ભારતના રાષ્ટ્રપતિ શ્રીમતી દ્રૌપદી મુર્મુએ આજે ગંગટોક ખાતે સિક્કિમ પોલીસને 'પ્રેસિડેન્ટ ઓફ ઇન્ડિયાઝ પોલીસ કલર' (President of India’s Police Colour) એનાયત કર્યો હતો.

આ પ્રસંગે બોલતા, રાષ્ટ્રપતિએ સિક્કિમ પોલીસ સાથે ભૂતકાળ અને વર્તમાનમાં જોડાયેલા તમામ અધિકારીઓ અને પોલીસ કર્મચારીઓને આ સન્માન માટે અભિનંદન પાઠવ્યા હતા. તેમણે એ નોંધતા આનંદ વ્યક્ત કર્યો હતો કે 1897માં તેની સ્થાપના થઈ ત્યારથી, આ દળે સિક્કિમમાં શાંતિ, સુરક્ષા અને ન્યાય સુનિશ્ચિત કરવા માટે કામ કર્યું છે.

રાષ્ટ્રપતિએ જણાવ્યું હતું કે ભારતની પોલીસ વ્યવસ્થા પર લાંબા સમયના સંસ્થાનવાદી શાસનની છાપ છે. સંસ્થાનવાદી ગુલામીના યુગ દરમિયાન, પોલીસનો પ્રાથમિક ઉદ્દેશ્ય જનતાની સેવા કરવાનો નહોતો પરંતુ તેમના પર નિયંત્રણ રાખવાનો અને સત્તાધારી શાસનના આદેશોનો સખત અમલ કરાવવાનો હતો. પરિણામે, પોલીસ વ્યવસ્થામાં સંસ્થાનવાદી માનસિકતા ઘર કરી ગઈ. આ માનસિકતા હેઠળ, પોલીસમાં પ્રચલિત વલણ જનતાને સહકાર આપવાને બદલે તેમના પર શાસન કરવાનું હતું. આ માનસિકતા હવે બદલાઈ રહી છે. તેમણે ભારપૂર્વક જણાવ્યું હતું કે દેશના નાગરિકોને સશક્ત બનાવવા માટે, આ સંસ્થાનવાદી દ્રષ્ટિકોણને સંપૂર્ણપણે છોડી દેવો આવશ્યક છે. તો જ નાગરિકો વિકસિત ભારતના લક્ષ્યને પ્રાપ્ત કરવામાં પૂરા દિલથી યોગદાન આપી શકશે.

રાષ્ટ્રપતિએ રેખાંકિત કર્યું હતું કે પોલીસ વ્યવસ્થામાં પારદર્શિતા અને જવાબદારી તદ્દન અનિવાર્ય છે. તેમણે જણાવ્યું હતું કે પોલીસ તંત્રને વધુ નાગરિક-મૈત્રીપૂર્ણ બનાવવું જોઈએ જેથી સામાન્ય લોકો કોઈપણ ડર વિના પોતાની ફરિયાદો નોંધાવી શકે. મહિલાઓ, બાળકો અને સમાજના નબળા વર્ગો પ્રત્યે સંવેદનશીલ અભિગમ અપનાવવાને પણ અગ્રતા આપવી જોઈએ.

રાષ્ટ્રપતિએ જણાવ્યું હતું કે પોલીસે નાગરિકો માટે ભાગીદાર અને માર્ગદર્શક તરીકે વિકસિત થવું જોઈએ. આ સહયોગી ભૂમિકાને અપનાવવાથી જનતા અને પોલીસ વચ્ચેનો વિશ્વાસ મજબૂત થશે. જ્યારે પોલીસ લોકોની સમસ્યાઓને સમજશે અને મદદનો હાથ લંબાવશે, ત્યારે તે સાથે જ સમાજમાં સુરક્ષાની ભાવના વધારશે અને કાયદાના શાસન પ્રત્યે આદરને વધુ ઊંડો કરશે. તેમણે ભારપૂર્વક જણાવ્યું હતું કે પોલીસ વ્યવસ્થાનો ઉદ્દેશ્ય માત્ર ગુનેગારોને પકડવા પૂરતો મર્યાદિત ન હોવો જોઈએ, પરંતુ તેનો વિસ્તાર એક સુરક્ષિત અને સામાજિક રીતે સભાન સમાજના નિર્માણ સુધી હોવો જોઈએ.

રાષ્ટ્રપતિએ એ નોંધતા આનંદ વ્યક્ત કર્યો હતો કે સિક્કિમ પોલીસે સિક્કિમમાં શાંતિ અને સંવાદિતા જાળવવામાં મહત્વપૂર્ણ યોગદાન આપ્યું છે. તેમના વ્યાવસાયિક આચરણ અને નાગરિકો પ્રત્યેના મૈત્રીપૂર્ણ વ્યવહાર દ્વારા, તેણે સિક્કિમના લોકોનો સ્નેહ અને આદર મેળવ્યો છે.

રાષ્ટ્રપતિનું ભાષણ જોવા માટે કૃપા કરીને અહીં ક્લિક કરો-

SM/IJ/GP/JT