রাস্ত্রপতিগী লোইশঙ
ভারতকী রাস্ত্রপতিনা ওজাশিংদা নেসনেল এৱার্দ লান্থোকখ্রে
একাদেমিক এক্সিলেন্স, স্কিল দিবেলপমেন্ত অমসুং ওন্ত্রপ্রিন্যুরশিপনা লৈবাক অসিনা খুমাং চাউশিন্নবা হোৎনবদা অচৌবা থৌদাং লৌরিঃ রাস্ত্রপতি দ্রৌপদি মুর্মু
থাগৎখিবা:
05 SEP 2026 3:09PM by PIB Imphal
ভারতকী রাস্ত্রপতি শ্রীমতি দ্রৌপদি মুর্মুনা ঙসি (সেপ্তেম্বর ৫, ২০২৬) ন্যু দিল্লীদা পাংথোকপা থৌরম অমদা লৈবাক শিনবা থুংবদগী লাকপা ওজাশিংদা নেসনেল এৱার্দ লান্থোকখ্রে।
থৌরম অদুদা ৱা ঙাংলদুনা রাস্ত্রপতিনা হায়খি মদুদি ঐখোয়গী সংবিধানদা য়াওরিবা চপ মান্নবা খুদোংচাবা পীবগী ৱাখল্লোন অসি মংফাওনহন্নবগী খ্বাইদগী কান্নবা ফংগদবা পাম্বৈদি মহৈ মশীংনি। মহাক্না হায়খি মদুদি প্রাইমরী স্কুল থাদোকপগী চাং য়াম্না নেমহন্নবা হোৎনখিবা অদুমক ঙসিদি ওজাশিং অসিগী হোৎনজমন্দগী ওইথোকপা ঙম্লে। জাতিগী থাক্ত আমাই পাকপা অসিগীদমক মহাক্না ওজা পুম্নমকপু থাগৎপা ফোংদোকখি।
রাস্ত্রপতিনা হায়খি মদুদি স্কুল এজুকেসন্না এজুকেসন সিস্তেমগী য়ুম্ফম ওই। লৌশিং অমসুং হৈশিংবা অসি মতম অমহেক্তদা ফংলবসু, অঙাং ওইরিঙৈদা অফবা লমচৎ-শাজৎ তম্বনা হেন্না কান্নৈ। অঙনবা গ্রেদশিংদা লৈবা অঙাংশিংগী ইন্তেলেকচুএল, ফিজিকেল, অমসুং মোরেল দিবেলপমেন্ততা কন্না মীৎয়েং থমদুনা, ঐখোয়গী ওজাশিংনা তুংগী চারোন-শুরোনগী অফবা মহৈরোইশিং অমসুং থৌদাং লৈবা নাগরিকশিং শেমগৎপা ঙম্মী।
মহৈরোয় কয়া অমা শেল-থুমগী ফিবম ফত্তবা ইমুংদগী লাকপনি। খরদি অহানবা জেনরেসনগী মহৈরোয়নি। খরদি খুঙ্গংগী মহৈলোইশঙদগী অচৌবা শহরগী মহৈলোইশঙদা হোংলকপনি। খরদি মহৌশানা ইকাইথীগনি। খরনা হৈথোই-শিংথোইরবসু মশাদা থাজবা লৈতে। অমসুং খরদি অখন্নবা মীৎয়েং চঙবা মথৌবা অঙাংশিংনি। মরম অমা নৎত্রগা অমগী মতুং ইন্না মতীক চাদবগী ৱাখল লৈরবা মহৈরোয় পুম্নমকপু থাজবা অমসুং পুক্নিং থৌগৎপা অসি ওজাশিংগী অখন্নবা থৌদাংনি।
রাস্ত্রপতিনা হায়খি মদুদি একাদমিক এক্সিলেন্স, স্কিল দিবেলপমেন্ত, অমসুং ওন্ত্রপ্রিন্যুরশিপ অসি লৈবাক অসিগী চাউখৎ থৌরাংদা য়াম্না মরু ওই। ভারতপু মালেমগী স্কিল কেপিতেল ওইনা লিংখৎপা অমসুং মসিবু নোলেজ সুপরপাৱর অমা ওইহনবা হায়বসি ঐখোয়গী লৈবাক অসিগী মরুওইবা মীৎয়েং চঙফমশিংগী মনুংদা অমনি।
ঐখোয়না বিক্সিত ভারত অমা শেমগৎনবা পান্দমদা চংশিল্লি অমসুং মালেমগী থাক্কী এজুকেসন সিস্তেম অমগী খুত্থাংদা মসিগী পান্দম অসি ফংবা ঙমগনি হায়না রাস্ত্রপতিনা হায়খি। ঐখোয়গী ওজাশিংনা এজুকেসন সিস্তেম অসিবু হিংনবা হোৎনবী। ঐখোয়গী লৈবাক অসিদা মহৈরোই অমত্তা মগুন লৈবা এজুকেসনগী খুদোংচাবা শোইদনা ফংহন্নবা ঐখোয়না হোৎনগদবনি। মহাক্না পুক্নিং চিংশিল্লদুনা হায়খি মদুদি ঐখোয়গী ওজাশিংনা মহৈরোয় খুদিংমক্তা মখোয়গী নুংশি-চান্নবা অমসুং থৌনাগী খুত্থাংদা লৌশিং, ইথিল, মোরেলিতী অমসুং সেন্সিতিবিতী পোকহনগদবনি।
রাস্ত্রপতিগী ৱারোল য়েংবীনবা মফম অসিদা নম্বীয়ু
***
(রিলিজ আই.দি.: 2307600)
ভিজিতর কাউন্তর : 4
রিলিজ অসি মসিদা পাবীয়ু:
English
,
Urdu
,
हिन्दी
,
Marathi
,
Assamese
,
Bengali
,
Bengali-TR
,
Gujarati
,
Odia
,
Tamil
,
Telugu
,
Kannada
,
Malayalam