ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି (୫ ସେପ୍ଟେମ୍ବର ୨୦୨୬) ଗୁରୁ ଦିବସ ଉପଲକ୍ଷେ ନୂଆଦିଲ୍ଲୀରେ ଆୟୋଜିତ ଏକ କାର୍ଯ୍ୟକ୍ରମରେ ସାରା ଦେଶର ଅସାଧାରଣ ଶିକ୍ଷକ ଶିକ୍ଷୟିତ୍ରୀମାନଙ୍କୁ ଜାତୀୟ ଶିକ୍ଷକ ପୁରସ୍କାର ପ୍ରଦାନ କରିଛନ୍ତି । 

କାର୍ଯ୍ୟକ୍ରମରେ ବିଦ୍ୟାଳୟ ଶିକ୍ଷା, ଉଚ୍ଚ ଶିକ୍ଷା ଏବଂ ବୈଷୟିକ ତାଲିମ କ୍ଷେତ୍ରରେ ୮୨ ଜଣ ଶିକ୍ଷକ ଓ ଶିକ୍ଷୟିତ୍ରୀଙ୍କୁ ଜାତୀୟ ପୁରସ୍କାର ଦିଆଯାଇଛି । ଓଡ଼ିଶାର ୪ ଜଣ ଶିକ୍ଷକଙ୍କୁ ଜାତୀୟ ପୁରସ୍କାର ମିଳିଛି । ଜଗତସିଂହପୁର ଜିଲ୍ଲା ଆଳିପିଙ୍ଗଳ ଉଚ୍ଚବିଦ୍ୟାଳୟର ଶିକ୍ଷକ ପଦରାଜ ଉମାକାନ୍ତ ନାୟକଙ୍କୁ ଜାତୀୟ ଶିକ୍ଷକ ପୁରସ୍କାର ପ୍ରଦାନ କରାଯାଇଛି । ସେହିପରି ମୟୂରଭଞ୍ଜ ଜିଲ୍ଲା କରଞ୍ଜିଆସ୍ଥିତ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟର ଶିକ୍ଷକ ମହମ୍ମଦ ଜଫର ଆଲମଙ୍କୁ ମଧ୍ୟ ଜାତୀୟ ପୁରସ୍କାର ମିଳିଛି । ଆଇଆଇଟି ଭୁବନେଶ୍ୱରର ମେଟାଲର୍ଜି ଇଞ୍ଜିନିୟରିଂ ବିଭାଗ ସହ ପ୍ରାଧ୍ୟାପକ ଡକ୍ଟର ଶ୍ରୀକାନ୍ତ ଗୋଲାପୁଡ଼ି ଏବଂ ସିଟିଟିସି ଭୁବନେଶ୍ବରର ଶିକ୍ଷକ ପ୍ରଣବ କୁମାର ଚୌଧୁରୀ ମଧ୍ୟ ଜାତୀୟ ଶିକ୍ଷକ ପୁରସ୍କାର ପାଇଛନ୍ତି ।

ରାଷ୍ଟ୍ରପତି ତାଙ୍କ ଅଭିଭାଷଣରେ କହିଥିଲେ, ଆମ ସମ୍ବିଧାନରେ ଲିଖିତ ‘‘ସୁଯୋଗର ସମାନତା’’ ଆଦର୍ଶକୁ ସାକାର କରିବାର ସବୁଠାରୁ ପ୍ରଭାବଶାଳୀ ମାଧ୍ୟମ ହେଉଛି ଶିକ୍ଷା। ପ୍ରାଥମିକ ବିଦ୍ୟାଳୟଗୁଡ଼ିକରେ ପାଠପଢ଼ା ଛାଡିବା ହାରକୁ ନଗଣ୍ୟ ସ୍ତରକୁ ହ୍ରାସ କରିବାର ସଫଳତା ଶିକ୍ଷକମାନଙ୍କ ପ୍ରୟାସ ଯୋଗୁଁ ସମ୍ଭବ ହୋଇଛି ବୋଲି ସେ ଉଲ୍ଲେଖ କରିଥିଲେ । ଏହି ଜାତୀୟ ସଫଳତା ପାଇଁ ସେ ସମସ୍ତ ଶିକ୍ଷକଙ୍କୁ ପ୍ରଶଂସା କରିଥିଲେ ।

ରାଷ୍ଟ୍ରପତି କହିଥିଲେ, ବିଦ୍ୟାଳୟ ଶିକ୍ଷା ହେଉଛି ଶିକ୍ଷା ବ୍ୟବସ୍ଥାର ମୂଳଦୁଆ। ଜ୍ଞାନ ଏବଂ ଦକ୍ଷତା ଯେକୌଣସି ସମୟରେ ଅର୍ଜନ କରାଯାଇପାରିବ, କିନ୍ତୁ ଶୈଶବ ସମୟରେ ପିଲାମାନଙ୍କ ମଧ୍ୟରେ ନୈତିକ ମୂଲ୍ୟବୋଧ ଜାଗୃତ କରିବା ଅଧିକ ପ୍ରଭାବଶାଳୀ ପ୍ରମାଣିତ ହୁଏ। ପ୍ରାରମ୍ଭିକ ଶ୍ରେଣୀରେ ପିଲାମାନଙ୍କର ବୌଦ୍ଧିକ, ଶାରୀରିକ ଏବଂ ନୈତିକ ବିକାଶ ଉପରେ ନିଷ୍ଠାର ସହିତ ଧ୍ୟାନ ଦେଇ ଆମର ଶିକ୍ଷକମାନେ ଭବିଷ୍ୟତ ପିଢ଼ିକୁ ଭଲ ଛାତ୍ର ଏବଂ ସଚେତନ ନାଗରିକ ରୂପେ ପ୍ରସ୍ତୁତ କରିପାରିବେ ।

ରାଷ୍ଟ୍ରପତି କହିଥିଲେ, ଅନେକ ଛାତ୍ରଛାତ୍ରୀ ଆର୍ଥିକ ଦୃଷ୍ଟିରୁ ପଛୁଆ ପରିବାରରୁ ଆସିଥାନ୍ତି; କେତେକ ସେମାନଙ୍କ ପରିବାରର ପ୍ରଥମ ପିଢ଼ିର ଛାତ୍ର; କେତେକ ମଧ୍ୟମ ଗ୍ରାମ ବିଦ୍ୟାଳୟରୁ ବଡ଼ ସହର ବିଦ୍ୟାଳୟକୁ ସ୍ଥାନାନ୍ତରିତ ହୁଅନ୍ତି; କେତେକ ସ୍ୱାଭାବିକ ଭାବରେ ଲାଜକୁଳା; କେତେକଙ୍କ ପାଖରେ ଅପାର ପ୍ରତିଭା ଅଛି କିନ୍ତୁ ଆତ୍ମବିଶ୍ୱାସର ଅଭାବ ଅଛି; ଏବଂ କେତେକଙ୍କର ବିଶେଷ ଆବଶ୍ୟକତା ଅଛି। ଶିକ୍ଷକମାନଙ୍କର ବିଶେଷ ଦାୟିତ୍ୱ ହେଉଛି ଯେ ସେମାନେ ଯେକୌଣସି କାରଣରୁ ପଛୁଆ ଅନୁଭବ କରୁଥିବା ସମସ୍ତ ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମବିଶ୍ୱାସ ସୃଷ୍ଟି କରନ୍ତୁ ଏବଂ ସେମାନଙ୍କୁ ପ୍ରଗତି ପାଇଁ ଉତ୍ସାହିତ କରନ୍ତୁ ।

ରାଷ୍ଟ୍ରପତି କହିଥିଲେ, ଶିକ୍ଷାଗତ ଉତ୍କର୍ଷ, ଦକ୍ଷତା ବିକାଶ ଏବଂ ଉଦ୍ୟୋଗୀତା ରାଷ୍ଟ୍ରର ବିକାଶ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଭାରତକୁ ଏକ ଜ୍ଞାନ ମହାଶକ୍ତି ଏବଂ ଏକ ବିଶ୍ୱସ୍ତରୀୟ ଦକ୍ଷତା କେନ୍ଦ୍ର ଭାବରେ ପ୍ରତିଷ୍ଠା କରିବା ଆମର ଜାତୀୟ ପ୍ରାଥମିକତା। 

ରାଷ୍ଟ୍ରପତି କହିଥିଲେ, ଆମେ ସମସ୍ତେ, ନାଗରିକ ଭାବରେ, ଏକ ବିକଶିତ ଭାରତ ନିର୍ମାଣ ଲକ୍ଷ୍ୟ ଆଡ଼କୁ ଅଗ୍ରସର ହେଉଛୁ । ଏକ ବିକଶିତ ରାଷ୍ଟ୍ର ନିର୍ମାଣ କେବଳ ଏକ ବିଶ୍ୱସ୍ତରୀୟ ଶିକ୍ଷା ବ୍ୟବସ୍ଥା ମାଧ୍ୟମରେ ସମ୍ଭବ। ଆମର ଶିକ୍ଷକମାନେ ଶିକ୍ଷା ବ୍ୟବସ୍ଥାରେ ଜୀବନ ଭରି ଦିଅନ୍ତି । ଆମ ଦେଶର ଜଣେ ବି ବିଦ୍ୟାର୍ଥୀ ଯେପରି ଗୁଣାତ୍ମକ ଶିକ୍ଷା ସୁଯୋଗରୁ ବଞ୍ଚିତ ନ ହୁଅନ୍ତି ତାହା ନିଶ୍ଚିତ କରିବା ପାଇଁ ଆମକୁ ପ୍ରୟାସ କରିବାକୁ ପଡିବ । ଆମ ଶିକ୍ଷକମାନେ ସେମାନଙ୍କର ସ୍ନେହ ଏବଂ ସମର୍ପଣ ମାଧ୍ୟମରେ ସମସ୍ତ ଛାତ୍ରଛାତ୍ରୀଙ୍କ ମଧ୍ୟରେ ଜ୍ଞାନ, ପ୍ରେରଣା, ନୈତିକତା ଏବଂ ସମ୍ବେଦନଶୀଳତା ସୃଷ୍ଟି କରିବା ଉଚିତ ବୋଲି ରାଷ୍ଟ୍ରପତି ଗୁରୁତ୍ୱାରୋପ କରିଥିଲେ। 

******

PS