Goa, 19 Naiwieng 2026
Na ka jingïalum ba rit paid jong ki 204 ngut ki nongwan mihkhmat na ki 18 tylli ki Ri ha u snem 2007 sha ka ïew salonsar kaba heh kaba la pdiangburom ïa ki 2500 ngut ki nongwan mihkhmat na palat 40 tylli ki Ri ha u 2025, ka Film Bazaar ka la nang kylladur sha kawei na ki rynsan bakongsan kaba pynïasnoh ïa ki Cinema ka India bad ka karkhana shna phlim jong ka pyrthei. Ha kane ka lyngkhuh snem ba 20 ka jong ki, ka WAVES Film Bazaar 2026 ka rakhe lehkmen ïa ki 20 tylli ki snem jong ka jingkyntiew ïa ki jingïatreilang baseisoh, ka jingshem ïa ki khana kiba thymmai bad ka jingplie ïa ki lad ki lynti na ka bynta ki Cinema ka India ha ka pyrthei hi baroh kawei.
Ba la pynlong da ka National Film Development Corporation (NFDC) hapoh jong ka tnat Ministry of Information and Broadcasting, kum shibynta jong ka tamasa lehkmen ïa ka International Film Festival of India (IFFI), ka WAVES Film Bazaar ka long shibynta bad ka World Audio Visual bad ka sienjam Entertainment Summit (WAVES) kaba ïar. Ba la ïalam lynti da ka Ktien phira ‘Create in India, Create for the World’, kane ka rynsan ka wad lad ban pynkylla ïa ka jinglah bor ban pyrkhat thymmai jong ka India sha ki rynsan ha ka pyrthei lyngba ki kam kum ha ka co-production, ka financing, distribution bad ki international partnerships.

Ka sienjam ba 20 jong ka WAVES Film Bazaar yn sa plie pyrda ha ka 20 tarik u Naiwieng 2026 hapoh ‘The Ballroom, Taj Cidade de Goa Horizon’. U Shri Chanchal Kumar, uba dei u Secretary, jong ka tnat Ministry of Information and Broadcasting, un sa ai ïa ka jingkren pdiangburom, pynbud da ka jingkren na u Symbud Kongsan u Shri Ashutosh Gowariker, uba dei ruh u Festival Director. U Shri G. Krishnakumar, Chairman jong ka NFDC, un sa ai ïa ka jingkren maitphang, katba u Shri Prabhat Kumar, u Additional Secretary, jong ka tnat Ministry of Information and Broadcasting, pat un sa ai ïa ki kyntien ai khublei. U Shri Dhiraj Singh, uba dei u Managing Director jong ka NFDC ruh un sa ïadon ryngkat lang. Hadien kine baroh yn sa pynbud da ka jingpyni halor ka ‘Navigating WAVES Film Bazaar’ da ka kynhun jong ka Film Bazaar.
Ka jaka ïew na ka bynta ki khana bad ki kabu
Ha kine ki 20 tylli ki snem, ka Film Bazaar ka la nang kylladur na ka jingïalang jong ki kynhun ïasnoh sha ki jaka ïew ba paka kiba la pynïasnohlang ïa ki nongshnaphlim, ki nongpynmihphlim, ki nongbei tyngka, ki nongkhaïi phlim, ki nongpynïaid ïew, bad ki nongpynïaid program ha man la ki tamasa. Ki prokram jong ka, ki kyrshan bad ai mynsiem ïa ki phlim ha man la ki rynsan pynroi lyngba ki sienjam kum ka NFDC Screenwriters’ Lab, ka Co-Production Market bad ka Work-in-Progress Lab. Ka Viewing Room, ki Market Screenings, ki jingïalang B2B kiba la pynbeit kyrpang, ryngkat bad ki Knowledge Series, ki la pynsuk shuh shuh ïa ka jingshem ïa ki projek, ka jingïashim bynta ha kane ka karkhana shna phlim, bad ki lad jingïatreilang kiba lah ban nang mih shakhmat.
Ka sienjam jong u snem 2025, ba la pynlong ha Goa naduh ka 20 haduh ka 24 tarik u Naiwieng ha ryngkat ka tamasa International Film Festival of India (IFFI) kaba 56, ka la wanlam shijaka haduh 2,500 ki nongwan mihkhmat na palat 40 tylli ki Ri. La sei madan ïa ki 320 tylli ki projek bad pynsuk haduh ïa 1,200 tylli ki jingïalang kam ba para marwei kiba pynkynthup lang ïa palat 220 ngut ki nongthied. Ki jingïakren halor ka die ka thied, bad ki jingïakut dor ki la poi haduh kumba ₹1,050 klur eiei, kynthup ruh ïa ka jingïasoi ïa ki MoU kiba shongdor kumba ₹100 klur eiei katkum ka kaiphod ba la ïoh lum na kawei na ki bynta jong ka jingïalang.
WAVES Bazaar: Ka jingpynïar ïa ka bor ban pyrkhat thymmai jong ka India shabar jong ki jaka ïew ba ju pynlong man la u snem
Ka sienjam WAVES ka kot ruh shabar jong ka Film Bazaar ba ju pynlong man la u snem lyngba ka WAVES Bazaar, kaba long ka rynsan ïatreilang ha ka khaii pateng hapdeng ki kynhun bapher bapher ha ka pyrthei (B2B), kaba treikam baroh shi snem bad kaba la sdang ha u Kyllalyngkot 2025. Ka kynthup ïa ki kam pynmih phlim, ka Television, ki OTT, animation, VFX, gaming, music bad kiwei kiwei pat ki bynta ba kham phylla. Kane ka rynsan ka pynïasnoh ïa ki nongshna phlim bad ka khaïi pateng jong ki bad ki nongthied kiba lah ban don ka jingthmu ban thied ïa ki, ryngkat bad kito kiba ban don bynta ha ka jingïatreilang.
Katkum ka jingtyllun jong ka kam haduh u Risaw 2026 ka WAVES Bazaar ka la don kumba 12,500 ngut kiba ju pyndonkam tista kiba kynthup ruh ïa palat 5,000 ngut ki nongthied bad kumba 6,500 ngut eiei ki nongdie ha ki 2,800 tam ki projek kiba treikam. Ki lad treikam kiba pyndonkam ïa ka Artificial Intelligence (AI), kum ka jingwad bniah ïa ki jingtip katkum ka jingmut jong ki kyntien (semantic search), ka jingpynïasnoh ïa ki kynhun kiba don ïa kijuh ki jingthmu (matchmaking), ka jingpynithuh ïa ki projek lyngba ka rynsan online (virtual pitching), bad ki lad jingïalang khaii pateng B2B lyngba ka internet, ki ïarap ïa ki nongshna phlim bad ki kynhun khaii pateng ban ithuh ïa ki nongïatreilang kiba thikna, bad ban bteng ïa ka jingïadei bad ki jingïashimbynta ha kane ka kam wat hadien ba la kut noh ki jingïalang ba markhmat.
Ka jinglah jong ka ban poi sha kylleng ki bynta ha ka pyrthei kum sha ki Ri Australia, Japan, South Korea, Italy, Germany, Canada, France bad ka Spain ruh ka la nang pynïar shuh shuh ïa ki lad bad ki kabu na ka bynta ki karkhana bad ki seng treikam ba ju pyrkhat thymmai jong ka India. Ki jingïashimbynta ha ki rynsan jong ki karkhana ka pyrthei kiba kynthup ha ka Gamescom, ha ka Toronto International Film Festival, ha Venice bad ha MIPCOM, ki la nang pynkhlaiñ shuh shuh ïa ka jingïatreilang bad kito baroh ki nongïadonbynta kiba na kylleng ka pyrthei.
Kine ki sienjam ki pynphalang ïa ka jingtreishitom kaba kham heh ban pynpoi ïa ka jinglah ban pyrkhat thymmai jong ka India na ka ‘Craft to Commerce’, kaba la pynkhlaiñ shuh shuh ïa ka kyrdan jong ka India kum ka rynsan ba pdengduh ha ka pyrthei na ka bynta ka jingshna ïa ki jingpyni ba pynbyrngia, ki hok longtrai halor ki bor pyrkhat bad ki karkhana ba pynmih ïa kine.
Katba ka WAVES Film Bazaar ka rakhe ïa ki 20 tylli ki snem jong ka jingïaidlynti, kane ka ïai bteng ban shakri kum ka rynsan bakongsan na ka bynta ki nongshna phlim shimet, ki cinema ba ïadei ha ki Ktien ka thaiñ bad ban pynmih ïa ki sap ba nang khie ha ka jingtbit ban pyrkhat thymmai ba kin ïohbynta ha ki rynsan ka die ka thied ha ka pyrthei, ban pynkhlaiñ shuh ïa ki jingïatreilang bad ban rah ïa ki khana kiba na India sha ki nongpeitkai ha kylleng ka pyrthei.
***