पोस्ट गरियो:
04 NOV 2026 4:14PM by PIB Gangtok
नयाँ दिल्ली, 4 नोभेम्बर, 2026:
सङ्गठनात्मक आवश्यकता तथा सञ्चालन दक्षताका दृष्टिले गरिएको वस्तुनिष्ठ मूल्याङ्कनले अग्निवीरहरूको सीप, उत्प्रेरणाको स्तर, शारीरिक तन्दुरुस्ती तथा प्राविधिक दक्षतामा उत्कृष्ट कार्यसम्पादन रहेको देखाएको छ। यसअघि परिकल्पना गरिएअनुसार योग्यताका आधारमा 25 प्रतिशत अग्निवीरलाई रक्षा बलमा नियमित रोजगारी प्रदान गरिनेछ।
यसका अतिरिक्त, भारतीय रक्षा बलको सिफारिसमा बाँकी 75 प्रतिशत अग्निवीरका लागि थप दुई वर्षको सेवा अवधि प्रदान गर्ने प्रस्तावलाई मन्त्रिपरिषद्ले स्वीकृति दिएको छ। यो दुई वर्षको सेवा अवधि पूरा भएपछि इच्छुक तथा निर्धारित छनोट मापदण्ड पूरा गर्ने सबै अग्निवीरलाई नियमित सैनिकका रूपमा रक्षा बलमा भर्ना गरिनेछ।
इच्छुक 75 प्रतिशत अग्निवीरका लागि थप दुई वर्षको सेवा अवधि लागू गर्ने निर्णय अग्निवीरहरूको आकाङ्क्षा र सङ्गठनात्मक दक्षताबीच सामञ्जस्य कायम गर्ने मूल उद्देश्यका साथ विस्तृत मूल्याङ्कन, विचारविमर्श तथा प्राप्त प्रतिक्रियाका आधारमा गरिएको हो।
अग्निपथ योजनाका उपलब्धिहरू
अग्निपथ योजना कार्यान्वयन भएको चार वर्षपछि यसको प्रभावकारिता तथा अग्निवीरहरूको कार्यसम्पादनबारे विस्तृत प्रतिक्रिया प्राप्त भएको छ। यस योजनाका केही प्रमुख उपलब्धिहरू निम्न छन्:
- देशका विभिन्न जिल्लाहरूमा अग्निवीर भर्तीको दायरा विस्तार भएको
- भर्ती प्रक्रियालाई थप मानकीकृत र पारदर्शी बनाइएको
- शारीरिक तन्दुरुस्ती, मनोबल, उत्प्रेरणा, प्रतिस्पर्धात्मक भावना तथा अनुशासनको उच्च स्तर कायम भएको
- सेवाकालमा सीप, प्राविधिक अनुकूलन क्षमता तथा शैक्षिक योग्यतामा वृद्धि भएको
- महिला अग्निवीरहरूका लागि रक्षा बलका विभिन्न शाखाहरू खुला गरिएको
यी उपलब्धिहरूका आधारमा अग्निपथ योजना निरन्तर जारी रहनेछ। दोस्रो सेवा अवधिमा थप पारिश्रमिक, बढाइएको सेवा निधि प्याकेज तथा वरिष्ठतासम्बन्धी सुविधा प्रदान गरिनेछ।
थप दुई वर्षको सेवा अवधिको व्यवस्था र त्यसपछि सबै अग्निवीरहरूलाई नियमित सैनिकका रूपमा समावेश गर्ने प्रावधानसहित मन्त्रिपरिषद्ले सबै अग्निवीरहरूलाई रक्षा बलमा समायोजन गर्ने मार्ग प्रशस्त गरेको छ।
*****
MPS/TWB