ভারত সরকারনা লৈবাক অসিদা রাজ্য সরকারশিং অমসুং য়ুনিয়ন তেরিতোরীশিংগা লোইননা কোবিদ-১৯ ঙাকথোক্নবা, মসিবু থিংনবা অমসুং শন্দোকপা থিংনবগীদমক খোংথাং কয়ামরুম লৌখৎলি। মখোয়শিং অসি অৱাংবা থাক্তা চাং নাইনা য়েংশিল্লি।

প্রধান মন্ত্রী শ্রী নরেন্দ্র মোদীনা লৈবাক শিনবা থুংনা কোবিদ-১৯গীদমক, শেম শারিবা অমসুং থবক পাইখৎলিবশিং অদু খঙদোক্নবগীদমক ঙরাং এম্পাৱর্দ গ্রুপশিংগী অপুনবা মীফম অমগী ময়াই তাংবল লৌখি। মদুদা হোস্পিতালশিং ফংহনবা, আইসোলেসন অমসুং কোরেন্তাইলগী খুদোংচাবশিং, তেস্ত অমসুং ত্রেনিং অসিনচিংবা হেনগৎহন্নবগীদমক হৌজিক ফাওবদা পাইখৎখ্রবা থবক-থৌরমশিংগী মতাংদা খঙহনখি।

কেন্দ্রগী হকশেল অমসুং য়াইফ-য়ুম্বাল মন্ত্রী দা. হর্শবর্ধন্না ওল ইন্দিয়া ইন্সতিত্যুৎ ওফ মেদিকেল সাইন্স (এ.আই.আই.এম.এস.), ঝজ্জরদা কোবিদ-১৯ লাকশিন্নবগীদমক পাইখৎলিবা শেম-শারিবশিং অদু য়েংশিনখি। মহাক্না হায়খি মদুদি কোবিদ-১৯ লাকশিন্নবগীদমক এম্স ঝজ্জরদা আইসোলেসন ৱর্দ ৩০০গা লোইননা শেম শারে, মসিনা অনাবশিংদা অথুবগী ওইবা কেয়র ফংহনগনি। কেন্দ্রগী হকশেল মন্ত্রীনা হায়খি মদুদি, “মালেমগী মীয়াম পুম্নমক্না তমথিরবা কোরোনা ভাইরসকী মায়োক্তা ভেক্সিন পুথোক্নবগীদমক্তা অহিং-নুংথিল নাইদনা থবক তৌরি অমসুং মদু ফংদ্রিফাওবদি ঐখোয় লোকদাউন অমসুং সোশিয়েল দিস্তেন্সিং অসি কোবিদ-১৯গী মায়োক্তা লৌখৎপা মতিক চাবা খোংথাং অমনি হায়না লৌগদবনি।”

কেবিনেৎ সেক্রেতরীনা ঙসি মফম অসিদা ভিদিও কনফরেন্সকী থোংদা রাজ্য/য়ুনিয়ন তেরিতোরী পুম্নমক্কী চীফ সেক্রেতরীশিং অমসুং জিলা খুদিংমক্কী দি.এম., এস.এস.পি., সি.এম.ও., আই.দি.এস.পি. স্তাফশিংগা লোইননা ৱারী শানখি। মহাক্না দি.এম. পুম্নমক্কী মফমদা হিদাক-লাংথক অমসুং মেদিকেল ইকুইপমেন্ত শাবা ফার্মা য়ুনিৎশিং নীংথিজনা থবক তৌহন্নবা খঙহনখি। রাজ্য/য়ুনিয়ন তেরিতোরীশিংগী স্তাফ পুম্নমক অমসুং মরী লৈনবা মীহুৎশিংদা ভিদিও কনফরেন্সকী থোংদা কোরোনাদগী ঙাকথোক্নবা লাল্লোংগী মতাংদা হায়খি। জিলা খুদিংমক্তা কোবিদ-১৯ ক্রাইসিস মেনেজমেন্ত প্লান শেম্নবা খঙহনখি। ভিদিও কনফরেন্স অসিগী থোংদা, জিলা তরুক (ভীলৱারা, আগরা, গৌতমবুদ্ধ নগর, পথানমথিত্তা (কেরল), নোংচুপ দিল্লী অমসুং মুম্বাই ম্যুনিসিপাল)কী দিস্ত্রিক্ত কমিস্নর অমসুং ম্যুনিসিপাল কমিস্নরশিংনা মখোয়গী লাল্লোং অমদি খঙলু-উরুবশিং অদু পাউদমখি।

হৌজিক ফাওবদা, লৈবাক অসিদা পুন্না জিলা ২৭৪ কোবিদ-১৯ ভাইরসনা শোকহনখ্রে।

আই.সি.এম.আর.না কোবিদ-১৯গীদমক্তা খোংজেল য়াংনা এন্তিবোদীদা য়ুম্ফম ওইবা ব্লদ তেস্তকা মরী লৈননা, ক্লস্তরশিং (কন্তাইনমেন্ত জোনশিংগা লোইননা) অমসুং মশিং য়াম্না মাইগ্রেন্তশিং খোমজিনফম/ইভাকুইজ সেন্তরশিংগীদমক এদভাইজরী অমা থাদোকখ্রে। এদভাইজরীগী মতুং ইন্না, তেস্তকী রিপোর্ত খুদিংমক আই.সি.এম.আর. পোর্তেলদা হকথেংননা ফীদ তৌননবা খঙহনখি। মসিনা কোন্ত্রেক্ত ত্রেসিং অমসুং মতম চানা লায়েংবদা খোংজেল য়াংখৎহনগনি।

মসিগা লোইননা আই.সি.এম.আর.না নৌনা থাদোকখিবা এদভাইজরীগী মতুং ইননা, মীয়াম তিনবা মফমশিংদা তিন শিৎপনা কোবিদ-১৯গী ভাইরস শন্দোকপা হেনগৎহনবা য়াই। এদভাইজরীদা পনখি মদুদি কোবিদ-১৯ লাইচৎকী হেনগৎলক্লিবা খুদোংথিবা অসিদা মিৎয়েং চংলদুনা মীয়াম্না কোবিদ-১৯ লাইচৎ অসিগী মতমদা মৈখু চেন্দবা হিদাকমনাগী পোৎথোকশিং শিজিন্নবা, অমসুং মীয়াম তিনবা মফমশিংদা তিন শিৎপীদনবা হায়খি।

হৌজিক ফাওবদা কেস ৩৩৭৪ কনফার্ম তৌখ্রে অমসুং ৭৯না শিখ্রে। লায়েংলবা মতুংদা মীওই ২৬৭ ফখ্রে।

কোবিদ-১৯গা মরী লৈনবা তেক্নিকেল ইশুশিং, গাইদলাইনশিং অমসুং এদভাইজরীশিংদা প্রমান লৈবা অমসুং অপদেৎ ওইবা ই-পাউগীদমক চানবীদুনা https://www.mohfw.gov.in/দা চংবীয়ু।

কোবিদ-১৯গী মতাংদা তেক্নিকেল ওইবা ৱাহংশিংগীদমক technicalquery.covid19[at]gov[dot]inদা মেল থাবীরকপা য়াগনি অমসুং ncov2019[at]gov[dot]inদগী কোরোনা ভাইরসকা মরী লৈনবা ৱাহংশিংগী পাউখুম ফংবীগনি। কোবিদ-১৯গী মতাংদা করিগুম্বা ৱাহং হংবীনীংলবদি হকশেল অমসুং য়াইফ-য়ুম্বাল মন্ত্রালয়গী হেল্পলাইন নম্বরঃ +৯১-১১-২৩৯৭৮০৪৬ নত্ত্রগা ১০৭৫ (তোল ফ্রী)দা ফোন তৌবীরকপা য়াগনি। কোবিদ-১৯গা মরী লৈননা রাজ্য অমসুং য়ুনিয়ন তেরিতোরী পুম্নমক্কী হেল্পলাইন নম্বর https://www.mohfw.gov.in/pdf/coronvavirushelplinenumber.pdfতগী ফংবীগনি।