Thaw lad ka Sorkar India ïa baroh ki Agniveer ban ïoh rung kam pura ha ka kam shipai.

Ka jingbishar bniah ba la leh da ki bor shipai halor ka jingtrei jong ki Agniveer ha ki saw snem ba la dep ka la pynmih ïa ki jingai jingmut kiba bha
Da kaba jied bad bishar katkum jinglah bad ka jingtbit, 25% na ki Agniveer kin ioh ïa ka kam ba pura ha ki tnad shipai jong ka ri kumba la pyrkhat mynshwa
Ïa ki 75% pat ki Agniveer kiba dang sah, yn tyrwa ïa ki ban bteng biang ïa ka jingshakri sa ar snem katkum ka mon jong ki

Hadien ba la pyndep ïa ka samoi treikam kaba ar snem, baroh ki Agniveer kin ioh ïa ka lad ban rung kum ki shipai ba pura, lada ki mon bad lada ki biang katkum ki kyndon jingjied.
Ka jingbishar bniah kaba katkum ki jingdonkam jong ka seng bad ka jingtreikam kaba seisoh ka la pynpaw ba ki Agniveer ki la pyni shisha ïa ka jingtrei kaba kyrpang ha kaba iadei bad ki sap treikam, ka jingnang jingtip shaphang ka kam, ka jingaiti lut, ka jingdon ïa ka met kaba koit ba khiah bad ka jinglah ban pyndonkam ïa ki kor ki bor ka juk teknoloji mynta. Kumba la pyrkhay mynshwa, katkum ka jingjied kaba shong ha ka jinglah bad jingtbit jong ki, 25% na ki Agniveer kin ioh ïa ka kam ba pura ha ki tnad shipai jong ka Ri.

Nalorkata, na ka bynta ki 75% pat ki Agniveer kiba dang sah, ryngkat ka jingai jingmut jong ki bor shipai jong ka ri India, ka kynhun myntri ka la mynjur ban ai lad ïa ki Agniveer ban bteng biang ïa ka jingshakri ha ka kam shipai sa ar snem. Hadien ba ki la pyndep ïa kane ka jingshakri kaba ar snem, baroh ki Agniveer kin ioh ïa ka lad ban rung kum ki shipai ba pura, da kaba bishar katkum ka mon jong ki bad ruh katkum ki kyndon jingjied.

Ïa ka rai ban ai lad ïa ki 75% ki Agniveer kiba mon ban bteng biang ïa ka jingshakri sa ar snem, la shim hadien ka jingbishar bniah, kaba sani bha bad ruh katkum ki jingai jingmut ba la ïoh. Ka thong kaba kongsan jong kane ka rai ka long ban pynïahap ïa ki jingangnud jong ki Agniveer bad ka rukom treikam kaba seisoh jong ka tnad shipai.

Ki Jingjop jong ka Skhim Agnipath

Hadien saw snem ba la pyntreikam ïa ka Skhim Agnipath, la lum ïa ki jingai jingmut kiba bniah shaphang ka rukom treikam bad ka jinglah jong ki Agniveer ban ai ïa ka jingshakri. Kine harum ki long katto katne na ki jingjop kiba kongsan jong kane ka skhim:

• Ka jingpynïar ïa ki jaka pynrung kam na ka bynta ki Agniveer ha ki distrik bapher bapher jong ka Ri.
• Ka jingpynlong ïa ka rukom pynrung kam kaba ryntih, kaba shai bad kaba khlem shah liang.
• Ka jingdon ïa ka met kaba koit ba khiah bha, ka mynsiem trei shitom, ka jingaiti lut, ka jingkwah ban jop ha ki jingïakhun bad ka jinglong ba don akor.
• Ka jingpynbha ïa ki lad jingtip bad ka sap treikam, ka jinglah ban pynïadei bad ki kor ki bor ka juk stad teknoloji bad ka jingpule ha ka por jong ka jingshakri.
• Ka jingplie lad ïa ki kynthei ban ïoh rung kam hapoh ki tnad shipai bapher bapher jong ka Ri.

Da kaba pynshong nongrim ïa kine ki jingjop, ka Skhim Agnipath kan dang ïai bteng bad yn dang pyntreikam. Ha ka jingshakri kaba ar, ki Agniveer kin ioh ïa ka jingsiew kaba kham heh, ka song pisa na ka Seva Nidhi bad ki jingmyntoi kiba ïadei bad ka kyrdan bad ka jinglong rangbah ne jingslem ha ka kam.

Lyngba ka jingpynrung biang sa ïa kawei pat ka samoi treikam kaba long sa ar snem, bud sa ka jingpynrung ïa baroh ki Agniveer kum ki shipai ba pura, ka kynhun myntri ka la thaw ïa ki lad kiban plie lad lut ïa baroh ki Agniveer ban ioh rung ha ka kam bad shakri pura kum ki shipai jong ka Ri.

*****