અટલ ઇનોવેશન મિશનના ગ્રાસરૂટ્સ ઇનોવેટર્સના એક સમૂહે આજે (31 જુલાઈ, 2026) રાષ્ટ્રપતિ ભવન કલ્ચરલ સેન્ટર ખાતે ભારતના રાષ્ટ્રપતિ શ્રીમતી દ્રૌપદી મુર્મુ સાથે મુલાકાત કરી હતી. તેમણે આ ઇનોવેટર્સ દ્વારા આયોજિત પ્રદર્શનની મુલાકાત પણ લીધી હતી, તેમના નવતર સંશોધનો નિહાળ્યા હતા અને તેમની સાથે સંવાદ કર્યો હતો.

આ પ્રસંગે બોલતા, રાષ્ટ્રપતિએ જણાવ્યું હતું કે ભારત તેના વિશાળ વ્યાપ અને નવીનતાની ભાવનાનો ઉપયોગ કરીને ગ્રાસરૂટ્સ ઇનોવેશન ક્ષેત્રે વૈશ્વિક પાવરહાઉસ બનવાની ક્ષમતા ધરાવે છે. તેમણે ભારપૂર્વક જણાવ્યું હતું કે ગ્રાસરૂટ્સ ઇનોવેશન્સ સમાજની જરૂરિયાતોને ખૂબ જ અનુકૂળ છે, કારણ કે તે સ્થાનિક અનુભવ, વૈજ્ઞાનિક વિચારસરણી અને સામાજિક જવાબદારીની ભાવના સાથે વ્યક્તિગત સર્જનાત્મકતાનો સમન્વય કરે છે. દેશભરના ઇનોવેટર્સ સ્થાનિક સમસ્યાઓના એવા ઉકેલો વિકસાવી રહ્યા છે જે રાષ્ટ્રીય સ્તરે મહત્વ ધરાવે છે તે નોંધીને તેમણે આનંદ વ્યક્ત કર્યો હતો. તેમણે જણાવ્યું હતું કે આજનું પ્રદર્શન દર્શાવે છે કે ગ્રાસરૂટ્સ ઇનોવેટર્સ કેવી રીતે કચરામાંથી સંપત્તિ બનાવવી (વેસ્ટ ટુ વેલ્થ), ઊર્જા સંરક્ષણ, મહિલાઓ અને દિવ્યાંગ વ્યક્તિઓ માટે સુવિધા વધારવી, પર્યાવરણ રક્ષણ, કૃષિ અને કલાના જતન જેવા ક્ષેત્રોમાં યોગદાન આપી રહ્યા છે.

રાષ્ટ્રપતિએ કહ્યું કે સામાજિક પરિવર્તન માત્ર વિચારોથી જ નથી આવતું. આ વિચારોને આગળ ધપાવવા માટે એવા વાતાવરણની જરૂર છે જે પ્રતિભાને માર્ગદર્શન આપે અને યોગ્ય પ્લેટફોર્મ તથા સંસાધનો પૂરા પાડે. તેમણે એ નોંધતા આનંદ વ્યક્ત કર્યો હતો કે અટલ કમ્યુનિટી ઇનોવેશન સેન્ટર્સ ગ્રાસરૂટ્સ ઇનોવેટર્સને માર્ગદર્શન અને તકનીકી સહાય પૂરી પાડી રહ્યા છે, તેમજ નવીન વિચારોને ટકાઉ સાહસોમાં રૂપાંતરિત કરવાની તકો પ્રદાન કરી રહ્યા છે.

રાષ્ટ્રપતિએ જણાવ્યું હતું કે વિકસિત ભારતનું સ્વપ્ન ત્યારે સાકાર થશે જ્યારે દરેક નાગરિક સમસ્યાઓના ઉકેલ શોધવા માટે નવીન વિચારસરણી સાથે કામ કરશે. વિવિધ સંસ્થાઓ અને નાગરિકો એક સામાન્ય ઉદ્દેશ્ય સાથે મળીને કામ કરી રહ્યા છે અને ઇનોવેશનની સંસ્કૃતિ મજબૂત બની રહી છે તે નોંધીને તેમણે આનંદ વ્યક્ત કર્યો હતો. તેમણે વિશ્વાસ વ્યક્ત કર્યો હતો કે આવા પ્રયાસોનો લાભ સમાજના વિશાળ વર્ગ સુધી પહોંચશે.

રાષ્ટ્રપતિએ નોંધ્યું હતું કે ઘણા ઇનોવેટર્સે મર્યાદિત સંસાધનો, અસુરક્ષા અને વારંવાર આવતા પડકારો છતાં તેમના પ્રયાસો ચાલુ રાખ્યા હતા. વ્યક્તિઓ, પરિવારો કે સમુદાયોના જીવનમાં સકારાત્મક પરિવર્તન લાવવા માટે નવીનતામાં તેમના દ્રઢ વિશ્વાસ બદલ તેમણે તેમની પ્રશંસા કરી હતી. રાષ્ટ્રપતિએ તેમના સંશોધનોને સતત ઉત્તમ બનાવવા, સંશોધન સંસ્થાઓ, ઉદ્યોગો અને અન્ય ઇનોવેટર્સ સાથે સહયોગ વધારવા અને તેમના સંશોધનોને વ્યાપક સ્તરે વિસ્તૃત કરવા માટે પ્રયત્નશીલ રહેવાની સલાહ આપી હતી.

રાષ્ટ્રપતિના સંબોધન માટે કૃપા કરીને અહીં ક્લિક કરો-

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com