ನಿಗದಿತ ಅವಧಿಗಿಂತ ಐದು ತಿಂಗಳು ಮುಂಚಿತವಾಗಿಯೇ 11 ಕೋಟಿ 'ರೈತರ ಗುರುತಿನ ಚೀಟಿ' ಸೃಷ್ಟಿ: ಡಿಜಿಟಲ್ ಕೃಷಿಯಲ್ಲಿ ಪ್ರಮುಖ ಮೈಲಿಗಲ್ಲು ಎಂದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್

ಡಿಜಿಟಲ್ ಕೃಷಿಯಲ್ಲಿ ಪ್ರಒಂದು ಮುಖ ಮೈಲಿಗಲ್ಲಾಗಿ, ಭಾರತ ಸರ್ಕಾರವು ಮಾರ್ಚ್ 31, 2027ರ ಗಡುವಿಗಿಂತ ಐದು ತಿಂಗಳು ಮುಂಚಿತವಾಗಿಯೇ 11 ಕೋಟಿ ರೈತರ ಗುರುತಿನ ಚೀಟಿಗಳನ್ನು ಸೃಷ್ಟಿಸುವ ತನ್ನ ಗುರಿಯನ್ನು ತಲುಪಿದೆ. ಕೇಂದ್ರ ಕೃಷಿ ಮತ್ತು ರೈತ ಕಲ್ಯಾಣ ಹಾಗೂ ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಈ ಸಾಧನೆಯನ್ನು, ಸಮೃದ್ಧ ರೈತರೊಂದಿಗೆ ವಿಕಸಿತ ಭಾರತವನ್ನು ನಿರ್ಮಿಸುವ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ದೃಷ್ಟಿಕೋನವನ್ನು ಸಾಕಾರಗೊಳಿಸುವತ್ತಿಟ್ಟ ಪ್ರಮುಖ ಹೆಜ್ಜೆ ಎಂದು ಬಣ್ಣಿಸಿದ್ದಾರೆ. ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯವು ಅನುಷ್ಠಾನಗೊಳಿಸುತ್ತಿರುವ 'ಡಿಜಿಟಲ್ ಕೃಷಿ ಮಿಷನ್' ಅಡಿಯಲ್ಲಿ ಈ ಮೈಲಿಗಲ್ಲನ್ನು ಸಾಧಿಸಲಾಗಿದೆ. ಕಾಗದಪತ್ರಗಳ ಕೆಲಸ ಮತ್ತು ಪದೇ ಪದೇ ಪರಿಶೀಲನೆ ಮಾಡುವುದನ್ನು ಕಡಿಮೆ ಮಾಡುವ ಜೊತೆಗೆ, ಸರ್ಕಾರಿ ಯೋಜನೆಗಳು, ಬ್ಯಾಂಕ್ ಸಾಲ, ಬೆಳೆ ವಿಮೆ ಮತ್ತು ವಿಪತ್ತು ಪರಿಹಾರಗಳನ್ನು ಪಾರದರ್ಶಕ, ಪರಿಣಾಮಕಾರಿ ಮತ್ತು ಸಮಯೋಚಿತವಾಗಿ ಪಡೆಯಲು ರೈತರಿಗೆ ವಿಶಿಷ್ಟ ಡಿಜಿಟಲ್ ಗುರುತನ್ನು ಒದಗಿಸಲು ರೈತರ ಐಡಿ ಉಪಕ್ರಮವನ್ನು ವಿನ್ಯಾಸಗೊಳಿಸಲಾಗಿದೆ.

ನಿಗದಿತ ಅವಧಿಗಿಂತ ಐದು ತಿಂಗಳು ಮುಂಚಿತವಾಗಿ ಗುರಿ ಸಾಧನೆ

ಕೇಂದ್ರ ಕೃಷಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಮಾತನಾಡಿ, ಅಕ್ಟೋಬರ್ 23ರ ರಾತ್ರಿಯ ವೇಳೆಗೆ 11 ಕೋಟಿ ರೈತರ ಗುರುತಿನ ಚೀಟಿಗಳ ಸೃಷ್ಟಿ ಪ್ರಕ್ರಿಯೆಯು ಯಶಸ್ವಿಯಾಗಿ ಪೂರ್ಣಗೊಂಡಿದೆ ಎಂದು ಹೇಳಿದರು. ಈ ಗುರಿಯನ್ನು ಸಾಧಿಸಲು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಮಾರ್ಚ್ 31, 2027 ರ ಗಡುವನ್ನು ನಿಗದಿಪಡಿಸಿದ್ದರು. ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯ, ರಾಜ್ಯ ಸರ್ಕಾರಗಳು ಮತ್ತು ಕ್ಷೇತ್ರ ಮಟ್ಟದ ಅಧಿಕಾರಿಗಳು ನಿಗದಿತ ಅವಧಿಗಿಂತ ಐದು ತಿಂಗಳು ಮುಂಚಿತವಾಗಿಯೇ ಇದನ್ನು ಸಾಧಿಸಲು ಸಮನ್ವಯದಿಂದ ಕೆಲಸ ಮಾಡಿದ್ದಾರೆ. ಈ ಸಾಧನೆಗಾಗಿ ದೇಶಾದ್ಯಂತದ ರೈತರನ್ನು ಅಭಿನಂದಿಸಿದ ಅವರು, ರೈತರ ಗುರುತಿನ ಚೀಟಿಯನ್ನು ಅವರದೇ ಆದ ಡಿಜಿಟಲ್ ಗುರುತು ಎಂದು ಬಣ್ಣಿಸಿದರು ಮತ್ತು ಆಧುನಿಕ ತಂತ್ರಜ್ಞಾನದ ಮೂಲಕ ಕೃಷಿಯನ್ನು ಹೆಚ್ಚು ಪರಿಣಾಮಕಾರಿ, ಪಾರದರ್ಶಕ ಮತ್ತು ಸಮೃದ್ಧಗೊಳಿಸುವತ್ತ ಇದು ಪ್ರಮುಖ ಹೆಜ್ಜೆಯಾಗಿದೆ ಎಂದರು.

ಕಡಿಮೆಯಾದ ಕಾಗದಪತ್ರಗಳ ಕೆಲಸ ಮತ್ತು ಸೌಲಭ್ಯಗಳ ಹೆಚ್ಚು ಪಾರದರ್ಶಕ ವಿತರಣೆ

ರೈತರ ಗುರುತಿನ ಚೀಟಿ ವ್ಯವಸ್ಥೆಯು, ರೈತರು ಪದೇ ಪದೇ ಸರ್ಕಾರಿ ಕಚೇರಿಗಳು ಮತ್ತು ಬ್ಯಾಂಕ್‌ಗಳಿಗೆ ಭೇಟಿ ನೀಡುವ ಅಥವಾ ಬೇರೆ ಬೇರೆ ಯೋಜನೆಗಳಿಗೆ ಒಂದೇ ರೀತಿಯ ದಾಖಲೆಗಳನ್ನು ಸಲ್ಲಿಸುವ ಅಗತ್ಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ ಎಂದು ಶ್ರೀ ಚೌಹಾಣ್ ಹೇಳಿದರು. ಈ ಹಿಂದೆ, ವಿವಿಧ ಸೌಲಭ್ಯಗಳನ್ನು ಪಡೆಯಲು ರೈತರು ಹೆಚ್ಚಾಗಿ ದಾಖಲೆಗಳನ್ನು ಪದೇ ಪದೇ ಒದಗಿಸಬೇಕಾಗಿತ್ತು, ಇದರಿಂದಾಗಿ ಸಮಯ ಮತ್ತು ಹಣವೆರಡೂ ನಷ್ಟವಾಗುತ್ತಿತ್ತು. ರೈತರ ಐಡಿಗಳೊಂದಿಗೆ, ಹಲವಾರು ಪ್ರಮುಖ ಸೇವೆಗಳ ಪ್ರವೇಶವು ಹೆಚ್ಚು ಸರಳ ಮತ್ತು ಪಾರದರ್ಶಕವಾಗುವ ನಿರೀಕ್ಷೆಯಿದೆ.

ಬ್ಯಾಂಕ್ ಸಾಲಗಳು ಮತ್ತು ಕಿಸಾನ್ ಕ್ರೆಡಿಟ್ ಕಾರ್ಡ್: ಸಾಲದ ಪ್ರಕ್ರಿಯೆಯು ಸುಲಭವಾಗಲಿದ್ದು, ಪದೇ ಪದೇ ದಾಖಲೆಗಳ ಪರಿಶೀಲನೆಯ ಅಗತ್ಯವನ್ನು ಕಡಿಮೆ ಮಾಡುತ್ತದೆ.

ಪ್ರಧಾನ್ ಮಂತ್ರಿ ಫಸಲ್ ಭೀಮಾ ಯೋಜನೆ: ನೈಸರ್ಗಿಕ ವಿಕೋಪಗಳು ಅಥವಾ ಬೆಳೆ ನಷ್ಟದ ಸಂದರ್ಭದಲ್ಲಿ, ಪರಿಹಾರದ ಮೌಲ್ಯಮಾಪನ ಮತ್ತು ಅದರ ವಿತರಣೆಯನ್ನು ಹೆಚ್ಚು ಪಾರದರ್ಶಕ ಪ್ರಕ್ರಿಯೆಯ ಮೂಲಕ ನಡೆಸಲಾಗುವುದು, ಜೊತೆಗೆ ಪಾವತಿಗಳನ್ನು ನೇರವಾಗಿ ರೈತರ ಬ್ಯಾಂಕ್ ಖಾತೆಗಳಿಗೆ ಮಾಡಲಾಗುತ್ತದೆ.

ವಿಪತ್ತು ಪರಿಹಾರ ನೆರವು: ತುರ್ತು ಪರಿಸ್ಥಿತಿಗಳಲ್ಲಿ ಪರಿಹಾರವು ನೈಜ ಮತ್ತು ಅರ್ಹ ರೈತರಿಗೆ ಹೆಚ್ಚು ವೇಗವಾಗಿ ತಲುಪುತ್ತದೆ.

ಕನಿಷ್ಠ ಬೆಂಬಲ ಬೆಲೆಯಲ್ಲಿ ಬೆಳೆ ಖರೀದಿ: ಡಿಜಿಟಲ್ ವ್ಯವಸ್ಥೆಯು ಖರೀದಿ ಪ್ರಕ್ರಿಯೆಯಲ್ಲಿ ಮಧ್ಯವರ್ತಿಗಳ ಪಾತ್ರವನ್ನು ನಿರ್ಮೂಲನೆ ಮಾಡಲು ಸಹಾಯ ಮಾಡುತ್ತದೆ ಮತ್ತು ರೈತರು ತಮ್ಮ ಉತ್ಪನ್ನಗಳಿಗೆ ಸೂಕ್ತವಾದ ಪೂರ್ಣ ಮೌಲ್ಯವನ್ನು ಪಡೆಯುವುದನ್ನು ಖಚಿತಪಡಿಸುತ್ತದೆ.

ಕೃಷಿ ಸೇವಾ ವಿತರಣೆಯಲ್ಲಿ ಪಾರದರ್ಶಕತೆ ಮತ್ತು ಹೊಣೆಗಾರಿಕೆಯನ್ನು ಬಲಪಡಿಸುವುದು ಈ ಉಪಕ್ರಮದ ಉದ್ದೇಶವಾಗಿದ್ದು, ಅರ್ಹ ರೈತರು ಕಡಿಮೆ ಕಾರ್ಯವಿಧಾನದ ಅಡೆತಡೆಗಳೊಂದಿಗೆ ಸರ್ಕಾರಿ ಬೆಂಬಲವನ್ನು ಪಡೆಯಬಹುದು ಎಂಬುದನ್ನು ಖಚಿತಪಡಿಸುತ್ತದೆ.

ಈಗಾಗಲೇ 6 ಕೋಟಿಗೂ ಹೆಚ್ಚು ರೈತರು ಪಡೆದಿದ್ದಾರೆ ಸೌಲಭ್ಯ

ಸೆಪ್ಟೆಂಬರ್ 2, 2024 ರಂದು ಕೇಂದ್ರ ಸಂಪುಟದ ಅನುಮೋದನೆಯ ನಂತರ ಡಿಜಿಟಲ್ ಕೃಷಿ ಮಿಷನ್ ಅನ್ನು ಪ್ರಾರಂಭಿಸಲಾಯಿತು. ಈ ಮಿಷನ್ ಅಡಿಯಲ್ಲಿ ಅಭಿವೃದ್ಧಿಪಡಿಸಲಾಗುತ್ತಿರುವ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯವು ಈಗಾಗಲೇ ತಳಮಟ್ಟದಲ್ಲಿ ಫಲಿತಾಂಶಗಳನ್ನು ತೋರಿಸುತ್ತಿದೆ. ರೈತರ ಗುರುತಿನ ಚೀಟಿ ಆಧಾರಿತ ಸೇವಾ ವಿತರಣಾ ವ್ಯವಸ್ಥೆಯ ಮೂಲಕ ದೇಶಾದ್ಯಂತ 6 ಕೋಟಿಗೂ ಹೆಚ್ಚು ರೈತರು ಇದುವರೆಗೆ ವಿವಿಧ ಯೋಜನೆಗಳಡಿಯಲ್ಲಿ ನೇರ ಸೌಲಭ್ಯಗಳನ್ನು ಪಡೆದಿದ್ದಾರೆ. ಪರಿಶೀಲಿಸಿದ ರೈತರ ದತ್ತಸಂಚಯವನ್ನು ಕೃಷಿ ಸೇವೆಗಳೊಂದಿಗೆ ಸಂಯೋಜಿಸುವುದು ವಂಚನೆ ಮತ್ತು ನಕಲಿ ಪರಿಶೀಲನೆಯ ಅಗತ್ಯವನ್ನು ನಿರ್ಮೂಲನೆ ಮಾಡಲು ಸಹಾಯ ಮಾಡುತ್ತಿದೆ. ಇದು ಸರ್ಕಾರಿ ಇಲಾಖೆಗಳ ನಡುವಿನ ಸಮನ್ವಯವನ್ನು ಸುಧಾರಿಸಿದೆ ಮತ್ತು ನೀತಿ ನಿರೂಪಣೆ ಹಾಗೂ ಯೋಜನೆಗಳ ಮೇಲ್ವಿಚಾರಣೆಯನ್ನು ಬಲಪಡಿಸಿದೆ, ಅವುಗಳ ಅನುಷ್ಠಾನ ಮತ್ತು ಸೌಲಭ್ಯಗಳ ವಿತರಣೆಯನ್ನು ಟ್ರ್ಯಾಕ್ ಮಾಡುವುದನ್ನು ಸುಲಭಗೊಳಿಸಿದೆ.

ಸಹಕಾರ ಒಕ್ಕೂಟ ವ್ಯವಸ್ಥೆಗೆ ಬಲವಾದ ಉದಾಹರಣೆ

ಶ್ರೀ ಚೌಹಾಣ್ ಅವರು ಈ ಸಾಧನೆಯನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಸಾಮೂಹಿಕ ಶ್ರಮಕ್ಕೆ ದೊರೆತ ಫಲ ಎಂದು ಶ್ಲಾಘಿಸಿದರು ಮತ್ತು ಇದನ್ನು ಸಹಕಾರ ಒಕ್ಕೂಟ ವ್ಯವಸ್ಥೆಯ ಅತ್ಯುತ್ತಮ ಉದಾಹರಣೆ ಎಂದು ಕರೆದರು. ನಿಗದಿತ ಅವಧಿಗಿಂತ ಮುಂಚಿತವಾಗಿ ಗುರಿಯನ್ನು ಸಾಧಿಸಲು ಕೊಡುಗೆ ನೀಡಿದ ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರಗಳು, ಕೇಂದ್ರಾಡಳಿತ ಪ್ರದೇಶಗಳ ಆಡಳಿತಗಳು, ಜಿಲ್ಲಾ ಮಟ್ಟದ ತಂಡಗಳು ಮತ್ತು ಹಳ್ಳಿಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕ್ಷೇತ್ರ ಸಿಬ್ಬಂದಿಗೆ ಅವರು ಅಭಿನಂದನೆ ಮತ್ತು ಧನ್ಯವಾದಗಳನ್ನು ತಿಳಿಸಿದರು. ಗುತ್ತಿಗೆ ರೈತರು ಮತ್ತು ನಿಜವಾದ ಸಾಗುವಳಿದಾರರನ್ನು ಡಿಜಿಟಲ್ ವೇದಿಕೆಗೆ ತರಲು ಅನ್ವಯವಾಗುವ ನಿಯಮಗಳಿಗೆ ಅನುಸಾರವಾಗಿ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ನಿರ್ದಿಷ್ಟ ಕ್ರಮಗಳನ್ನು ತೆಗೆದುಕೊಳ್ಳುತ್ತಿವೆ. ಯಾವುದೇ ಅರ್ಹ ರೈತರು ಸರ್ಕಾರದ ಕಲ್ಯಾಣ ಮತ್ತು ಬೆಂಬಲ ಕಾರ್ಯಕ್ರಮಗಳಿಂದ ಹೊರಗುಳಿಯದಂತೆ ಖಚಿತಪಡಿಸಿಕೊಳ್ಳುವುದು ಇದರ ಉದ್ದೇಶವಾಗಿದೆ.

ಭಾರತೀಯ ಕೃಷಿಯನ್ನು ರೂಪಾಂತರಿಸಲು ತಂತ್ರಜ್ಞಾನ

ಸರ್ಕಾರದ ಕನಿಷ್ಠ ಹಸ್ತಕ್ಷೇಪ ಹಾಗೂ ಗರಿಷ್ಠ ಆಡಳಿತ ತತ್ವಕ್ಕೆ ಅನುಗುಣವಾಗಿ ರೈತ ನೋಂದಣಿಯನ್ನು ಬಲಪಡಿಸಲು ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯ ಬದ್ಧವಾಗಿದೆ. ರೈತರ ಗುರುತಿನ ಚೀಟಿ ಎಂಬುದು ಕೇವಲ ಡಿಜಿಟಲ್ ಗುರುತಿನ ದಾಖಲೆಯಲ್ಲ; ಇದು ಪಾರದರ್ಶಕ, ಹೊಣೆಗಾರಿಕೆಯುಳ್ಳ ಮತ್ತು ರೈತ-ಕೇಂದ್ರಿತ ಆಡಳಿತ ವ್ಯವಸ್ಥೆಗೆ ಬಲವಾದ ಅಡಿಪಾಯವಾಗಿದೆ. ರೈತರಿಗೆ ಪರಿಶೀಲಿಸಿದ ಡಿಜಿಟಲ್ ಗುರುತನ್ನು ಸೃಷ್ಟಿಸುವ ಮೂಲಕ, ಕೃಷಿ ಸೇವೆಗಳ ವಿತರಣೆಯನ್ನು ಸುಧಾರಿಸುವುದು ಮತ್ತು ಸರ್ಕಾರಿ ಬೆಂಬಲವು ಉದ್ದೇಶಿತ ಫಲಾನುಭವಿಗಳಿಗೆ ಪರಿಣಾಮಕಾರಿಯಾಗಿ ತಲುಪುವುದನ್ನು ಖಚಿತಪಡಿಸಿಕೊಳ್ಳುವುದು ಈ ಉಪಕ್ರಮದ ಗುರಿಯಾಗಿದೆ. ದೇಶಾದ್ಯಂತದ ರೈತರನ್ನು ಅಭಿನಂದಿಸಿದ ಶ್ರೀ ಚೌಹಾಣ್, ಆಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲು, ಅನಗತ್ಯ ತೊಂದರೆಗಳಿಲ್ಲದೆ ತಮಗೆ ಅರ್ಹವಾದ ಯೋಜನೆಗಳು ಮತ್ತು ಸೌಲಭ್ಯಗಳನ್ನು ಪಡೆದುಕೊಳ್ಳಲು ಹಾಗೂ ಭಾರತೀಯ ಕೃಷಿಯನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯಲು ಕೊಡುಗೆ ನೀಡುವಂತೆ ಆಗ್ರಹಿಸಿದರು. ತಂತ್ರಜ್ಞಾನವು ರೈತರ ಹಿತಾಸಕ್ತಿಗಳನ್ನು ಕಾಯುವ ಮತ್ತು ವಿಕಸಿತ ಭಾರತದ ದೃಷ್ಟಿಕೋನವನ್ನು ಬೆಂಬಲಿಸುವ ಆಧುನಿಕ ಕೃಷಿ ವ್ಯವಸ್ಥೆಯನ್ನು ನಿರ್ಮಿಸುವತ್ತ ಈ ಸಾಧನೆಯು ಪ್ರಮುಖ ಹೆಜ್ಜೆಯಾಗಿದೆ ಎಂದು ಅವರು ಹೇಳಿದರು.

*****