প্রধান মন্ত্রী শ্রী নরেন্দ্র মোদীনা ঙসি কোবিদ-১৯গা মায়োক্ননবগীদমক মতুং তারকপা লাল্লোং য়াৎননবা ভিদিও কনফরেন্সকী থোংদা রাজ্য পুম্নমক্কী মুখ্য মন্ত্রীশিংগা লোইননা খন্ন-নৈনখ্রে। মসি মুখ্য মন্ত্রীশিংগা লোইননা পাংথোকপা প্রধান মন্ত্রীগী অসিগুম্বা মখলগী অহুমশুবা খন্ন-নৈনবনি, মসিগী মমাংদা এপ্রিল ২ অমসুং মার্চ ২০, ২০২০দা পাংথোকখি।

প্রধান মন্ত্রীনা হায়খি মদুদি কেন্দ্র অমসুং রাজ্যশিংনা পুন্না হোৎনবদগী কোবিদ-১৯কী শাফু অসি হন্থহনবদা তেশেংনা মতেং ফংলি, অদুবু ফিভম অসি য়াম্না থুনা অহোংবা নাইরি, মরম অদুনা মিৎকুপ নাহুম শিংনা লৈবা অসি মথৌ তাই। প্রধান মন্ত্রীনা থোইদোক্না শাফু পীরদুনা হায় মদুদি ভাইরস শন্দোকপদগী থিংননবা হৌজিক ফাওবদা লৌখৎখিবা খোংথাংশিংনা পীবা শাফু অদু খঙদোক্নবগীদমক মথংগী চয়োল ৩-৪ অসি য়াম্না মরু ওই। মহাক্না মসিসু হায়খি মদুদি শিংনবা অসি মায়োক্ননবা তীম ৱর্ক তশেংনা মথৌ তাই।

প্রধান মন্ত্রীনা ময়েক শেংনা থাজবা পীখ্রে মদুদি ভারত্তা তঙাইফদবা হিদাক-লাংথকশিং মরাং কাইনা লৈরি। মসিগা লোইননা মহাক্না হায়খি মদুদি লানফম অসিদা খ্বাইদগী মাংজিন থারিবা থৌমী পুম্নমক্কীদমক্তা প্রোতেক্তিব গীয়র অমসুং মরু ওইবা ইক্বিপমেন্ত ফংহন্নবগীদমক পাম্বৈ পুথোক্লি। মহাক্না ব্লেক মার্কেতিং অমসুং পৈশিন্দুনা থমজিনবশিংগী মায়োক্তা অকনবা থবক লৌখৎনবা পাউজেল পীখি। দোক্তরশিং অমসুং হেল্থ প্রোফেস্নরশিংদা খুৎ থাবা অমসুং অৱাং নোংপোক অমসুং কশ্মীরগী মহৈরোইশিংদা ফজদবা লমচৎ চৎখিবগী থৌদোক অদুবু য়ানীংদবা ফোংদোকপগা লোইননা অৱাবা ফোংদোক্লদুনা প্রধান মন্ত্রীনা ৱাফম অসি ফোংদোকখি মদুদি অসিগুম্বা মতাংদা পুক্নীং চেৎনা লাকশিনবগী মথৌ তাই। মহাক্না লোকদাউন থুগাইবশিং থিংনবা অমসুং সোসিয়েল দিস্তেন্সিং ঙাক্না চৎপা তঙাইফদবগী মতাংদসু ৱারী শাখি।

লোকদাউন লোইশিন্নবগী থৌরাংগী মরমদা ফোংদোক্লদুনা প্রধান মন্ত্রীনা হায়খি মদুদি লোকদাউন অসি চয়োল অনি অমগা শাংদোকপদা রাজ্যশিংগী মরক্তা অমত্তা ওইনা য়ানীংবা উরে। মহাক্না ৱাফম অসি পনখি মদুদি সরকারগী মন্ত্র অসি মমাংদা ‘জান হৈ তো জহান হৈ’ অসি ওইরম্মি, অদুবু হৌজিক্তি মন্ত্র অসি ‘জান ভী জহান ভী’ ওইরে।

প্রধান মন্ত্রীনা হকশেলগী সর্বিসশিংগা মরী লৈনবা ইনফ্রাস্ত্রকচর অসি মপাঙ্গল কলহনবা অমসুং তেলি-মেদিসিনগী পাম্বৈনা অনাবশিং ফাওবা য়ৌশিনবদা অখন্ননা শাফু পীখি। মহাক্না মসি হৌদোকখি মদুদি কৈথেলদা মীয়াম তিনবা হন্থহন্নবা লৌউ-শিংউগী পোৎথোকশিংগী দাইরেক্ত মার্কেতিং শৌগৎপা য়াই, মসিগীদমক্তা মোদেল এ.পি.এম.সি. লোশিং খোংজেল য়াংনা শেমদোক্কদবনি। অসিগুম্বা মখলগী খোংথাংশিংনা লৌমীশিংনা মখোয়গী থোঙ্গাল মক্তদা মখোয়গী পোৎথোকশিং য়োনবদা মতেং পাংগনি।

প্রধান মন্ত্রীনা আরোগ্য সেতু এপ অসি অদুক্কী মতিক য়াম্না দাউনলোদ তৌননবগীদমক মীয়াম্না পাম্নহন্নবসু ফোংদোকখি। মহাক্না মতৌ করম্না খা কোরিয়া অমসুং সিঙ্গাপুরনা অনাবশিংগা লোইনরুবা মীওইশিং খঙদোকপদা মাই পাকখিবগে হায়বদুগী মতাংদা পনখি। মহাক্না হায়খি মদুদি অসিগুম্বা এক্সপিরিয়েন্সশিংগী য়ুম্ফমদা ভারতনা লাইচৎ অসিগী মায়োক্তা চংশিল্লিবা ভারতকী লাঞ্জংদা মরু ওইবা খুৎলাই অমা ওইগৌরিবা এপ অসিগী খুৎথাংদা ঐখোয়গী মাইকৈদগী অকনবা থৌরাং লৌখৎলি। মহাক্না মসিসু ফোংদোকখি মদুদি এপ অসিগী ই-পাস শেম্বগী ওইথোকপা লৈরে মদুনা কোন্না মফম অমদগী মফম অমদা চৎনবগী খুদোংচাবা পীবা ঙমগনি।

শেনমিৎলোনগী শিংনবশিংগী মতাংদা পল্লদুনা প্রধান মন্ত্রীনা হায়খি মদুদি মসিগী খুদোং থিবা মতম অসি ইরোমদোম লেপচনবা অমদি লৈবাক অসি শেনমিৎলোনগী অচৌবা পাঙ্গল অমদা ওন্থোক্নবগী তাঞ্জা অদুনি।

থৌরম অদুদা মুখ্য মন্ত্রীশিংনা মাগী মাগী রাজ্যশিংদা কোবিদ-১৯গী পোজিতিব কেস, সোসিয়েল দিস্তেন্সিং ঙাক্নবগীদমক হৌজিক ফাওবদা পাইখৎখিবা খোংথাংশিং, হকশেলগী থবকশিংগা মরী লৈনবা ইনফ্রাস্ত্রকচরবু মপাঙ্গল কলহনবা, অতোপ্পদগী লাকপশিংগী অৱাবা হন্থহনবা অমসুং তঙাইফদবা পোৎলমশিং সপ্লাই তৌবগী মতাংদা পাক-চাউনা পাউদমখি। মুখ্য মন্ত্রীশিংনা ৱাফম অসি হৌদোকখি মদুদি লোকদাউন অসি চয়োল অনি অমগা শাংদোকপা মথৌ তাই। মুখ্য মন্ত্রীশিংনা লাইচৎ অসিগী মায়োক্তা চৎথরিবা লানফম অসিদা মখোয়গী রিসোর্সশিং হেনগৎহন্নবা কেন্দ্রদগী ফাইনান্সিয়েল অমসুং ফিস্কেলগী তেংবাংসু নীখি।

কেন্দ্রগী য়ুমলৈ-কৈরৈ মন্ত্রী, ঙাকশেল মন্ত্রী, হকশেল মন্ত্রী, প্রিন্সিপল সেক্রেতরী, কেবিনেৎ সেক্রেতরী অমসুং ভারত সরকারগী অতৈ সেনিয়র ওফিসরশিংসু শরুক য়াখি।