ଦେଶରେ କୋଭିଡ-19ର ନିରାକରଣ, ପ୍ରତିରୋଧ ଓ ମୁକାବିଲା ପାଇଁ ଉଚ୍ଚସ୍ତରରେ ସମୀକ୍ଷା କରାଯାଉଛି ଏବଂ ରାଜ୍ୟ ତଥା କେନ୍ଦ୍ର ଶାସିତ ପ୍ରଦେଶ ଗୁଡ଼ିକ ସହିତ ସହଭାଗିତାରେ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି ।  

ଲକଡାଉନ କାର୍ଯ୍ୟାନୁଷ୍ଠାନ ଗ୍ରହଣକୁ ସୁନିଶ୍ଚିତ କରିବା ସମୟରେ ପ୍ରବାସୀ ଶ୍ରମିକଙ୍କ ଅସୁବିଧା ପ୍ରତି ଧ୍ୟାନ ଦେବା ଲାଗି ସମସ୍ତ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶଗୁଡ଼ିକୁ କ୍ୟାବିନେଟ ସଚିବ ନିର୍ଦ୍ଦେଶ ଦେଇଛନ୍ତି । ସେମାନଙ୍କ କଲ୍ୟାଣ ପାଇଁ ରିଲିଫ କ୍ୟାମ୍ପ ତଥା ସଙ୍ଗରୋଧ ସୁବିଧା କେନ୍ଦ୍ରରେ ଖାଦ୍ୟ, ପାଣି, ଚିକିତ୍ସା ସୁବିଧା ଓ ସ୍ବଚ୍ଛତା ବ୍ୟବସ୍ଥା କରିବା ଲାଗି କୁହାଯାଇଛି । ପ୍ରବାସୀ ଶ୍ରମିକମାନଙ୍କ ପାଇଁ ଯଥେଷ୍ଟ ସଙ୍ଗରୋଧ ଏବଂ ମାନସିକ-ସାମାଜିକ ପଦକ୍ଷେପ ଗ୍ରହଣ କରିବା ନିମନ୍ତେ ଗତକାଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ମାର୍ଗଦର୍ଶିକ ଜାରି କରାଯାଇଥିଲା ଯାହାକି https://www.mohfw.gov.in/pdf/RevisedPsychosocialissuesofmigrantsCOVID19.pdf. ରେ ଉପଲବ୍ଧ ରହିଛି ।

ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ରିଲିଫ କ୍ୟାମ୍ପରେ ରହୁଥିବା ପ୍ରବାସୀ ଶ୍ରମିକମାନଙ୍କୁ ମାନସିକ-ସାମାଜିକ ସହାୟତା ଯୋଗାଇ ଦେବା ଲାଗି ତାଲିମପ୍ରାପ୍ତ ମାର୍ଗଦର୍ଶକ, ଧାର୍ମିକ ନେତାମାନଙ୍କୁ ନିୟୋଜିତ କରିବା ଲାଗି ରାଜ୍ୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ସର୍ବୋଚ୍ଚ ନ୍ୟାୟାଳୟଙ୍କ ଆଦେଶ ମୁତାବକ ବୈଷୟିକ ସୂଚନା ନିମନ୍ତେ ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏକ ଇମେଲ ଆଇଡି (technicalquery.covid19[at]gov[dot]in) ଜାରି କରାଯାଇଛି । ଯାହା ଜରିଆରେ ନୂଆଦିଲ୍ଲୀ ଏମ୍ସ ଭଳି ପ୍ରତିଷ୍ଠାନକୁ ଆସୁଥିବା ବୈଷୟିକ ପ୍ରଶ୍ନର ସମାଧାନ କରାଯିବ । ସମସ୍ତ ବୈଷୟିକ ଗାଇଡଲାଇନ ମଧ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ  https://www.mohfw.gov.in/ ୱେବସାଇଟରେ ଉପଲବ୍ଧ ରହିଛି । କିଛିଦିନ ହେବା କୋଭିଡ-19 ସମ୍ପର୍କିତ ସୂଚନା ପାଇଁ ଟୋଲ ଫ୍ରି ନମ୍ବର (1075) ଏବଂ ହେଲ୍ପଲାଇନ ଇମେଲ ଆଇଡି (ncov2019[at]gov[dot]in) କାର୍ଯ୍ୟକ୍ଷମ କରାଯାଇଛି ।

ଏହାବ୍ୟତୀତ, ଜାତୀୟ ଔଷଧ ମୂଲ୍ୟ ନିର୍ଦ୍ଧାରଣ ପ୍ରାଧିକରଣ (ଏନପିପିଏ) 24ଟି ଶ୍ରେଣୀର ଚିକିତ୍ସା ସରଞ୍ଜାମକୁ ବିଜ୍ଞପିତ କରିଛନ୍ତି। ଫଳରେ ଏଗୁଡ଼ିକୁ ଗୁଣବତ୍ତା ନିୟନ୍ତ୍ରଣ ପାଇଁ ଔଷଧ ଭାବେ ବିନିୟମିତ କରାଯିବ ଏବଂ 1 ଏପ୍ରିଲ 2020 ଠାରୁ ଔଷଧ ବ୍ୟବସ୍ଥା (ମୂଲ୍ୟ ନିୟନ୍ତ୍ରଣ) ଆଦେଶ 2013 ଅଧୀନରେ ଏଗୁଡ଼ିକର ମୂଲ୍ୟ ଅନୁଧ୍ୟାନ କରାଯିବ । ଯାହାଫଳରେ ବିଗତ 12 ମାସ ମଧ୍ୟରେ କୌଣସି ଉତ୍ପାଦନକାରୀ ଏସବୁ ସାମଗ୍ରୀର ଏମଆରପିରେ 10 ପ୍ରତିଶତରୁ ଅଧିକ ବୃଦ୍ଧି କରିପାରିବେ ନାହିଁ ।

କୋଭିଡ-19 ସଂକଟ ସମୟରେ ରୋଗ ପ୍ରତିଷେଧକ ଶକ୍ତି ବୃଦ୍ଧି କରିବା ବିଶେଷ କରି ଶ୍ବାସକ୍ରିୟାକୁ ସୁସ୍ଥ ରଖିବା ଲାଗି ଆୟୁଷ ମନ୍ତ୍ରଣାଳୟ ପକ୍ଷରୁ ଆତ୍ମ ଯତ୍ନ ଗାଇଡଲାଇନ ଜାରି କରାଯାଇଛି ।

ଲକଡାଉନକୁ କଡ଼ାକଡ଼ି କାର୍ଯ୍ୟକାରୀ କରିବା, ସାମାଜିକ ଦୂରତା ପଦକ୍ଷେପ ଜାରି ରଖିବା ଏବଂ ଧାର୍ମିକ ସମାରୋହରେ ବହୁସଂଖ୍ୟାରେ ଏକତ୍ରିତ ନହେବା ଆଦି ଉପରେ ଗୁରୁତ୍ଵାରୋପ କରାଯାଇଥିଲା ।

ବର୍ତ୍ତମାନସୁଦ୍ଧା ଭାରତରେ  1637 କରୋନା ସଂକ୍ରମିତ ହୋଇଥିବା ବେଳେ ଏମାନଙ୍କ ମଧ୍ୟରୁ 38 ଜଣ ପ୍ରାଣ ହରାଇଛନ୍ତି । ବିଗତ 24 ଘଣ୍ଟା ମଧ୍ୟରେ 376 ଜଣ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଥିବା ସ୍ଥଳେ 3 ଜଣ ପ୍ରାଣ ହରାଇଛନ୍ତି । 132 ଜଣ ବ୍ୟକ୍ତି ଆରୋଗ୍ୟ ଲାଭ କରିବା ପରେ ହସ୍ପିଟାଲରୁ ଘରକୁ ଫେରିଛନ୍ତି ।

************