ಎಲ್ಲಾ ಅಗ್ನಿವೀರರನ್ನು ರಕ್ಷಣಾ ಪಡೆಗಳಲ್ಲಿ ಸೇರಿಸಿಕೊಳ್ಳಲು ಮಾರ್ಗ ಕಲ್ಪಿಸಿದ ಸಚಿವ ಸಂಪುಟ

ಸಾಂಸ್ಥಿಕ ಅಗತ್ಯಗಳು ಮತ್ತು ಕಾರ್ಯಾಚರಣೆಯ ದಕ್ಷತೆಯ ದೃಷ್ಟಿಯಿಂದ ನಡೆಸಿದ ವಸ್ತುನಿಷ್ಠ ಮೌಲ್ಯಮಾಪನವು ಕೌಶಲ್ಯ, ಪ್ರೇರಣೆಯ ಮಟ್ಟ, ದೈಹಿಕ ದಾರ್ಢ್ಯತೆ ಮತ್ತು ತಾಂತ್ರಿಕ ಪ್ರಾವೀಣ್ಯತೆಯ ವಿಷಯದಲ್ಲಿ ಅಗ್ನಿವೀರರ ಅತ್ಯುತ್ತಮ ಕಾರ್ಯಕ್ಷಮತೆಯ ಮೇಲೆ ಬೆಳಕು ಚೆಲ್ಲಿದೆ. ಈ ಹಿಂದೆ ನಿರ್ಧರಿಸಿದಂತೆ, ಅರ್ಹತೆಯ ಆಧಾರದ ಮೇಲೆ ಶೇ. 25 ರಷ್ಟು ಅಗ್ನಿವೀರರಿಗೆ ರಕ್ಷಣಾ ಪಡೆಗಳಲ್ಲಿ ಖಾಯಂ ಉದ್ಯೋಗವನ್ನು ನೀಡಲಾಗುವುದು.

ಇದಲ್ಲದೆ, ಉಳಿದ ಶೇ. 75 ರಷ್ಟು ಅಗ್ನಿವೀರರಿಗೆ, ಭಾರತೀಯ ರಕ್ಷಣಾ ಪಡೆಗಳ ಶಿಫಾರಸುಗಳ ಮೇರೆಗೆ, ಹೆಚ್ಚುವರಿ 2 ವರ್ಷಗಳ ಸೇವಾ ಅವಧಿಯನ್ನು ಸಂಪುಟ ಅನುಮೋದಿಸಿದೆ. ಈ ಎರಡು ವರ್ಷಗಳ ಸೇವಾ ಅವಧಿಯು ಪೂರ್ಣಗೊಂಡ ನಂತರ, ತಮ್ಮ ಇಚ್ಛೆ ಮತ್ತು ಆಯ್ಕೆಯ ಮಾನದಂಡಗಳನ್ನು ಪೂರೈಸುವುದರ ಆಧಾರದ ಮೇಲೆ, ಎಲ್ಲಾ ಅಗ್ನಿವೀರರಿಗೆ ಖಾಯಂ ಸೈನಿಕರಾಗಿ ಸೇರ್ಪಡೆಗೊಳ್ಳುವ ಅವಕಾಶವನ್ನು ನೀಡಲಾಗುವುದು.

ಆಸಕ್ತ ಶೇ. 75 ರಷ್ಟು ಅಗ್ನಿವೀರರಿಗೆ ಹೆಚ್ಚುವರಿ ಎರಡು ವರ್ಷಗಳ ಸೇವಾ ಅವಧಿಯನ್ನು ಪರಿಚಯಿಸಿರುವುದು, ಅಗ್ನಿವೀರರ ಆಕಾಂಕ್ಷೆಗಳು ಮತ್ತು ಸಾಂಸ್ಥಿಕ ದಕ್ಷತೆಯನ್ನು ಸಂಯೋಜಿಸುವ ಮೂಲಭೂತ ಉದ್ದೇಶದೊಂದಿಗೆ ಸುದೀರ್ಘ, ಸಕಾರಣ ಮತ್ತು ವಿವರವಾದ ಮೌಲ್ಯಮಾಪನ ಹಾಗೂ ಪ್ರತಿಕ್ರಿಯೆಯ ನಂತರ ಕೈಗೊಳ್ಳಲಾಗಿದೆ.

ಅಗ್ನಿಪಥ್ ಯೋಜನೆಯ ಸಾಧನೆಗಳು

ಅಗ್ನಿಪಥ್ ಯೋಜನೆಯ ಅನುಷ್ಠಾನದ ನಾಲ್ಕು ವರ್ಷಗಳ ನಂತರ, ಅದರ ದಕ್ಷತೆ ಮತ್ತು ಅಗ್ನಿವೀರರ ಪ್ರದರ್ಶನದ ಬಗ್ಗೆ ವಿವರವಾದ ಪ್ರತಿಕ್ರಿಯೆಯನ್ನು ಪಡೆಯಲಾಗಿದೆ. ಯೋಜನೆಯ ಕೆಲವು ಪ್ರಮುಖ ಸಾಧನೆಗಳು ಕೆಳಗಿನಂತಿವೆ:

• ದೇಶದ ವಿವಿಧ ಜಿಲ್ಲೆಗಳಾದ್ಯಂತ ಅಗ್ನಿವೀರರ ನೇಮಕಾತಿಯ ವಿಸ್ತರಣೆ
• ಹೆಚ್ಚು ಪ್ರಮಾಣೀಕೃತ ಮತ್ತು ಪಾರದರ್ಶಕ ನೇಮಕಾತಿ ಪ್ರಕ್ರಿಯೆ
• ಅತ್ಯುನ್ನತ ಮಟ್ಟದ ದೈಹಿಕ ದಾರ್ಢ್ಯತೆ, ಮನೋಬಲ, ಪ್ರೇರಣೆ, ಸ್ಪರ್ಧಾತ್ಮಕ ಮನೋಭಾವ ಮತ್ತು ಶಿಸ್ತು
• ಸೇವೆಯಲ್ಲಿ ಕೌಶಲ್ಯ ಅಭಿವೃದ್ಧಿ, ತಾಂತ್ರಿಕ ಹೊಂದಾಣಿಕೆ ಮತ್ತು ಶಿಕ್ಷಣದ ಸುಧಾರಣೆ
• ಮಹಿಳೆಯರಿಗಾಗಿ ರಕ್ಷಣಾ ಪಡೆಗಳ ವಿವಿಧ ವಿಭಾಗಗಳಲ್ಲಿ ಅವಕಾಶ ಕಲ್ಪಿಸುವುದು

ಈ ಸಾಧನೆಗಳ ಆಧಾರದ ಮೇಲೆ, ಅಗ್ನಿಪಥ್ ಯೋಜನೆ ಮುಂದುವರಿಯಲಿದೆ. ಎರಡನೇ ಸೇವಾ ಅವಧಿಯು ಹೆಚ್ಚಿನ ವೇತನ, ಸುಧಾರಿತ ಸೇವಾ ನಿಧಿಯ ಪ್ಯಾಕೇಜ್ ಮತ್ತು ಹಿರಿಯತನಕ್ಕೆ ಸಂಬಂಧಿಸಿದ ಪ್ರಯೋಜನಗಳನ್ನು ಹೊಂದಿರುತ್ತದೆ.

ಎರಡು ವರ್ಷಗಳ ಹೆಚ್ಚುವರಿ ಸೇವಾ ಅವಧಿಯ ಪರಿಚಯ ಹಾಗೂ ಇದರ ನಂತರ ಎಲ್ಲಾ ಅಗ್ನಿವೀರರನ್ನು ಖಾಯಂ ಸೈನಿಕರಾಗಿ ಸೇರ್ಪಡೆಗೊಳಿಸುವುದರ ಮೂಲಕ, ಸಂಪುಟವು ಎಲ್ಲಾ ಅಗ್ನಿವೀರರನ್ನು ರಕ್ಷಣಾ ಪಡೆಗಳಲ್ಲಿ ಅಳವಡಿಸಿಕೊಳ್ಳಲು ಸುಗಮ ಹಾದಿಯನ್ನು ಕಲ್ಪಿಸಿದೆ.

*****