ଭାରତର ସୃଜନଶୀଳ କ୍ଷେତ୍ରକୁ ସୁଦୃଢ଼ କରିବା ଏବଂ ବିକଶିତ ହେଉଥିବା ‘ନାରଙ୍ଗୀ ଅର୍ଥନୀତି’କୁ ପ୍ରୋତ୍ସାହିତ କରିବା ପାଇଁ ସରକାରଙ୍କ ପ୍ରୟାସର ଅଂଶସ୍ୱରୂପ, ସୂଚନା ଓ ପ୍ରସାରଣ ମନ୍ତ୍ରଣାଳୟ ଆଜି 'ଜେମ୍ସ ଅଫ୍ ଇଣ୍ଡିଆ' ଚ୍ୟାଲେଞ୍ଜର ପାଇଲଟ୍ ପର୍ଯ୍ୟାୟର ଶୁଭାରମ୍ଭ କରିଛି। ଏହା ସାରା ଦେଶର ତୃଣମୂଳ ସ୍ତରର ଡିଜିଟାଲ୍ କ୍ରିଏଟରମାନଙ୍କୁ ଚିହ୍ନଟ କରିବା ସହ ସେମାନଙ୍କୁ ପ୍ରୋତ୍ସାହିତ କରିବା ଏବଂ ଆଗକୁ ଆଣିବା ପାଇଁ ଏହା ଏକ ବ୍ୟବସ୍ଥିତ ଜାତୀୟ ପଦକ୍ଷେପ।

ମାନ୍ୟବର ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ, ଭାରତ ପ୍ରଯୁକ୍ତିବିଦ୍ୟାକୁ ସଶକ୍ତୀକରଣ, ଅନ୍ତର୍ଭୁକ୍ତୀକରଣ ଏବଂ ରାଷ୍ଟ୍ର ନିର୍ମାଣର ଏକ ଶକ୍ତିଶାଳୀ ମାଧ୍ୟମ ଭାବରେ ଗ୍ରହଣ କରିଛି। 'ଡିଜିଟାଲ୍ ଇଣ୍ଡିଆ' ଭଳି ପଦକ୍ଷେପଗୁଡ଼ିକ ପ୍ରଯୁକ୍ତିବିଦ୍ୟାର ବ୍ୟବହାରକୁ ସହଜ ଓ ସାର୍ବଜନୀନ କରିବା ସହ ଅଭୂତପୂର୍ବ ସ୍ତରରେ ନୂତନ ଉଦ୍ଭାବନ ପାଇଁ ସୁଯୋଗ ସୃଷ୍ଟି କରିଛି।

ସୂଚନା ଏବଂ ପ୍ରସାରଣ ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବଙ୍କ ଦ୍ୱାରା ଆରମ୍ଭ କରାଯାଇଥିବା ଓ୍ବେଭ୍ସ ଓଟିଟି ସେବା ଅଧୀନସ୍ଥ ସିଟିଜେନ୍‌ କ୍ରିଏଟର ପ୍ଲାଟଫର୍ମ ମାଇଓ୍ବେଭ୍ସ ଉପରେ ଆଧାରିତ। ଏହାର ଉଦ୍ଦେଶ୍ୟ ହେଉଛି ଭାରତର ଡିଜିଟାଲ କ୍ରିଏଟର ଇକୋସିଷ୍ଟମକୁ ସୁଦୃଢ଼ କରିବା ସହିତ ମୌଳିକ ବିଷୟବସ୍ତୁ ସୃଷ୍ଟି, ଅପଲୋଡ୍ ଏବଂ ସେୟାର କରିବାକୁ ନାଗରିକମାନଙ୍କୁ ସକ୍ଷମ କରିବା। ଉପଭୋକ୍ତା-ସୃଷ୍ଟ ବିଷୟବସ୍ତୁ (ୟୁଜର୍-ଜେନେରେଟେଡ୍ କଣ୍ଟେଣ୍ଟ)କୁ ପ୍ରୋତ୍ସାହିତ କରିବା ଏବଂ ଭାରତର ସମୃଦ୍ଧ ସାଂସ୍କୃତିକ ବିବିଧତାକୁ ପ୍ରଦର୍ଶିତ କରିବା ପାଇଁ ଏକ ମଞ୍ଚ ଭାବରେ ପରିକଳ୍ପିତ 'MyWAVES' ଏବେ 'ଜେମ୍ସ ଅଫ୍ ଇଣ୍ଡିଆ' ଚ୍ୟାଲେଞ୍ଜ ପାଇଁ ଭିତ୍ତିଭୂମି ଯୋଗାଉଛି, ଯାହା କ୍ରିଏଚରମାନଙ୍କୁ ପ୍ରାମାଣିକ ଡିଜିଟାଲ୍ କାହାଣୀ ପ୍ରସ୍ତୁତି (ଷ୍ଟୋରୀଟେଲିଂ) ମାଧ୍ୟମରେ ସେମାନଙ୍କ ଜିଲ୍ଲାର ଅନନ୍ୟ କାହାଣୀ କହିବାକୁ ଆହ୍ୱାନ କରେ।

ସୂଚନା ଓ ପ୍ରସାରଣ ମନ୍ତ୍ରଣାଳୟର ସଚିବ ଶ୍ରୀ ଚଞ୍ଚଳ କୁମାର ସ୍ୱୀକାର କରିଛନ୍ତି ଯେ, "ଭାରତର ପ୍ରତ୍ୟେକ ଜିଲ୍ଲାରେ ଏପରି କିଛି କାହାଣୀ ଅଛି ଯାହା ପ୍ରକାଶ ପାଇବାକୁ ଅପେକ୍ଷା କରିଛି, ଏବଂ 'ଜେମ୍ସ ଅଫ୍ ଇଣ୍ଡିଆ' ଆମ ସ୍ରଷ୍ଟାମାନଙ୍କୁ ତାହା କହିବା ପାଇଁ ଏକ ମଞ୍ଚ ପ୍ରଦାନ କରୁଛି। ଏହା ଆମ ଯୁବପିଢ଼ିଙ୍କ ସୃଜନଶୀଳତାକୁ ପାଳନ କରିବା ସହିତ ଆମ ଜିଲ୍ଲାଗୁଡ଼ିକର ଅସାଧାରଣ ବିବିଧତାକୁ ସମ୍ମାନିତ କରିବାର ଏକ ପ୍ରୟାସ।"

ଏହି ଚ୍ୟାଲେଞ୍ଜର ଉଦ୍ଦେଶ୍ୟ ହେଉଛି ଭାରତର ପ୍ରତ୍ୟେକ ଜିଲ୍ଲାର ସ୍ୱତନ୍ତ୍ର ପରିଚୟକୁ ପାଳନ କରିବା ସହ, କ୍ରିଏଚରମାନଙ୍କୁ ପ୍ରାମାଣିକ ଡିଜିଟାଲ୍ ଷ୍ଟୋରୀଟେଲିଂ ମାଧ୍ୟମରେ ସେମାନଙ୍କ ଜିଲ୍ଲାର ସଂସ୍କୃତି, ଐତିହ୍ୟ, ପର୍ଯ୍ୟଟନ, ପରମ୍ପରା, ଇତିହାସ ଏବଂ ସ୍ୱତନ୍ତ୍ର ସଫଳତାଗୁଡ଼ିକୁ ପ୍ରଦର୍ଶିତ କରିବାକୁ ପ୍ରୋତ୍ସାହିତ କରି ସାରା ଦେଶରେ କ୍ରିଏଟରମାନଙ୍କର ଏକ ସକ୍ରିୟ ନେଟୱର୍କ ଗଠନ କରିବା।

କିପରି ଅଂଶଗ୍ରହଣ କରିବେ: ଏହି ପ୍ରତିଯୋଗିତାରେ ଯୋଗଦେବା ପାଇଁ, କ୍ରିଏଟରମାନେ ଓ୍ବେଭ୍ସ ଓଟିଟି ପ୍ଲାଟଫର୍ମର ମାଇଓ୍ବେଭ୍ସ ବିଭାଗ ମାଧ୍ୟମରେ ୧ରୁ ୩ ମିନିଟର ଭିଡିଓ ଦାଖଲ କରିପାରିବେ। ପାଇଲଟ୍ ପର୍ଯ୍ୟାୟ ପାଇଁ ଦାଖଲ ୱିଣ୍ଡୋ ୧ ଅଗଷ୍ଟରୁ ୩୧ ଅଗଷ୍ଟ, ୨୦୨୬ ପର୍ଯ୍ୟନ୍ତ ଖୋଲା ରହିବ।

ପାଇଲଟ୍ ପର୍ଯ୍ୟାୟ କଭରେଜ୍ ଏବଂ ସହଭାଗୀତା: ପାଇଲଟ୍ ପର୍ଯ୍ୟାୟ ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜ, ଅରୁଣାଚଳ ପ୍ରଦେଶ, ଚଣ୍ଡିଗଡ଼, ଦାଦ୍ରା ଏବଂ ନଗର ହାବେଳୀ ଏବଂ ଦାମନ ଏବଂ ଦିଉ, ଗୋଆ ଏବଂ ଲଦାଖରେ ଆରମ୍ଭ କରାଯାଉଛି। ଏହି ପର୍ଯ୍ୟାୟ ପ୍ରସାର ଭାରତୀ, ମାଇ ଭାରତ ଏବଂ ସମ୍ପୃକ୍ତ ରାଜ୍ୟ ଏବଂ ଜିଲ୍ଲା ପ୍ରଶାସନ ସହିତ ଜଡିତ ଏକ ମିଳିତ ପ୍ରୟାସ। କ୍ରିଏଟରଙ୍କୁ ଆକୃଷ୍ଟ କରିବା ଏବଂ ବିଷୟବସ୍ତୁ ପ୍ରସ୍ତୁତିକୁ ସହଜ କରିବା ପାଇଁ ସ୍ଥାନୀୟ ସାଂସ୍କୃତିକ ଏବଂ ଶିକ୍ଷାନୁଷ୍ଠାନଗୁଡ଼ିକ ମଧ୍ୟ ସକ୍ରିୟ ଭାବରେ ସାମିଲ ହେବେ।

ଏହି ପଦକ୍ଷେପକୁ ଆହୁରି ବ୍ୟାପକ କରିବା ପାଇଁ, ମନ୍ତ୍ରଣାଳୟ ପ୍ରମୁଖ ସଂସ୍ଥା YouTube ଏବଂ Meta ସହିତ ହାତ ମିଳାଉଛି। ଏହି ଦୁଇଟିଯାକ ପ୍ଲାଟଫର୍ମ ସେମାନଙ୍କର କ୍ରିଏଟର ସମ୍ପ୍ରଦାୟକୁ ଏକାଠି କରିବାରେ ଏବଂ ନିଜ ନିଜ ନେଟୱର୍କ ମାଧ୍ୟମରେ ଏହି ଚ୍ୟାଲେଞ୍ଜର ପହଞ୍ଚକୁ ସାରା ଦେଶରେ ବିସ୍ତାର କରିବାରେ ସାହାଯ୍ୟ କରିବେ।

ପୁରସ୍କାର ଏବଂ ମାନ୍ୟତା :

ଉଲ୍ଲେଖନୀୟ ପ୍ରତିଭାକୁ ସମ୍ମାନିତ କରିବା ପାଇଁ, ଏହି କାର୍ଯ୍ୟକ୍ରମ ଅଧୀନରେ ଜିଲ୍ଲା, ରାଜ୍ୟ ଏବଂ ଜାତୀୟ ସ୍ତରରେ ସମ୍ମାନଜନକ ପୁରସ୍କାର ପ୍ରଦାନ କରାଯିବ:

• ଜିଲ୍ଲା ସ୍ତର: ପ୍ରତ୍ୟେକ ଜିଲ୍ଲାରେ ସର୍ବାଧିକ ୨୦ ଜଣଙ୍କୁ ୫୦,୦୦୦ ଟଙ୍କା ଲେଖାଏଁ ପୁରସ୍କାର ପ୍ରଦାନ କରାଯିବ।

• ରାଜ୍ୟ ସ୍ତର: ପ୍ରତ୍ୟେକ ଜିଲ୍ଲାରୁ ଜଣେ ପ୍ରତିଭାବାନ କ୍ରିଏଟରଙ୍କୁ ୨ ଲକ୍ଷ ଟଙ୍କାର ରାଜ୍ୟସ୍ତରୀୟ ପୁରସ୍କାର ପାଇଁ ମନୋନୀତ କରାଯିବ।

• ଜାତୀୟ ସ୍ତର: ପରବର୍ତ୍ତୀ ସମୟରେ ହେବାକୁ ଥିବା ଜାତୀୟସ୍ତରୀୟ ଶୁଭାରମ୍ଭ ସମୟରେ, ମନୋନୀତ ରାଜ୍ୟସ୍ତରୀୟ ପ୍ରବେଶିକାଗୁଡ଼ିକୁ ୫ ଲକ୍ଷ ଟଙ୍କା ଲେଖାଏଁ ଜାତୀୟ ପୁରସ୍କାର ପ୍ରଦାନ କରାଯିବ।

ନିରପେକ୍ଷ ମୂଲ୍ୟାଙ୍କନ ନିଶ୍ଚିତ କରିବା ପାଇଁ, ସମ୍ପୃକ୍ତ ପ୍ରଶାସନ ଦ୍ୱାରା ଜିଲ୍ଲା ଏବଂ ରାଜ୍ୟ ସ୍ତରୀୟ ବିଚାରକ କମିଟି ଗଠନ କରାଯିବ। ଏହି କମିଟିଗୁଡ଼ିକରେ ସଂସ୍କୃତି, ଐତିହ୍ୟ, ପର୍ଯ୍ୟଟନ, ଗଣମାଧ୍ୟମ ଏବଂ ଶିକ୍ଷା କ୍ଷେତ୍ରର ବିଶିଷ୍ଟ ବ୍ୟକ୍ତିବିଶେଷ ସାମିଲ ହେବେ। 

ଭବିଷ୍ୟତରେ ଦେଶବ୍ୟାପୀ ଶୁଭାରମ୍ଭ: ଏହି ପାଇଲଟ୍ ପର୍ଯ୍ୟାୟରୁ ମିଳିଥିବା ଅଭିଜ୍ଞତା ଏବଂ ଦୃଷ୍ଟିକୋଣକୁ ଆଧାର କରି, 'ଜେମ୍ସ ଅଫ୍ ଇଣ୍ଡିଆ' ଚ୍ୟାଲେଞ୍ଜକୁ ପରବର୍ତ୍ତୀ ସମୟରେ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ବିସ୍ତାର କରାଯିବ। ଭାରତର ପ୍ରତ୍ୟେକ ଜିଲ୍ଲାର ସ୍ୱତନ୍ତ୍ର ପରିଚୟ ଏବଂ ଐତିହ୍ୟକୁ ପାଳନ କରୁଥିବା ଡିଜିଟାଲ୍ ସ୍ରଷ୍ଟାମାନଙ୍କର ଏକ ସକ୍ରିୟ ଓ ଦେଶବ୍ୟାପୀ ଇକୋସିଷ୍ଟମ୍ ପ୍ରତିଷ୍ଠା କରିବା ଏହାର ଚୂଡ଼ାନ୍ତ ଲକ୍ଷ୍ୟ।

***

TKM