NITI Aayog
azadi ka amrit mahotsav

U Secretary jong ka kynhun myntri u la plie paidbah ïa ka Karmayogi Sankalpa ha ka National Workshop jong ka NITI Aayog halor ka phang “Leadership as a Mission.”

Ki nongtrei sorkar ha kylleng ka ri kin pynrung ha ka rynsan iGOT Karmayogi ia ki jingkular jong ki ban wanrah ïa ki jingkylla kiba donkam ha ka rukom treikam bad ka rukom ïalam jong ki.

Ha ka: 17 NOV 2026 9:25PM by PIB Shillong

U Dr. T.V. Somanathan, u Secretary jong ka Kynhun ki myntri, mynta ka sngi u la pyllait paidbah ïa ka Karmayogi Sankalpa ha ka rynsan iGOT Karmayogi, ha ka jingïalang pynkut jong ka National Workshop halor ka phang “Leadership as a Mission”, lane ka Kamram jong ki nongialam, kaba la pynlong da ka NITI Aayog ha Bharat Mandapam, New Delhi. Kane ka workshop ka long kaba nyngkong napdeng san tylli ki National Workshop kiba la pynkhreh da ka NITI Aayog, ha kaba la rakhe ïa ka jingdap 25 snem jong u Myntri Rangbahduh ka ri, U Narendra Modi, kum u khlieh jong ka Sorkar.

Katkum ka Karmayogi Sankalpa, uwei pa uwei u nongtrei sorkar un buh ïa kawei ka jingkular ban wanrah ïa ka jingkylla kaba kyrpang ha ka rukom treikam bad ka rukom ïalam jong u. Ha kane ka jingkular, u nongtrei sorkar un batai shai ïa ki kamram kiba u dei ban leh, ki jinglong bad ki sap nongïalam kiba u donkam ban kyntiew, ka jingkylla kaba ki paidbah kin sakhi bad ki kam kiba un trei. Ki nongïashim bynta kiba don ha ka Bharat Mandapam bad ki heh sorkar kiba la pynïasoh lyngba ka rynsan iGOT Karmayogi, ki la buh ïa ki jingkular jong ki ha ka por ba la plie paidbah ïa kane ka prokram. Ka Karmayogi Bharat kan buddien ïa ki jingkular jong ki heh sorkar. Ïa kane ka Sankalpa yn pynïaid shakhmat lyngba ki tnat sorkar pdeng, ki Sorkar Jylla bad ki jaka ai jinghikai, da ka thong ban pynrung haduh 25,000 tylli ki jingkular ha kane ka rynsan shuwa ka 25 tarik u Nohprah 2026, kaba la rakhe kum ka Sngi jong ka Synshar Khadar kaba Bha (Good Governance Day).

Ka sngi ka la sdang da ka jingkren plie paidbah kaba la ai da u Dr. P.K. Mishra, u Principal Secretary jong u Myntri Rangbahduh ka Ri. Hadien kata, la pynlong ïa ki jingïasam jingtip halor ka jingpynthymmai biang ïa ka Kutch hadien ka jingjia u jumai ha u snem 2001, ki sienjam ba la shim ban ïakhun pyrshah ïa ka khlam COVID-19, ka prokram Lakhpati Didi, bad ka jingplie lad ïa ka ïoh ka kot kaba ïadei bad ka haw-haw (Space Economy). Ha ka jingïalang Case Clinic, kawei pa kawei ka kynhun ka la bishar bniah ïa kawei ka rai kaba la shim ia ka kam ba la bynshet ha ki, da ka jingpyrkhat ïa ka jingdonkam jong ki paidbah ha ka por ba shim ia kane ka rai, ki jingeh bad ki jingkhanglad kiba la mih, bad kumno la pynthikna ba kata ka rai kan ïaid katkum ka jingthmu ba la buh lyngba ka jingpyntreikam ïa ka.

La pynïaid ïaka jingialang iakren halor ka phang “Ka Jinglong Nongïalam na ka bynta ka Viksit Bharat” da u B.V.R. Subrahmanyam, uba la ju long u Chief Executive Officer jong ka NITI Aayog. Ki nongïashim bynta ha kane ka jingïakren ki long u Arvind Kumar Sharma, u Myntri Sorkar jong ka Uttar Pradesh ba khmih ïa ka Tnat pynroi sor bad ka bording; u Prof. Vishal Gupta na ka Indian Institute of Management, Ahmedabad; ka Ms. Debjani Ghosh, ka President barim jong ka NASSCOM bad Distinguished Fellow jong ka NITI Aayog; bad ka Ms. Narayani Bhatia, ka Joint Magistrate jong ka Hardoi, Uttar Pradesh.

Ki nongïashim bynta ha ka jingïakren ki la ïasam ïa ki jingmut bad jingsngew jong ki halor ki nongrim jong ka rukom ïalam jong u Myntri Rangbahduh ka Ri, u Narendra Modi, bad kumno kine ki nongrim ki don ka jingïadei bad ka jingpynurlong ïa ka thong ban pynlong ïa ka India kum ka ri kaba la kiew shaphrang (Viksit Bharat) ha u snem 2047.

U Arvind Kumar Sharma u la pynpaw ïa ka jingkylla kaba khraw ha ka rukom synshar khadar ha ka por ba u Myntri Rangbahduh ka Ri u dang long u Myntri Rangbah jong ka Jylla Gujarat. Da kaba ban jur ïa ka sap jong u ban thaw ïa ki rukom treikam kiba thymmai, ban kyntiew ïa ki tnat treikam bad ka sap treikam jong ki briew, bad ban pynlong ïa ki paidbah kum ka nongrim jong ka roi ka par.

U Prof. Vishal Gupta u la pynpaw ïa ka jinglah jong u Myntri Rangbahduh ka Ri ban ai mynsiem ïa ki briew ban shaniah ha ki thong kiba heh. U la ban jur ba ka mon jong ka sorkar ban pyntreikam ïa ki jingthmu ka dei ban ïaid ryngkat bad ki jingpynkylla ha ka rukom treikam jong ki tnat sorkar. U la kdew ruh ïa ka Seva Bhav (Ka jingshakri ïa ki paidbah) kum kawei na ki nongrim ba kongsan jong ka jinglong nongïalam.

Ka Ms. Debjani Ghosh ka la ban jur ba ki kor ki bor teknoloji ki dei ban wanrah ïa ka jingmyntoi ïa ki briew bad ka imlang sahlang, da kaba buh ïa ki briew ha ka pdeng jong ka jingkyntiew ïa ka AI bad ki teknoloji thymmai, khnang ban wanrah ïa ki jingkylla kiba don jingmut ha ka imlang sahlang.

Ka Ms. Narayani Bhatia ka la pynpaw ïa ka rukom pyrkhat kaba pher jong u Myntri Rangbahduh ka Ri bad ka jinglah jong u ban ithuh ïa ki lad bad ki kabu kiba ïadei bad iwei ïa iwei pat. Ka la ban jur khamtam ïa ka rukom jong u ban sngap bniah bad sngewthuh ïa kiwei, da kaba ai lad ïa ki briew, kynthup ïa ki heh sorkar kiba dang samla, ban pynpaw ïa ki jingmut bad jingsngew jong ki, kaba long kawei na ki jinglong ba kongsan jong ka rukom ïalam jong u.

Ha ka jingïalang Application Clinic, ki heh sorkar ki la pyntreikam ïa ki jinghikai kiba ki la ïoh na ka Case Clinic, ban pynbeit ïa ki jingeh bad ki jingtynjuh ha ka rukom ïalam kiba ki ïakynduh ha ki kam ba ki dang trei mynta.

Ha ka jingïalang pynkut, u Dr. R. Balasubramaniam, u dkhot jong ka NITI Aayog, u la ai ïa ka jingbatai lyngkot halor ki jingïaid jong ki kam baroh ha kane ka sngi. Nalor kata, ki kynhun bapher bapher ki la pyni ïa ka rukom pynbeit ïa ki jingeh kiba ïadei bad ka ASR SAATHI – Safe Antenatal Assistance: Ban buddien bad pynthikna ïa ka jingsumar kaba biang ïa ki longkmie kiba armet kiba sah ha ki jaka kiba jngai na ki jaka sor. Ban pynbha ïa ka rukom phah nongpang hapdeng ki jaka ai jingsumar, khnang ban pynthikna ïa ka jingsumar kaba biang ïa baroh, khamtam ïa kiba don ïa ki jingpang bym saphriang. Ban pynthikna ba man la ka Saras Mela kan ïoh ïa ki nongthied kiba thikna ha baroh shi snem, khnang ban pynneh ïa ka kamai kajih jong ki kynhun SHG bad ki kynthei Lakhpati Didi. Ban pynthikna ba ki jingtei bad ki kor pynkhuid um jaboh hapoh ka Swachh Bharat Mission-Gramin (SBM-G) kin long kiba treikam bad kin bteng ban ai jingshakri ha ki por ki ban wan.

Ha ka jingkren pynkut jong u, u Dr. T.V. Somanathan, u Secretary jong ka kynhun myntri, u la ong ba watla lah ban pule bad wad bniah shaphang ka jinglong nongïalam lyngba ki jingpule bad ka jingwad bniah, hynrei ki jinghikai kiba kordor tam ki wan lyngba ka jingpeit bad ka jingïatreilang bad ki nongïalam kiba la don ka jingshemphang. Da kaba pynshong nongrim ha ka jingshem jong u ha ka jingïatreilang bad ki nongïalam kum u Myntri Rangbahduh ka Ri, u Narendra Modi, u la kdew ïa ki rukom treikam kiba bha ha ka liang ka jingsynshar khadar, kiba ki heh sorkar ki lah ban bud bad pyntreikam. U la pynpaw ruh ba ka Karmayogi Sankalpa kan ïarap ban pynkylla ïa ki jinghikai na kane ka workshop sha ki kam kiba lah ban pyntreikam. U la ban jur ba lah ban sngewthuh bha ïa ka jinglong nongïalam lyngba ki nongïalam kiba la tbit bad shemphang bad ban sngewthuh ia ka jing kongsan ban ioh jinghikai na ka rukom treikam jong ki.

U la bynrap ba ka jingsynshar kaba treikam bha ka dei ban pynkylla ïa ki jingthmu sha ki jingkylla kiba lah ban thew, lyngba ka jingkylli kaba don jingmut, ka jingsngap bniah, ka jingshim rai kaba kloi bad shai, ka jingbahkhlieh bad ka jingbud ryntih ïa ki rukom treikam kiba dei

Ka jingbishar bniah jong ki kynhun yn sa pynkhreh da ki nongthoh case study bad  yn pynmih ïa kine ki jingthoh ha ka rynsan iGOT Karmayogi khnang ba ki heh sorkar bad ki jaka ai jinghikai kin pyndonkam ïa ki. Ki jingthmu ban pyntreikam kiba la pynkhreh da man la ka kynhun, ryngkat bad ki jingkular hapoh ka Karmayogi Sankalpa, kin ïarap ban pyntreikam ïa ki jinghikai ba la ïoh na kane ka workshop ha ki kam ba man la ka sngi. Ka National Workshop kaba bud, halor ka phang “Governance as Delivery”, yn pynlong ha u Kyllalyngkot 2027. Ïa kane ka workshop la pynkut da ka jingai khublei na U Anurag Jain, u Chief Executive Officer jong ka NITI Aayog.

******


(Release ID: 2337822) visitor counter : 10