ڈینگو کی روک تھام اور  اس کےکنٹرول کے لیے ہندوستان کی کوششوں کو مضبوط کرنے کی سمت میں ایک اہم قدم اٹھاتے ہوئے ، صحت اور خاندانی بہبود کی وزارت کے تحت سنٹرل ڈرگس اسٹینڈرڈ کنٹرول آرگنائزیشن (سی ڈی ایس سی او) نے ڈینگو ٹیٹرا ویلینٹ ویکسین (لائیو ، اٹینیوٹڈ)-کڈینگا ® کے لیے مارکیٹنگ کی اجازت دے دی ہے ، جسے ٹیکڈا جی ایم بی ایچ ، جرمنی نے تیار کیا ہے اور اسے میسرز ٹیکڈا بائیوفرماسیوٹیکلز انڈیا پرائیویٹ لمیٹڈ کے ذریعے درآمد کیا جائے گا ۔  ڈینگو کی بیماری کی روک تھام کے لیے ملک میں منظور شدہ یہ پہلی ڈینگو ویکسین ہے۔

یہ منظوری ڈرگس اینڈ کاسمیٹکس ایکٹ 1940 اور ڈرگس رولز 1945 کی دفعات کے مطابق ویکسین کے معیار ، حفاظت اور افادیت کے جامع سائنسی جائزے کے بعد دی گئی ہے ۔

کیوڈینگا® ایک لائیو ، کمزور ٹیٹرا ویلینٹ ڈینگو ویکسین ہے جسے ریکومبیننٹ ڈی این اے ٹیکنالوجی کا استعمال کرتے ہوئے تیار کیا گیا ہے ۔  یہ ویکسین ویرو سلیز میں تیار کی جاتی ہے ، جس میں ڈینگو وائرس ٹائپ-2  بیک گون  میں انجینئر شدہ جینز کوڈنگ سیرٹائپ مخصوص سطح کے پروٹین ہوتے ہیں ۔  پروڈکٹ میں جینیاتی طور پر تبدیل شدہ حیاتیات(جی ایم اوز) شامل ہیں۔یہ منجمد خشک پاؤڈر کی شکل میں فراہم کی جاتی ہے، جسے استعمال سے پہلے محلول میں حل کیا جاتا ہے اور جلد کے نیچے  انجیکشن کے ذریعے لگایا جاتا ہے۔

یہ ویکسین 4 سے 60 سال عمر کے افراد میں ڈینگو بیماری سے بچاؤ کے لیے تجویز کی گئی ہے۔ اس کے حفاظتی ٹیکہ کاری کے شیڈول کے مطابق 0.5 ملی لیٹر کی دو خوراکیں دی جاتی ہیں، جن کے درمیان تین ماہ کا وقفہ ہوتا ہے (یعنی صفر اور تین ماہ پر)۔

اس ویکسین کی منظوری ایک جامع عالمی کلینیکل ترقیاتی پروگرام سے حاصل ہونے والے شواہد کی بنیاد پر دی گئی ہے، جس میں ڈینگو سے متاثرہ اور غیر متاثرہ دونوں طرح کے خطوں میں اس کی حفاظت، مدافعتی ردِعمل پیدا کرنے کی صلاحیت  اور موثریت کا جائزہ لیا گیا۔ کلینیکل مطالعات آٹھ سے زائد ممالک کے شرکاء پر کیے گئے، جن میں برازیل، تھائی لینڈ اور سری لنکا شامل ہیں۔ اس جائزے میں بھارتی آبادی پر کی گئی ایک اہم فیز III تحقیق بھی شامل تھی، جس میں 4 سے 60 سال عمر کے افراد میں ویکسین کی حفاظت اور مدافعتی صلاحیت کا جائزہ لیا گیا۔

اس ویکسین کو پہلے ہی 42 ممالک میں انضباطی منظوری مل چکی ہے، جن میں یورپی یونین، برطانیہ، سوئٹزرلینڈ، انڈونیشیا، ملائیشیا اور تھائی لینڈ شامل ہیں۔ اس کے علاوہ، اسے عالمی ادارۂ صحت کی پری کوالیفیکیشن بھی حاصل ہے۔ دنیا بھر میں اب تک اس ویکسین کی 2 کروڑ 40 لاکھ سے زائد خوراکیں تقسیم کی جا چکی ہیں۔ جن ممالک میں یہ ویکسین استعمال ہو رہی ہے وہاں سے حاصل ہونے والے مارکیٹ کے بعد نگرانی  کے اعداد و شمار سے معلوم ہوا ہے کہ اس کا حفاظتی پروفائل اطمینان بخش ہے اور اب تک اس سے متعلق کوئی نمایاں حفاظتی خدشہ سامنے نہیں آیا ہے۔

ملک کی پہلی ڈینگو ویکسین کی منظوری ڈینگو کے خلاف ہندوستان کے صحت عامہ کے ردعمل میں ایک اہم سنگ میل کی نشاندہی کرتی ہے اور توقع ہے کہ یہ نیشنل ویکٹر بورن ڈیزیز کنٹرول پروگرام کے تحت جاری ویکٹر کنٹرول ، نگرانی ، ابتدائی تشخیص اور کیس مینجمنٹ کے اقدامات کی تکمیل کرے گی ۔

صحت اور خاندانی بہبود کی وزارت ایک مضبوط اور سائنس پر مبنی انضباطی فریم ورک کے ذریعے محفوظ ، موثر اور معیاری یقین دہانی والی ویکسین اور ادویات تک بروقت رسائی کو یقینی بنانے کے لیے پرعزم ہے ۔

********

ش ح۔ع ح   ۔رض

U-215