ભારતના રાષ્ટ્રપતિ શ્રીમતી દ્રૌપદી મુર્મુએ આજે શિક્ષક દિન (September 5, 2026) પર નવી દિલ્હીમાં યોજાયેલા એક સમારોહમાં દેશભરના શિક્ષકોને રાષ્ટ્રીય પુરસ્કારોથી સન્માનિત કર્યા.

આ અવસરે બોલતા રાષ્ટ્રપતિએ જણાવ્યું હતું કે શિક્ષણ એ આપણા બંધારણમાં સમાવિષ્ટ તકની સમાનતાના આદર્શને સાકાર કરવાનું સૌથી અસરકારક સાધન છે. તેમણે કહ્યું કે પ્રાથમિક શાળાના ડ્રોપઆઉટ રેટને નગણ્ય કરવાની સિદ્ધિ શિક્ષકોના પ્રયાસોથી જ શક્ય બની છે. તેમણે આ રાષ્ટ્રીય સફળતા માટે તમામ શિક્ષકોની પ્રશંસા કરી.

રાષ્ટ્રપતિએ કહ્યું કે શાળાકીય શિક્ષણ એ શિક્ષણ વ્યવસ્થાનો પાયો છે. જ્યારે જ્ઞાન અને કૌશલ્ય કોઈપણ સમયે મેળવી શકાય છે, બાળપણ દરમિયાન સારા આચરણના પાઠ આપવા વધુ અસરકારક સાબિત થાય છે. શરૂઆતના ધોરણોમાં બાળકોના બૌદ્ધિક, શારીરિક અને નૈતિક વિકાસ પર કાળજીપૂર્વક ધ્યાન કેન્દ્રિત કરીને, આપણા શિક્ષકો ઉત્કૃષ્ટ વિદ્યાર્થીઓ અને ફરજનિષ્ઠ નાગરિકોની ભાવિ પેઢીઓ તૈયાર કરી શકે છે.

રાષ્ટ્રપતિએ રેખાંકિત કર્યું કે ઘણા વિદ્યાર્થીઓ આર્થિક રીતે નબળા પરિવારોમાંથી આવે છે; કેટલાક પ્રથમ પેઢીના શીખનારા (first-generation learners) છે; અન્ય સામાન્ય ગામડાની શાળાઓમાંથી મોટા શહેરની શાળાઓમાં ટ્રાન્સફર થાય છે; કેટલાક કુદરતી રીતે શરમાળ હોય છે; કેટલાક પાસે અગાધ પ્રતિભા હોય છે પરંતુ આત્મવિશ્વાસનો અભાવ હોય છે; અને કેટલાક વિશેષ જરૂરિયાતો ધરાવતા બાળકો હોય છે. તે શિક્ષકોની વિશેષ જવાબદારી છે કે તેઓ તેમનામાં આત્મવિશ્વાસ જગાડે અને એવા તમામ વિદ્યાર્થીઓને ઉપર ઉઠાવે જેઓ કોઈપણ કારણોસર લઘુતાગ્રંથિ અનુભવે છે.

રાષ્ટ્રપતિએ જણાવ્યું હતું કે દેશના વિકાસમાં શૈક્ષણિક ઉત્કૃષ્ટતા, કૌશલ્ય વિકાસ અને સાહસિકતા અત્યંત મહત્વ ધરાવે છે. ભારતને વિશ્વની સ્કિલ કેપિટલ (કૌશલ્ય રાજધાની) તરીકે સ્થાપિત કરવું અને તેને નોલેજ સુપરપાવરમાં રૂપાંતરિત કરવું એ આપણી રાષ્ટ્રીય પ્રાથમિકતાઓમાં સામેલ છે.

રાષ્ટ્રપતિએ કહ્યું કે આપણે વિકસિત ભારત નિર્માણના લક્ષ્ય તરફ આગળ વધી રહ્યા છીએ અને આ લક્ષ્ય માત્ર વિશ્વસ્તરીય શિક્ષણ વ્યવસ્થા દ્વારા જ પ્રાપ્ત કરી શકાય છે. આપણા શિક્ષકો શિક્ષણ વ્યવસ્થામાં પ્રાણ પૂરે છે. આપણે એ સુનિશ્ચિત કરવાનો પ્રયાસ કરવો જોઈએ કે આપણા દેશનો એક પણ વિદ્યાર્થી ગુણવત્તાયુક્ત શિક્ષણની તકોથી વંચિત ન રહે. તેમણે ભારપૂર્વક જણાવ્યું હતું કે આપણા શિક્ષકોએ પોતાના સ્નેહ અને સમર્પણ દ્વારા તમામ વિદ્યાર્થીઓમાં જ્ઞાન, પ્રેરણા, નૈતિકતા અને સંવેદનશીલતા સિંચવી જોઈએ.

રાષ્ટ્રપતિનું ભાષણ જોવા માટે કૃપા કરીને અહીં ક્લિક કરો

SM/JY/JD