী মরক্তা চুংশিন্নবা অসি মরু ওই হায়না ফোংদোক্লদুনা য়ুমলৈ-কৈরৈ মন্ত্রীনা হায়, “লম লমগী সরকার পুম্নমক্না কেন্দ্র সরকারগা চুংশিন্নদুনা থবক তৌমিন্নরিবা অসি থাগৎনীংঙাইনি। হৌজিক ঐখোয় চুংশিন্নবা অসি অমুক্কা হেন্না চেৎশিলহনবা তাই মদুনা মরম ওইদুনা মীপুম খুদিংমক্না লোকদাউন অসি নীংথিজনা ইনগনি অমসুং মীওই অমত্তনা তঙাইফদবা পোৎলমশিংগী অৱাৎপা লৈরোই।”

কোবিদ-১৯গা মায়োক্নরিবা অহানবা পরেংদা লেপ্লিবা হকশেল অমসুং ঙাকশেলগী মীওইশিংদা সেলুৎ পীরদুনা শ্রী অমিৎ শাহনা হায়, “লানফম অসিদা মরুওইবা থৌদাং লৌবীরিবা ঐখোয়গী দোক্তর, হকশেলগী মীওইশিং, লুব-নানবগী মীওইশিং, পুলিস ফোর্স অমসুং ঙাক-শেলগী মীওই পুম্নমক্কী থৌদাং অসি থমোইদা পাল্লি। অসিগুম্বা অকিবগী মশক ওইরবা ফিভম অসিদা অদোমগী থৌনা অসিনা ভারত মচা খুদিংমক্তা ইথিল পোকহনবীরি। পুম্নমক্না গাইদলাইনশিং ঙাক্তুনা মখোয়গী মতেং পাংসি।”

অৱাবগী মতম অসিদা লৈবাক অসিগী মীয়ামদা থাজবা পীরদুনা অমসুং অমনা অমগী মতেং পাংননবা পুক্নীং থৌগৎলদুনা শ্রী শাহনা হায়, “লৈবাক অসিগী য়ুম্লৈ-কৈরৈ মন্ত্রী অমা ওইনা ঐনা লৈবাক মীয়ামদা অমুক্কা হন্না থাজবা পীজরি মদুদি লৈবাক অসিদা চানবা পোৎলম, হিদাক-লাংথক অমসুং অতৈ নুংতিগী চংদবা য়াদ্রবা পোৎলমশিং মরাং কাইনা লৈরি। মরম অদুনা মীওই অমত্তনা পাখৎপগী মথৌ তাদে। মসিগা লোইননা ৱাৎত-পাদবা মীওইশিংদা হায়জরি মদুদি অদোম থোকপীরক্তুনা অদোমগী অকোইবদা লৈবা লাইরবশিংগী মতেং পাংবীয়ু।”