કેન્દ્રીય ગૃહ અને સહકારિતા મંત્રી શ્રી અમિત શાહે ભારત-પાકિસ્તાન સરહદ (IPB) ને અડીને આવેલા સરહદી જિલ્લાઓ સંબંધિત સુરક્ષાના મુદ્દાઓની વ્યાપક સમીક્ષા કરવા માટે રાજસ્થાનના બીકાનેરમાં એક ઉચ્ચ સ્તરીય સુરક્ષા સમીક્ષા બેઠકની અધ્યક્ષતા કરી હતી. આ બેઠકમાં રાજસ્થાનના મુખ્યમંત્રી, રાજ્ય સરકારના વરિષ્ઠ અધિકારીઓ તેમજ 5 સરહદી જિલ્લાઓ - બીકાનેર, જેસલમેર, બાડમેર, શ્રી ગંગાનગર, ફલોદીના જિલ્લા મેજિસ્ટ્રેટ અને પોલીસ અધિક્ષકો (SP) ઉપસ્થિત રહ્યા હતા. આ બેઠકમાં રાજ્ય સરકારના ઉત્તમ સંકલન સાથે ઉન્નત અને વ્યાપક સરહદ વ્યવસ્થાપન પર ધ્યાન કેન્દ્રિત કરવામાં આવ્યું હતું.

બેઠક દરમિયાન, દરેક સરહદી જિલ્લા માટે 360-ડિગ્રી સુરક્ષા માળખું તૈયાર કરવાનો નિર્ણય લેવામાં આવ્યો હતો. આ સંકલિત અભિગમમાં સ્થાનિક નાગરિકો, રાજ્ય સરકારના તંત્ર અને તમામ સંબંધિત સુરક્ષા એજન્સીઓને સક્રિયપણે સામેલ કરવામાં આવશે જેથી વ્યાપક અને મજબૂત સરહદ વ્યવસ્થાપન સુનિશ્ચિત કરી શકાય.

કેન્દ્રીય ગૃહ મંત્રી શ્રી અમિત શાહે ગેરકાયદેસર બાંધકામો, ખાસ કરીને આંતરરાષ્ટ્રીય સરહદથી 0 થી 15 કિલોમીટરની અંદર, સામે ઝીરો-ટોલરન્સ નીતિના કડક અમલીકરણની જરૂરિયાત પર ભાર મૂક્યો હતો. તેમણે સંબંધિત સત્તાવાળાઓને આવા તમામ અનધિકૃત બાંધકામો તોડી પાડવાનો નિર્દેશ આપ્યો હતો.

શ્રી અમિત શાહે ઘૂસણખોરી, માદક પદાર્થોની તસ્કરી, અતિક્રમણ, આતંકવાદી ભંડોળ અને અન્ય સરહદ પારના ગુનાઓને અસરકારક રીતે પહોંચી વળવા માટે બોર્ડર સિક્યુરિટી ફોર્સ (BSF), સેન્ટ્રલ બોર્ડ ઓફ ડાયરેક્ટ ટેક્સીસ (CBDT), નાર્કોટિક્સ કંટ્રોલ બ્યુરો (NCB) અને રાજ્ય સરકારના તંત્રને સામેલ કરતી સંકલિત સરહદ વ્યવસ્થાપન વ્યૂહરચના પર ભાર મૂક્યો હતો.

ગૃહ મંત્રીએ જિલ્લા મેજિસ્ટ્રેટોને વધુ ઉન્નત જવાબદારીઓ સંભાળવા નિર્દેશ આપ્યો હતો, જેમાં તમામ બેંકો દ્વારા સંપૂર્ણ કાનૂની અને નાણાકીય પાલનની ખાતરી કરવી, મોટા વ્યાપારી પ્રતિષ્ઠાનોની ચકાસણી, તેમના ભંડોળના સ્ત્રોતોની તપાસ, મ્યુલ એકાઉન્ટ્સ અને શેલ (નકલી) કંપનીઓ પર નજર રાખવા, નકલી આધાર કાર્ડની ઓળખ કરવા અને તસ્કરી અટકાવવાનો સમાવેશ થાય છે.

કેન્દ્રીય ગૃહ મંત્રી શ્રી અમિત શાહે સાયબર ગુનાઓના ત્વરિત નિવારણ માટે ‘1930’ કોલ સેન્ટરનો અસરકારક ઉપયોગ કરવા અને આ પ્રદેશમાં કાયદાના અમલીકરણ તેમજ ન્યાયિક પ્રક્રિયાઓને મજબૂત કરવા માટે ત્રણ નવા ફોજદારી કાયદાઓનો સંપૂર્ણ અમલ કરવા સૂચના આપી હતી.

બેઠક દરમિયાન, છેવાડાના શાસનને મજબૂત કરવા, આર્થિક ગુનાઓને રોકવા, માળખાકીય ખામીઓ પૂરી કરવા અને સરહદી વસ્તીને ટેકો આપવા માટે વાઇબ્રન્ટ વિલેજ પ્રોગ્રામ-II (VVP-II) ના સફળ અમલીકરણ પર ભાર મૂકવામાં આવ્યો હતો. સરહદી ગામોમાં તમામ સરકારી યોજનાઓની 100% સંતૃપ્તિ (સંપૂર્ણ ઉપલબ્ધતા) લાવવાનો પુર્નોચ્ચાર કરવામાં આવ્યો હતો.

આ બેઠકમાં એ વાત પર ભાર મૂકવામાં આવ્યો કે પ્રધાનમંત્રી શ્રી નરેન્દ્ર મોદીના નેતૃત્વ હેઠળ, ભારત સરકાર આંતરરાષ્ટ્રીય સરહદો પર સુરક્ષાના ઉચ્ચતમ ધોરણો સુનિશ્ચિત કરવા માટે પ્રતિબદ્ધ છે, સાથે સાથે સરહદી વિસ્તારોના સર્વાંગી વિકાસ અને સલામતી માટે કેન્દ્ર અને રાજ્ય એજન્સીઓ વચ્ચે ગાઢ તાલમેલને પ્રોત્સાહન આપે છે.

SM/BS/JD