উপ-রাস্ত্রপতিগী লোইশঙ
উপ-রাস্ত্রপতী শ্রী সি.পি. রাধাকৃষ্ণন্না সেন্ত্রেল য়ুনিভর্সিতী ওফ তামিল নাদু, তিরুবরুরগী ১১শুবা কনভোকেসন্দা শরুক য়াখ্রে
ৱাখল-লৌশিংখক্তনা মপুং ফাবা নত্তে; পুন্সি চুপ্পা তমশিনবা, ইনোভেসন অমসুং অওনবা চুশিন্নবা তুংলমচৎকীদমক মরুওই: উপ-রাস্ত্রপতী
মহৈ মশিং হায়বসি মনিং তম্না ৱাখল খন্নবা, ক্রিএতিবিতী অমসুং খুন্নাইগী থৌদাং লৌনবগীদমক চাংয়েং অমসুং মার্ক্কী ৱাংমদা চৎকদবনি: উপ-রাস্ত্রপতী
পব্লিক একজামিনেসন রিফোর্মশিং অসি অরানবা তৌবশিং চৈরাক ফংহন্নবা অমসুং পুকচেল শেংবা মহৈরোয়শিংগী ইন্তরেস্ত ঙাক্নবগীদমক মথৌ তাই: উপ-রাস্ত্রপতী
মশাগীদমক হিংবা হায়বসি লংজবা অমা নত্তে, মশাখক্তগী হিংবদি লংজবনি: উপ-রাস্ত্রপতী
“ৱাখল লৌশিং শীজিন্নবখক্তা নত্তনা শেমগৎপা ওইয়ু; মতৌ তম্বা নত্তনা ইনোভেতরশিং ওইয়ু; তুং ইনবা নত্তনা লুচিংবা ওইয়ু”: উপ-রাস্ত্রপতী
উপ-রাস্ত্রপতীনা সিক্যুরিতী এজেন্সীশিংদা দ্রগ লান্না শীজিন্নবশিংগী মায়োক্তা অকনবা থবক লৌখৎনবা ৱাফম থমখি
प्रविष्टि तिथि:
17 AUG 2026 1:56PM by PIB Imphal
উপ-রাস্ত্রপতী শ্রী সি.পি. রাধাকৃষ্ণন্না ঙসি তিরুবরুরদা সেন্ত্রেল য়ুনিভর্সিতী ওফ তামিল নাদুগী ১১শুবা কনভোকেসন্দা শরুক য়াখ্রে অমসুং মায় পাক্লবা মহৈরোয়শিংগী মফমদা মখোয়গী পুন্সিগী মরুওইবা পন্দোল অমা লোম্বদা নুংঙাইবা ফোঙদোকখি।
গ্রেজুএতশিংগী মফমদা ৱা ঙাংলদুনা, শ্রী সি.পি. রাধাকৃষ্ণন্না কনভোকেসন্না দিগ্রী ফংলকপখক্তবু হরাও তয়াম্বা ফোঙদোকপা নত্তে, মহৈরোয়শিংবু মরুওইখ্রবা মীৎকুপ অসি ফাওবা পুরক্লিবা মহৈ মশিংগী অওনবা পুরকপগী মতিং, ৱাখল লৌশিং তানবা অমসুং পুক্নিং লুপ্পা, হোৎনবা কনবা অমসুং খাঙবা কনববু সেলেব্রেত তৌবনি হায়খি।
মহাক্না মায় পাক্লবা মহৈরোয়শিংগী মমা মপা অমসুং ওজাশিংগী মফমদা নুংঙাইব ফোঙদোক্লদুনা মখোয়না কত্থোকখিবশিংবু শকখঙখি অমসুং মখোয়না মখোয়গী অঙাংশিং অমসুং মহৈরোয়শিংগী নীংথিরবা তুংলমচৎ অমগীদমক মখোয়গী হৌজিক নুংঙাইনা লেনগদবা মীৎকুপ কয়া মাঙজখ্রবনি হায়খি।
তিরুবরুরগী মরুওইবা ৱাফমশিং ফোঙদোক্লদুনা, শ্রী সি.পি. রাধাকৃষ্ণনন্না চীং লেম্লবা ত্যাগরাজা লাইশঙ লৈরিবা শেংলবা ময়োল্লম অসি চহিচা কয়া লাইনিং, মহৈ মশিং অমসুং কলাগী ইনাক খুল্লবা মফম অমা ওইদুনা লাক্লি হায়খি।
শেংলবা লমদম অসিনা লম্বোইবা, মায়চৌ, অমসুং কর্নাতিক ঈশৈ নোংমাইগী মমিং লৈরবা ত্রিনিতী ময়া মখোঙ শোমদুনা লাকখি হায়না মহাক্না ফোঙদোকখি। তশেংনা অথোইবা হায়বসি নাৎ, তমবা অঅমসুং মমলশিং পুন্না চাওখৎমিন্নরবা মতমদা ওইরকপনি হায়না মহাক্না হায়খি।
উপ-রাস্ত্রপতীনা হৌখিবা চহি তরানিথোই অসিদা হাইয়র এজুকেসনগী লমদা অকনবা মওংদা পাকথোক চাউথোরক্লিববু শিংথাখি। লৈবাক্কী মফম কয়াদা পাঙথোকপা কনভোকেসন থৌরমশিংদা মহাক্না নুপাদগী নুপীশিংনা মশিং হেন্না দীগ্রী অমসুং মেদলশিং ফংবা হেক হেক উই হায়রদুনা ওইরক্লিবা মওং অসি তরাম্না ওক্নিংঙাই ওইবা মশক্নি হায়না মহাক্না হায়খি।
উপ-রাস্ত্রপতীনা ঙসিগী মহৈ মশিংগী ফীভম অসি চাংয়েং অমসুং মার্কখক্তনা ওনবা য়াদে হায়খি।
“মসি মনিং তম্না ৱাখল খনবা ঙম্বা, মতিং লৈনা পাউ ফাওনবা ঙম্বা, পুন্না থবক তৌমিন্নবা ঙম্বা অমসুং পুন্সি চুপ্পা মখা তানা তমশিনবা ঙম্বগী মতিংনা ওনগদবনি,” হায়না মহাক্না হায়খি।
মহাক্না সেন্ত্রেল য়ুনিভর্সিতী ওফ তামিল নাদুবু মসিনা ফংহল্লিববা দিসিপ্লিন কয়াগী মহৈ মশিং, থিজিন হুমজিনবা, ইনোভেসন অমসুং ভেল্যুদা য়ুম্ফম ওইদুনা তম্বদা পীরিবা মরুওইবা খোঙফমগী খুত্থাঙদা ৱাখল্লোন অসি কোনশিনবগীদমক থাগৎপা ফোঙদোকখি।
হন্দক্তা পার্লিয়ামেন্তনা পাস তৌখিবা পব্লিক একজামিনেসন্স (প্রিভেন্সন ওফ অনফ্যের মীন্স) এমেন্দমেন্ত বিলগী মতাঙদা পল্লদুনা, উপ-রাস্ত্রপতীনা চাংয়েংদা অরানবা পাম্বৈ শীজিন্নবা থিংবা অমসুং মহৈরোয়শিংগী ইন্তরেস্ত ঙাকপা হায়বসি খ্বায়দগী মরুওইবনি হায়খি।
মহাক্না ঝার্খন্দগী গভর্নর ওইনা লৈরিঙৈ মতম নীংশিংলদুনা, শ্রী সি.পি. রাধাকৃষ্ণন্না মসিগা মান্নবা বিল অমা মহাক্কী মতমদা ঝার্খন্দ লৈঙাক্না পাস তৌখি, অমসুং মতমদুগী গভর্নর ওইনা মহাক্না মদুবু খুদক্তা খুৎয়েক পীদুনা লো ওইহনখি হায়খি।
পব্লিক একজামিনেসনশিংগী ইন্তেগ্রিতী অমসুং ফ্যেরনেস ঙশক্নবগীদমক অকনবা থৌরাং মথৌ তাই হায়রদুনা, “অফবা মীওইশিংগী ইন্তরেস্ত ঙাক্নবগীদমক খুন্নাইগী ফত্তবা মচাকশিং চৈরাক ফংহনগদবনি,” হায়না মহাক্না হায়খি।
উপ-রাস্ত্রপতীনা গ্রেজুএতশিংগী মফমদা “ৱাখল লৌশিং শীজিন্নবগী মহুত্তা শেমগৎপা ওইয়ু, মতৌ তম্বগী মহুত্তা ইনোভেতর ওইয়ু, অমসুং তুং ইনবগী মহুত্তা লুচিংবা ওইয়ু” হায়খি।
শ্রী সি.পি. রাধাকৃষ্ণন্না প্রধান মন্ত্রী শ্রী নরেন্দ্র মোদীগী মীৎয়েঙ শানবা লুচিং মখাদা, ভারতনা ভিক্সিত ভারত @২০৪৭ গী মঙলান তম্না চঙশিল্লি হায়খি। মহাক্না নহাশিংগী মফমদা মখোয়না তৌথোরকপা থবক্তা থম্মোয়নুংদা “নেসন ফর্স্ত – লৈবাক্না মাঙদা” হায়বা ৱাখল্লোন থম্নবা অমসুং মখোয়গী ৱাখল-লৌশিং, হৈ-শিংবা অমসুং লুচিংবগী মতিংবু লৈবাক শেমগৎপদা শীজিন্নবা ৱাফম থমখি।
উপ-রাস্ত্রপতীনা পুলিস অমসুং সিক্যুরিতী এজেন্সীশিংগী মফমদা দ্রগ য়োল্লিবা মীওইশৎং অমসুং দ্রগকী অকিবা ফীভম শন্দোকপদা য়াওরিবা মীওইশিংগী মায়োক্তা অকনবা থবক পায়খৎনবা ৱাফম থমখি।
দ্রগ লান্না শীজিন্নবনা শীজিন্নরিবা মীওইশিংগী পুন্সি লৈখা তাহনবতা নত্তনা ইমুং মনুং অমসুং খুন্নাইবুসু লৈখা তাহল্লি, অমসুং অসিগুম্বা ফীভম অসিদগী নহাশিংগী ঙাকথোকপা হায়বসি অপুনবা থৌদাং অমনি হায়না মহাক্না হায়খি।
মহাক্কী ৱাফম অদু মহৈরোয়শিংগী মফমদা অমুক হন্না থম্লদুনা “দ্রগ শীজিন্নগনু” হায়খি অমসুং মখোয়গী মরুপ-মপাংশিংবুসু নিশা শীজিন্নদনবা হায়নবা পুক্নিং থৌগৎখি।
মহাক্কী ৱারোল লোইশিল্লকপদা, উপ-রাস্ত্রপতীনা গ্রেজুএত খুদিংমক্কী মফমদা মায় পাকপা, নীংবা থুংবা, মশা ফবা অমসুং খুন্নাইদা কান্নবা অহোংবা পুরকপদা অপেনবা পোক্নবা য়াইফ-পাউজেল পীখি।
কনভোকেসন অদুদা মহৈ মশিংগী লমদা মীথোয় মীহেন্দুনা সনাগী মেদল ফংলকপা ৫০ য়াওনা পুন্না গ্রেজুএত ১,১০৩ না মখোয়গী দিগ্রী ফংখি। গ্রেজুএত ১,১০৩ অদুগী মনুংদা নুপীনা ৬১৬ নি। নুপীশিংনা সনাগী মেদল ৫০ গী মনুংদা ৩৭ ফংখি।
তামিল নাদুগী গভর্নর শ্রী রাজেন্দ্র বিস্বানাথ অর্লেকর, লোক সভাগী মেম্বর (নাগপত্তিনম) তিরু ভি. সেলবারাজ, চাঞ্ছেলর প্রোফেসর জি. পদ্মনভন, ভাইস-চাঞ্ছেলর সেনিয়র প্রোফেসর সুলোচনা শেখর, ফেকল্তী মেম্বরশিং, মমা মপা অমসুং মহৈরোয়শিংনা থৌরমদুদা শরুক য়াখি।
*****
(रिलीज़ आईडी: 2300620)
आगंतुक पटल : 12
इस विज्ञप्ति को इन भाषाओं में पढ़ें:
English
,
Urdu
,
हिन्दी
,
Marathi
,
Bengali
,
Bengali-TR
,
Punjabi
,
Gujarati
,
Tamil
,
Telugu
,
Kannada
,
Malayalam