ভাৰতৰ সৃজনশীল খণ্ডক শক্তিশালী কৰা আৰু সম্ভাৱনাপূৰ্ণ অৰেঞ্জ ইক'নমিক প্ৰচাৰ কৰাৰ লক্ষ্যৰে চৰকাৰে চলাই থকা প্ৰচেষ্টাৰ অংশ হিচাপে, তথ্য আৰু সম্প্ৰচাৰ মন্ত্ৰালয়ে সমগ্ৰ দেশৰ তৃণমূল পৰ্যায়ৰ ডিজিটেল ক্ৰিয়েটৰসকলক চিনাক্ত কৰা, যত্ন লোৱা আৰু তেওঁলোকক প্ৰচাৰ কৰাৰ বাবে 'জেমছ অৱ ইণ্ডিয়া' চেলেঞ্জৰ পাইলট পৰ্যায় মুকলি কৰিছে।

মাননীয় প্ৰধানমন্ত্ৰীৰ দূৰদৰ্শী নেতৃত্বত ভাৰতে প্ৰযুক্তিবিদ্যাক সৱলীকৰণ, অন্তৰ্ভুক্তি আৰু ৰাষ্ট্ৰ নিৰ্মাণৰ এক শক্তিশালী মাধ্যম হিচাপে গ্ৰহণ কৰিছে। ডিজিটেল ইণ্ডিয়াৰ দৰে পদক্ষেপে প্ৰযুক্তিৰ ব্যৱহাৰ সহজলভ্য কৰি তুলিছে আৰু অভূতপূৰ্ব পৰিসৰত উদ্ভাৱনৰ সুযোগ সৃষ্টি কৰিছে।

তথ্য আৰু সম্প্ৰচাৰ মন্ত্ৰী শ্ৰী অশ্বিনী বৈষ্ণৱে নাগৰিকসকলক নিজা সমল সৃষ্টি, আপলোড আৰু শ্বেয়াৰ কৰিবলৈ মুকলি কৰা WAVES OTTৰ অধীনস্থ নাগৰিক ক্ৰিয়েটৰ প্লেটফৰ্ম মাইৱেভছৰ ওপৰত ভিত্তি কৰি এই উদ্যোগটো গঢ়ি তোলা হৈছে। ব্যৱহাৰকাৰীসকলে প্ৰস্তুত কৰা সমলক উৎসাহিত কৰা আৰু ভাৰতৰ সমৃদ্ধ সাংস্কৃতিক বৈচিত্ৰ্য প্ৰদৰ্শনৰ এক প্লেটফৰ্ম হিচাপে পৰিকল্পনা কৰা মাইৱেভছে এতিয়া জেমছ অৱ ইণ্ডিয়া চেলেঞ্জৰ ভেটি প্ৰদান কৰিছে, যিয়ে ক্ৰিয়েটৰসকলক সঁচা ডিজিটেল গল্পকথনৰ জৰিয়তে নিজ নিজ জিলাৰ অনন্য কাহিনীবোৰ বৰ্ণনা কৰিবলৈ আমন্ত্ৰণ জনাইছে।

তথ্য আৰু সম্প্ৰচাৰ মন্ত্ৰালয়ৰ সচিব শ্ৰী চঞ্চল কুমাৰে কয়, "ভাৰতৰ প্ৰতিখন জিলাৰে একোটা কাহিনী আছে আৰু জেমছ অৱ ইণ্ডিয়াই আমাৰ ক্ৰিয়েটৰসকলক সেয়া প্ৰকাশ কৰাৰ এটা প্লেটফৰ্ম প্ৰদান কৰে। ই যিমান আমাৰ যুৱপ্ৰজন্মৰ সৃজনশীলতাৰ উৎসৱ, সিমানেই আমাৰ জিলাসমূহৰ অসাধাৰণ বৈচিত্ৰ্যৰো উৎসৱ।"

এই চেলেঞ্জৰ উদ্দেশ্য হৈছে ক্ৰিয়েটৰসকলক প্ৰামাণিক ডিজিটেল কাহিনী কোৱাৰ জৰিয়তে নিজ নিজ জিলাৰ সংস্কৃতি, ঐতিহ্য, পৰ্যটন, পৰম্পৰা, ইতিহাস আৰু বিশিষ্ট সাফল্যসমূহ প্ৰদৰ্শন কৰিবলৈ উৎসাহিত কৰা আৰু ভাৰতৰ প্ৰতিখন জিলাৰ অনন্য পৰিচয়ক উদযাপন কৰা।

অংশগ্ৰহণৰ নিয়ম: এই চেলেঞ্জত অংশগ্ৰহণ কৰিবলৈ, ক্ৰিয়েটৰসকলে WAVES OTT প্লেটফৰ্মৰ MyWAVES বিভাগৰ জৰিয়তে ১ ৰ পৰা ৩ মিনিট দৈৰ্ঘ্যৰ ভিডিঅ' জমা দিব পাৰিব। পাইলট পৰ্যায়ৰ বাবে আবেদন প্ৰক্ৰিয়া ২০২৬ চনৰ ১ আগষ্টৰ পৰা মুকলি হ'ব আৰু ২০২৬ চনৰ ৩১ আগষ্টলৈকে খোলা থাকিব।

পাইলট পৰ্যায়ৰ সামৰণি আৰু অংশগ্ৰহণঃ পাইলট পৰ্যায়টো আন্দামান আৰু নিকোবৰ দ্বীপপুঞ্জ, অৰুণাচল প্ৰদেশ, চণ্ডীগড়, দাদৰা আৰু নগৰ হাভেলী আৰু দমন আৰু দিউ, গোৱা আৰু লাডাখত মুকলি কৰা হৈছে। এই পৰ্যায়টো প্ৰসাৰ ভাৰতী, মাই ভাৰত আৰু সংশ্লিষ্ট ৰাজ্য তথা জিলা প্ৰশাসনৰ এক যৌথ প্ৰচেষ্টা। ক্ৰিয়েটৰসকলক একত্ৰিত কৰা আৰু সমল বিকাশৰ সুবিধাৰ বাবে স্থানীয় সাংস্কৃতিক আৰু শিক্ষা প্ৰতিষ্ঠানসমূহকো সক্ৰিয়ভাৱে জৰিত কৰা হ'ব।

এই উদ্যোগটোক আৰু অধিক সম্প্ৰসাৰিত কৰিবলৈ মন্ত্ৰালয়ে উদ্যোগ জগতৰ প্ৰধান প্ৰতিষ্ঠান ইউটিউব আৰু মেটাৰ সৈতে সহযোগিতা কৰিছে। দুয়োটা প্লেটফৰ্মেই নিজৰ ক্ৰিয়েটৰ সমুদায়ক একত্ৰিত কৰাত সহায় কৰিব আৰু নিজৰ নেটৱৰ্কৰ জৰিয়তে এই চেলেঞ্জৰ প্ৰসাৰ বৃদ্ধি কৰিব।

পুৰস্কাৰ আৰু স্বীকৃতি: অসাধাৰণ প্ৰতিভাক সন্মান জনাবলৈ, এই কাৰ্যসূচীয়ে জিলা, ৰাজ্য আৰু ৰাষ্ট্ৰীয় পৰ্যায়ত সন্মানীয় পুৰস্কাৰ প্ৰদান কৰিব:

জিলা পৰ্যায়: প্ৰতিখন জিলাত ৫০,০০০ টকাকৈ সৰ্বোচ্চ ২০টা পুৰস্কাৰ থাকিব।

ৰাজ্যিক পৰ্যায়: প্ৰতিখন জিলাৰ পৰা এজনকৈ অসাধাৰণ ক্ৰিয়েটৰক ২ লাখ টকাৰ ৰাজ্যিক পৰ্যায়ৰ পুৰস্কাৰৰ বাবে নিৰ্বাচিত কৰা হ'ব।

ৰাষ্ট্ৰীয় পৰ্যায়: পৰৱৰ্তী ৰাষ্ট্ৰীয় পৰ্যায়ৰ কাৰ্যসূচীত, নিৰ্বাচিত ৰাজ্যিক প্ৰৱেশৰ বাবে প্ৰতিটোলৈ ৫ লাখ টকাৰ ৰাষ্ট্ৰীয় পুৰস্কাৰ।

নিৰপেক্ষ মূল্যায়ন নিশ্চিত কৰিবলৈ সংশ্লিষ্ট প্ৰশাসনে জিলা আৰু ৰাজ্যিক জুৰী কমিটী গঠন কৰিব। এই পেনেলসমূহত সংস্কৃতি, ঐতিহ্য, পৰ্যটন, সংবাদ মাধ্যম আৰু শিক্ষা খণ্ডৰ বিশিষ্ট ব্যক্তি সকল অন্তৰ্ভুক্ত হ'ব।

ভাৰতজুৰি পৰৱৰ্তী সম্প্ৰসাৰণঃ এই পাইলট পৰ্যায়ত লাভ কৰা অভিজ্ঞতা আৰু ধাৰণাৰ ওপৰত ভিত্তি কৰি জেমছ অৱ ইণ্ডিয়া চেলেঞ্জ পৰৱৰ্তী সময়ত সকলো ৰাজ্য আৰু কেন্দ্ৰীয় শাসিত অঞ্চললৈ সম্প্ৰসাৰিত কৰা হ'ব। ইয়াৰ চূড়ান্ত লক্ষ্য হৈছে ডিজিটেল ক্ৰিয়েটৰসকলৰ এক সক্ৰিয় দেশজোৰা পৰিৱেশ গঢ়ি তোলা, যিয়ে ভাৰতৰ প্ৰতিখন জিলাৰ অনন্য পৰিচয় আৰু ঐতিহ্যক উদযাপন কৰে।

*****

Mahesh Kumar/Vivek Vishwash/Aparajita Priyadarshini/DB